Genesis 42

1Mutu ban-ban yuma kurami nesaladi, ‘Mesir mutu derirami jen keca kunupkamep’ tenen, Mesir mutu yakaramipa, Yakub ton gekepudi, kael kepu. Ada, ‘E, Mesir mutu neitamai jagung du do, terigu du do, akeca utopu keca kwapmare’ tenen, kael kepudi, er nyapu yuma tep upepu. “Sunda ware keca deiyo tep tali tekra didanmarum do? 2Yuk nesaladi, ‘Mesir mutu neitamai jen keca tupa kurure,’ penmaipa, gekepmasa tep, sun yuma adipapu Mesir mutu kunumbeso. Nun jen jena gum di depnup cadi, ‘Gam tupa kunkamep’ tenen, Mesir mutu bena jen keca kunumbeso,” pepra deipu.

3Upepu pangeda, Yusup er du yapu 10 nengdi Mesir mutu jen keca kunumbana tep bei. 4Sun bei dinino, Yakubdi Yusup er weit bo Benyaminda men dokotepupa, Mesir mutu men beu. Deiyoda, ‘Ne sirya deipsi mida depnerur do? Amutu nengdi ne mi tep mali kupra deipnung do?’ tenen, kware kupka cadi, Benyamin men dokotepupa, mening damaipu kuramu. 5Ataruda, Kanaan mutu neitamai yuma peda, sun jen keca gum kupupa, tali jen si tepra, mesumpu kuramya tep, Yakub (er si ton Israel perami) er nyapu yumadi, ‘Nun jen keca kunupkamep’ tenen, Mesir mutu kunumbei.

6Uda, sun kunumbei taru neitamaida, Yusupdi Mesir mutu talena deiyo ngebo gubenur utopu kuramudi, amutu neitamai kurami nesala yuma tep, sun jagung du do, terigu du do, keledei du do, akeca utopu keca yuma kunuamu. Apel doramnga cadi, er du yape tali mangkau kange doupra er damai yai dingeda, ‘Aila ngebo tep gispal dopkup’ tenen, sun giso tu dipra genepdongopi.

7Sun yai pangeda Yusupdi, ‘E, anengda ne du yape kunmange’ tenen, adipapu kael kepu. Sun urasin kael kepmau dinin, ‘Sundi ne tep, tali yuk mutu ngebopu tenepkamneng’ tenen, yambula di yu kuprap, puto di upu pepu. “Sunda ware mutu di yanmanerum do?” pepra, puto di asipetepu. Asipetepupa, sundi, “Gume naio, ‘Jen keca kunupkamep’ tenen, Kanaan mutu neitamai di yanmapu,” pepi.

8Yusupdi, ‘E, anengda tek sisi ne du yape kunmange’ tenen, konum kael kepu dinin, sundi er urasin tep men kael kepidi, ‘Nun weit bo Yusup adano,’ pio men tenepi. 9Ataru dipu Yusupdi, men di ken deiki mapudi, aken deiki er du yape tep epu kecada, kange di ton cap tenepu. Tenepudi, sun tep upepu. “Ae, sunda ‘Nimi popkup’ tenen, menmena dirbana neng kuruma de! Nun Mesir mutu neitamai telep kupra men kalengdanupaida, ‘Dan do?’ tenen, diryanmaserume,” pepu.

10– 11Upepupa, sundi, “Gume naio, nunda kan amutara kunge nengpu kunupe. Nunda jen keca kunumna tep yanmape. Nunda dumsisi kun nesala, tek sisi upupu pen neng kunupe. Nun nai bo sisa, tenpu ngebodi deipseupa, nunda nimi pona tep menmena dirbana neng gume,” pepi.

12Upepipa, Yusupdi tamupra pepu. “Gume, upepmanerum dinin, ne kangeda, nun Mesir mutu neitamai telep kupra men kalengdanupai, popsetumai tep diryanmaserume,” pepu. 13Upepupnen sundi, “Uo, angeda gume. Nun nai bo tenpu Kanaan tara neitamai kuredi, erdi deiamseupa, nun weitap duap 12 kemamupu dinin, nun weit sirya deipu mida, nun nai cap kunmare. Tenpu weit ton kuramu dinin, konum depu,” pepi.

14Sundi upepipa, Yusupdi tamupra pepu. “Gume, ne kangeda, sunda nimi pona tep menmena dirbana nengpu kurume. 15Ange tep, kurpeten keca deipkusene. Firaun tek sisi tupa kurura cadi, er si deiki di pepsene. Sun weit bo, sirya mida, er ton nun mutu neitamai, ne damai men yaryopda, nun mutu tapra sun mutu tamupra pio men benkamrume.

