Hab 3 | XteSC | STEP | Allah er upu lap pena deiyo ngebo, Habakukdi Allah tep moropu. Amoropu ngeda, sun Ibrani nengdi mut peraminge, amut sida Sigionot perami utopu pepu.

Habakkuk 3

Habakukdi Allah tep moropu upu

1 Allah er upu lap pena deiyo ngebo, Habakukdi Allah tep moropu. Amoropu ngeda, sun Ibrani nengdi mut peraminge, amut sida Sigionot perami utopu pepu. ^{▼▼Sigionot – Aupu Sigionot ngeda, Ibrani upu deiki sekami dinin, er deiyo nun yuma men kael keamupka tep, yambul walwal kuserure.} 2 Habakukdi pepu. “Uo, ne nai Allah, nimi weika di, kan si cap, kandi ila mambul pel doramumnge capda, peramipane, ne konum gekeramsi. Tonda, kan Allah Yahwehdi ila mambul pel, pumun taru doamum ngeda, gekepsa tep, kwar kunerure.

Ange yumada keteng tamun, keteng tamun yuma, ila mambul pel doramum atep, ‘Ukutaru peda, ange tupa jenek kupra pel dopsetum’ tenen, moropkene naio. Ukutaruda, nun Israel nesala, pio mali weik kuramepupa, kandi yu tenerumdi, wenemkamserum dinin, ataru neitamaida, pio tupa bicau kukere ngeda, lumdongona gume. Nun mali kuna tep, adipapu poptapra gawal daksetum dinin, ‘Nun tep bicau tenepra melimkamserum’ tenen, moropkene naio.” Habakukdi Allah Yahweh tep, upepra moropu.

3 Moropudi, aupu ton peprapudi moropu. “Uo ne nai Allah, Teman ^{▼▼Teman mutuda, ada Yehuda tara dinin, dutara kuramu tara, Edom tara neitamai dinin, propinsi sida Teman peraminge tep pepu. Ada, sun Israel nesalada, Mesir mutu tapra yanami taruda, Allahdi Yehuda mutu damai dinin, utara mutu di yana meliamnga tenepidi aupu pepi.} mutu di yana lyepsemume. Kanda, mali keca tenpunge peda men kurum ngebo, Pio Lek ^{▼▼Lek Ngebo pepkada, ‘Nong bol kurun ngebo’ tenena gume. Ada, ‘Mali kun keca tenpunge peda men kurure’ tenen, pepke.} Ngeboda, Paran Mutu di yana lyepropsemume.

Ataruda, nun ikin tep, yana meliamsemuma deiki di, kan ila telep kurumnge cap, ila puto capda, ila mambul kurumnge cap, im neitamai yuma katuai kuramu. Ange utopu, tuai mutu ban-ban yuma kurami nesaladi, kan si tep, gispal dopra, kan si ila di eremamidi, ‘Allahda pio teleppu kurure,’ perami. Kanda Allah tepapu gudiramkei. 4 Uo naio, kan dirinda, keteng yakaramre taru, dirin weik kuramretopu kupudi, Allah kan puto inimrumai di, kan buru di, kulman cap, perenglang penange cap, dokotepmempa, melang peramretopu kupseu. Angeda, Allah kan puto tepa.

5 Allahdi, ‘Amutu benkun’ tenen, benkomumai yumada, ila pu jena deiyo keca kareramumpa, mali nesala weika di pu jeramupa derami. Ange utopu, kan embaramum mutu neitamai yumada, ila kange mun pu kareramumpa, mali neng weika di pu jeramupa derami.

6 Naio, kan Allahdi, mutu deiki tekmumpa, amutuda ila di lokamu. Tonda, ware mutu nesala do yuma, kandi anesala sun wenemna tep, pio dirpeteramum taruda, nimi yuma diramipa, kwar kupupa, kange mun kange douramidi, ‘Uo ware kupkuser do?’ tenen, moropsemnapu kurami. Pumun taru bungamu mutuda, kandi karepmumpa, ila di longmaua deiki di, sakupa, gum kupra deipmume. Tonda, pumun taru diramepu mutu bumada, kandi karepmumpa, ila teno pakudi, pio gum kupra deipmum pangeda, banpu kupu. Naio, kandi kumem keca yumada, pio akunkamre.”

