Haggai 2

Allah Yahweh er si eremna tep, ukupu ila ati kange di tamupra, punupra dopi upu

1Ataruda, Allah Yahweh erdi, nabi Hagai kori yana peipu. Aupu yan peipu tumida, tanggal dua puluh satu (21), tonda warda, yoneitam war deiki di yana pepra deipu. Allah Yahwehdi, nabi Hagai tep peipu upuda ake.

2Allahdi nabi Hagai tep, upepu. “Kandi nimi si Sealtieldi deipu ngebo, er sida Zerubabel tep, upu perbenkurume. Angeboda, Gubernur kepra Yehuda mutu kunge nesala taleamu ngebo Zerubabel cap, tonda Yosadak deipu ngebo, er si Yosua cap, perbenkurume. Yosuada, ne Allah si eremna ati pumbon talepra pel donung neng, sun ila deiyo ngebo, imam Yosua tep pepkene. Tonda, Babel mutu di tapra, Yerusalem mutu damai yakaramidi, tupa gam kunung Israel yala nesala yuma cap, wekra gekenkamengai di, aupuda bena pepkurume.” Allahdi nabi Hagai tep upepra deipu.

3Aupu pepudi, aupu ton cap dukdongopra pepu.

Sun ataru kuramrumu nesala yumada, menop taru, ne si eremna ati, pio urasin telep ati domi ngeda, sun pe asuru di diramrum nesala ton kurum do, gum do? Akati pumun taru diramrum nesaladi, pumun taruda, ‘Uo, akatida urasin pio telep kupra dominge ace’ tenen, diramrum dinino, ukutaru dano? Akatida uruptaprapidi, sikke utopu buktapya tep, ‘Uo akatida, urasin pio telep’ tenen, kange deipra aupu tupa perum do? Gume, ukutaruda, akati pio malipu kurure. Atep, ukutaruda, sundi, ‘Uo, Allah er si eremna atida, telep kupra domi dinin, ukutaruda, akati uruptapi ngeda, tali dakuamre gel utopu kurure,’ tenepra perum do?

4Atep nengeda, ne Allah Yahwehdi pepsene. Kan Zerubabel cap, Yosadakdi deipu ngebo, imam Yosua cap, amutu neitamai tupa gam kurumu Israel yala nesala yuma capda, ‘Uo, wareto kupkamep do?’ tenen, kange mun kudidana gume. Ne nyapu sisa Israel nesala yumada, sun kange yuma tenenange cap, dipru cap, puto kepra kunkamrume. Sun yumadi, ‘Nun nai bo Allah, er si eremna ati punupra dopkupe’ tenen, pio pe deipra donapu kunkamrume. Ada tali tep men pepsene.

Deiyoda, apel donkamrum taru yumada, nedi sun tep, pio kalekra melimkamsene. Tali ngebodi men pepsere. Neda akeca-keca yuma deiki tara talepra, im deiki jen talen malaikat sun ila deiyo ngebo, Ila Eremna Ngebodi pepsene. Atep, apepra deipsen upuda, tek sisi amenda taruda nong kupkamre.

5Aupuda, tali tep men pepsene. Sun Mesir mutu neitamai kuramrumanen, amutu tapra bisi neitamai yakaramrum taruda, ne pedina upu deiki di peipsisi. Ada, ‘Nedi sun tep pio kalekra melimkamsene. Melimkamsena deiki di, ne si eremna ati punupra donkamnerume,’ pepra, pedina upu deiki di sun damai konum pepra deiamsisi. Atep, ukutaruda ‘Uo ware kupkuseng do?’ tenen, sun dipru pu jena gume. Nedipu melimkamsene. Allahdi pepu. Upepu dingeda, aupu ton cap dukdongopra pepu.

6Neda akeca-keca yuma deiki tara talepra im deiki jen talen malaikat sun ila deiyo ngebodi pepsene. Ne Allahdi tenepsi tumi konum dam kemna tep nengeda, go yambulpu kaprepa, ataru kepre pangeda, nedi im neitamai kure keca cap, tuai mutu neitamai kure keca yuma cap, tonda mutu-mutu yuma cap, ila laut mokon deipu mutu yuma capda, ila di lokamre. Ada nedi, ‘Ukutaru loktue,’ tenepnepa, adipapu lokamre.

