Genesis 44

1Jen jepmaidi mapmaiya berekyopda, sun benkunge taruda, Yusupdi er ati deiyo ngebo tep upepu. “Ukupkurume. Aneng sun duyanmai karongda, jen keca weika di dongopmempa, dekpepkurure. Aneng yumadi dubenmautopu weika di karepmemdi, sun kin keca, er si karong yuma yuk-yuk dinin, sun karong pumbon deiki tarada, sun kunumna keca perakda, ka tamupra dongopkurume.

2Ukupmemnyopda, ne me jen mau, pio telepnge perak di petupra ketekepnei ngeda, dopra sun weit bo sirya mida, er karong pumbon inipra dongopkurume. Tonda, er jen keca kunumna perak peda, er karong pumbon dongopkurume,” pepra deipu. Yusupdi upeputopu er melimna ngebodi kupu.

3Mapmaipa, bereng yakan taruda, aneng cap, sun kuda bisam cap bisi banmai. 4Banmaipane, mutu weik kapul men banmai taruda, Yusupdi er pel don neng tep upepu. “Ukupu benmangu neng damai sepdara berume. Antaprumnyopda, aupu pepkurume. ‘Nun nai bodi teleppu kupra deipmaser dinin, sundi er tep ware deiyo di mali kupra deipmemerum do? 5Sun kin keca karong pumbon kure me mau, perak di petupra ketekepi ngeda, ne deiyo ngebo Yusupdi talerur nge do, gum do? Tonda, erdi ame mau neitamai dipetepredi, amenda kupkamre keca ‘Aca’ tenen, kael kemrure. Sundi akeca upula dopropmarum ngeda, pio mali kuprume.’ Upepkamrume,” Yusupdi er pel melimna ngebo tep peipu.

6Upepupa, angebo sepdara benmaudi, Yusup er du yape bisi neitamai antapmaipa, angebodi aupu yuma pepu. Ada, Yusupdi, ‘Upepkurume,’ peipmautopu pepu. 7Upepra wenepupa, sundi tamupra, “Gume, naio, ware keca deiyo tep, aupu utopu upu pepmaserem do? Nunda, sun amutara kunge nesala utopu kunupa cadi, apepseremtopuda, nun tek sisi men kuptepe.

8Tonda, angepu gum dinin, men di Kanaan tara neitamai bepudi, nun karong pumbon epmepu kunumna keca perakda, ka tamupra sun mutu yana karepsepu. Ukupmupka tep nengeda, ton cap tenipetepo, nun ware keca deiyo tep, kan nai bo ati pum dadi perak pe, emas peda upula doproptepe do? Nundi er keca upula men dopropmepu, angeda gume. 9Dinino nun naio, kandi nun keca pumbon yuma dipetepmemdi, epmemnyopda, angeboda poptumpa deptue. Nun tali yuk neng yumada, sun tali pel melimna neng kupra deipserumdi, sun amutara kupra sun pelpu donkamepe,” pepi.

10Upepipa, angebodi upepu. “Telepe, apepmanerum utopu kunkamepe. Ne kangeda, akeca upula dopropmau ngebo, ne tali pel melimna ngebopu kunkamnere. Sun yuk neng yuma tep nengeda, ‘Mali kupmange,’ pepra, sun nong deiki mali upu men deipkamsepe,” pepu. 11Upepupnen, sun yuk-yuk dinin, sun yuma berbera di, sun kuda bisam bali tara di sun sak dopra, tuai deipmaidi paktapmai.

12Paktapra deipmaipa, Yusup er pel dona ngebodi, sun karong yuk-yuk dinin, tenpu-tenpu dipetepra banmau. Ada, menmena wisi ngebo ernge dadi, neitamai wisi neng sun nge adinen, siryada sun weit bo Benyamin ernge ton dipterepu. Dipterepupa, Benyamin er karong pumbonda, Yusup er me jen mau perak di keteneipinge bukmau epu. 13Epu pangeda, Yusup er du yape yumadi, mambul kange weik doupmaidi, ‘Uo, ware kupkup do?’ tenen, sun opkal yuma gweleptapmaidi, sun bunga yuma ka di ton cap kuda bali tara deiki deiprapidi, ka tamupra Yusup kori, er ati tamupra bei.

14Tamupra akati arum beidi, Yusup er ati pum tupa bukmaupa, Yehuda cap, er nyapsilip yuma cap, Yusup er damai yanmaidi, mali kange doupra er urasinai dinin, tu deiki saki. 15Ukupmaipa, Yusupdi aneng tep upepu. “Sunda amali kupmanerum ngeda dano? Ware deiyo tep mali kupmanerum do? Sun ton men kael keprum do? Neto nengdi mem pel dopmepedi, akeca-keca yuma amenda kupkamserenge pe, ukutaru inipserenge peda, dipra kael kemnupe. Angeda men tenipmanerum do?” pepra wenepu.

