Genesis 45

1Uda, Yehudadi aupu yuma tupa penmaupane, Yusup cap, er ati melimna neng cap yumadi gekenmai. Gekenmaipane, Yusup dipru pu jepmaupa, ikin kange doupra, ‘Engepnyopda, ne pel melimna nengdi epkuneng,’ tenepmaudi, aneng yuma tep, “Sun yuma bura bendopso, aca tapra yukai beso,” pepmaupa, sun yuma benmai. Benmaiya cadi, Yusupdi er du yape yuma tep, “Neda, sun weit bo Yusup kunune,” pepra, er pe tep katuai lap pepu taruda, yuk Mesir mutu nengdi ton men gekepi. Yusup er du yape sun dipu gekepi.

2Dinino, Yusupda, ila ikin kange doupmaua di, ila di engenmaupa, sun akati dam kunmai Mesir mutu nesala gekepidi, Firaun er ati kurami nesala tep lap pepi. 3Yusupdi er du yape tep jenek kupra upepu. “Neda tek sisi Yusup, sun weit bo kunune. Ne nai bo sisada dano? Tupa gam kurur do, gum do?” pepu. Upepupane, er du yape yumadi lukdaidi, kware weik kupupa, er tep upu tamupra men pepmanto kupi.

4Ukupipa, Yusupdi sun tep upepu.

“Gume, ne nong damai yaneso,” pepupa, sun yai pangeda, upepu. “Gume, neda yuk ngebo gume. Men di sun weit bo dopra, ‘Mesir mutu dubenkameng’ tenen, yuk mutu nesala tep kunupra kareprumpa, Mesir mutu dubei ngeboda, Yusup akunune. 5Ukupnerum dinino, ukutaruda, kwar dangna gume. Tonda sun pedi sun pe tep, ‘Uo, Mesir dubenkameng’ tenen, ‘Nun weit bo kunupmepuada, warya tep do?’ tenen, deremdana men kunkamrume. Deiyoda, angeda tali tep men kupneu. Ange gum dinin, Allahdi, ‘Nimi depnung tep, Yusup dokotepmenga deiki di nesala lyepkamne,’ tenemnga deiki di kupnerume.

6Orketeng tamun tenpu deiki di gonga kepudi, ukutaru keteng tamun butenenge neitamai ton, jen keca yuma gum kupseupa, amutu kunge nesala yuma jen si tepra, tali mesumpu kununge. Ange utopu, ukutaru di dipra, orketeng tamun pamu bari deiki di ton cap, amutu nesaladi wa pena cap, kirbana cap gum dipapu, mesumpu kunkamenge. 7Ukupkamser dinin, sun kapul yarum taruda, Allahdi ne dopra amutu neitamai dokotepneupa, kunune. Ada tali tep gume. Deiyoda, ‘Yakubdi deiamu nyapu cap, sun nyapsilip yuma cap depnung’ tenen, ‘Ton nesala lyepnedi, ne mawa kunkamenge,’ tenepudi, amutu dokotepneu. Tonda, erdi, ‘Ne ila mambul pel dopnedi, Yakub er nyapsilip lyepkamne,’ tenepudi, ne mutu dokotepneue.

8Ange tep nengeda, sundi ne dopra, Mesir mutu neitamai men dokotepnerume. Allah erdi dokotepneue. Allah dokotepneudi, erdi ereipneua deiki di, Firaun er nai bo utopu kupra deipneue. Tonda, Firaun er ati kunge nesala yuma cap, er pel donge nesala yuma cap, ne amutarapu kununge. Mesir mutu yuma talenune. Ange yumada, Allah erdi ereipneupa kunune. 9Ne nai damai menmena benkamarume. Berum dingeda upepkamrume. Yusupdi upepkere.

Allah er dipu ereipneupa, Mesir mutu keca yuma talepra ila ngebo kunune. Cadi, adipapu kan mutu tapra, ne damai yankamarume. ‘Amenda taru do?’ tenena gum dinin, adipapu diryanerume.

10Yarum dingeda, Mesir mutu neitamai dinin, mutu si Gosen mutu karepsenepa, amutu neitamai kunkamrume. Ada ne damai kunkamruma tepa. Ada kan cap, kandi deiamum nyapu cap, sundi deiami nyapu cap, kan tarum domba yuma cap, unta bisam cap, uda kandi talerum keca yuma cap dopra duyankamrume.

11Oryankamre keteng tamun pamu bari ton cap neitamaida, jen pio gum kupbankamsere. Ataru neitamaida, nesala yuma jena gum, tali mesumpu kunkamenga tep, nedi kan cap, kan nyapsilip yuma cap tep, pio melimnapu kunkamsene. Gum dingeda, kan cap, kan nyapsilip yuma cap, pio ikin weik kupserepa, tali kankan kunge nesalapu kunkamrume. Ukupserur tep, ne damai yarumpa, ne melimkamsene. “Yusupdi upepkere,” pepra perbenkurume.