7Akeca-keca yuma lokre pangeda, ataru di dipdongopra dorkupbankamre taruda, mutu ban-ban yuma kunung nesala, sun yuma ange epra kael kepmengedi, sun talepra kunung kunumna weik keca yala-yala yuma cap, ‘Angeda ila mambule’ tenen, derinung keca yuma cap doupra, akati damai duyakankamenge. Ada, ne si eremna tep, sun talenge keca, pio telep keca yuma doupra, akati deriryakankamenge. Akeca dopra, sun tep karesenge pangeda, sundi akeca yuma dopropmumdi, ne si eremna ati neitamai deriramrumpane, abung keca yuma, pio weika di akati dinikamre. Ukuprepa, nedi akati deiki ila dirin deipkamne.

8Ada tali tep men pepne. Mutu ban-ban yuma kwamupa, nimidi talenung keca, pio kunumna weik keca, er si emas cap, perak cap yumada, ketekemdina deiyo ngeboda, ne Allah pua, pepsene. Neda akeca-keca yuma deiki tara talepra, Ila Eremna Ngebo kunedi, im deiki jen talen malaikat sun ila deiyo ngebo kununa cadi, atelep keca yumada, nengepu kurure.

9Pio telep keca yala-yala yuma doupra, ne si eremna ati punupra donkamnerumuai duyange pangeda, ataruda ne si eremna ati ukupu dopkamrum ngeda, urasin pio telep kunkamre. Menop taru ne si eremna tep domi atida, yambul telep ati domi dinin, amenda taru donkamnerum atida, pio telep kunkamre. Tonda, ne si eremna ati dopkamrumaida, nedi sun tep telep kupra deipkamsene.

Ada, sun podan nesala yumada, gum kupra deipnepa, sun yumada tali kange doupra, teleppu kunkamrume. Yuk nesala cap podana cap, yu upu deiki pangdana cap, pio men kunkamrume. Ada nedi ne nyapu sisa, sun Isarel nesala yuma tep, telep kupra deipsenepa, kange deipra kunkamrume. Aupuda, ne Allah Yahweh, akeca-keca yuma talepra, deiki tara Ila Eremna Ngebo kunedi, im deiki jen talen malaikat yuma, sun ila deiyo ngebodi, pepsene. Nedi sun tep, aupu konum pepra deipsena cadi, tek sisi nong kupkamre pepne. Allahdi pepu.

Nabi Hagai cap, sun imam-imam neng cap, bulupra wekidi upu talepi upu

10Aupu talepi taruda, Persia mutu ila nimi deiyo kepra, taleamu ngebo Raja Dariusda, keteng tamun butene deiki di taleamu taru, warda toupne war, tumida tanggal dua puluh empat (24) deiki di pepu. Ataruda, Allah Yahweh kange di ton cap tamupra, nabi Hagai kori yana aupu pepra deipu. 11“Ne Allahdi akeca-keca yuma talepra, deiki tara Ila Eremna Ngebo kunedi, im deiki jen talen malaikat yuma, sun ila deiyo ngebodi pepkene. Hagai kandi, sun imam-imam neng tep, asipetepkurume,” Allahdi pepu. Aneng tep pepkamrum upuda ake.

“Allahdi peipupa, Musadi sekeiamseu upu neitamaida, ware peserur do? 12Ada aupu neitamaida, ware perur do? Allah tep popra kareryankameng domba bisam tu, tenpu ngebo yatudi, yan dopra er angebo kemamtu lyom opkal di getepra, er pe ati doupra banmatupa, abisam tu getepmatu opkal, yuk dakwapmatu keca ton beptuopda, ayuk keca peda, telep kupkamre do? Akeca dopra, ne Allah gispal dona tep, karepnetenge do, gum do?

