Hab 2 | XteSC | STEP | Neda, ‘Allahdi ne tep ware upu tamupra pepkamner do?’ tenen, dinedi gekepra kunkamne. Ukupmantoda, nimi kalengne deiyo ngebodi, nimi dina tep kalengne ati, lyom ati domenga dup welepredi, ‘Yuk neng karen mutu di yankameng do?’ tenen, dan-dana kalekra diramretopu, kunkamne. Tek sisi deiyoda, nedi Allah tep, “Ware keca deiyo tep, sun Kasdim mutu nesala wepmumpa, amali nengdi nun Israel nesala tep, wenepkamseng do?” pepra asimsinge ngeda, ‘Allahdi ware upu pepkamner do?’ tenen, gekenapu kunedi dinkamne.

Habakkuk 2

Nabi Habakukdi, ‘Allahdi pepkamner upu gekepkun’ tenen, pepu upu

1 Neda, ‘Allahdi ne tep ware upu tamupra pepkamner do?’ tenen, dinedi gekepra kunkamne. Ukupmantoda, nimi kalengne deiyo ngebodi, nimi dina tep kalengne ati, lyom ati domenga dup welepredi, ‘Yuk neng karen mutu di yankameng do?’ tenen, dan-dana kalekra diramretopu, kunkamne. Tek sisi deiyoda, nedi Allah tep, “Ware keca deiyo tep, sun Kasdim mutu nesala wepmumpa, amali nengdi nun Israel nesala tep, wenepkamseng do?” pepra asimsinge ngeda, ‘Allahdi ware upu pepkamner do?’ tenen, gekenapu kunedi dinkamne. 2 Amenda taruda, Allah er si Yahwehdi, ne tep upepneu.

Nedi karepkesipa, ken deiki di epmumnge yumada sekurume. Tonda, ‘Telep jenek kupra seknepa, nimi yumadi betapra nukmengedi, kael kepkameng’ tenen, aupuda, gel pala deiki di, petupra sekamrume. Ukupmemnyopda, kai telep upu sepdara lap perbenkamre ngebodi, kanam dipapu nuktudi, kael keptuopda, sepdaro embaredi, yuk mutu nesala tep, katuai lap pepra embaryopda, kael kepkamenge.

3 Ken deiki di epmum ngeda, ‘Dan taru kupkamre do?’ tenen, kalengnapu kumemdi dinkamrume. Sundi, ‘Kapul warya tep sik kupmar do?’ tenen, men kunkamrume. Nedi, “Amenda doryankamre taruda, ukupkamre,” pepkesi ngeda, mok men pepmakene. ^{▼▼mok men pepmakene – Nabi Habakukdi pepu taru dipra adinen, dakuramipane, keteng tamun enam puluh enam (66) konum kupu pangeda, sun Kasdim, (sun si ton Babel) mutu nesala peda, puto boun kupupa, yuk mutu nengdi, Kasdim nesala tep popbisipi. ‘Ange kupkamre’ tenen, aupu pepu.} Nedi, ‘Ataru kupkamre,’ teneramsitopu konum kupre pangeda, tek sisi nong jenek kupkamre ja. Sik men kupkamra tep, moupra dinmumdi, ‘Dan taru kupkamser do?’ tenen, kalengnapu kunkamrume. 4 Habakuk kandi, sun Kasdim mutu nesala tep, moupra dimemdi tenepkurume. Sunda sun dipru eremengedi, ‘Nun pedi nun pe tepapu, telep kudidankamepe,’ tenenunge. Sun dipru kange dumsisi kunge nesala men kununge.

Dinino, dipru neitam teka tenepra, moupropkameng nesalada, ne tep teka tenengedi, dumsisingepu kunkamenge. Ada, sundi ne Allah tep, ‘Er dipapu nun tep, kalekra melimkamsere’ tenen, teka tenenenga deiki di kununge.

