Gen 48 | XteSC | STEP | Uda, sun yuma dakuramipane, amenda taru ton nengdi Yusup tep, “Kan nai sisapu weik jenmare,” pepra lap pepipa, Yusup gekepudi, erdi deipu nyapu buteneda, Manase cap, Efraim cap dopra er nai damai bei.

Genesis 48

1 Uda, sun yuma dakuramipane, amenda taru ton nengdi Yusup tep, “Kan nai sisapu weik jenmare,” pepra lap pepipa, Yusup gekepudi, erdi deipu nyapu buteneda, Manase cap, Efraim cap dopra er nai damai bei. 2 Beipa, akunmai nengdi Yakub tep, “Kan mi Yusup diryanmakere,” pepipa, gekepu dingeda, pu weik jeramupa, puto pio bounpu kuramu dinin, pio piripetepudi, er manai di bukrou.

3 – 4 Bukrapudi Yakubdi Yusup tep upepu. “Pumun taru Kanaan tara neitamai dinin, mutu si Lus ^{▼▼Amutu tenpu dinin, er sida butene perami. Menop tarada, Lus mutu perami dinin, Yakub amutu mapu taru, ken mapka deiki di, Allahdi er tep upu peipupa, Yakubdi amutu si tep, Betel mutu, si pepra deipu.} mutu damaida, akeca-keca yuma talepra, pio deiki tara kuredi, Ila Puto Deiyo Ngebo kurur Allahda, ^{▼▼Allah – Acada, Ibrani upu deiki di, Allah er si tep, ‘Allah Shadday’ pepra seki. Aupu ‘Shadday’ deiyoda, sundi, ‘Allahda akeca-keca yuma talepra, pio deiki tara kuredi, Ila Puto Deiyo Ngebo kurure,’ tenena tep ‘Shadday’ pepra seki. Sun kael kemna tep, angeda konum jenek kupra sekmepu.} ne ken mapsa deiki di ne damai yana upeipneu. “Nedi meliamkenepa, kandi nyapu deipmempa, dadeipdanen baramenganen, amenda taru kupkameng nesalada, pio weik kupbankamenge. Kandi deipmempa, dordi dadeipkameng nesala yala-yala weik kupkamenge. Tonda, sun amenda taru kunkameng nesala, sun karena tep, Kanaan tara yuma karepnepa, talenkamenge. Ada kandi deipmempa, dortaru dadeipbankameng nesaladi, Kanaan tara pio talenkamenga tep pepkene,” Allahdi upepra pedina upu peipneu.” Yakubdi pepu.

5 Upepudi aupu ton dukdongopra pepu. “Ukuda Yusupo, neda kan damai kapul men yasi taru neitamai, kandi Mesir mutu neitamai deipmum nyapu butene sun sida, Manase cap, Efraim capda, yuk nesaladi sun tep nengeda, ne nyapu utopu tenenkamenge. Ada, nedi Ruben cap, Simeon cap deipsitopu, yuk nengdi kan nyapu butene tep nengeda, ‘Anyapuda, Yakub er nyaputo kurerunge’ tenen, penkamenge. 6 Ukutaru di dipra, oryankamre taru neitamaida, kandi nyapu ton cap deipmemnyopda, sunda kan nyapupu kunkamenge. Amenda taru sun nai yape depmepyopda, adinen sun tu dopropkamengada, sun du yape si deiki di dopropkamenge.

7 Pumun taru Padan-Aram mutu tapra, Kanaan tara tamupra yakanmasi taruda, bisi neitamai tupa banmapu taruda, ne ner Rahel depupa, ne ikin kange doupra engepsi. Rahel depkaida, Kanaan tara neitamai dinin, mutu si Efrata mutu damai depu. Depupa, acapu er nong dopra tu palipsi. Ada Eperat mutu bisi piriman, ne ner Rahel tu palipsi.” (Amutu tenpu dinin, si butenenge perami ada, Betlehem mutu ton perami).

8 Aupu pepu taruda, Israeldi Yusup er nyapu butene epudi, “Anyapuda ware ngebodi deipu do?” pepra asipetepu. 9 Asipetepupa, Yusupdi tamupra pepu. “Gume naio, anyapu buteneda, Allahdi meliamneupa, nedi Mesir mutu neitamai, amutu deipsi nyapu butene adano,” pepu. Upepupnen Israeldi, “Atep Allahdi anyapu butene tep melimredi, ‘Pio telep kweipkamre’ tenen, ne damai deipnemempa, sun deikida telep upu pepra deipkune,” pepu.

10 Uda, ataruda Israel er asuru konum mali kupbaramnga cadi, telep kupra men epmanto kupka tep, Yusupdi er nyapu butene dopra, Israel er mening dam deipupa, er nai bodi anyapu mutupudi iripu. 11 Iripudi, Yusup tep upepu. “Uo, ne mi Yusupo, pumun taruda, ‘Kan urasin kange di ton cap pio men dinkamne,’ tenemsi dinin, ukutaruda kanpu gum dinin, kandi deipmum nyapu ton epmane. Ada Allahdi telepe tenemudi, go karepmanera tepa,” pepu.

