Genesis 41

1– 2Uda, sun yuma dakuramipane, Firaun ton ken mapu. Erdi ken mapka deiki epu kecada ake. Amutu neitamai ila embaramu me, Nil me damai tekmaupa, ame pumbon dadi sapi bisam yoneitam bari welepmaidi, amelman bisi paramu keca neitamai jenmai. Sun nongda ila weik, sun urasin cap, sun potong capda, pio telep kupmai.

3Sun jen jenmaipane amendada, sapi bisam yoneitam bari ton welepmai. Asapida, bol pio mali dounmaidi, sun potongda malipu kunmai. Sun bol mali sapidi, nong weik sapi mening dam, melman bisi jen jenmangaipu tengyai. 4Sun bol mali dounmai sapi bisamdi, nong weik urasin telep sapi bisam tep popra jepropi. Jepropipa, Firaun er ken mapmaua neitamai bukrou.

5Bukrou dinin, udungnapu kupmaua cadi, kange di ton cap mapmaudi, ken deiki ton epmau kecada ake. Tenpu jagung ▼

▼‘Jagung’ pepra sekmupkada, pumun taru ‘gandum’ seki dinin, akecada nun mutu nesala men kael keamya tep, ‘jagung’ sekmupke.

tekmaua, er jagung du yoneitam bari pio telepnge kupu. 6Ajagung yoneitam bari telepnge akunmaupane, amenda taru adeiyo tenpu deiki dinin, jagung du yoneitam bari ton cap moupmau. Moupmaupa, katuai kupupa, keteng yakan tara di ila bupu kumanya pungmaupa, gelal sepropupa, ajagung du mali kupu. 7Mali kupupa, sun yoneitam bari malinge di, yoneitam bari nong telepnge tep jepkwetepupa, gum kupu. Jepkwetepu pangeda, Firaun er ken mapmaua neitamai di bukrou.

8Berekyopda Firaundi, ‘Uo, angeda ware keca deiyo tep do?’ tenen, mambul kange dounmaudi, er mutu Mesir mutu kurami neng, ila kael neng cap, kunupsek pen pel utopu pel dorami neng cap tep upupupa, er damai yai. Yai pangeda, Firaun ken deiki mapmaudi epmau keca, yuma lap penmaupane, anesala kan-kan di tenpu ngebo peda, ‘Deiyo aca’ tenen, men lap pepmanto kurami. 9Mesumpu kuramipa, Firaun er me jen mau talena deiyo ngebodi upepu.

Uo, atumi ne mali kupsi ngeda ukupu tenepne. 10Orketeng tamun neitamaida, kandi ne cap, kan jen keca dana deiyo ngebo cap tep, yu kupkeupa derepsemumdi, wenemna ati jen talena neng, sun deiyo ngebo ati dongopsemume. 11Dongopsemumpa, dakuramnemu taru neitamaida, nun butene di ken mapnemu. Alukunda tenpu neitamaipu ken mapnemu dinin, aken deiyo neitamai ngeda, yuk-yuk kupu.

12Ataruda jen talena neng, sun deiyo ngebo ati kuramnemu taru, nun cap kikiman kuramepu ngebo, Ibrani kaber ngebo ton kuramepu. Erda, akati deiyo ngebo, er tali pel melimna ngebo kuramu. Nun ken deiki epnemu keca, er tep lap pepnemupa, erdi nun butene yuk-yuk tep, ‘Kan ken deiki epmarem keca deiyo aca, aca,’ pepra lape pepseu. 13Erdi lape pepseutopu, akeca yuma kupu. Ne tep nengeda, kandi ereipnemumpa, kan pel ton dokenune. Dinin, kan jene dana deiyo ngeboda, kum sektapra co deiki kapdongopmume. Angebodi Firaun tep pepu.

14Firaun tep lap penmaupa, gekepu dingeda, adipapu upu peipmaupa, yuk nengdi Yusup wenemna ati pum kunmauai di dopra duyanmaipa, er bana potong tupmaudi, telep opkal kenekra Firaun damai yaue. 15Firaundi Yusup tep upepu. “Ne ken mapsidi epsi keca deiyo neitamai ngeda, yuk neng yumadi lape men pepnetenge. Sun walwal dinin, yuk nengdi, ‘Gume, Yusupda, ken maramep keca deiyo ngeda lape pepsetue,’ pepneipa, gekepsa cadi, kandi lape pepneo,” pepu.

16Upepupa, Yusupdi upepu, “Gume, ne puto deiki dipu men lape pepketene. Dinino, kandi, ‘Uo, ne ken deiki epsi keca deiyo dan do?’ tenen, putanmakere ngeda, Allah er dipu lape pepketu,” pepu. 17– 18Upepupa, Firaundi Yusup tep upepu. “Ne ken mapsi deiki epsi ngeda ake. Nil me pirman tekmasipa, ame pumbon dadi, sapi bisam yoneitam bari, nong weik cap, potong pio telepnge cap tengyaidi, melman bisi pamu keca neitamai jen jenmai.

