Hag 1 | XteSC | STEP | Allah Yahwehdi, “Ne si eremna ati uruptapi ngeda, kange di tamupra dopkunerume,” pepra deipu taruda, Raja Dariusdi, ila nimi deiyo ngebo kepra, Persia mutu kurami nesala yuma taleamu taruda, keteng tamun butenenge kepu. Aketeng tamun deiki dipu, warda ngantan war kepu. Awar deiki komuni tenpu, tanggal 1 kepu tumida ake. Atumida, Allah Yahwehdi, Yehuda mutu kurami nesala neitamai di, Gubernur kepra taleamu ngebo, er sida Sealtiel, er mi Zerubabel cap, tonda Allah er si eremna ati neitamai talepra, pel dona deiyo neng, imam-imam neng sun ila deiyo ngebo kepra kuramudi taleamu ngebo, er sida Yosadak, er mi Yosua cap tep, “Sun kori perbenkurume,” pepra, nabi Hagai kori yana peipu.

Haggai 1

Allah Yahwehdi, “Ne si eremna ati uruptapi ngeda, kange di tamupra dopkurume,” peipu upu

1 Allah Yahwehdi, ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} “Ne si eremna ati uruptapi ngeda, kange di tamupra dopkunerume,” pepra deipu taruda, Raja Dariusdi, ila nimi deiyo ngebo kepra, Persia mutu kurami nesala yuma taleamu taruda, keteng tamun butenenge kepu. Aketeng tamun deiki dipu, warda ngantan war kepu. Awar deiki komuni tenpu, tanggal 1 kepu tumida ake. Atumida, Allah Yahwehdi, Yehuda mutu kurami nesala neitamai di, Gubernur kepra taleamu ngebo, er sida Sealtiel, er mi Zerubabel cap, tonda Allah er si eremna ati neitamai talepra, pel dona deiyo neng, imam-imam neng sun ila deiyo ngebo kepra kuramudi taleamu ngebo, er sida Yosadak, er mi Yosua cap tep, “Sun kori perbenkurume,” pepra, nabi Hagai kori yana peipu.

2 Allah Yahweh akeca-keca yuma talepra, deiki tara Ila Eremna Ngebo kurure. Allah erda, jen talepra kunge malaikat yuma, sun deiyo ngebo kurure. Allah Yahwehdi, nabi Hagai kori yana pepra deipu upuda ake. “Sun Babel mutu akunung nesala yumadi, Allah Yahweh er si eremna ati tamupra dona taruda, kapul men kepu,” penunge. 3 Upenunga tep nengeda, Allah Yahweh er nyapu sisa, Israel yala nesala, sun kori Allah upu lap perbana deiyo ngebo, er sida nabi Hagai kori yana, upu pepra deipu. Allahdi peipu upu ake.

4 Uo, ne nyapu sisa, sun kun ati teleppu dopra kuramrum taruda, konum kupmaser do? Tonda, ne si eremna atida, men doprumdi, tapra kaukeprumada ware deiyo keca tep do? Sunda, ware keca deiyo tep, ati donada walwalpu kupseu do? Ne si eremna ati uruptapi ngeda, malipu kupka cadi, konum lepsisikra donmanetum dinin, sun pe atipu tenepra kurumnyada, ware keca deiyo tep do? 5 Uda atep nengeda, sun kayapu neng tep, ton, sundi tamupra dipetepmumdi, gopterepdaso. ‘Telep kuserur do? Mali kuserur do?’ tenen, ne Allahdi pepsene.

6 Ukupmantoda, sun yal kecada, weika di bolongrum dinino, ayal keca bolokamrumnyane, nong kin taruda, yambulpu kirume. Tonda sun jen kecada, weik akuserur dinino, ajen keca dopra jepmum taruda, mumun neitamai sakseredi, men boupserepa, kange telep doupra men kurume. Tonda sun anggur tapu du wada, weik perum dinino, dakra jerum taruda, men boursisingserure. Autopu tonda, bupu kuna tep, sun opkal weika di kemrumnya peda, sun nong bupu men piriserure.

Tonda, ‘Yuk neng melipra pel dopmepepa, kunumna keca karepsengepa deipmepedi, jepra gam tupa kunkamepe,’ tenerumnya peda, aderirum keca yumada, bon di sangdoserepa, mawa men derirume. Ada, sundi ne tep, ‘Allah erda ila mambule’ tenen, gispal men doneruma tep, sundi, ‘Ukupkamepe,’ tenerum keca yumada, talipu kurure. Nong men kupkamre.

7 Uda atep nengeda, sun kurum keca yuma tep, sun pedi tamupra dipetepmumdi, goterepdaso. ‘Telep kuserur do? Mali kuserur do?’ tenen, ne Allahdi pepsene. Akuser ngeda, sun pedi didamumdi, ‘E, nun kunup keca kamoda, ukuserure’ tenen, moupra kael kemdarum do? Angeda, ware keca deiki di malipu kuserur do? 8 Atep nengeda, ukutaru sun adipapu amutu buma, amutu buma deiki welepmumdi, ne si eremna ati dona tep, co bena doupra yaso. Adoupra yamum dingeda, ne si eremna ati yana dopso. Ne si eremna ati dopmum pangeda, nedi akati tep, kange deipnedi, ne ila puto cap, dirine capda, akati neitamaipu deipkamne. Deipnepa, akunkamre taruda, sun Israel nesala cap, yuk mutu nesala cap eprumudi, ‘Uo, tek sisi Allah erda, ila mambul kurure,’ tenemumdi, ne tep gispal donkamnerume.

