Gen 46 | XteSC | STEP | Ange tep nengeda, Israeldi er taleamu keca cap, er nyapsilip yuma cap dopra, ‘Mesir mutu kwererbenkaman’ tenen, bisi banmai. Bisi banmaipane, bisi neitamai mutu si Bersyeba mutu bei taruda, Israeldi (ada Yakub) ‘Ne nai bo Isakdi si eremamu Allah, er gispal dona tep, gam keca popra karepkun’ tenen, karepu.

Genesis 46

1 Ange tep nengeda, Israeldi er taleamu keca cap, er nyapsilip yuma cap dopra, ‘Mesir mutu kwererbenkaman’ tenen, bisi banmai. Bisi banmaipane, bisi neitamai mutu si Bersyeba mutu bei taruda, Israeldi (ada Yakub) ‘Ne nai bo Isakdi si eremamu Allah, er gispal dona tep, gam keca popra karepkun’ tenen, karepu. 2 Karepupa, alukunda neitamai di, Allahdi Israel tep, ken mapmaua deiki di upepu. “Yakub, Yakubo,” pepupnen, Yakubdi, “Naio, ne akunune, gekepkene,” pepu.

3 Upepupa, Allahdi upepu. “Neda Allah kunune. Kan nai bo Isakdi si eremamu Allah nepu kunune. Mesir mutu kwererbana tep nengeda, kwar dangna pio gume. Deiyoda, umutu bemumpa, nedi amutu neitamaipu pio telep kupra deipkamkene. Nedi meliamkenepa, kan nyapudi deipmengepa, dadeipdanen kunkameng nesala yuma, pio weik kupbankamenge. 4 Ne cap Mesir mutu neitamai melipra benkamne. Kikimanpu bankamneme. Ange utopu kan nyapsilip yuma dopra, kange di ton cap atarapu tamupra duyankamne. Kan depmemnyopda, kan mi Yusup, er buru di kan asuru pupdongopkamkere.” Allahdi Yakub tep ken mapmaua deiki pepu.

5 Upepupa mapmaiya berekyopda, Yakub cap, ^{▼▼Yakub – Yakubda, er si ton Israel perami.} er nyapsilip cap, Bersyeba mutu tapra bisi banmai. Ada, Yakub er nyapudi, sun nai cap, sun nerapu cap, sun nyapu yuma cap dopra, Firaun karepu tu deiki embana keca deiki deipmaidi, dipra dubenmai. 6 – 7 Tonda, sun peirami keca yala-yala yuma cap, sun Kanaan tara neitamai deriramidi, taleami keca cap, ange-ange yuma dopra, Mesir mutu kwererbei. Ada Yakub cap, er nyapsilip yuma cap, erdi deiamu nyapu cap, erdi deiamu nerapu cap, sundi deiami nyapu cap, ner nyapu cap, sun yuma Mesir mutu kwererbei.

8 Yakub cap, er nyapsilip cap, Mesir mutu bei nesalada sun si ake. Yakubdi menmena taru deipu mi er sida Ruben. 9 Rubendi deiamu nyapu sun sida, Henok cap, Palu cap, Hesron cap, Karmi cap bei.

10 Yakubdi amenda taru deipu mi Simeon cap bei. Simeondi deiamu nyapu sida ake. Yemuel cap, Yamin cap, Ohat cap, Yakhin cap, Sohar cap, tonda Kanaan tara nerdi deiprei mi er sida Shaul cap bei.

11 Yakubdi deipu mi Lewi cap, erdi deiamu nyapu sun sida, Gerson cap, Kohat cap, Merari cap bei.

12 Tonda, Yakubdi deipu mi Yehuda cap, erdi deiamu nyapu sun sida, Sela cap, Peres cap, Sera cap, tonda Peresdi deipu nyapu Hesron cap, Hamul cap bei. (Yehudadi er butene nyapu ton, sun sida Erya cap, Onan cap deipu dinin, men di Kanaan tara neitamaipu konum depreia cadi, sunda Mesir mutu men berei).

13 Tonda Yakubdi deipu mi Isakar cap, erdi deiamu nyapu sun sida, Tola cap, Puha cap, Jasub cap, Simron cap bei.

14 Tonda Yakubdi deipu mi Zebulon cap, erdi deiamu nyapu Sered cap, Elon cap, Jalel ^{▼▼Jalel – Indonesia Alkitab neitamaida, angebo si tep ‘Yahleel’ seki.} cap bei.

15 Adeiki tara sekmap nyapu yumada, Yakub cap, Lea cap, Padan-Aram mutu kikiman kuramrei taru neitamai deiprei. Tonda, sun ner mi tenpu, er sida Dina deiprei. Sun sida nukrap denge weik 34 nesala kurami. ^{▼▼Ton nengda, Ohat er si ton men sengnunge. Ada, ‘Angeboda Yakubdi men deipka’ tenena tepa.}

16 Yakubdi deipu mi ton Gad cap, erdi deiamu nyapu sun sida, Zifyon cap, Hagi cap, Suni cap, Ezbon cap, Eri cap, Arodi cap, Areli cap bei.

17 Tonda Yakubdi deipu mi Asyer cap, erdi deiamu nyapu sun sida, Imna cap, Yiswa cap, Yiswi cap, Beria cap, tonda ner mi er sida, Sera cap bei. Tonda Beriadi deipu nyapu, sun sida Heber cap, Malkiel cap bei. 18 Uda, adeiki tara sekmap nimi sida, ada Yakub cap, Silpa capdi deiprei nyapu. Ada Lea er nai bo Labandi, ‘Aner er pel melimna ner kunkamre’ tenen, karepu ner ake. Sun si nukrap denge weik 16 kurami.