7 “Nun Israel nesala lyepra duyanamsemum taruda, Kusyan nesala sun opkal bol di dodin tenda ati doraminge neitamai kuramidi, sun kware weik kupu. Ange utopu, ataru dipu sun Midian mutu kurami nesala peda, kan tep kware weik kupupa, ikin kange doramipa, nedi epsi.”

8 “Ne nai Allah Yahweh, kanda amutu neitamai embaramu me tep, yu kupkeu do? Tonda amutu embaramu me tep, tulum kupkeupa, ‘Wenepra gum kupra deipkamne,’ teneramum do? Ange utopu, laut mokon tep yu kupkeu do? Ukupkeupa, ame cap, alaut mokon cap bokeipmumpa, dana-dana tara kepropu. Ukupmantoda, tulum kupkeupa apel doamum taruda, jen nengdi, sun kuda bisam gipra, tu deiki embaramre keca, er si kereta kuda cap, tonda sun kuda bisam bali deiki bukmengedi, sepdara bengedi porbaramengtopu, kandi apel menmena di dopmume, naio.

9 Kandi teneramumtopu, jen talen nengdi, jen doupra poryakarami taruda, kandi, ‘Ukupra popkamenge,’ teneramumtopu, sun jen dopropidi, nimi weik porami. Tuai mutu neitamaida, ‘Yuk-yuk kupkamre’ tenen, tali embaramre me cap, ila laut mokon cap kareramumdi, mutu-mutu yuma neitamai di bokra, dan-dana deipmumpa, aneitamaida me embaramu. Tonda, laut mokonda aneitamai deipu. Mutu ban-ban yuma yana wilipropmumpa, me bungna bukra embaramu.

10 Ukupmum taruda, kan Allah yamumpa, mutu-mutu yuma longamupa, amutu di dirami. Tonda, tuai mutu embaramu me cap, laut mokon cap yumada, kan tep kwar kupupa, me yuma longteng-longteng pepi. Ukuamu taruda, me yuma oupra baramudi ila lelim pepra baramu. Laut mokon deiki tarada, kan tep diramupa, mokon longteng-longteng pepra me kait ila di welepu.”

11 Naio, kan Allah yakaramum taruda, keteng cap, war cap embana gum di, tenpuaipu dimpeprei. Ukuprei taruda, kan mar dopmumpa, dirin weik kupu. Tonda, kandi nimi pona tep, lyom co takke dopmum taruda, aco takke deiki dirine kupu. 12 Kan yu kuramkeu taruda, tuai mutu-mutu neitamai di, tu yanipra embaramume. Ataruda, yu kuramkeupa, amutu kuramidi, mali-mali kurami neng tep, yaniptapra balena di nimi poramengtopu, amutu nesala yuma wenemamume.

13 Ukupbamum taruda, kandi, ‘Ne mawa nesala kunkameng’ tenen, wepra deiamum nesala, kan nyapu tepapu, ‘Lyepropkamne,’ teneramsemumdi, lyepropsemume. Ada kandi, ‘Anesalada, nenge pua’ tenen, wepra deiamsemum neng tepapu, wepra doropsemumdi lyepsemume. Ukupmum taru di, sun pio mali-mali weik kurami nesala, sun ila nimi deiyo ngeboda, ila di wenepmume. Er taleamu keca yumada, uruptapmumdi, er taleamu keca yuma sirya gawal dakmumdi, gum kupra deiamume.

14 Aila nimi deiyo ngebo, er jen talena nengdi, nun Israel nesala tep, ‘Anesala popra gawal dakamep’ tenen, yakanmasei taruda, aila ngebo, er nimi pona tep, lyom co takke doupkada, kandi ernge dalaupra, er tep poptapmume. Ataruda, sun mali nesala, sun ila nimi deiyo ngebodi, ‘Sun Israel nengda, kware tep, inipmang dinin, nedi sun ayala nesala yuma popnedi, gawal dangkamne,’ teneramudi, er pe dipru erepdaudi, sal nong-nong kuramupane, kandi angebo poptapmume.