9 Sun wa perum ngeda, ‘Nong weik kupserepa kipkamepe,’ tenerum dinino, atenepra wa peamrumutopu men kirume. Tonda, sun wa peamrumyai di, nong kipra banmamum taruda, ne Allahdi, ‘Akeca yuma gum kuptu’ tenen, pung pepnepa, kumanya utopu kupra yaredi, doupdaro badoserure. Adeiki sun kipmarumu keca yumada, men kuserure. Ayuma gum kudoserure. Neda akeca-keca talepra, deiki tara Ila Eremna Ngebo kunedi, jen talepra kunge malaikat yumada, sun deiyo ngebo kunune. Nedi asipetepsene. Aikin keca karesenunada, ware keca deiyo tep, nedi kusenun do?

Angeda ake. Sundi ne si eremna atida, tamupra men dopnerumpa, ati walangyopu kupka tep, kusenune. Adeiki di sunda sun pe kun ati tep nengeda, pio pe deipra puto di dorumudi, sun pe ati wekra, tali kange doupra kuruma tep pepsene. Allahdi pepu. Upepudi, aupu ton dukdongopra pepu.

10 “Sunda pio malipu kurumudi, ne tep men tenenerume. Adeiyo tep nengeda, sun wenemna tep peipsipa, sun wa pepra kourumnyai yumada, mo ton karepnepa, mo cepredi awaidam men sakamsere. Ukupsere pangeda, sun koun keca yala-yala yumada, telep kupra men bongopkamsere.

11 Tonda, sun wenemna tep, ne Allahdi dou mana li karepsisipa, tuai cap, amutu buma deiki yuma capda, tu konum gelal sepropseu.

Ada ukutaru pe, amenda doryankamre taru peda, sun kouamrum jagung utopu keca, er sida gandum, wa perumnyai cap, anggur tapu wai dam cap, zaitun co du wai dam cap, gum kupra deipkamsere. Tonda, er pe tu deiki di bongoramre keca yala-yala yuma cap, tonda nesala yuma cap, tali gam kurameng keca yala-yala yuma cap, gum kupra deipkamsere. Tonda nesaladi talepra kurumu keca yala-yala yumada, gum kupra deipkamsere. Sun wenemna tep, akeca-keca yuma mali kupra deipkamsene.” Allahdi Israel nesala tep pepu.

Israel nesala sun yumadi, Allah Yahweh pepra deipu upupu, moupra talepi upu

12 Uda, Allah er upu lap pena deiyo ngebo, nabi Hagai kori yan peipu upu yumada, Hagaidi Zerubabel cap, Yosua cap, tonda Israel yala nesala, Babel mutu wenemnai derirbenamiane, tamupra yai nesala yuma cap tep, Allah Yahwehdi nabi Hagai kori pepupa, nabi Hagaidi bena lap pepu upupu, sun yumadi gekepi. Gekepidi, Allah tep kwar kupupa, aupupu moupra taleamidi, pio moupra kurami.

13 Ataruda Allahdi, “Israel nesala sun kori pepkamrume,” pepra, nabi Hagai kori yana lap peipu upu deiki di peiamu ngeda, nabi Hagaidi aupu yumada, Israel yala nesala bupra wekmaiya neitamai, “Allahdi, ‘Ukupra melimkamsene. Ne cap, sun cap, kikiman kunkamepe,’ pepra deipseue,” pepu. Nabi Hagaidi upepupa, sun Israel nesala yuma aupu gekepi.

14 Allahdi, Yehuda tara talena tep, nimi deiyo kepra taleamu deiyo ngebo, Gubernur Zerubabel, er dipru neitamai pel dopupa adipapu, ‘Ukupkamne’ tenen, dipru erepudi gamapupa, pel doramu. Autopu tonda, Allah er si eremna ati neitamai talepra pel dona neng, sun ila deiyo ngebo, er sida Sealtiel, er mi Yosua, er dipru neitamai pel dopu.

Tonda, Israel yala nesala, Babel mutu wenemnai derirbenamiane, tapipa tamupra yai nesala peda, sun dipru neitamai pel dopu. Ukupka tep, sun aneng yuma tapakra, tenpu kange doupra kuramidi, sun nai bo Allah Yahweh, er si eremna ati lepsisikra dona tep, yana bulupra pel kikiman dorami. Ada, akeca-keca yuma talepra, deiki tara Ila Eremna Ngebo kuredi, im deiki jen talepra kunge malaikat yuma, sun ila deiyo ngebo Allah, ^{▼▼Aupu katuai di sekmupkada, Ibrani upu deiki di, ‘Yahweh Sabaot’ seki dinin, ‘Ketengban nesala Allah er si deiyonge kael kepkameng’ tenen, katuai dipu sekmepu.} er si eremna ati dona tep, anesala yumadi, ‘Allah er si eremna ati punupra dopkup’ tenen, bulupra yai. Akati lepsingna tep pel dorami.

15 Allah er si eremna ati pel dona tep, gonga kepi tumida ake. Ada, ngangtan war, tanggal dua puluh empat (24), atumi di pel gonga kepra dopi. Ataruda, Persia mutu ila nimi deiyo kepra taleamu ngeboda, Raja Darius, erdi amutu taleamu taru neitamaida, apel gonga kepra dorami.