5 Sun sal nong-nong kange doupmengedi, mali kun kecapu kunge nesalada, ‘E, akonuma’ tenen, tali kange doupra kununge. Isomka weik nesala, sun bunga weik cap, co bo weik cap akapyopda, akeca di sun nong peda mali kudirure. Ange utopu kunge nesalada, pio tep men kunkamenge. Ukupmantoda, nimi tuai nesala yuma denunge. Derameng dinin, dena deiyo kecada, “E, akonuma. Yuk nesala ton men depkamenge,” pepra, pio men yamdongorure.

Ange utopu, nimi depmengopda, nimi nong peirbaramengaida, go men gum kupbarure. Yuk neng ton depmengopda, tupa peirbanapu kunkamenge. Jen keca jepmengepa bouramra utopu, pio men kunkamre. Sun Kasdim mutu nesalada, mali weik kunge nesala cadi, ukupmenga deiki di, nimi yuk yala nesala ban-ban yuma tep, popbisipmengedi, ‘Nun amutara kunkameng’ tenen, bupra derinunge. Popbisipmenge nesala weika di tomopra, ateng koupmengedi, sun damai dubengopda, ikin keca sun nong deiki deipmengedi, ikin pel dimnunge. Allahdi nabi Habakuk tep pepu.

Allahdi mali kunung neng wenemna tep, pepu upu

6 Allahdi pepu. Sun pio mali kunge nesala yuma pe, Kasdim mutu neng peda, yuk nesaladi aneng yuma tep, amenda taru nyek-nyek pepra, nalemna upu penkamenge.

Sun mali weik kurum nengda, sun pedi ikin keca deridarume. Amenda taruda, Allah wenepseredi, poptapra gawal dakamsere. Sundi, yuk mutu nesala, popbisipmumdi, sun keca dalupra dororamrume. Tonda, ukuramrumdi, mok upu peptapra, yuk nesala keca upula dororamruma deiki di, bunga weik dopra, sun pe mutu tamupra derirbaramrume. Ukupra bunga weik taleramrum dinin, amenda taru, sun peda kange mun kange doupra kunkamrume. Sun mali-mali weik kuramrumnge tep, Allahdi wenepkamser ja.

7 Sundi yuk mutu nesala keca upula dororamrumpa, ikin kange doupra kange sukuramu nesalada, amenda taru dato-dato di tekmengedi, yu kupre pangeda, sun Kasdim nesala tep, “Nun keca tamupra karenkamserume,” pepmengedi poryakankamsenge. Ukupra kunkameng taruda, sun Kasdim mutu nesalada, kware weik kupserepa, ‘Uo, ware kupkamseng do?’ tenen, moropsemkamrume. Anesaladi, sun taleamrum keca yuma, dopropmengedi gawal dakamenge.

8 Menmena taru, sun Kasdim mutu nesaladi, yuk mutu nesala tep, popbisiprumdi, sun keca yuma dalupra dororamrume. Tuai mutu ban-ban yuma neitamai di, sundi yuk nimi yambul ati dum cap, ila kota cap, urumtamamrumdi, sun keca upula dororamrume. Amutu kurami nesala weika di, popra gawal dakmanto kuramrume. Dinino, ukutaruda, yuk mutu nesala poprumdi, yambulanun tamrum nesaladi, sun damai yana bisbisa kapsengedi, adipapu popra gawal dakamsenge.

9 Ware neng do yuma, sundi, ‘Nun cap, nun kayapu neng cap, nun nerapu cap, nyapu capda, kanam dipu kunkamep’ tenen, yuk neng tep popra bisiprumdi, sun keca upula dororum nengda bicaue. Ila kange mun kange dounkamruma tepa. Tonda, sundi, yuk neng keca, upula dororamruma deiki di, sun pe ati kunge nesala cap, sun cap, isomka kupra teleppu kuramrum nesalada, bicaue. Sundi utenerume. ‘Gume, nunda isomka neng kunupa cadi, nimi upu bongdina deiyo nengdi, nun tep men wenepkamsenge,’ tenerume. Tonda sundi, ‘Nun tep, dakwapye’ tenen, ‘Kaukemkamsenge,’ tenerume. Dinino, sunda bicaue. Ila ikin keca weik, sun nong deiki yankamra tepa.

