Gen 47 | XteSC | STEP | Yusupdi Firaun damai bena aupu pepu. “Ne nai cap, ne du yape capdi, sun talenung keca yuma cap, sun domba bisam yuma cap, yuk gam kun keca tanung keca yala-yala yuma cap dopra, Kanaan tara neitamai di, nun tara Gosen mutu konum yanmange,” pepu.

Genesis 47

1 Yusupdi Firaun damai bena aupu pepu. “Ne nai cap, ne du yape capdi, sun talenung keca yuma cap, sun domba bisam yuma cap, yuk gam kun keca tanung keca yala-yala yuma cap dopra, Kanaan tara neitamai di, nun tara Gosen mutu konum yanmange,” pepu. 2 Tonda, Yusupdi er du yape kan-kan di pamu bari neng wepra Firaun damai dubeu.

3 Dubeupa, Firaundi aneng pamu bari tep upepra asipetepu. “Sunda wareto pel dorum do?” pepra asipetepupa, sundi, “Gume, nunda kan amutara kunge nesala utopu kunmape. Nunda nun apu yapudi pel doramitopu, domba bisam pein nesalapu kunupe. 4 Kanaan mutu neitamai peda, jen keca yala yuma gum kupseua cadi, nun peinup keca yuma, sun jen keca peda gum kupre. Ange tep nengeda, nunda, ‘Amutu neitamai ke taru tep kunkamep’ tenen, yanmape. Atep naio, kandi, ‘Telepe’ pepsetumpa, nunda Gosen mutu neitamai bena kunkamepe,” pepi.

5 Upepipa, Firaundi Yusup tep upepu. “Kan nai cap, kan du yape cadi, ‘Yusupdi melipkamser’ tenen, kan damai konum yanmange. 6 Ne talenun mutu, Mesir mutu yuma akwapmarpa diruma cadi, nun mutu neitamai pio telepaipu wepra kan nai cap, kan du yape cap tep karepkurume. Ne kangeda, Gosen mutu neitamai kunkamengada, telep pua. Tonda, kan du yape neitamai, gam keca peina ila kael ngebo akuryopda, angebo ton wepra, peina deiyo ngebo kuna tep ereiprumpa, erda ne pedi talenun gam kure keca melipra peinkamnere,” pepu.

7 – 8 Upepupa, amendada Yusupdi er nai sisa dopra, Firaun damai dubeu. Dubeupa, Yakubdi Firaun tep, ‘Allahdi melimkamemer’ tenen, telep upu pepra deipupa, Firaundi Yakub tep, “Kanda keteng tamun ware kupra deiki wisi konum deipkeu do?” pepra asipetepu. 9 Asipetepupa, Yakubdi, “Neda tuai mutu neitamai embana kuramsi taruda, keteng tamun denge weik, 130 konum kuramsidi, wisi deipsi. Ne kuramsi taruda, ikin dipu kuramneu dinin, ne apu ya peda keteng tamun denge pio weik kurami. Ne puda yambulanun pua,” pepu. 10 Yakubdi Firaun tep, telep upu ton pepudi, akati tapra beu.

11 Firaundi Yusup tep peiputopu, Yusupdi er nai cap, er du yape cap tep, Mesir mutu neitamai dinin, tu pio telepai wepra, karepu. 12 Tonda Yusupdi er nai cap, er du yape cap, sun nyapsilip yuma cap tep, jen keca ton kareramu. Ada sun nyapu akuramitopu nukrapudi, sun puturamutopu bokra, sun yuma dinin, ati yuk-yuk bokra kareramu.

13 Sun yuma dakuramipane, Mesir tara neitamai yuma cap, Kanaan tara neitamai yuma capda, ikine pio weik kuramu. Ada jen keca yala-yala yuma, tupa-tupa gum kupbaramupa, sun keca yuma mali kupbaramu. 14 Ataru neitamaida, amutu neitamai kurami nesaladi sun co bo cap, kunumna keca yuma cap dopra, Yusupdi menmena taru orketeng tamun deiki menekra deriramu jen keca kunumyakarami. Co bo deiki akeca kunumyakaramipane, Yusupdi akeca yuma bulupra, Firaun er ati dongoramu.

