Genesis 49

Yakubdi er nyapu tep, keteng tamun dorkupbankamunge tep pepu upu

1Amenda taruda, Yakubdi er nyapu yuma tep upupupa yaiopda, erdi sun tep upepu. “Amenda taru kupkamser keca lape pepkusena tep, ne damai bulupra bukrumupa, aupu pepra deipkusene. Nedi pepsenetopu kunkamruma tepa,” Yakubdi pepu. Upepu dingeda aupu pepu. 2“Ne Yakubdi deiamsisi neng tep, ne pepkusen upu gekepneso. Neda sun nai bo Israel kunune.

3Ruben, kanda nedi menmena taru du ngebo deipkesi. Ne puto weik kuramsi taru, menmena deipkesi mida kan ca. Yuk neng tep gispal dorameng dinin, kan tep ngeda weika di gispal dokununge. Yuk neng ton puto yambulanun kunung dinin, kanpuda ila puto weik ngebo kurume. 4Ukupra kuramum dinin, ila me embarepa, longteng-lonteng peramretopu kuruma cadi, amenda taruda ila mambul ngebo men kunkamrume. Ada tali tep gum dinin, deiyoda kan nai bo maramngaipu welepmumdi, ne dopsi ner upula nyakmuma deiki di, mali kupra deipnemuma tep, aupu pepkene.” Yakubdi Ruben tep pepu.

5“Simeon cap, Lewi capda, sun kikiman utopu kurerunge. Sun parang ya dopra nimi porbarerunge. 6Atep, sun cap, yuk neng cap upu sisingkameng taruda, ne cap melipra buknedi men gekenkamne. Sun cap, yuk neng cap, bulupmenge taruda, ne cap buknedi kikiman men kunkamne. Deiyoda sun butene nengda, tulum weik kupupa nimi weik poptaprei. Sundi, ‘Ukupkuneme,’ tenepreitopu, yuk nesala sun taleami sapi yan melmele sekdongoprei.

7Nimi bicau tenena pio gum dipapu, yu weik kuprepa nimi portamrerunge. Angeda pio mali tep, Allahdi wenepseredi wipkamsere. Wenepra wipseredi, sun yala nesala yuma dopra, Israel yala nesala kunkameng mutu neitamai dinin, yuk-yuk bokra dokotemrepa, yuk-yuk kunkamenge.” Yakubdi sun Lewi cap, Simeon cap, sundi deiprengepa, dadeipdanen bankameng nesala tep pepu. 8“Yehuda, kan weitapsilip yumadi kan tep, ‘Erda pio mambul ngebo,’ pepra gispal donkamkenge. Kan nai bo deiamu nyapudi, kan gispal dona tep, sun urasin genepdongopmengedi, gispal donkamkenge. Kandi yuk mali neng tep, popra bisbisa kapmemdi, kan buru sun kum dam talenkamrume.

9Singa mida, puto weik kuredi balila weik kuramretopu, Yehuda, kan peda utopu kware gum di puto weik kurume. Singa pusdi, ‘Akeca popra jepkun’ tenen, kalekbareanen, popredi jepra, er kange deipra ati telep kupra tamupra yakaramretopu, kan peda utopu kurume. Singa jena epredi, beipra kalekra pepmareadi, dang pepra popra jeramretopu kurume. Yu singa pus mapmaryai, nimi men dumameptopu, ware nesaladi kan tep yana dupetepketenge do?

10Ila nimi deiyo nengdi, nimi deiyo neng kemne maca talepmengedi, sun yan dan-dana deipmengedi, amaca neitamai tu dipra talepmengedi, nimi yuma tep upu bongdinunge. Ukuramengtopu kan cap, kandi deipmempa dadeipdanen baramenganen, dorkunkameng nesala, Yehuda yala nesala neitamai di, ila nimi deiyo kepmenge neng peda, tupa ukunkamenge. Nimi deiyo neng kemna tep talerameng macada, kan yala nengdi pio talenkamenge. Yehuda yala nengdi amaca pio taleramenganen, amenda sirya taruda, amaca pio talenkamre ngebo, ila nimi deiyo ngebo yaryopda, amacada ernge cadi, er pepu dopropkamre.

