Genesis 40

1Uda, sun yuma dakuramipane, amenda taruda, Mesir mutu ila nimi deiyo ngebo, er me jen mau talena deiyo ngebo cap, er roti jen keca dana deiyo ngebo cap, sun butene di mali kupreipa, Mesir mutu taleamu ngebodi sun tep derepu. 2Ada Firaundi er pel don neng butene, er me jen mau talena deiyo ngebo cap, er jen keca dana deiyo ngebo cap tep, tulum kupu.

3Tulum kupka cadi, erdi peipupa, abutene neng sun wenemna tep, wenemna ati jen talena neng, sun deiyo ngebo ati dongopupa, erdi sun butene tep kalengamu. Akatida, ada Yusup dongorami wenemna ati pua. 4Wenemna ati jen talena neng sun deiyo di, abutene neng dopra, ‘Yusupdi kalekra melimkamre’ tenen, er amutara deipu. Deipupa, sunda akatipu ue denge weik kuramrei.

5Sun dakuramreipane, Mesir mutu taleamu deiyo ngebo, er jen me mau talena deiyo ngebo cap, er jene dana deiyo ngebo cap, sun yuk-yuk dinin, sun butene ken deiki mapmarei. Sun butene alukundapu ken mapmarei dinin, sun yuk-yuk ken deiki epmarei kecada, deiyo yuk-yuk kupu. 6Sun mapmareipa berekyopda, Yusupdi sun damai yan epetepudi, sun ikin kange doupmareipa, epra kael kepu.

7Kael kepka cadi, Yusupdi Firaun er amutara pel doramrei neng dinin, sun cap, er cap, awenemna ati tenpu neitamai di kunmarei neng tep asipetepmau. “Atumi sunda, ware keca deiyo tep mali kange doupra kurerum do?” pepra asipetepu. 8Asipetepupa, sundi, “Gume, nun buteneda, ken mapmanem dinin, ken deiki di epmanem keca, ‘Deiyo aca’ tenen, lap pepsetu ngebo men kurura cadi, nun ikin kange doupra kunmaneme,” peprei. Upepreipa, Yusupdi ka tamupra sun tep upepu. “Ken deiki mapmepepa, dinup keca lap pena peserur deiyo ngeboda, Allah erpu kurure. Angeda men kael keprerum do? Atep nengeda, sun ken deiki epmarerum kecada, lape pepnereso,” pepu.

9Upepka cadi, Mesir mutu taleamu ngebo, er me jen mau talena deiyo ngebodi, er ken mapmaudi epmau keca, lap pepudi upepu. “Ne ken mapmanua deiki di, anggur du mouramre tapu ne urasin tara kupmaupa, epmanu. 10Atapuda, teru weneri kupmaua deiki di, gapu paku di, kait popmau. Kait popmauanen, amendada anggur du moupu.

11Moupupa, Firaun er me jen mau talenmanua cadi, anggur tapu puruprapmanupa, er me jen mau dingdongonmanudi, er Firaun tep karepmanupa, doupmau,” pepu. 12Upepmaupa, Yusupdi upepu. “Uda, apepmanerem upu er nong neitamai ngeda, lap pepkune. Ada teru weneri epmaumada, ada tumi weneri.

13Tumi weneri ton cap konum kupyopda, Firaundi kan tep, kange di ton cap ereipkeredi, kandi men di domum pelpu karepkerepa, er me jen mau talena deiyo ngebo kupmemdi, Firaun tep er jen mau karenkamrume. 14Dinino, apepmakentopu, ange yuma telep kupkeryopda, ne tep tupa tenenkamnereme. Ada bicau tenepnememdi, Firaun tep ne si ton peipkamreme. Ne si pepnerempa, Firaundi kange di ton cap tenepneryopda, loptapnerepa, awenemna ati tapra talipu kuptene.

15Angeda, tali men pepkene. Pumun taruda, Ibrani nesala kurameng mutu neitamai di, dalupra puto di dopropneidi dubeneipa, awenemna ati dongopnei. Tonda, amutu neitamai kuramsi taru yumada, mali pio men kupsi dinin, deiyo men kapupapu, awenemna ati dongopnei. Atep ne men lupronkamnerume,” Yusupdi me jen mau talena deiyo ngebo tep upepu.

16Upepupa, Mesir mutu taleamu deiyo ngebo, er jene dana deiyo ngebo gekepudi, ‘E, aken mapmaua deiki epmau keca tep, telep upupu penmare,’ tenepudi, Yusup tep pepu. “Ne ton ken mapmanu deiki epmanu keca pepkukene. Ada, ne giso deiki kau weneri kupmau. Akau pumbonda, roti jen keca dapmanunge kupmau. 17Ukupra kupmau dinin, deiki tara kupmau kau pumbonda, Firaun er tep roti jen keca yala-yala weik kipra deipmanu dinin, sun mada, tali upula jeryanmangue,” pepu.

18Upepupa, Yusupdi upepu. “Kan ken mapmaumdi, epmaum keca deiyo neitamai ngeda lape pepkukene. Kau weneri kupmauada, ada tumi weneri. 19Atep tumi weneri konum kupyopda, Firaundi dopropkeredi, kum ya sektapkeredi, kan nongda co deiki koupra kapdongopkamkere. Co deiki deipkerepa, tali ma yangedi kan nong tu yuma jepropkamkenge,” pepra lap pepu.

20Yusupdi aupu yuma lap pepmaupa, sun dakunmaipane, tumi weneri ton konum kupupa, Firaun er deiprei tumi kupu. Kupupa, Firaundi er amutara pel dorami nesala yuma tep, ila kalemna karepu. Kalemna kalepra jene jenmai taru neitamaida, er pel doramrei neng butene tep, upu peipupa duyai. Er amutara pel dorami nesala gekenmaiyapu, aneng butene tep upu bokra deipu.

21Er me jen mau talena deiyo ngebo tep, kange di ereipudi, er pel tamupra karepupa, angebodi ton cap Firaun er me jen mau talena deiyo ngebo pel dopbaramu. 22Dinino, er jen keca dana deiyo ngebo tep nengeda, kum sektapudi, co deiki dapdongopu. Ada Yusupdi, “Sun ken mapmarerumdi, epmarerum kecada deiyo aca. Ukupkamser, ukupkamser,” pepmemeu utopu kupu.

23Yusupdi peiputopu Firaundi kupu dinino, Firaun er me jen mau talena deiyo ngebodi Yusup tep pio lupropu. Kange di ton cap men teneramu.