10 Angeda mesum tep men pepsene. Sundi, sun pe tep, mali kudidarume. Tonda, sun kuramrumnya deiki di, ali weik kunkamsere. Deiyoda, sundi yuk mutu nesala weika di, popra gawal dangamrume. Deiyo men kwapupapu, yuk tali neng poramruma deiki di, sun tep wenepra popkamsene. 11 Sun gel ati doamumnge neitamai di, agel di mali upu penkamsenge. Ange utopu, sun ati pumbonda, gat co deiki dela doamrumngedi, sun tep mali upu penkamsenge. Sundi penkamseng upuda ake. ‘Kasdim mutu nesaladi, yuk mutu neng tep, tali lupra popbaramipa, sun keca yuma upula dororami,’ pepra mali pepkamsenge.

12 Sun nimi podan nesala yuma cap, sun Kasdim mutu neng capda, nimi weik popmumdi, ati yuma upula dopropmumdi, amutu neng talerami keca upula dopra, sun pe ati dorum nengda, bicaue. Ukupra pio mali weik kurumnya deiki di, sun porum neng yapi deiki di, sun ati dorume. Sun angetopu kurum nesala yumada, kange mun kange doupra kunkamruma cadi, sunda bicaue. Ne Allahdi wenepra popkamsena tep pepsene.

13 Tuai nesala yumadi, ikin pel weik doramenganen, apel kunumna deiki di, telep keca doronung dinin, ‘Amenda taruda, akeca yala-yala yumada, pio gum kupkamre ja’ tenen, sun ton men kael keprum do? Akeca-keca talepra deiki tara kunedi, ila puto cap, Ila Eremna Ngebo cap kune ngeboda, ne si Yahwehdi, konum teneramsitopu kupkamre. Ada, nimi tuai nesala ban-ban yumadi pel doramengepane, kunumna weik dororamenge keca yumada, ne Allahdi uku karepne pangeda, akeca yuma uku jepropredi, gawal dakrepa, gum kupkamre.

14 Nimidi dororameng kunumna weik keca yala-yala yumada, gum kupkamre dinin, tuai mutu ban-ban yuma neitamaida, Allah er si Yahweh tep kael kepmengedi, Allah er dirine weik kurenge cap, er pio telep kurenge cap tep, betapra kael kepkamenge. Ukupmanto ngeda, laut mokon ila pala weik kurur dinin, me mokon di atara yuma singidongoramretopu, tuai mutu ban-ban yuma neitamaida, nesala pio weika di, Allah tep, kael kepmengedi, Allah er dirine cap, er pio telep kurenge cap tep, kale kepmengedi, er sipu eremkamenge.

15 Dinino, sundi mali kurumnge tep pepkusene. Ware ngebo do yuma, erdi er kayapu nesala tep, ‘Sun nong banangapu eptene’ tenen, kange yawaramne me weika di kareprepa jepmengedi, sun opkal kwiriptapmengepa, erdi dirur ngeboda, nedi angebo tep wenepra popkamne ja. 16 Sun mali kun keca akumumya deiki di, ‘E, nunda pio telepe, nun konum telep kunupe,’ tenerume. Ukupra tenerum dinin, nedi tek sisi pepsene. Neda Allah, ne si Yahwehdi, sun tep ila di wenepra ponkamsene.

Ukutaruda, yuk nesaladi sun tep, ‘Uo, sun Kasdim nengda, ila puto weik neng, sunda mambule’ tenen, sun tep kware kurur dinin, ne Allah Yahwehdi sun tep wenepkamsene. Sun kange deipra, pio isomka weik kuramrumutopu, wenepsenyopda, ila kange mun kange doupra, ikin weik kunkamrume. Ukupsenepa, ali weik dangkamrume. Yuk nesala yumadi, sun tep, ‘Uo, sun Kasdim nesalada, pio mali nengpu kununge,’ tenenkamsenge. Deiyoda, sun mali kumumnge yumada, ne Allah Yahweh, ne ila puto deiki di kunumna karepkamsene.