15 Pio tupa-tupa kunumyakaramipa, Mesir tara nesala cap, Kanaan tara nesala cap taleami co bo yuma konum gum kupu pangeda, Mesir tara neitamai kurami nesala weik, Yusup damai yakaramidi uperami. “Nun co bo cap, yuk kunumna keca capda, konum gum kupmasere. Atep nun jen keca talipu karepserume. Ware deiyo tep, kan tali dinmaserempane, denapu kunkamep do?” pepra mororami.

16 Upepra mororamipa, Yusupdi, “Uda, sun kunumna keca konum gum kupmara cadi, sun peirum keca gam kun keca yala-yala yuma duyana karepnemumpa, akeca yo pununa tep, sun jen keca karenkamsene,” pepu. 17 Upepka tep, amutu nesala yumadi sun peirami keca, domba cap, kambing cap, kuda cap, sapi cap, keledai cap akeca yuma dopra kareramipa, akeca yo pununa tep, Yusup er men di mawa deriramnga neitamai di dopra, sun jen keca kareramu. Ukuramnga deiki di, Yusup meliamnga di, amutu kurami nesalada, aketeng tamun tenpu ton cap telep kupra gam kurami.

18 Uda, aketeng tamun konum kupupa, orketeng tamun neitamai di anesala yuma, Yusup damai yaidi upepi. “Uo, nun naio. Nun ikin weik kupserada men iniptepe. Kandi diseruma cadi kan kaele. Nun kunumna keca yuma konum gum kupseu. Tonda, nundi gam keca peiramupu keca yala-yala yuma, kan tep konum kareramupupa, kandi konum talerume. Ukutaruda nundi talenup kecada, tupa akapsere ngeda butenepu kuserure. Nun pe nong cap, nundi talenup tu cap apua. Yuk ton pio gume.

19 Nun kangeda ake. Nun tuai yuma cap, nun pe nong cap, ware keca deiyo tep tali gum kupkamser do? Kandi dinmaserempa, talipu depkamepa tepa. Ukupserura cadi, nun tuai yuma cap, nun pe nong cap kunupserema deiki di, ‘Sun jen keca ton karepsetum’ tenen, pepkepe. Nun nong cap, nun tuai yuma capda, Firaundi ateng kouna utopu kupra taleserepa, er amutara nesalapu kunkamepe. Ukupserem dingeda, nun wa kouna tep, yal keca yala-yala yuma ton karepsetume. Ada tali tep gume. Deiyoda, dena gum di, gam tupa kuramepyanen, wa pepra yal keca kouptepetoda, ‘Nun tu yuma talipu men kunkamre’ tenen, pepkepe,” upepra moropi.

20 Upepra moropya tep, Yusupdi Mesir tara kwamu tuai yuma kunupudi, Firaun tep karepu. Ataru neitamaida, jen keca yuma gum kuramnga cadi, amutu neitamai kurami nesala yuma, jen jena gum, tali jen si tepra kurami ngeda, ikin pio weik cadi, Mesir tara nesala yuma sun taleami tu kunupropipa, Firaundi taleamupa, erngepu kwamu.

21 Tonda, Mesir tara neitamai ban-ban yuma kurami nesalada, Yusupdi kunuamudi, anesala dopra Firaun er amutara deriramupa, sun yuma Firaun taleamu. 22 Uda, amutu neitamai isok si eremna tep, mem pel talepra deiyo neng kurami nesala tep nengeda, Firaundi sun melimna tep, er teneamu taru jen keca bokra tupa-tupa kareramu. Sun jen kecada, Firaundi tali kareramnga cadi, sun jene akwamupa, sun tuai men kunumamipa, Yusupdi men dororamu. Adeiyo tep nengeda, sun tu men kunupropi.