16Apepmana cadi, tenpu ngebo dokoteprumpa, erdi sun weit bo dorberedi, tamupra acapu duyankamre. Er bere taruda, sun yuk neng yumada wenemna ati dongopsenepa, acapu kunkamrume. Ada tali tep gume. Nun yumadi, arup pepmanerum, ‘Tek pepmang do, mok do?’ tenen, dinkamepe. Tek gum dingeda konuma, adeiki di kael kepkamepe. ‘Sunda nimi pona tep dirbana nengpu kununge’ tenen, kael kepkamsepe. Firaun tupa kurura cadi, angeda tali tep men pepsene, er si deiki di tek sisi upu pepsene,” Yusupdi pepu.

17Upepu dingeda, sun yuma dopra wenemna ati dongopupa, ue taru weneri tumi deiki di akati pum mapmai. 18Mapmaipane, tumi weneri konum kupupa, Yusupdi aneng tep pepu. “Neda, Allah er si erepra er tep gispal donuna cadi, ne pepkusen upu kuprumnyopda, men popkamsene. 19‘Nunda dumsisi nengpu kunupe,’ pepmaruma cadi, ange utopu tek sisi kumumnyopda, ne pepnetopu kupkurume. Sun kan-kan neitamai di, tenpu ngebo wepra deiprumpa, erda awenemna ati pum tupa kunkamar dinin, sun yuk neng yumada, sun mutu tamupra berumdi, sun nyapsilip yuma tep, jen keca kipra karerbankamrume. Sun nyapsilip yumada, jene pio men jenmangdi, ikine weik kunmanga tepa.

20Dinino, sun weit bo amutu kapul men yanmar mida, er dopra tamupra denkamnerume. Ukuprumnyopda, gam tupa kunkamrum dinin, gum dingeda poptapkamsene,” pepu. Yusupdi aupu peputopu, sun yumadi angepu gekepra gonga kepra kupbanmai.

21Uda, ataru neitamaida, Yusup er du yape yumadi upepdanmai. “Uo, ikin keca weik nun nong deiki deipmaserada, tali tep men kupmasere. Deiyo dorkapu. Ada menop taruda nun weit bo Yusup tep mali kupmupka tepa. Nun weit bo dopra, tu pumbon dongopmepu taruda, erdi kange mun kange doupra engepudi, weika di moropseu dinin, nun yumadi er tep bicau tenen, men gekepmupu. Ukupmupka tep nengeda, ukuda ikin keca weik nun nong deiki kupkamsere,” pepra upu pedanmai.

22Upepra pepdanmaipa, Rubendi upepu. “Uda ataruda, nedi sun yuma tep, ‘Nun weit bo portamna gume,’ pepra, upu sekterepsisi dinin, sun yumadi ne pepsi upu men gekepnerume. Upepsi do, gum do? Dinin ukutaruda, er popmupka cadi, er yapi embeua tep nengeda, nun ikin weik kupsere. Allahdi nun tep kwang dangmasere, tenepne,” pepu.

23Sundi aupu pepra pedanmai taruda, Yusup amening damaipu tekmaudi, gekenmau dinin, sun mangkau kangepu kunmaidi, ‘Nun upu gekemasere,’ men tenenmai. Ada, Yusupdi sun mutu upu deiki di men penmau. Erdi Mesir mutu upupu penmaupa, yuk ngebodi upu wilimdinmaudi, Ibrani upu penmaua deiki gekenmai.

24Ukunmau dinin, Rubendi aupu penmaua deiki di, Yusup ikin kange doupmaudi, er amnyo karekra ortarato dinmaudi, engenmau. Engepmau dingeda, ka tamupra yanmaudi, upu peipmaupa, er jen talen nengdi, sun kan-kan neitamai, er du ngebo sida Simeon dopra, sun adinmangai dipu ateng koupdongopi.

25Yusupdi peipupa, er amutara pel don nengdi, Mesir mutu jen keca dopra, Yusup er du yape neng sun karong yuma kipdongopidi, sun kunumna keca perakda, ka tamupra sun karong neitamaipu inipra deipdongopi. Tonda, sun mutu tamupra bana tep, bisi neitamai putapkamre jen keca ton tapakra talipu karepu.

26Ange yuma sun makuna tep konum karepipa, Yusup er du yapedi akeca yuma dopra, sun unta bisam bali tara getepdongopidi, amutu tapra bisi banmai. 27Bisi banmaipane, ipropkou taruda, sun yuma bisi neitamai, ‘Acapu mapkup’ tenen, bukmai. Sun abukmai taruda, sun kan-kan tenpu ngebodi, ‘Ne unta bisam tep jagung du karepkun’ tenen, tenpu karong paktapra dipterepupa, er kunumna keca perak asak pumbon kupmaua epu.

