Gen 43 | XteSC | STEP | Ataru neitamaida, mutu ban-ban yuma, sun jen keca pio gum kupupa, jen si tepra tupa ikine weik kunmai.

Genesis 43

1 Ataru neitamaida, mutu ban-ban yuma, sun jen keca pio gum kupupa, jen si tepra tupa ikine weik kunmai. 2 Atep nengeda, Yakub er nyapudi Mesir mutu neitamai kunupi jen keca yuma konum jepropipa, Yakubdi sun tep upepu. ^{▼▼Yakub er si ton Israel perami. Er si butene tepa.} “Mesir mutu tamupra berumdi, nun jen keca ton cap kunupkamserume,” pepu.

3 Upepu dinin, Yehudadi er nai tep upepu. “Naio, upepmaserem dinin, Mesir mutu ila ngebodi, puto weika di peipseuada, ‘Sun weit bo dopra, ne mutu men derumnyopda, ne cap tek sisi men antapkamepe,’ upepra deipseue, naio. 4 Atep, nun weit bo Benyamin dokotepmempa, nundi dopra er cap kikiman betepetoda, nun jen keca kunumbetepe.

5 Dinino, kandi Benyamin er bana tep, ‘Gume’ pepseremnyopda, nun men kunumbenkamepe. Deiyoda, Mesir deiyo ngebodi, ‘Sun weit bo cap men yarumnyopda, neda kange di ton cap men epkamnerume,’ pepra, konum peipseua tepa,” Yehudadi pepu. 6 Upepupa, sun nai Yakubdi tamupra pepu. “Sundi aMesir deiyo ngebo tep, ‘Nun weit bo ton akurure,’ pepra, lap pepruma deiki di, ikin keca ne nong deiki deipnerumada, ware keca deiyo tep do?” pepu.

7 Upepupa, sundi, “Gume, naio, Mesir deiyo ngebodi nun cap, nun yala neng cap, nun ati kikiman kunup nesala cap tep, weika di asipetepseue. Erdi, ‘Sun nai bo sisada, gam tupa kurur do? Sun weit bo ton dakurur do?’ pepra asipetepseupa, nundi er asipetepmaserengepu tali lap pepmepu. Erdi, ‘Sun weit bo dopra dekankamnerume,’ peipseuada, ware kuprap ‘Upepserur’ tenen, kael keamtepe do? Nun tali mangkau kange doupra kupmepu,” pepi.

8 Upepipa, Yehudadi er nai bo Israel, er si ton Yakub tep upepu. “Naio, kan cap, nun cap, nundi deiamupu nyapu cap, ‘Jena gum di nun yuma depnup’ tenen, kan adipapu Benyamin karepnetumpa, nun adipapu Mesir mutu bena jen keca kunupkamepe. 9 Ne pedipapu Benyamin tep, ‘Mali kupra deipmemer’ tenen, pio moupra kalengkamne. Er telep kunada, ne deikipu kupkamnere. Nedi er dopra, kange di ton cap men duyanedi, kan damai men deipkenyopda, deiyoda ne deikipu derinkamnerume. Ne gam tupa kunkamne taru neitamai yumada, sundi ne tep, ‘Deiyo kan ca,’ pepra, ne nong deiki ikin keca derinkamnerume.

10 Dinino, Mesir mutu jen keca kunumbana tep, men yapmatepe teptoda, ne butene taruda konum kunumbenmatepya tamupra yanmatepe dinin, kapul men bepu.” Yehudadi er nai Yakub ^{▼▼Yakub er si butene. Ton tarada Israel perami. Ton taruda Yakub perami dinin, er tenpu ngebopu kuramu. Er sida butene perami.} tep pepu.

11 Upepupa, sun nai Israeldi upepu. “Yuk bisi ton men kapsera tep, ukupkurume. Nun mutu kure keca, pio telep keca wepra keteneiprumdi, sun kin keca karong pumbon dongopkurume. Ada, ‘Mesir mutu deiyo ngebo, er namna tep karerbenkamrum’ tenen, pepsene. Sundi kipkamrum kecada, nimi kwetena tep lingna obat, er sida balsam cap, mong mokon cap, ‘Jen keca tau pepkamre’ tenen, yangne keca er si bumbu cap, nintong telep keca, er sida damar ladan cap, jeramep co du yala butene, sun sida kemiri co du cap, Badam co du cap, kipkamrume.

