Gen 50 | XteSC | STEP | Yakub depu pangeda, Yusupdi er nai akupmauaipu iriprapudi, ila di engenmaudi, er nai nong mutupu.

Genesis 50

1 Yakub depu pangeda, Yusupdi er nai akupmauaipu iriprapudi, ila di engenmaudi, er nai nong mutupu. 2 Mali kange doupra dakunmaipane, Yusupdi er amutara pel domi kwetena deiyo neng tep peipupa, sundi Israel er nong dopra dubeidi, ‘Er nong berbera lyuprur’ tenen, sun obat utopu keca derinmaidi, er nong ketenepra deipi.

3 Apel dopmai ngeda, ue taru weik 40 tumi deiki di apel donmai. Deiyoda, derami nesala sun nong lyuna tep sengdongon obat deriramyada, ware tenputo deiki di, ue taru 40 tumi deiki di apel dorami. Ange konum kupipa, sun Mesir mutu kurami nesaladi, Yakub er gispal dona tep, ue taru 70 tumi deiki di mambul kange douna cap, engena cap, malye pena cap kunmaiyanen gawal daki.

4 Sun tenepi taru neitamai engena cap, gispal dona cap, ayuma konum daki pangeda, Yusupdi Firaun er amutara kurami deiyo nesala tep upepu.

Sundi ne tep telep ngebo tenepnerumdi, kange deipnetumtoda, ne melimna tep Firaun damai bena apepkurume. 5 Yusupdi upepkere. “Ne nai bo kapul men depu taruda, moropneupa, nedi, ‘Ange moropmanerumtopu tek sisi kupkamkene’ pepra deipsi. Ne naidi upepneu. ‘Ne adipapu depkamana tep, Kanaan tara neitamai, nedi nimi peinai tep kumupra paliamsi gel imir pumbonpu, ne depnyopda acapu peipkamnerume,’ pepra moropneue. Atep, ukutaruda, kandi, ‘Telepe,’ pepnerempa, ne nai er nong dopra peirbenkamne. Ukupnyopda, adipapu tamupra kan damai yankamne. ‘Yusupdi ukupra moropkere,’ pepra, Firaun tep peipnerume,” Yusupdi aneng tep peipupa, sundi aupu dopra, Firaun perbei.

6 Konum pepipa, Firaundi Yusup tep, “Telepe, Yusup kan nai bodi, ‘Ukupkamnerume,’ pepra moropupa, ‘Ne tek sisi kupkamkene,’ pepra pedina upu deipmumtopu kunkamreme,” pepu. 7 Firaundi Yusup tep upepupa, Yusupdi er nai er nong dopra, ‘Kanaan tara neitamai peipkaman’ tenen, dubeu. Er bisi beu taruda, Firaun er amutara kurami deiyo nesala cap, uda Mesir mutu neitamai kurami ila neng yuknge cap kikimanpu bei.

8 Tonda, Yusup er nyapsilip yuma cap, er ati kikiman pel dopra kurami nesala cap, er du yape cap, er nai Yakub er yala nesala cap, sun nyapsilip cap, sun yumadi Kanaan mutu welerbei. Sun bei dinin, Gosen mutu acapu tapi nesalada, sun aneng sun nyapu tepa. Tonda, sundi talepra peirami keca, gam keca yuma dopra men dubei. 9 Sun welerbei taruda, kuda bisam bali deiki bukra embarami neng cap, kuda bisamdi gipra embaramipa, tu deiki embaramu keca cap dopra dubei. Yusup cap bisi banmai nesalada, gung ila weika di bisi banmai.

10 Sun yuma bisi banmaiyane, Yordan mutu damai dinin, mutu si Atad mutu beidi, gandum du sekra deipmengepa, kalapredi gege pepmengepa, ^{▼▼Gandum du wena tep, ukurami. Menmenada, gandum du taikra pala keca deiki deriramidi, buru dana-dana talepra long-long peramipa, kumanya di, pung pepnepa, katbalange bendopnedi, gandum dunge apala keca deiki tupa kuramu. Adu keca yumada nimidi gapra jerami.} du sakroprepa kiramengai, amutu bei. Amutu bei dingeda, sun yumadi mambul kange doupmaidi, ‘Nun nai bo Yakub depue’ tenen, ila upu deiki di malye pena cap, engena cap kunmai. Yusupdi ue taru yoneitam bari tumi deiki di, er nai gispal dona tep, malye pepra, engenmaudi, ikin kange dounmau.

11 Sun yuma ukunmaipane, amutu kurami nesala, Kanaan tara nesala epidi upepi. “Uo, sun Mesir tara nesaladi, ila upu di malye pena cap, engena cap kunmangada, tali tep gume. Ada mambul ngebo depka tep kunmanga cadi, ada mambule.” Upenmaiya tep nengeda, atara di dipra, aneitam taru yuma cap, amutu sida, Habel-Misraim karepidi, si perami.

12 Ange tep nengeda, Yakubdi, “Angeda ukupkamrume,” peiputopu, erdi deiamu nyapudi angepu kupi. 13 Yakub er nyapudi er nong dopra, Kanaan tara neitamai dubei. Ada mutu si Mamre mutu damai, wa tu si Makpela wa neitamai kwamu gel imir pumbon dongopi. Agel imir cap, awa tu capda, pumun taru Abrahamdi, ‘Ne yala neng nimi peina tep,’ tenepudi kunupu tuai tepa. Tonda ataruda, Het yala ngebo er sida, Efron taleamnga cadi, Abrahamdi kunumna keca karepupa, Efrondi Abraham tep awa cap, agel imir cap karepu.

