Hab 1 | XteSC | STEP | Neda Habakuk kunune. Allah er si Yahwehdi, er upu lap pena deiyo ngebo nabi kuramsi taruda, Allah ken deiki di peamneu upu lap pepra sekne.

Habakkuk 1

Allahdi er upu lap pena deiyo ngebo, er si Habakuk tep, ken deiki di peipupa gekepudi, sekeipseu upu

1 Neda Habakuk kunune. Allah er si Yahwehdi, ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} er upu lap pena deiyo ngebo nabi kuramsi taruda, Allah ken deiki di peamneu upu ^{▼▼ken deiki – Nabi Habakukdi sekeipseu upuda, Allahdi Habakuk tep peramu dinin, Habakuk ken mapka deiki gekepudi sekra deipseu. Atep, Ibrani upu deiki di, Habakukdi acada, ‘Ne ken mapsa deiki di epra gekepsi keca’ sekne, pepu.} lap pepra sekne.

Allah er upu lap pena deiyo ngebo, Nabi Habakuk kange mun kange doupudi, Allah tep, malye pepu upu

2 Nabi Habakukdi pepu. “Ne nai Allah, ware kuprap taru ton cap, kan tep pio tupa moronkamkene dinin, men gekenkamnerem do? Tonda, nedi kan tep, ‘Mali nengdi, nun Yehuda tara nesala tep, ila ikin keca, nun nong deiki derisengepa, kange mun kange doupra kunupa tep, ^{▼▼kange mun – Ataruda, sun Israel nesala taleamu nimi deiyo ngeboda, er si Yehoakin. Yehoakinda, pio yu ngebo cadi, mali weik kuramudi, sun Israel nesala, ikin keca weik sun nong deiki deriramupa, kange mun kange doupra kurami.} naio kandi nun tep lyepdaropkamserume,’ pepra morokenun dinin, ware keca deiyo tep, ange men gekepra lyemserum do?”

3 “Ware keca deiyo tep, nun kunup mutu neitamaida, pio mali neng kunge keca tupa dinun dinin, kandi ange gum kupra men derirum do? Amali nengdi mali-mali weik kunung dinin, kandi ange dimumdi men wenemrumada, deiyo warya tep do? Ataru-ataru yumada, mali nengdi, sun ati yuma uruptapra, yuk neng tep pongedi, ikin keca weik sun nong deiki derinunge. Tonda, dana-dana tara yumada, ton tara nengdi, ton tara neng tep, upu deiki di pangdana cap, yu di upu pedana cap, tek sisi podana cap kurure. Ange yuma tupa dakunung dinin, ware keca deiyo tep, ange gum kupra men derirum do?”

4 “Amali kunge keca weik akurura cadi, kandi, ‘Ange kunkamrume, angeda men kunkamrume,’ pepra peamsemum upuda, yanitamnapu kununge. Aupuda, tek sisi, men tenenunge. Atep nengeda, nimi upu bongdin ati neitamai yumada, telep kupra dumsisi kupra, upu men bongdisenunge. Mok upupu penunge. Adeiki di mok upupu tenena neng yangedi, dumsisi kunge neng tep, warengyakanunge. Ukunga deiki di kandi, ‘Ange kunkamrume, angeda, men kunkamrume,’ pepra deiamsemum upuda, talepra men dombanunge. Kan upu tapra, sun pe kange dipapu mali-mali weik kununge.” Nabi Habakukdi Allah tep pepu.

Kasdim yala nesaladi, Yehuda yala nesala tep, popbisipkamiya tep, pepu upu

5 Allah, er si Yahwehdi, er nabi ngebo Habakuk tep pepu. “Nimi yala-yala yuma, yuk karen mutu neng kungenge epmemdi, kael kepkurume. ‘Angeda war keca deiki di kunung do?’ tenen, kange tenimtona kupkamkere. Kandi, ‘Uo, ware ka di kuptenge do?’ tenen, mambul kange dounkamrume. Angeda mesum tep men pepkene. Ada, ne Allahdi ataru yuma, pel dopyakankamnenge yumada, teka men teneptume. Ukupmantoda, yuk nengdi, kan tep, ‘Allahdi ukupkamsere,’ pepra lape pepketenga peda, akunkamne kecada, ‘Teka’ tenepra, betapra men kael keptume.”