12 Tonda, sun jen keca kunuprum taruda, Mesir mutu nengdi, sun kin keca karong pumbon sun kunumna keca tamupra karepseia tep, sun jen keca kunupkamrum utopu dinin, butene kepra perak ketenepkamrume. (Ada tenpu taru dinin, ue butene kepra, kunumna keca karena tep pepu). Ada sun kunupkamrumnge cap, sun tamupra karepseinge cap, tapakra karepkamruma tep pepsene. Nun walwal dinin, Mesir mutu nengdi tali mangkau kange di, ‘Sun kunumna keca tamupra karepsei do?’ tenena tepa.

13 Ukuda telepe pepne. Sun weit bo dopra, adipapu Mesir mutu deiyo ngebo damai kunumberume. 14 Nedi Allah tep moropkamsen ngeda ake. Ada, akeca-keca yuma talepra, pio deiki tara kuredi, Ila Puto Deiyo Ngebo kurur Allahdi ^{▼▼Allah – Acada, Ibrani upu deiki di, Allah er si tep, ‘Allah Shadday’ pepra seki. Aupu ‘Shadday’ deiyoda, sundi, ‘Allahda akeca-keca yuma talepra, pio deiki tara kuredi, Ila Puto Deiyo Ngebo kurure,’ tenena tep ‘Shadday’ pepra seki. Sun kael kemna tep, angeda konum jenek kupra sekmepu.} melipserya deiki, Mesir ila ngebodi sun tep bicau tenepkamsere. Bicau tenepseredi, sun du bo Simeon cap, sun weit Benyamin cap loptaprepa, sun yuma kikimanpu tamupra yankamrume. Ange yuma tep Allah moronkamsene. Ne pe tep nengeda, kan mun keca kupnerepa, engenapu kupyopda, apu kunkamne. Dakwapye.” Sun nai Israeldi pepu.

15 Upepka tep, er nyapu yumadi Benyamin cap, kunumna keca perak weik ton cap butene kepra kipidi, bisi bei. Bisi sepdara banmaiyane, Mesir mutu bei dingeda, adipapu Yusup er damai bena teki. 16 Tekipa, Yusupdi er weit bo Benyamin epu dingeda, adipapu er ati jen keca ketenemna deiyo ngebo tep upepu. “Aneng yuma cap, ne cap keteng dukduk deiki nati kikiman jepkamepa cadi, kandi adipapu domba bisam popra kalemberume,” pepu. 17 Yusupdi angebo tep peipmautopu, Yusup er weitap duap yuma dopra, Yusup ati dubeudi, sun jene tep kalepra keteneipu.

18 Ukupu dinin, anengpuda, Yusup ati dubeuopda, kware weik kupu. Deiyoda sundi utenepi. “Gume, er ati dubenmasera deiyo ton akwapmare. Ada, menmena taru nun kunumna keca, perak mangkau di tamupra karepseia tep duyanmasera de. Erdi nun tep popseredi bisbisa kapseryopda, nun unta bisam cap, kuda bisam cap, upula dopropseredi, nun tep ateng koupseredi, er tali pel melimna neng kupra deipkamsere. Ukupseredi ikin pel weik dipkamseredi men loptapkamsere,” pepdai.

19 – 20 Ukupra pepdanmaiya cadi, Yusup er ati bung keca ketenemna deiyo ngebodi, sun dopra Yusup ati buplan dam dubeu pangeda, sundi er angebo tep upepi. “Kao, nun menmena taru amutu yana jen keca kunupmepudi, nun mutu tamupra bepu bisi neitamaida, nun kin keca er sida karong paktapmepudi, dipterepmepu. 21 Ange dipetepmepupa, nun kunumna keca perakda, tupa akarong pumbonpu akapu. Ada, ajen keca kunumna tep karepmeputopu, sundi tamupra karepseipa, epmepu. Ange tep nengeda, sun tamupra karena tep akunumna keca perakda, sun damai tamupra duyanmasepe.