23 Angeda sun yuma konum kupi pangeda, Yusupdi Mesir mutu neitamai kurami nesala tep upepu. “Ukuda sun nong cap, sun tu cap, akeca yuma ne deiyo ngebo Firaun tep konum kunupropsisi. Ukupsa tep, ukutaru yal keca yala-yala yuma karepkusene. Karepsenepa, sun yumadi akeca kourbenkurume. 24 Kouprumpane, amenda taru akeca-keca konum bolokrepa, kiprum dingeda, ukupkamrume. Akipkamrum keca dopra, pamu bari bokra deipkamrume. Ukupmumdi, apamu bari neitamaida, tenpunge dopra Firaun tep tamupra karenkamserume. Apamu bari deipkamrumai neitamai bokra, dumbari ngeda ada sun yal keca cap, sun pe jena cap, sun nyapsilip yuma sun jena cap tep, dopra jenkamrume.” Yusupdi amutu nesala tep pepu.

25 Upepupa, aneng yuma gekepidi, “Uo, naio. Nunda talipu konum depmatepe dinin, kandi ange kupkamserema deiki di lyepserempa, gam kunkamepe. Atep telepe, nunda Firaun er amutarapu kupra, er tali pel don nesala kunkamepe taru erdi, ‘Kange deipsetue’ tenen, putaserure,” pepi.

26 Ange tep nengeda, Yusupdi “Ukunkamrume,” pepka deiki di, amutu neitamai kurami nesala angepu kurami. Tonda peraturan kepra sekra deipi. Ataru akupitopu, aupu sekmape taru ton tupa kununge. Ada, sun kouameng keca bolokrap kiramenge ngeda bokmengedi, pamu bari deipmengopda, tenpu ngeda Firaun ernge tep karepungedi, dumbari ngeda sun pedi doronunge. Tu dangeda, amutu tu yuma Firaun taleamu dinin, amutu isok si eremna deiyo neng, sun tu puda, men kunupropi. Atep sun dipu tupa talerami.

27 Uda, Yakubdi deiamupa, dadeipdanen yakaramyanen, deipbarami nesala, Israel nesalada, Mesir tara neitamai dinin, mutu si Gosen mutu neitamai kurami. Atu talepra kuramidi, sundi nyapu weik deipra baramipane, nesala gung pio weik kupbarami.

28 Uda, Yakubda, keteng tamun denge weik 17 tahun deiki di, Mesir mutu neitamai kuramupa, erda keteng tamun denge weik, 147 tahun wisi deipu. 29 Wisi weik deipupa, ‘Depkaman ja,’ tenepu taru konum damai kupupa, Yakubdi er mi Yusup tep upupupa, yaupa, aupu pepu. “Ne mio, kandi ne tep kange derinerum do? Pio bicaupu tenepnemem dingeda, kan buru ne kail ^{▼▼kail – Pumun taru sun Israel nesaladi kurami. Pedina upu pepkure ngebodi, aupu gekepkure ngebo tep, er kail iriamu tara er buru dongopra, pedina upu perami. Deiyoda, aupu gekepkure ngebodi, ‘Pio tek sisi upu pepkunere. Angebodi pepkunertopu, tek sisi kupkamre, tenepkamnem’ tenen, ukurami. Sun adat tepa.} iriamu tara deipmemdi, pedina upu peipkunereme. Ada, neda kan nai sisa tep, ‘Dakwapye’ tenena gum dinin, ne ila di putapnerur keca kupkamnereme. Ada tali upu pertamna gum dinin, ne moropkuken utopu, bicau tenepneremdi, angepu kupkamnereme. Ne moropken kecada ake. Ne depnyopda, ne nong dopra, Mesir mutu neitamai men peipkamnerume.

30 Ange gum dinin, ne nong dopra Mesir mutu tapra, ne nong dubenememdi, ne apu yapu depipa, tu paliramyaipu, tu palipkamnerume. Ada ne apu yapu konum depitopu, depkamne taru tep pepkene,” Yakubdi Yusup tep pepu. Upepra moropupa, Yusupdi er nai tep, “Naio, apepra moropmaneremtopu kupkamkene,” pepu.

31 Upepupa, Yakubdi tamupra pepu. “Tali namna tep men pepnere. ‘Pio tek sisi kupkamnere,’ tenepkamkena tep nengeda, “Pio tek sisi kupkamkene” pepra deipneo,” pepupa, Yusupdi, “Naio, pio tek sisi angepu kupkamkene,” pepra deipu. Upepra deipupa, er nai bo Yakubdi (er si ton Israel perami), maca giso dipdongopra tekudi, Allah er si erepu.