19Jen jenmaipane, amendada sapi yoneitam bari ton tengyai. Dinino, angeda sun pio bol malipu kunmai. Sun nong metek urasin malipu kunmai. Mesir mutu neitamai yuma sapi bisam weik dinun dinino, asapi bol pio mali kupitopu, pio men diramsi. 20Sun bol mali sapi bisamdi, nong weik cap, potong telep cap, kunmai sapida jepropi. 21Jepropi pangeda, sun arup taru bol pio mali kunmaitopu, tupa malipu kunmai. Nimi yumadi sun tep diptereptenga peda, ‘Sun ukupu jen weik jepmange’ tenen, men kael keptenge. Urasin pio malipu kupipa, ne ken mapsa neitamai di bukrosi,” Firaundi Yusup tep upepu.

22Upepu dingeda, aupu ton dukdongopra pepu. “Uda yuk ken deiki epsi ngeda ake. Tenpu jagung deiyo bolokupa, er deikida jagungda, pio telepnge yoneitam bari moupu. 23Moupupa, amenda taru, ajagung deiyo deiki dinin, jagung du yoneitam bari ton cap moupu. Moupupa, keteng yakan taru di, ila bupu kumanya pupupa, gelal sepropupa, urasin pio mali kupu.

24Ukupupa, sun metek jagung du di, urasin telep jagung du tep jepkwetepi. Aupu yumada, ne mutu kunge nesala kunupsek pen pel donge nesala tep, lap pepsi dinin, sun kan-kan di tenpu ngebo peda, ‘Deiyo aca,’ pepra, lape men pepnetue,” Firaundi pepu. 25Upepupa, Yusupdi Firaun tep upepu. “Kanda ken butene epmum dinin, sun deiyo neitamaida tenpupu kurure, yuk ton gume. Ada, Allahdi kan Firaun tep, amenda taru kupkamser keca tep lape pepmakere. Deiyo neitamai ngeda aca.

26Sun yoneitam urasin telep sapi bisamda, ada keteng tamun yoneitam bari tepa. Ange utopu, urasin telep jagung du peda, ada keteng tamun yoneitam bari tepa. Ken mapmumada butene dinin, sun deiyoda tenpu pua. 27Amenda taru tengyai sapi bisam urasin pio mali cap, bol mali cap doupi sapi sun deiyoda, keteng tamun yoneitam bari tepa. Ange utopu, urasin mali jagung du moupu dinin, keteng yakan tara di ila bupu kumanya pupupa, gelal sepropunge peda, keteng tamun yoneitam bari kurura tepa. Aketeng tamun yoneitam bari, tali keteng tamun gum dinin, jen keca yala-yala yuma gum kuprepa, tali si tepra mesumpu kunkamep taru tep pepkene.

28Arup pepmakentopu, Allahdi kan Firaun tep, amenda kupkamserenge tep, konum lap pepkere. 29Keteng tamun yoneitam bari deiki di, Mesir mutu yuma neitamaida, sun kounkameng keca pio weika di moupkamre. Jen keca yala-yala weik kunkamsere.

30Dinino, amenda taruda, keteng tamun yoneitam bari deiki di, jen keca yala-yala yuma gum kuprepa, jen si tepra talipu kunkamepe. Ukupra kupseryopda, Mesir mutu neitamai yuma jen si tepra kuramepepane, ikin pio weik kupmepya deiki di, men di jen keca weik kwamseu taru yuma lupronkamepe. 31Menmena, jen keca yala-yala yuma weik kupkamre dinin, amenda taru, akeca yuma gum kupre pangeda, kange mun kange pio weik dounkamepa tep, telep kwamseu taru lupronkamepe.

32Ken butene mapmuma deiyoda ake. Aken buteneda deiyo tenpu dinin, Allahdi, ‘Angeda tek sisi kupkamne. Kange men buteneipnere,’ konum tenepka cadi, ken butene deiki di pepkeu. Tonda, Allahdi akeca yumada, menmena di kupkamsere, sika di gume,” Yusupdi Firaun tep pepu.

33Upepu dingeda, aupu ton dukdongopra pepu. “Ange yuma tep nengeda, telep ngeda pepkukene. Kan epetepmemdi, ila kael cap, ‘Deiyo aca’ tenen, ila di tenepmanto cap kure ngebo epmemnyopda, ereipkamreme. Ada, ‘Mesir mutu yuma kalengna cap, melimna cap tep talena deiyo ngebo kupkamre’ tenen, angebo ereipkamreme.