15 Jen talena nengdi, sun kuda bisam bali deiki bukmengedi, laut mokon damai yanipbangepa, me silong yana kiptaprepa, bukapyanen gum kuramretopu, kandi nun podan neng konum poptapmumdi, nun damai yana puto di lyepsemume.

16 “Ne Habakukdi, kandi peipnemum upu, konum gekepnedi, dipru neitamai di dukduk pepmanere. Tonda, ne kware tep, ne sipyal dam berber pepmanere. Ukupneredi ne yoda, met-met pepnerpa, tenpuaipu tekmanedi, moropsepnerdi met-met pepmanere. Pio kange mun kange doupra kunman dinin, kandi abamur upu pepmaseremnge tep nengeda, tali dimpepra dinapu kunkamne ja.

Ada, nun podan nengdi, nun mutu neitamai yana popsengopda, kandi, ‘Ukupkamne,’ pepra peipmaseremtopu, amali nesala, sun Kasdim mutu nesala tep, kandi wenepra popkamrem taruda, ‘Dan taru yankamre do?’ tenen, dinapu kunkamne.”

17 “Naio, kanda nun nai bo Allah Yahweh kurema tep nengeda, nedi kan tepapu, teka tenepra tali dimpeprappu kunkamne. Atep nengeda, ataruda ara co du mouramre co, kait men poptua peda, nedi kan tep teka tenenapu kunkamne. Tonda, anggur tapu anggur du men mouptua peda, nedi kan tep teka tenenapu kunkamne. Ange utopu, zaitun co du mouramre co peda, co du men moupredi, nong gum kuptua peda, nedi kan tep teka tenenapu kunkamne. Ange utopu, nun jen keca wa peramepnge, nong gum kuptua peda, nedi kan tep teka tenenapu kunkamne.

Tonda, nun domba bisam yuma depmengepa, domba beilya wiramepunge tali gopu kuptua peda, nedi kan tep teka tenenapu kunkamne. Uda nun sapi bisam yuma depmengepa, sapi bisam gerekra peinup ati tali gopu kuptua peda, nedi kan tep teka tenenapu kunkamne.”

18 “Ange-ange yuma, ila kange mun kuserur keca kupsetua peda, nedi ne nai bo Allah, kan Yahweh teppu, kange deiprap kan si eremkamkene. Ne nai Allaho, kandi lyepnemum ngebo tep, kange mun men kupkamnere. Kan tep nengeda, kange deipra pio pingping kange doupra kunkamne. Kanda ne Lyemna Deiyo Ngebo kuruma tep, nedi gudinkamkene.”

19 “Ne nai bo Allah, ^{▼▼Allah – Acada, Allah er si tep, Ibrani upu deiki di, ‘Adonay’ pepra sekya cadi, nundi aupu deiyo ngeda, ‘Sundi kael kepkamrum’ tenen, konum jenek kupra sekmupu.} akeca-keca yuma talepra, deiki tara erepra, pio puto weik deiyo ngebo kuruma cadi, kan tenememtopu, angepu kurume. Cadi, kanda Allah Yahweh tep gudinkamkene. Kandi lyemdonememdi, ne nong cap, ne dipru cap tep, puto karenerume. Ukupmanto ngeda, rusa bisam yane pio teleppu kuredi, mutu dupai gel si deiki tali lupra embaramretopu, kandi melimnememdi, puto telep kupra karenemem pangeda, neda teleppu kunune. Pio ila mutu dup peda weleptene.”

“Atep, kange mun keca yaneryop peda, kwar men kunkamne. Ne Habakukdi aupu pepne. Nun mutu mut pena deiyo ngebo, er gekena tep konum pepne. Amut penmane taruda, bung-bung pena, er kamo gitar utonun, akeca deiki di mut pepmane.” Nabi Habakukdi pepu.