12 Upepupa, Yusupdi er nyapu butene, Israel er kail deiki bukmarengai di dopra, Israel er urasin tara deipudi, Yusup er nong genepdongopudi, ‘Ne nai gispal dopkun’ tenen, er pe urasinda, tu damai lung-lungdongopu. 13 Ukupu dingeda, Yusupdi er nyapu butene doprapudi, Efraimda er dumsisi buru di talepudi, Manaseda er tebalal buru di talepudi, er nai Israel dabukmaupa, Efraimda Israel er tebalal tara deipu. Manaseda, Israel er dumsisi tara deipu. (Ada Efraimda weit bo kupka cadi, tebalal tara deipudi, Manase du ngebo kupka tep, dumsisi tara deipu).

14 Ukupu dinin, Israeldi er dumsisi buru weit ngebo Efraim, er giso deiki deipra talepu. Tonda, Manaseda, du ngebo kuramu dinin, Israel er tebalal tara buru Manase er giso deiki deipra talepu. Ukupuada, er dumsisi buruda, tebalal tara buru deiki deipudi, anyapu talepu. 15 Israeldi anyapu butene tupa talenmau taruda, er mi Yusup tep atelep upu pepra deipu. Ada, ‘Allahdi Yusup melimkamra deiki di, telep kweipkamemer’ tenen, aupu pepra deipu. “Ukuda Allahdi anyapu butene tep, ‘Weika di melimrepa, pio telep kweipkamre’ tenen, Allah moropne. Ada ne nai yapu Abraham cap, Isak cap, sundi er sipu erepra embaramipa, sun tep diramu Allah tep pepne. Nundi nun domba bisam tep pio melipra kalengameptopu, Allahdi ne gam kuramsi taru yuma cap, ukutaru cap, tupa melipra kalengnerur Allah tep pepne.

16 Ne ikine kuramneunge yuma neitamai di, lortamamneu Allahdi, ‘Kan nyapu butene tep melipra pio telep kweipkamre’ tenen, pepne. Tonda anyapu buteneda, yuk nesaladi sun tep, ‘E anyapuda, Israeldi deiamu nyapu kurunge. Sun apu ya peda, Abraham cap, Isak cap kuramrei. Sunda ayala nengdi deipi,’ pepra, ‘Pio penkamenge’ tenen, Allah moropne.” Israeldi pepu.

17 Israeldi er dumsisi buru dopra, Efraim giso deiki deipra talepmaupa, Yusup epudi, mali kange doupu. Mali kange doupka cadi, ‘Er dumsisi buru dopra, Manase er giso deiki deipmatue’ tenen, Yusupdi er nai buru talepra, ‘Ordeipkun’ tenen, piripetepmau. 18 Piripterepmau taruda upepu. “Naio, kan walwalapmareme. Atara mida, menmena deipsi mi cadi, kan dumsisi buruda, er giso deikipu derina telepe. Er giso deiki taleprume,” pepu.

19 Yusupdi upepra piripetepu. Dinin, er nai bodi upepu. “Gume, ne mio. Ne kaele. Ne mangkau kange doupra men kupne. Menmena deipmum mi Manaseda, er ton ila ngebo kupredi, nyapu dadeiprepa, dadeipdanen baramenganen, dortaru kunkameng nesalada weik kupbankamenge. Ukupredi yambul mambul kunkamre dinin, er weit bo Efraimda, ila mambul weik kunkamre. Er du bo deiki tarato kupredi, erdi deiprepa, dadeipdanen baramenganen, dorkupkameng nesalada, yala-yala weik kupbankamenge.

20 Ne nai Allah, kan si deiki di apepmanu upu yuma pepra deipne. Yusup kan tep nengeda, Allah meliamredi, Efraim cap, Manase cap tep, pio telep kupra deipkamretopu, ‘Telep kupra melipketue’ tenen, Allah moropne.” Israeldi aupu yuma pepra deipu.

Israeldi aupu pepka deiki di, Efraim dopra, deiki tarato erepra deipu dinin, Manase tep nengeda, yambulanun iriamu tarato dopra deipu. 21 Ukupu dingeda, Israeldi Yusup tep upepu. “Uda, ne mio, neda depmanto konum kupnerepa, depkaman dinin, kan tep nengeda, Allah weika di melimkamkere. Tonda, amenda taru kan apu yapu kurami mutupu, Allahdi kan tep dopra dubenkamkere.

22 Tonda kanda, kan du yape sun deiki tara kupra, ila nimi deiyo ngebo kuruma cadi, nedi kan tep tenpu mutu ton karepkene. Ada menop taru, ne jen cap, parang ya cap dopra, sun Amori nesala popbisipsidi, dopropsi mutu gon cap, mutu iriye cap, karepkene,” Israeldi Yusup tep, aupu yuma pepra deipu.