28Epudi er weitap duap tep upepu. “Kaepe, ne kunumna keca perakda, tamupra karepmaneng adano. Ne kin keca er sida karong pumbon akupmare,” pepmau. Upepmaupa, sun yuma gekepmaidi, tenipterepmaipa, kware weik kupu. Kware weik kupupa, sun dipru buluksakmaupa upenmai. “Uo, nun kange mun kupkusere. Ukuda Allahdi ware ikin keca dopra, nun nong deiki deipmaser do?” penmai.

29Upenmaidi, mapmaiya berekyopda, bisi mapbanmaiyanen, amenda taru sun nai Yakub er damai bei. Ada, er ati Kanaan tara neitamai beidi, Mesir mutu neitamai kupu keca yuma, er tep lap pepi. 30“Naio, Mesir mutu yuma talepra deiyo kure ngebodi, nun tep derepseudi wenepseue. Erdi nun tep, ‘Sunda nimi pona tep menmena dirbana neng kununge,’ tenepseudi, wenepseudi ikin keca nun nong deiki deipseue.

31Ukupseupa nundi, ‘Gume, nunda nimi pona tep men diryanmape. Nunda dumsisi kun nengpu kunupe. 32Nun nai bo sisa tenpu ngebodi deiamseupa, nunda weitap duap 12 neng kuramepu dinin, tenpu ngebo depu. Tonda nun weit bo sirya mida, nun nai bo cap Kanaan tara neitamai tupa kurerunge,’ pepmupu.

33Upepmepupa, Mesir mutu talerur ngebodi upepseu. ‘Ukuda, ‘Sunda tek sisi dumsisi neng kurum do, mok do?’ tenen, kurpeten keca deipkusene. Sun kan-kan neitamai tenpu ngebo wepra deiprumpa, ne mutupu kunkamre dinin, sun yuk neng yumada, sun nyapsilip yuma karena tep, jen keca kipra sun mutu tamupra karerberume. Sun pe mutu kunge nyapsilip yuma peda, jen jena gum di ikin weik kunmanga tepa.

34Dinino, ‘Sunda dumsisi nengpu,’ tenepsetenya tep nengeda, sun weit bo dopra, sun mutu dordi ne damai duyankamnerume. Ukuprumnyopda, ‘E, sunda nimi pona tep men diryanmasenge, tek pepmange’ tenepsetene. Gum dingeda, gume. Apepmasentopu konum kuprumnyopda, ne cap kunkamre ngebo, sun du bo tamupra karepsenepa, nun mutu neitamai jen keca kunuptume.’ Ukupra-ukupra pepseu,” pepi.

35Upepi dingeda, sun yumadi sun kin keca er sida karong dopra paktapra dipetepidi, sun kunumna keca perak epi. Sun yuk-yuk dinin, akarong yuma pumbon yuma sun kunumna keca kupmaupa epi. Sun cap, sun nai bo Yakub cap, sun kunumna keca epipa, kware weik kupupa, mambul kange doupi. 36Ukupipa, sun nai bo Yakubdi sun tep upepu. “Sunda pio ikin kupra deipnerume. Ne nyapu Yusup cap, uda ukutaru Simeon cap gum kupmanerengada, deiyo sun ca! Angepu gum dinin, ukutaruda, ne sirya deipsi mi Benyamin, ‘Er ton dopra Mesir mutu dubenkamepe,’ tenenmarumdi penmanerume. Uo, akeca-keca yumada mali kupnere. Ne pio ikine kunune,” pepra malye pepu.

37Malye penmaupa, Rubendi er nai bo tep upepu. “Naio, kan mi Benyaminda, ne deikipu deipneremnyopda, ami moupra kaleknedi, tek sisi tamupra denkamkene. Benyamin dopra tamupra men duyanyopda, ne wenemna tep, ne deipsi nyapu buteneda poptume. Apepmana tep teka tenepnetume,” pepu.

38Rubendi upepu dinin, er nai Yakubdi tamupra pepu. “Ne metek mi cap, sun cap Mesir mutu men benkamrume. Er du bo Yusupda konum depka tep, ne wisi deipsi taru mida, er tenpupu kurure. Sun Mesir mutu tamupra benkamrum taru neitamaida, ne mi Benyamin popyopda, ikine pio weik kupnerepa, depkamne ja. Ne koul potong konum kupnera tep, pio kange mun kange doupra, engenapu kunmanyanen depkaman ja. Atep ne sirya deipsi mi Benjamin dopra Mesir mutu men dubetume,” Yakubdi pepu.