14 Uda, Yusupdi er nai bo konum peipu dingeda, er cap, er du yape cap, sun kikiman bei nesala yuma cap, ka tamupra bisi banmaidi, Mesir mutu tamupra bei. 15 Yakub konum depupa, Yusup er du yape yumadi upepdai, “Uo, nun weit Yusup tep pio ikin keca er nong deiki deipmupu ngeda, tupa tenimnapu kuserur do? Yusupda, er dipru neitamai akecapu tupa tenepseredi, ‘Kwang dakamser do?’ tenen, kware dangmaidi upepdai.”

16 Kware weik kunmaiya tep, sundi upu peipipa, yuk nengdi Yusup damai lap perbei. Sundi upepu. “Nun nai bo kapul men depu taruda, aupu ton peipseu. 17 Yusup tep upepkamrume. Kan nai bodi upepkere. Kan du yapedi kan tep, pio mali-mali weik kupkeia deiki di, ikin keca weik kan nong deiki kwamkeu. Dinino, sundi pio mali kuraminge tep ngeda kaukepkurume. Kan nai bodi si eremamu Allahda, kan du yape peda, er sipu erepra gispal donunge. Atep, sundi mali kupra deipkei ngeda kaukepkurume. Kan nai bo Yakubdi upepra moropkeu.” Yusup er du yapedi aupu pepra dokotepipa, yuk nengdi aupu lap peryaipa, Yusup gekepu dingeda engepu.

18 Amenda taru Yusup er du yapedi er damai yana, er gispal dona tep, er urasinai tu deikipu bukra ali dakmaidi upepi. “Ukutaru nunda kan tali pel dona nesala utopu kunupe. Kan iriamu tarapu kunkamepe,” pepi. 19 Upepi dinin, Yusupdi sun tep upepu. “Gume, sun kwar dangnada yaprume. Neda Allah kuretopu, upu bongdina ila deiyo ngebo kununa tep, aupu pepnerum do?

20 Pumun taruda sundi, ‘Yusup poptapkamepe’ tenen, tek sisi mali kupra deipnerum dinino, ataruda Allah er kangeda, ‘Gume, ukupra dakupmengepane, amenda taru angebo Yusup, er pel dopkamnerya deiki di, depmanto nesala weik lyepkamne,’ teneramneue. Atep erdi kaukepseupa, mali kweipnerum ngeda telep pua. Ukutaru apel donupe deiki di, Allah men di teneramseu ngeda, konum katuai kuprepa, kael kepmape.

21 Ange tep nengeda, sun kwar dangna yaprume. Nedi sun cap, sundi deiamrum nyapu cap, sun nyapsilip yuma cap tep, sun putasere keca tali lupra karenkamsene.” Yusupdi er du yape tep pepu. Aupu utopu upu ton upepka deiki di, sun dipru kwa dipudi, telep upu ton bouna di pepupa, sun yuma tali kange doupra teleppu kunmai.

22 Yusup cap, er nyapsilip cap, uda er nai bodi deiamupa, sundi deiami nesala yuma cap, Mesir tarapu pio kurami. Yusupda, keteng tamun denge weik, 110 tahun deiki kuramu. 23 Ataru neitamaida, erdi deipu mi Efraimda, ner dopupa, sundi deiprei nyapu cap, uda aneng ton sundi deipi nyapu cap, anyapudi deipi nyapu cap epu. Ange utopu, Yusup er mi Manasedi deipu mi, er sida Makir, erdi deipu nyapu ton epu. Ada anyapu deipi taruda, ‘Yusup epkur’ tenen, anyapu dopra, Yusup er kail deiki deipbaramipa, diramu.

24 Sun dakuramipane, amenda taru Yusupdi er du yape tep upepu. “Ukuda ne depkaman ja. Ne depkaman dinin, Allahdi sun yuma tep melimkamsere. Ada, Allahdi nun apu yapu Abraham cap, Isak cap, Yakub cap tep, ‘Amutu karepkamsene,’ pepra, pediramu mutupuda, melipra dubenkamsere. Mesir mutu neitamai dopropseredi, Kanaan tara dubenkamsera tep pepsene,” Yusupdi pepu.

25 Upepudi aupu ton dukdongopra pepu. “Ne du yape, ne kaele. Allah melipseredi dopra, Kanaan mutu dubenkamsere. Atep nengeda, Mesir mutu tapra, Kanaan tara benkamrum tarada, ne yo dopra Kanaan tara dubenkamrume. Ne yoda, amutu neitamai tara gume. ‘Pio teka tenepsetene’ tenen, sundi ne tep, ‘Nunda tek sisi kan yo dopra, Kanaan mutu dubena peipkamepe,’ pepra deipneso,” Yusupdi upepra moropupa, er du yapedi, “Teka ukupkamepe,” pepra, pedina upu deipi.

26 Uda, sun dakunmaipanen, amenda taru Yusup depu. Er depu taruda, keteng tamun denge weik, 110 tahun wisi konum kupu. Depupa, ‘Er nong berbera lyuprur’ tenen, sun akeca kael nengdi, lyuna sengdongon obat er nong deiki deipidi, bekine pumbon dongopi dingeda, Mesir mutu acapu deipi.