19 Tonda, Yakub cap, Rahel capdi deiamrei nyapu, sun ton bei. Sun sida ake. Yusup cap, Benyamin cap kuramrei.

20 (Tonda Mesir mutu neitamai, Yusup cap, er ner Asenat capdi deiprei nyapu, Manase cap, Efraim cap kuramrei. Asenat, ada On mutu nesaladi isok si eremna deiyo ngebo er sida Potipera, erdi deipu ner mi Yusup dopu).

21 Yakubdi deipu mi, er sida Benyamin cap, beu. Benyamindi deiamu nyapu sun sida, Bela cap, Beker cap, Asbel cap, Gera cap, Naman cap, Ehi cap, Eros cap, Mupim cap, Hupim cap, Arad cap deiamu. 22 Yakub cap, Rahel capdi deiamrei nyapuda, nukrap denge weik 14 kurami. Sun sida adeiki tara sekmape.

23 Tonda, Yakubdi deiamu mi ton, er sida Dan beu. Dandi deipu mi ton Husim beu.

24 Yakubdi deiamu mi ton, er sida Naftali cap bei. Tonda, erdi deiamu nyapu ton bei. Sun sida, Yahasiel cap, Guni cap, Yeser cap, Silem cap bei. 25 Anyapu yumada, Yakub cap, Bila capdi deiprei. Rahel er nai Labandi, ‘Anerda pel dona melimna ner kunkamre’ tenen, karepu ner ake. Yakubdi dopupa, Biladi anyapu deiamu. Sunda nimi si nukrap 7 nesala kurami.

26 Uda, Yakub cap, Mesir mutu bei nesalada, nukrap denge weik 66 kurami. Ada Yakubdi deiamu nyapu cap, sundi deiami nyapu cap tep pepmape. Erdi deiamu nyapudi domi nerapu si men nukmape. 27 Yusup er ner dopudi, sun butene di, Mesir mutu neitamai deiprei nyapu butene ton tapakra nukmepyopda, sun gungda 70 kurami. Ada Yakub cap, er nyapsilip cap, Mesir mutu neitamai kikiman kurami nesala tep pepmape.

28 Yakub cap, er nyapsilip cap, Mesir mutu neitamai dinin, ‘Gosen mutu benkamep’ tenen, benkoi taruda, Yakubdi er mi Yehuda dopra menmena dokotepu. Ada, Yehuda Yusup damai berepa, Yusupdi, “Gosen mutu bisi banada, ukupra-ukupra abisipu benkamarume,” pepra, lape pepmemerepa, ‘Peryankamner’ tenen, dokotepu. Dokotepupa, sun amenda taru bisi banmaiyanen, Gosen mutu damaito bei.

29 Bei taruda, Yusupdi peipupa, er amutara pel don nengdi, er tu deiki embana keca keteneipi. Ketenepipa, akeca deiki welepra bisi benmaudi, ‘Ne nai bisi neitamai antapkamanem’ tenen, beu. Beupa, Gosen mutu neitamai antaprei taruda, Yusupdi er nai bo tep iriprapudi, pio weik engenmau. 30 Engenmaupane, er nai bo Israeldi Yusup tep upepu. “Ukutaruda, ne pe asuru di epmakene. Kanda tek sisi gam tupa kureme. Konum kael kepmana cadi, ukutaruda ne dena telepe pua,” pepu.

31 Amenda taru Yusupdi er du yape cap, sun nyapsilip yuma cap tep upepu. “Ukuda Firaun er damai lap perbenkune. Benedi upepkamane. Naio, ne nai bo cap, ne du yape cap, sun nyapsilip yuma capda, Kanaan tara kurami dinin, ukuda ne damai yanmange. 32 Animi yumada, gam kure keca yala-yala weik tanunga cadi, sunda bisam yala keca utopu keca pein nesalapu kununge. Sun domba bisam cap, sun unta bisam cap, sapi bisam cap, akeca utopu keca cap, uda sun talenung keca yala-yala yuma dopra duyanmenge.” Yusupdi, “Upepkamane,” pepu.

33 Upepudi aupu ton dukdongopra pepu. “Amenda taru Firaundi sun tep upupseryopda yarumpa, asipterepkamasere. Erdi, ‘Sunda ware pel dorum do?’ pepra asipseryopda, sundi tamupra upepkamarume.

34 ‘Gume naio, nunda metek nyapu kuramupu taru, dadi diprap aneitam taru yumada, gam kure keca pein nesala kuramepudi, tupa apelpu donupe. Nun nai yapudi apelpu doramitopu, nun peda apelpu talepra bisam yala-yala yuma pein nesala kunupe,’ pepra, lape pepkamarume. Angepu peprumnyopda, Firaundi peprepa, Gosen mutu karepkamsere. Deiyoda, sun Mesir mutu neitamai kunge nesaladi, gam keca pein nesala yuma tep, ‘Uo, ato nengda nun songe. Nun damai kuna dabale,’ tenenunga cadi, yambul karen mutu Gosen mutu karepserepa, aneitamaipu bena kunkamrume.”

Yusupdi er du yape cap, er nai cap, sun nyapsilip yuma cap tep pepu.