11Ataruda, nimi tuai nesala ban-ban yumadi, er upupu gekepmengedi, er amutarapu kunkamenge. Kware gum di, tali kange doupra, telep kupra kuramre ngebodi, er keledai bisam dopra anggur tapu gerekra deriramretopu, tonda er kuda dopra, telep co damai gerekra deriramretopu, Yehuda, kan yala nesalada kange deipra teleppu kunkamenge. Kan yala nesaladi, anggur tapu mokon purupdongopmengedi, amokon deikida, sun opkal me kunkamenge.

12Telep anggur meda pio miriramretopu, sun asuruda pio telep kupra mirinkamre. Sapi moum teyung pio kururamretopu, Yehuda yala nesala, sun si telep kupra lengkamsere. Sunda pio kipe kungedi, urasin telep nesalapu kunkamenga tepa. 13Zebulon, kan yala nesalada, ila laut mokon pirman bena kunkamenge. Ila mungna mukre taruda, laut mokon deiki embaramre gapung coda, ‘Mungna di popserur’ tenen, sun kunkameng mutu wengbengedi, keanapu kunkamenge. Sun kunkameng mutu sirikda, Sidon mutu damai, sirya yana sekropkamre.

14Nimidi puto weik keledai bisam dopra, bunga weik kipra, er bali tara koupdongopmengepa, embaramre taruda, er beipye peingna tep, bena bukrepa, abunga kin kecada tu barimrure. Ukuramretopu, Isakar kan yala nesala, ange utopu kunkamenge. 15Isakar yala nesala dipetepmengedi, ‘E, nun mutuda pio telepe, nun beipye peingnai cap, kunai capda aca pio telepe’ tenen, kael kepkamenge. Kael kepmengopda, sundi ikin keca dopra ereipkamenge. Yuk nengdi sun tep, bisbisa kapmengedi, sun deiki tara kungedi, ‘Nun pel tali pel dopseso,’ pepra dipmengedi, ikin keca sun nong deiki deipmengopda, telep pua tenepmengedi, pio piripetepra pel tali lupra donkamenge.

16Dan, kan yala nesalada, Israel yala nesala kununga cadi, sun pe yala neng tep, telep kupra upu bongdinkamenge. 17Ila karayong bisi do, tali metek bisi do, yu bal mutmuta palpal inipra mapmaryadi, kuda deiki bukmare ngebo amutu baryopda, baldi akuda yan si toprepa, kuda lukdana ereproprepa, popmare ngebo komorkweteprepa tuai sangrure. Ange utopu, Dan, kan yala nesalada, ayu bal utopu kunkamenge.” Yakubdi er nyapu tep pepu.

18Upepkopda, Allah morona tep upepu. “Uo, ne nai Allaho, ‘Kan dipu loptapnememdi, melimkamnerum’ tenen, dinapu kukenune,” pepu. Upepkopda, aupu ton pepu.

19Gad, kan yala nesalada, yuk yu nengdi, ‘Aneng popmepedi, sun keca upula dopropkamep’ tenen, poryankamsenge. Ukupkameng dinin, Gad er yala nesaladi ayu neng tep, ka tamupra sun amnyo tara dombengedi, popbisipkamenge. 20Asyer, kan yala nesaladi jenkameng kecada, tau pio telep keca jenkamenge. Sun ila nimi deiyo neng, Raja neng jerameng keca utopu kecada, Asyer er yala nesaladi bupra ketenem dinkamenge.

21Naftali, kan yala nesalada, ukunkamenge. Nimidi bura tara rusa bisam talepra koupdongonmengepane, amenda taru arusa loptapmengepa, pio kange deipra bura saka baramretopu kunkamenge. Rusa bisam ner ngedi, pio telep kupra rusa nyapu deriramretopu kunkamenge.

22Yusup, kan yala nesalada, metek embaramre me pirman anggur tapu bongopredi, nepbaramyane, du weik moupredi, nimi wirameng beilya deiki embaredi, er bodi singipredi, inimamretopu kunkamenge. 23Yu nengdi kan yala nesala tep, jen talepra popetepkameng dinin, men popkamenge. ‘Anesalada poptapkamep’ tenen, yu kuprepa, marapetepkamenge.