17 Amali kumumnge di, sun Libanon mutu nesala weika di popra gawal dangamume. Dinino, ange kuramrumtopu, nedi wenepsenepa, sun weika di depkamrume. Tonda, sun Kasdim mutu nesala peirumu gam keca yala-yala yuma, pio weika di poptapnepa, depmengopda, sunda ila kwar weik kupserepa, kange mun kange doupra, ‘Uo ware kunkamep do?’ tenen, kunkamrume. Ukupsene pangeda, nimi yuk nengdi epra nalemkamsenge. Angeda, mesum tep men wenepkamsene.

Deiyoda, sundi yuk mutu nesala, pio weika di, popbisipra gawal dangamrume. Ukuamumnya deiki di, nimi yapi pio weika di embaramu. Tonda, sundi yuk mutu nesaladi domi ati cap, sun talerami mutu cap, sun amutu kurami nesala cap, weika di poptapra gawal dangamrume. Ange yuma tep nengeda, ne Allah Yahwehdi, sun Kasdim mutu nesala tep, ila di wenepsenedi, menenga karepkamsene. Ukupsene pangeda, yuk mutu nesaladi sun tep, yap-yap penkamsenge.

18 “Tonda, nedi pepkusen upuda, moupra tenepkurume. ‘Nun nai bo kunkamser’ tenen, nimidi gat keca dopra, ketenepra deriramengedi, si eremenge keca yumada, akecada tek sisi ila mambule kurur do, gum do? War keca deiyo tep, nimi urasin utopu keca ketekemdiramrum do? Si eremenge keca yumada, tali keca pua. Angeda, mambul pio gume. Deiyoda, aneng dipu gat co doupra, sun pedi petupra derinunge. Deipmengedi, ‘Uo, angeda nun nai bo akurura cadi, nun melimkamser’ tenen, teka tenenunge.

Dinino, sun pedipapu, akeca petupra derinunga cadi, akecada, talinge pua. Tonda nimi dipapu ketekepra deipne keca dipapu, ‘Telep upu penkamser’ tenen, petupra derinung dinin, akecada tek sisi upu men pepmanto keca cadi, tali kecapu kurure. Atep, nimidi, ‘Akeca di pepnerur upuda ake,’ tenenunga peda, tali keca pua. Ada mok pua.”

19 “Ange utopu, ware nesala do yuma, sun nimidi betamenge co tep, si eremengedi, aco tep, ‘Gam bukroyo,’ pepra moronge nengda, sunda bicaue. Nedi akunge nesalada wenepkamna tep pepne. Ange utopu, gam men kure keca gel utopunge, ‘Naio, bukroyo, gam kunkamrume,’ pepra, si eremenge nesala tep nengeda, ne ila di wenepkamne. Atep sun bicaue. Akecada, gat keca doprapmengedi, petupra deringedi, kunumna weik keca emas cap, perak cap uku dongopmengepane, boun kupyopda, sun si eremenge keca bol deiki palepra derinunge.

Ukungepa, urasin telep kurur dinin, akeca di, ‘Telep kun kecada ake. Ukunkamrume, ange men kunkamrume,’ pepra, akeca di sun makupra petereptu do? Gume akecada, gam kure keca gum cadi, men kupmanto kurure. Tonda, akeca yala-yala yumada, isin men kuredi, gam men kurure. Akecada, sambala gum keca tepapu si eremna gume.

20 Dinino, neda Allah Yahweh, neda Ila Eremna Ngebo kunune. Tonda, neda, Gam Kuna Deiyo Ngebo kunune. Ne Pio Telep Lengna Ati, ne si eremna ati pumbon kunune. Atep nengeda, tuai mutu ban-ban yuma kunge nesala yumada, ne damai yarumdi, upu pena gum dipapu, kware kuprepa, dimpepnapu kunkamrume. Ne tep upu pena gum dipapu, gekenapu kunkamrume.” Allahdi nabi Habakuk tep pepu.