6 “Nedi, kunkamne ngeda, ake. Ada, pio tek sisa, nedi sun Kasdim ^{▼▼Kasdim – Ton nengdi anesala tep, sun si Kasdim peramenge. Ton nengdi, Babel mutu neng peramenge. Ton tara nengdi anesala tep, Kaldea nesala peramenge. Si weneri yuk-yuk penung dinin, sun ayala nesalada, tenpu yala nesala pua. Pumun taruda, sun Asyur mutu nesaladi, Babel (sun si ton Kasdim) mutu neng tep popbisipi dinin, amenda taruda, Habakuk kuramu taru neitamaida, sun Babel, (sun si ton Kasdim) mutu nengdi, Asyur tara nesala ka di popbisipidi, sun pedi loptapdai. Ukupipa, Allahdi, aKasdim neng tep, go karepupa, sun Babel, (sun si ton Kasdim) yala nengdi, Yehuda tara nesala tep poryakarami. Ada, Allahdi sun Yehuda tara nesala wenemna tep kupu.} yala nesala go karepne pangeda, sun dipapu mutu ban-ban yuma popbisipra yana talepmengedi, arapropkamenge. Ukupmengedi, yuk nesala sun mutu cap, sun ati cap, sun keca yala-yala yuma cap, aKasdim yala nengdi, upula dopropkamenge. Sunda, pio yu weik neng kungedi, ‘Amenda taru, ware ikin keca kupkamser do?’ tenena pio gum dipapu, tali lupra popbisinapu kununge.”

7 “Kasdim nesala tep nengeda, yuk yala nesala yumadi sun tep, ila kwar kurure. Yuk yala neng yumadi, ‘Uo Kasdim jen talen nengdi, poryankamseng do?’ tenen, kware kuprepa, moropsemnunge. Tonda, sun Kasdim yala nesalada, sun pe kange dipapu, ‘Nunda ila mambul weik nesala kunupe,’ tenengedi, sun dipru eremengedi, sal nong-nong kamnunge. Ukununga cadi, sun pedipapu, ‘Ange kupkamepe, ange men kupkamepe,’ tenepmengedi, angepu kununge. Yuk nengdi sun Kasdim yala nesala tep, ‘Ukupso,’ pepra, upu men sektenge.” Allahdi pepu.

8 Upepudi aupu ton dukdongopra pepu. “Sun Kasdim yala nesalada, sun kuda bisamda, pio menmena badorure. Yuk nengdi, ‘Gume bura tara kuramre pus utopu keca, er si macan tutul penup kecada, ila sepdara barure,’ tenenunge. Dinino, nedi tek sisi pepsene. Sun Kasdim nesala talenge kuda bisamda, pio menmena banunge. Bura tara pus, er si macan tutul, erda nemupra barure.

Tonda ukupmantoda, bura tara dumre kamda, lukunda embanmaryopda, pio yu weika di, ayam ma popra jerur dinin, sun Kasdim mutu nengdi, sun kuda bisam bali deiki bukra yakanungada, yu ila weike. Dumre kamda, er yu yambulapu kurure.

Ukupmantonge ton, seng-seng pen madi, ayam ma epredi, ‘Ama popra jepkun’ tenen, karenai di pio menmena lakra yakarurtopu, sun Kasdim jen talen neng peda, utopu kununge. Ada, sun kuda bisam bali deiki bukmengedi, karen mutu di, yuk neng damai menmena yakangedi, popbisimnunge.”

9 “Kasdim neng akunga yumadi, kika deipra, ‘Yuk mutu nesala yuma popra gawal dangkamep’ tenen, poryakankamsenge. Sundi menmena mepra yakangedi, poryakanunge. Ukupmantoda, ila bupu kuramre tara di, mungna yakaramre utopu yangedi, yuk yala nesala popbisipmengedi, aneng yuma tomopra, wenemna ati derirbanunge. Ukupmantoda, me wenenga yamuramra utopu, tomopmenge nengda men nukmanto kununge.

10 Tonda, yuk mutu-mutu yuma, sun ila nimi deiyo neng cap, deiyo-deiyo neng cap, wisi neng cap tep, Kasdim nengdi aneng yuma tep, kware kuna gum dipapu, mali upu pengedi nalepra autununge. Ukungedi, yuk mutu nesala yuma, ‘Yu nengdi nun ati men weksetenge’ tenen, ila lyom gel beilya wiptenga peda, sun Kasdim nengdi, autununge. ‘Angeda mambule gume,’ tenengedi, alyom gel beilya deiki tara welepra, akati yuma wengbana tep, tu palipmengedi, tu cap, gel cap tapakra abeilya damai deipbaramengepane, konum erepyopda, atu deiki welepmengedi, abeilya kaplepra, akati wengkamenge. Ukupra wekmengedi, akati yuma urumtamkamenge. Amutu nesala yuma, tali lupra tomopra ateng koupmengedi, wenemna ati derirbanunge. Ukupra kupmengedi, amutu kuramre keca yuma aramdonunge.

11 Ukupmenge dingeda, kumanya embaramreto kupra, tenpu mutu nesala konum popmengopda, adipapu, ‘Yuk mutu nesala ton bena popkupe’ tenen, sepdara banunge. Sun Kasdim nesalada, tek sisi pio mali-mali weik kununga cadi, ne Allahdi sun tep wenepkamne. Deiyoda, sun pe puto weik kurura cadi, sun pedi sun pe tepapu, ‘Nunda, ila mambul neng kunupa tep, nunda yuk Allah ton men putaserure. Nun yuk ila neng kunkamepa cadi, Allah men putarerure,’ tenenunge.” Allahdi nabi Habakuk tep pepu.