34Tonda ukupkamrume. Jen keca bongdina deiyo neng wepra deipmemnyopda, keteng tamun yoneitam bari deiki, jen keca yala yuma weik kupkamser taru neitamaida, sun Mesir mutu nesala kinkamenge yuma bongkamenge. Kinkameng keca bokra, pamu bari deipmengedi, dumbaringe tali lupra jeptenge dinin, pamu ngeda mawa di menengkamenge.

35Kandi wepkamrem deiyo nengdi, jen keca yala-yala yuma, weik kunkamser keteng tamun neitamaida, ton ngeda, Firaun si deiki di dopropmengedi, ila nimi ati arum neitamai menekra derinkamenge. Ada amenda taru ikin kunkamser taru jena tep, ange kupmemnyopda, telep pua. 36Adeiyo nengdi menekra derinkameng jen kecada, amenda taru keteng tamun yoneitam bari neitamai Mesir mutu jen keca yala-yala yuma gum kupbaryopda, amenekamenge dopra bokeipmengepa, Mesir mutu nesala jepkamenge. Ukupmenga deiki di, Mesir mutu yuma cap, Mesir mutu nesala yuma cap men gum kupkamre.” Yusupdi Firaun tep pepu.

37Aupu yuma lap pepupa, Firaun gekepudi, “Angeda teleppu” tenepu. Tonda er amutara pel dorami neng peda, sun gekepidi, “Telepe,” tenepi. 38Utenepipa, Firaundi er pel don neng yuma tep asipetepu. “Sun ton tenipetepso. Angeboda, Allah er sambaladi er dipru neitamai pel dorure. Dana-dana tara yuma ton, pio epetepmepya peda, angebo utopu ngebo ton eptepe do? Ne kangeda men eptepe,” pepu.

39Firaundi upepka cadi, erdi Yusup tep upepu. “Uda, akeca-keca yuma, kandi lape pepmaserem yumada, Allahdi kan tep katuai lap pepkeupa, jenek kupra lap pepmaserema cadi, yuk nengda yambula di kael neng kunung dinin, nun kangeda kanda ila kael cap, ‘Deiyo aca’ tenen, lap pepmanto kemna cap weika di kukerure.

40Ange tep nengeda, ne ila ati cap, ne talenun keca cap tep, ila deiyo ngebo kunkamreme. Kandi tenepmem upu peipmempa, ne talenun nesala yumadi gekepkengedi, kandi pepseremtopu, angepu kunkamenge. Ne puda, amutu ila nimi deiyo ngebo kunedi, amutu yuma talenuna cadi, neda kan deiki tara kunkamne dinin, yuk nesala yumada kan iriamu tarapu kunkamenge. Sun deiyo ngebo kunkamreme.” Firaundi Yusup tep pepra deipu.

41Firaundi Yusup tep upepu dingeda, aupu ton pepu. “Ukutaru di dipra oryankamre taru neitamai tep nengeda, konum erepra deipkena tep, Mesir mutu yuma talepra deiyo ngebo kunkamreme,” pepu. 42Upepudi, sun ila nimi deiyo nengdi, sun buru du deiki kenengami emas keca, er sida cincin dopra, Yusup er buru du deiki dongopu. Deiyoda, ‘Mesir nesala yumadi, angebo nun deiyo ngebo, tenepmengedi kael kepmengedi kael kepkameng,’ tenen, kupu. Tonda, ataru ila nimi deiyo neng kenengami opkal pio telepnge cap, Yusup er kum dam gerengna tep emas tapu cap karepupa, Yusupdi kenekudi, gereku.

43Tonda Firaundi peipupa, sun amutu ila nimi deiyo neng embaramitopu, kuda bisam gipra, tu deiki embaramu keca ton karepupa, Yusup akeca wekra adeiki tekudi, embaramu. Firaunda, pio deiki tara ila nimi deiyo ngebo kuramudi, Mesir mutu yuma taleamu dinin, er amutara ila ngebo butene ngeda, Yusup tep ereipupa teku. Amutu neitamai Yusup embaramu taru, yuk nengdi, “Gopropso,” pepbanmaipa, sun tali dakunmai nesala yuma mepropmaipa, Yusup embaramu. Firaun ayuma kupka deiyoda, ‘Yusupdi Mesir mutu neitamai kunkamep keca yuma tep, upu bongdina deiyo ngebo, ila ngebo kunkamser’ tenen, kupu.

44Ukupudi, Firaundi Yusup tep upepu. “Neda tek sisi amutu talena deiyo ngebo menmena ngebo kunun dinino, kandi, “Ukupso,” pepsememnyopda, ne tara nesaladi pel donkameng dinin, gum dingeda gume. Ada, sun kange dipu pel men donkamenge. Kandi pepsememngepu gekepra pel donkamenge,” pepu.