16Wenepupa, Yehudadi upepu. “Uo, nun naio, nun ware upu peptepe do gume? Nun wareto keca kuptepya deiki di, ‘Anengda tek penmange, mali men kupmange,’ tenepsetum do? Nunda kan amutara utopu neng kunupe. Allahdi nun mali kupmepu keca tep, deiyo konum katuai kupra deipmasere. Ukutaruda, nun yuma kan amutara tali pel don nengpu kunkamkepe. Ateng koupsengedi, kan amutarapu pio kunkamepe. Ada nun yuma pe, kan perak me mau dopropmau ngebo peda, nun yuma tep pepkene,” Yehudadi Yusup tep pepu.

17Upepupa, Yusupdi tamupra pepu. “Gume. Nedi apepmaneremtopu men kuptene. Ange gum dinin, ne perak me mau dopropu ngebo, er puda ne amutara kupra, ne tali pel don ngebo kunkamre. Sun yuk neng yumada, tali kange doupra kwar dangna gum dipapu, sun nai damai tamupra berume,” pepu.

18Upepu pangeda, Yehudadi tekra Yusup bukmauai damai bena upepu.

Uo naio, upu tenpu ton cap pepketene do? Kanda ila nimi deiyo ngebo, Firaun er kuretopu kureme. Ne puda mambul pio gum ngebo, kan amutara kunun dinin, ‘Men derepkunerem’ tenen, moropkene. Upu metekanun pepketene do? 19Naio, men taruda kandi nun tep, “Sun nai sisa tupa kurur do? Sun weit bo ton kurur do?” pepra asipetepsemume.

20Asipsemumpa nundi, “Teka, nun nai bo tupa gam kurure. Tonda, er pio wisi kuramu taru neitamaida, nun weit bo tenpu ton deipu. Amida, er nin sisa di menmena taru deipu mi, er du boda konum depka tep, aner er deiamu nyapu ton gum, ami tenpupu kurure. Er nai bodi er tep, pio bicau tenepra kange derirure,” pepmepu. 21– 22Upepmepupa, kandi nun tep, “Sun pe mutu berumdi, sun weit bo dopra, ne damai duyankamnerume. Ne asuru dipu epkamne,” pepsemumpa, nundi, “Uo, nun weit boda, er nai sisa tapra beryopda, er nai depkamre ja,” pepkepu.

23Upepkepu dinin, kandi nun tep, “Gume, sun weit bo dopra men duyarumnyopda, ne ton men epkamnerume,” pepsemume. 24Gekepmupudi, nun nai damai tamupra bepudi, nai kandi peipsemumtopu, lape pepmupu. 25Upepmepupa, amenda taru erdi upepseu. “Ukuda Mesir mutu ton cap kwereprumdi, nun jen keca ton kunumberume,” pepu.

26Upepu dinin, sundi, “Gume, nun nai, nun men betepe. Nun weit bo cap men bepyopda, Mesir mutu deiyo ngebo cap men antapkamepe,” pepra lap pepmepu. 27Upepmupupa, nun nai bodi nun tep upepseu. “Sun kaele. Ne nerdi sal nyapu butenepu deipneue.

28Tenpu ngeda, tenpu taru ati tapra bura beu dinin, kange di ton men dinupa cadi, ‘Bura tara kure yu kamdi poptapra jepu do?’ teneramsi. Ataru di dipra, ukutaru neitamai peda, ami pio men dinupe. 29Ange tep nengeda, ne sirya taru di deipsi mi ton dopra duberumpa, er ton gum kupneryopda, ataru di dipra, oryankamre taru yuma neitamai di, pio kange mun kange doupra, engenapu kunmanyane, amenda taru ne koul potong konum kupneu ngebo depkamne ja. Ikinepu kunkamne ja,” ne nai bodi pepseu.

30– 31Atep naio, ne nai sisa damai tamupra benkamne taru, ne weit bo cap kikiman men embenemnyopda, ne naidi er sirya taru deipu mi men epreiyopda, er tek sisi depkamre. Tali tep men pepkene. Deiyoda, ne nai bodi ami tep, ila di kange deiamudi, pio tenenapu kurura cadi, er gum kupreyopda, nun nai depkamre. Ada nun weit kikiman bana gum di, tali mesumpu tamupra nun nai damai bepyopda, nun nai depkamre.

32Tonda, neda kan amutara kure ngebo autopu ngebodi pepkene. Ne nai tep upepsi. “Gume, ne dipapu nun weit pio kalengkamne. Er telep kuna tep, ne deikipu kupkamnere. Er dopra kan damai tamupra men duyanyopda, ikin keca ne nong deikipu derinkamnereme. Nun weit gum kupreyopda, ne gam kunkamne taru yuma, adeiyoda ne nong deikipu kunkamnere,” upepsi.

33Atep, kanda ne deiyo ngebo kunerempa, amutu neitamaipu kan amutarapu kunkamne. Kan tali pel don ngebo pio kunkamne, men loptapkamnereme. Ada, “Telepe,” pepsetumpa, ‘Nun weit bo cap, uda, er du yape cap, nun nai damai tamupra betenge’ tenen, moropkene naio. 34Ne weit bo cap men betene teptoda, ne ware ka di ne nai damai tamupra betene do? Gume. Ne ukupnyopda, ne nai ikin kange weik doupredi, pio kange mun kange doupra kunkamrada, men dinkamne. Angeda pio men kuptene, naio.

Yehudadi Yusup tep aupu yuma pepra moropu.