12Yusupdi upepudi, aupu ton dukdongopra pepu. “Ukutaruda, sun pe asuru dipu epmaneruma cadi, sun cap, ne weit bo Benyamin cap, sun yumadi, ‘E, ada nun weit bo Yusupdi aupu penmasere’ tenen, konum kael kepmanerume. 13Atep sundi ne nai damai berumdi, upepkamrume. ‘Gume, sun Mesir mutu nengdi, nun weit bo Yusup tep, ila di gispal donunge,’ pepkurume. Sundi amutu neitamai epmarum keca yumada, ne nai tep lape peprumdi, er dopra ne mutu duyankamnerume.” Yusupdi er du yape tep pepu.

14Upeprapudi, er weit bo Benyamin tep iriprapudi engenmau. Ange utopu, Benyamindi Yusup tep iripudi engepu. 15Tonda Yusupdi er du yape yuma tep nengeda, mutupudi engenapu kupmau. Ayuma konum kupu dingeda, er cap, er du yape yuma cap upu sisingmai.

16Upu siningmaipane, yuk nengdi, “Yusup er du yape yanmange,” pepra, Firaun er ila nimi deiyo ngebo ati kunmauai lap pepipa, Firaun cap, er amutara pel dorami neng cap, kange deipi. 17Kange deipipa, Firaundi Yusup tep upepu. “Kan du yape tep upepkurume. Sun kuda bisam deiki, akeca-keca yuma getepra deiprumdi, Kanaan tara tamupra berume.

18Berum dingeda, sun nai bo dopra er cap, sun nyapsilip cap, sun ati kunge nesala cap dopra, ne damai tamupra deneso. Mesir mutu neitamai kure keca pio telepnge karenkamsene. Karepsenepa, nun mutu neitamai kure keca, telep ngeda jenkamrume. 19Tonda upepkurume. Nun Mesir mutu tu deiki embaramre keca ton dopra dubenkurume. Ada, sun nerapu cap, sun nyapu cap, sun nai bo cap, akeca deiki bukmengepa, gipra duyankamrume.

20Sun talerum keca, sun bungada tenena gume. Mesir mutu neitamai pio telepngepu karepsenepa, doronkamruma tepa.” Firaundi Yusup tep pepu.

21Firaundi upepra deipka cadi, Israel er nyapu yuma gekepidi, aupu peputopu kupi. Firaundi, ‘Angeda ukupkamrume,’ peputopu, Yusupdi er du yapu tep, tu deiki embaramu keca karepupa, gipra dubei. Tonda, sun bisi neitamai jenkameng keca tep, jen keca bokra karepupa, dopra dubei. 22Yusupdi er du yape yuma tep nengeda, sun tenpu-tenpu tep ukupu opkal karepu. Ukupu dinin, er weit bo Benyamin tep nengeda, ukupu opkal pamu bari nukra karepudi, kunumna weik keca perak tiga setengah kilo (3 ½) ton karepu.

23Tonda, er nai bo gispal dona tep, tali karepu kecada ake. Gem keledai bisam (ada kuda bisam utopu) 10 cap, ner keledai bisam 10 cap karepu. Akeledai bisam bali tara getepra deipu kecada gemnge deiki di, Mesir mutu pio telep taleami keca yala-yala yuma kipra deipudi dokotepu. Ner keledai bisam deiki di, jen keca yala-yala weik cap, roti cap, uda bisi neitamai putapkamu keca yala weik cap, tapakra getepudi deipu. 24Yusup ukupu dingeda, er du yape benkoi taruda, upepu. “Bisi neitamai banmarum taruda, yu kuprepa, upu deiki di pangdana gume. Tali kange doupra bankurume,” peipupa, bisi banmai.

25Mesir mutu dutara di tapra, bisi welerbanmaiyanen, amenda taruda sun nai Yakub er damai Kanaan tara neitamai bei. 26Beidi er tep upepi. “Yusupda tupa gam kurure. Angepu gum dinin, Mesir mutu yuma ila deiyo ngebo kupra talerure,” pepi. Upepipa, Yakubda lukdaudi, upu men pepmanto kupu. Erdi sun penmai upu teka men tenepudi lukdau.

27Ukupu dinin, sun yumadi sun nai tep, Yusupdi peipu upu lap pepipa, tonda Yusupdi, ‘Ne nai akeca deiki bukrepa, duyankamenge’ tenen, dokotepu tu deiki embana keca cap, akeca-keca yuma cap epu dingeda, teka tenepudi, tali kange doupra telep kupu. 28Telep kupudi upepu. “Uda, ukutaru nedi teka tenepsene. ‘Ne mi Yusup tupa gam kurure’ tenen, teka tenepmane cadi, ne kapul men depman taruda, adipapu er kure mutu dirbenkamane,” Yakubdi pepu.