45Upepra Firaundi Yusup tep, ukupu si ton karepu. Animi sida, ‘Sapenat-Panea,’ pepra deipu. Tonda er ner tep, aner si ‘Asenat,’ karepupa dopu. Aner er naida, On mutu nesala sun isok si eremna deiyo ngebo, er sida, ‘Potipera’ kuramu. Ange-ange yuma konum kupu pangeda, Yusupdi Mesir mutu neitamai pel dopra dirbaramu.

46Uda, Mesir mutu yuma taleamu ila deiyo ngebo, Firaundi Yusup ereipu taruda, Yusup erda keteng tamun 30 konum nepu. Ataru di gonga kepra, ortaru neitamai yuma Yusupdi Firaun er damai tapra, Mesir mutu neitamai yuma pel dopembaramu. 47Keteng tamun yoneitam bari deikida, Mesir mutu neitamai kourami keca yala-yala yuma pio weik mouramupa, jen keca pio weik kuramu.

48Jen keca yala-yala weik kuramnga cadi, Yusupdi peiamupa, amutu kurami nesaladi, sun ila ati arum dana-dana tara, wa pepra kouami keca nong pio weik mouamnga cadi, aketeng tamun yoneitam bari, neitamai ton ngeda bokra, jen derin ati neitamai menekra derirami. Ada ‘Amenda tarupu jenkamep’ tenen, mawa derirami. 49Uda, berbera men lyupmanto keca, jagungto do, keledaito do, terigu do, Yusupdi peiamupa, akeca utopu keca, pio weika di deriramipa, men nukmanto kwamu. Ada laut mokon pirman me wenenga pio weik kuramretopu. Kilo men nukmanto kupra deriramya cadi, Yusup gonga kepu taruda, kilo nukrap sengamu dinin, men nukmanto kwamupa, nungnada yaprou.

50Jen keca yala-yala yuma, kapul men gum kupu taru, telep keteng tamun neitamaida, Yusup er ner Asenatdi sal nyapu butene deipu. (Aner er nai boda, sun On mutu nesaladi isok si eremna deiyo ngebo, er sida Potipera kuramu). 51Yusup er menmena taru deipu mi, er si tep, Manase pepra deipu. Ada, ami deipu taruda, Yusup er kange deipudi, “Ukuda Allahdi konum melipmanerpa, menop taru ne ikin kuramneunge cap, ne nai bo cap, er ati nesala yuma cap tep, ikin kange doupra tupa tenenapu men kunune,” pepu. Upepka tep, ‘Ami sida Manasa,’ pepu.

52Er sal mi butene deipu taruda, Yusupdi, “Amutu neitamaida kange mun kange doupra ikin weik kuramneu dinin, ukuda Allahdi melipmanera deiki di, ne nyapu deipra, teleppu kunune,” pepudi, ami er si tep, ‘Efraim,’ pepra deipu.

53Ataru neitamaida, keteng tamun yoneitam bari, jen keca yala-yala yuma pio weik kwamu taru gawal daku. 54Gawal dakupa, adi dipra orketeng tamun yoneitam bari ton, jen keca gum kupkamu taru gonga kepu. Ada orketeng tamun deiki Yusupdi, “Amenda taru akeca-keca yuma gum kupkamsere,” peiputopu gonga kepbanmau. Mesir mutu neitamai cap, uda amutu dana-dana taru mutu yuma cap, jen keca yala-yala yuma gum kupupa, anesala yuma jen si tepra, jen jena gum di talipu kurami. Ukurami dinin, Mesir mutu neitamaida, jen keca weik kwamu taru menekra mawa weik deriramya tep, sunpuda jen keca jenmai.

55Jen keca gum kupbaramupa, amutu nesala yuma ikin weik kuramidi, sun deiyo ngebo Firaun tep, “Uo naio, nun jen kecada gum kupsera tepa, melipseo,” pepra mororbei. Moropmaipa, Firaundi upepu. “Ukuda Yusup damai berumpa, erdi pepkamserengepu gekepra kunkamrume,” pepu.

56Amutu dana-dana tara yuma neitamai, jen keca yala-yala yuma gum kupbaramu pangeda, Yusupdi peipupa, sun men di jen derirami ati buplan pakra deipidi, Mesir mutu neitamai kurami nesala ban-ban yumadi kunumyakarami. Ada, amutu dana-dana tara yuma, jen keca gum kupupa, anesala yuma ikin weik kuramya tep, jene kunumyakarami.

57Tonda, Mesir mutu neitamaipu gum dinin, dana-dana tara mutu yuma peda utopu, sun jen keca peda gum kupbaramupa, sun yuk mutu nesala peda ikin weik kuramipa, ‘Mesir mutu nesaladi menekra deriramingepu kunupkup’ tenen, Mesir mutu kunumyakarami.