24Ukupetepkameng dinin, mar men benkamre. Er kware gum di, er pe jen dim peprap talenkamre. Er buruda puto weik cadi, men moropsemkamre. Ukupra telep kupkamengada, tali tep gume. Deiyoda, Yakubdi si eremamu Allah, pio puto weik Allahda, er buru deiki di talepra melimkamra tep, teleppu kunkamenge. Tonda, domba peina nengdi, sun domba tep bicau tenepmengedi, telep kupra peiramengtopu, Allahdi Israel nesala tep, pio kalekra melimkamre. Ila mutu yangne gel men erepmanto tep, apio kuputopu, Allahda pio kuredi, Israel nesala melimkamre.

25Yusup, yan yala nesala teleppu kunkamenga deiyo butene ngeda, kan nai bodi si eremamu Allahda, sun yuma melimkamsera tepa. Tonda, akeca-keca yuma talepra, pio deiki tara kuredi, pio Ila Puto Deiyo Ngebo kurur Allah, erdi kan yala nesala tep, telep kupra derinkamsere. Allahdi melimsere kecada yala weik dinin, im neitamai di mo cemamrenge cap, tuai neitamai di me bungna gutukra gembaramrenge cap, tali me embaramrenge capdi melimserure. Tonda, erdi melimserepa, sun nerapu mundu douamengepane, mi deipmengopda, moum dinimnunge.

26Pumun taru kwamu mutu yumada, ‘Pio telepe’ tenenup dinin, angeda yambul telepe pua. Kan nai bodi telep upu pepra, telep kupra deipmakenada, pio telepe. Nedi, “Ukupkameng, ukupkamenge,” pepra, pio telep upu pepmakenada, ‘Allahdi melimkerepa kupkamkere,’ tenen, Allah moropmakene. Yusupda, er du yapu weik dakunung dinin, erda ila mambul ngebo kurura cadi, sunda tali nengto kununge. Erda sun deiki tara kuredi, nimi deiyo ngeboto kurure.

27Benyamin, kan yala nesalada ukunkamenge. Bura tara dumre kamdi, er putapre keca kalekra embaredi, akeca poptapra jerure. Idona taruda, gawal tapmare ngeda bokredi, er nyapu tep karyakarure. Benyamin yala nesalada, ange utopu kunkamenge.

28Asi pepmap nengda, sundi deipipa, dadeipdanen baramya deiki di, “Israel yala nesala, 12 yala kununge,” penungada, sun apu yapu arup sekmape. Tonda, sun nai bo sisa di, er nyapu 12 neng tep, Allahdi aneng tep, ‘Ukupkamre, ukupkamre’ tenen, amenda kupkamre keca tep aupu pepra, sun deiki pepra deipu upuda akonuma. Yakubdi pepu.

Sun yuk-yuk dinin, sun yuma sun kunge keca yuk-yuk kuramitopu, tenepudi aupupu pepra deipu.

29Aupu konum pepu dingeda, aupu ton cap dukdongopra pepu. “Ukuda ne apu yapu deramitopu, ne peda amenda depkaman ja. Ne konum depnyopda, ne nong dopra Het mutu ngebodi taleamu wa neitamai, agel imir pumbon peipkamnerume. Atuda, Het yala ngebodi er sida Efron, erdi taleamu wa ake. 30Ada ne apu bo Abrahamdi, ‘Ne ner Sarah peipkamne’ tenen, kunupu wa, Kanaan tara neitamai dinin, mutu si Mamre mutu damai, awa tu kunupudi, amutu sida Makpela si karepu. Awada, Het yala ngebodi taleamu tu cap, gel imir cap kwamu dinin, Abrahamdi kunupu.

31Agel imir tenpu dinin, ne apu bo Abraham er ner depupa, acapu peipu. Er Abraham cap, er mi Isak cap, Isakdi domu ner Erepka cap deramipa, sun nong yuma, agel imir pumbonpu peipbarami. Ne dopsi ner Lea ton depupa, agel imir pumbonpu peipsi. Ne ton depnyopda, acapu peipkamnerume. 32Uda awa tu cap, agel imir capda, sun Het yala nesaladi nun apu bo Abraham tep kunupi,” Yakubdi er nyapu tep pepu.

33Upepu dingeda, isin konum dakropkou taruda, er yan tuai deipmau dinin, meprapudi er man ason deikipu derirbeu. Ukupra kunmauanen, amenda taruda, isin dakropupa depu. Er isine gum kupupa, er apu yapu konum men di deramitopu, er peda depu.