Nabi Habakukdi, Allah tep, “Uo, naio, ware keca deiyo tep, sun mali nengdi poryankamseng taruda, kandi men lyepropkamserum do?” pepu upu

12 Ne nai Allah Yahweh, kanda ila puto ngebo, pumun taru di akeca-keca kapul men ketekeiamum taru di, kan konum akuramume. Tonda, kanda gam pio kunkamreme. Kan sipu eremkenune. Kanda, Pio Lek ^{▼▼Lek Ngebo pepkada, ‘Erda bol kurun ngebo kuramu’ tenena gume. Aupu deiyoda, ‘Mali kun keca tenpunge peda men kurur ngebo’ tenen, lek ngebo seku.} Ngebo, Ila Eremna Ngebo kurume. Atep nengeda, nedi moropkene. ‘Nun Yehuda tara kunup Israel nesalada, lyepropsetumpa, nun men depkamepe’ tenen, moropkene. Naio, kan dipu nun tep, upu bokeipsetumdi, nun tep wenepsetum dinino, tek sisi sun Kasdim nengda, kandi, ‘Ukunkamenge’ tenen, wepra deipmuma cadi, sundi nun tep wenepkamsenge. Kanda, ila mutu yangne gel utopu kuruma cadi, kan amutara lelipdongosetumdi, kaleksetum dinin, kandi teneamumtopu, Kasdim mutu neng wepra deipmumpa, sundi nun tep, wenepra poryakankamsenge.

13 Ukunkamrum dinin, naio, kanda mali kun keca yala-yala yuma cap, mali kunge neng capda, kange deipra men dirume. Kanda, pio lekpu kupra dumsisi kurum ngebo cadi, kan lek asuru di, mali keca tep kange deipra men dirume. Ange utopu, mali kunge neng tep nengeda, kandi anesala epra, ‘Dakwapye,’ tenen, men kaukemdongorume. Naio, apepmantopu kurum ngebo dinino, ware keca deiyo tep, ukutaruda, kanda mali kunge neng, sun Kasdim neng tep, men wenepmarem do? Tupa disememdi, bicau teneserum dinin, ware keca deiyo tep, sun mali kunge neng, Kasdim yala nengdi, nun Israel nesala telep kupra kunup neng tep poryakankamseng do? Habakukdi Allah tep, malye pepra moropu.

14 Upepudi aupu ton dukdongopra pepu. “Ne nai Allah, ne kange dipu tenepmanada, pepkune. Ada, kandi nimi yuma tep nengeda, me pumbon kure keca, mekina er si ikan utopu kudiserume. Nun kaele, laut mokon pumbon gam kure keca yala-yala yumada, sun ila nimi deiyo ngebo utopu keca, men kurure. Sun tali embandanapu kununge.

15 Ukungepanen, pio mali kunge neng dinin, sun tenepmenge taru dipu, ikan pon keca me pumbon dongopra younunge. Tonda, ila alen utopu keca, mekina yakra dorona tep, er si jala dopra, mokon pumbon dokotepmengepa, dakupmarepane, mekina wekyopda, amenda akeca talepra dopropmengepa, ikan weik wekmarepa, doronunge. Ukupmenge dingeda, kange derinunge. Ukuramengtopu, sun Kasdim nengdi, nun Israel nesala weika di tomopra posengedi, kange derinkamenge.

16 Sun laut mokon pumbon kure keca, ikan porameng nengda, kanda Allah tep, pio men tenenunga cadi, er mekina pon keca, er si jala tep nengeda, ‘E akecada ila mambule’ tenen, akeca tep, si eremnunge. Ange utopu, sun mekina pon keca si tep nengeda, ‘Uo, akecada, mambul keca cadi, nun jena tep, mekina weik talepmarepa, dopra weika di jenupe. Men jenup ngeda, weik tupa akurura cadi, ange kunupmepedi, co bo weik doronupe. Ukunupa deiki di, akeca-keca weik akwapmasere. Tonda, aco bo deiki di, yuk yala jen keca yuma, pio telepnge kunupra jenupe. Atep, nunda pingping kange deipra, pio teleppu kunupe,’ tenenunge. Kan Allah tep, pio men tenekenunge.” Habakukdi Allah tep pepu.

17 Upepudi aupu ton pepu. “Naio, sun Kasdim nesalada, pio mali-mali weik kunung nesala cadi, mekina pona deiyo nengdi, mekina weik tomopmengedi, alen utopu keca pumbon di dopra popmengedi, jepra gawal dangamengtopu, sun Kasdim nengdi, yuk mutu yala neng tep, weika di ton cap, tupa poryakankamsenge. Ada, bicau tenena gum dipapu, yu weik kuprepa, nimi yuma popra gawal dangnunge. Ukununga utopu, sundi nun Yehuda tara nesala tep, utopu popra, pio gawal dangdongonkamsenga tep, naio, kandi, ‘Ange dakwapye’ tenen, kaukemkamserum do?” Nabi Habakukdi Allah tep pepu.