22 Tonda ukutaru, ‘Yuk jen keca ton cap kunupkamep’ tenen, perak ton tapakra duyanmape. Nun kin keca karong yuk-yuk dinin, ayuma pumbon, ka di ton perak inipra dongopsei nengda, nun walwale dinin, nundi gume,” pepi. 23 Upepipa, erdi tamupra pepu. “Sunda kwar dangna gume. Sun nai bo Israeldi, Allah er si eremrur Allahda, erdi sun kunumna keca perak karepseupa, sun karong pumbon inipra dongopsei. Ne pedi dopra epsa cadi, sun kwar dangna gume,” pepu. Upepudi, akati wekra Simeon dopra duyanmaudi, sun tep karepu.

24 – 25 Angebodi, Yusup er du yape yuma dopra, Yusup ati pum dubeudi, sun karen bisi di yanmaiya tep, sun yane me kuna tep karepu. Tonda, sun kuda bisam tep jen keca karepudi, “Keteng dukduk deikida, sun cap, Yusup cap, akati kikiman jepkamarume,” pepupa, gekepi. Gekepmaiya cadi, ‘Yusupda keteng dukduk yaryopda, er tep karepkamep’ tenen, duyai karena telep keca ketenepi. 26 Amenda Yusupdi er ati tamupra yanmau taruda, sundi er ati pum ketenepmangu keca dopra, er tep karepidi, er gispal dona tep, sun yumadi sun nong genedongopmai.

27 Ukupmaipa, erdi sun tep, “Telep kurum do? Tonda, sun nai bo sisa, pio wisi ngebo, men di lap pepnerum ngeboda, tupa gam kurur do, wareto kurur do?” pepra asipetepu. 28 Asipetepupa, sundi, “Nun nai bo peda, kan melimna ngebo utopu kurure. Erda tupa telep kupra, kippu kurure,” peprapidi, er gispal dona tep, sun nong genepdongopmai.

29 Yusupdi sun yuma dipterepudi, er nin sisa di deipu mi, er weit bo Benyamin epudi, asipetepu. “Sundi, ‘Nun weit bo tenpu ton akurure,’ pepra, lap pepnerum ngeboda, angebo do? Atep ngeda ne putapnere ngeda, ‘Allahdi ami tep, bicau tenepredi, weika di pio melimkamre,’ putanerure,” pepu. 30 Upepra Benyamin tep dipetepudi, ikin kange doupra akati tapra, ‘Yuk neng men epnetengaipu engepkun’ tenen, yukai bena epetepu. Er pe ati, er yuk maramu ati bena engepu. 31 Engepmauanen, konum kupmau dingeda, er urasin me kupmaudi, arup kupmau atipu tamupra yanmaudi, er melimna neng tep upepu. “Ukuda, nun jen keca melipra bokeipseso,” pepu.

32 Er ati melimna nengdi, jen keca yuma bokra keteneipmaidi, Yusup er tenpu tep, yuk bukmauaipu yuknge bokra karepmai. Tonda, Yusup er weitap duap, sun yukai bukmanguaipu yuknge bokra, sun yuk karepmai. Tonda, sun Mesir mutu nesala, akati pumbonpu dinin, sun yuk bukmaiyaipu jepmai. Deiyoda, sun Mesir mutu nesaladi utenerami. ‘Gume, sun Ibrani nesala cap, nun Mesir mutu nesala cap, nun kikiman jenada pio mali pua,’ teneramya cadi, kikiman jen keca men jerami.

33 Sun yumadi, ‘Jepkup’ tenen, bukmai taruda, Mesir nengdi, ‘Ukupso’ peipipa, Yusup er du yape yuma, sun nai bodi deiamutopu buki. Ada ortara di menmena deipu ngebo bukmaupa, aneitamai amenda taru deipu ngebo bukmaupa, adinen nukrap, sirya taru deipu mi Benyamin atara siryada bukmaue. Sun keteng tamun kupitopu nukrap, ortara di atara kepra, baris kepman bukmai. Ukupra bukmaidi, sun pedi sun pe tep epdanmaidi, ‘Ware deiyo tep kupmaseng do?’ tenen, lukdanmai.

34 Sun dabukmaipane, Mesir mutu melimna nengdi, sun jen keca Yusup er meja deiki di dopra, sun bukmaiyapu deriryanmaipa, sun yuma tep nengeda, yambul weik akapmau dinin, Benyamin tep karepmai ngeda, pio weika di bokra deipmai. Ange tep, sun yuma lukdanapu kunmai. Ukunmai dinin, sun yuma tali kange doupra, tali lupra kikiman jen jenmaidi, jen me cap jepmai.