Ada, ukupmantoda, ‘Allah tep yana kareptepe’ tenen, men keteneipmange keca, roti kwaneng do, mau pumbon gapmatenge jen keca do, anggur tapu du purupra deiamenge anggur me mokon do, yuk yala jen keca do? Tali dakuamre keca dinin, angebodi, ‘Allah karepkun’ tenen, getepmatu domba bisam tu, akeca er bol beptuopda, atali keca ton dopra, ne Allah gispal dona tep karepnetenge do? Atep, kandi asipetepmempa, sun imam nengdi, Musa sekamu upu neitamai dipetepmengedi, lap pepkamkeng ja.” Aupu pepra, Allahdi nabi Hagai tep pepu.

Upepupa, nabi Hagaidi, Allah er si eremna ati pumbon talepra, pel dorami deiyo neng, imam tep, asipupa, anengdi tamupra, “Gume, ange men kutenge. Allah tep karepmanto keca di, tali dakuamre keca beptua peda, atali keca dopra, Allah tep men kareryatenge. Angeda nundi men kuptepe,” pepi.

13Upepi pangeda, nabi Hagaidi aimam neng tep, ton cap tamupra asipu. “Tonda ukupmanto, gam kure ngebo konum depmatu ngebo, er bol bepmatu ngeboda, Allah er damai men yanmanto konum kupyopda, amali kupmatu ngebo yatudi, arup pepmasen keca, jen keca yala-yala yuma, angebodi akeca talepyopda, akeca dopra Allah tep kareptepe do, gum do? Amali kupmatu ngebodi, akeca talepyopda, adeiki di, tali dakuamre keca yuma peda, mali kuprepa, Allah tep men kareptepe do, kareptepe do?” pepra asipu. Upepra asipetepupa, sun Allah ati pumbon pel talepra dorami imam-imam nengdi pepi. “Apepmarem ngeda, pio tek sisi mali tep, mali kupmatu ngebo akeca taleptuopda, akeca yuma peda, malipu kupkamre. Ato kecada, Allah tep men kareptepe,” pepi.

14Nabi Hagaidi sun imam-imam neng tep, aupu yuma konum asipupa, pepyopda, yuk upu ton dukdongopra pepu. “Aupu pepmaneruma tep nengeda, aupu ton cap pepkusene. Allah Yahwehdi konum peipmasere. Ada, Israel yala nesala yumada, pio malipu kununga cadi, sun amutu neitamai kunung nesala, Isarel yala nesala yumada, sun wa pepra koungenge cap, pel donung nge cap, sundi talenung keca cap yumada, pio malipu kununge.

Amali kun keca talepra kunung dipapu, sundi, ‘Nun akwapsere keca dopra, Allah er gispal dona tep, karerbenkup’ tenen, Allah er si eremna ati damai duyakanunge. Ukunung dinin, akeca yumada, pio mali kupmangepapu doupra, Allah tep kareryakanunga cadi, akeca yumada, Allah tep men kareptenge. Nun nai bo Allahdi upepsere,” nabi Hagaidi sun imam neng tep pepu.

“Ne Allah Yahwehdi akeca-keca yumada, tali yamupra karenkamsene,” pepra, pedina upu deiki di peipu upu

15Nabi Hagaidi, sun imam neng tep upepu.

Allah Yahwehdi nun tep pepra deipseu upuda ake. Sunda, ‘Allahdi amenda kunkamre taru neitamaida, telep kupkamser do, mali kudinkamser do?’ tenen, ne gompetena tep kumumdi, dinapu kunkamnerume. Pumun taruda, ne Allah Yahweh, ne si eremna tep, ‘Ati dopkup’ tenen, tenpu gel peda doupra, akati kapul men domi taru, ikin kwamseu keca tep, kange di ton cap tenipetepkamrume.

16Sun adipapu jagung utopu keca, er sida gandum wa pepra kouamum ngeda, ‘Nong weik kupser do?’ tenen, dirbaramrum taruda, ‘Gandum keca sekmepedi, alen 20 kupra kipkamepe’ tenen, dirbaramrum dinino, gum kupka tep, alen yumada, 10 alenpu kwamu. Ange utopu, anggur me dingdinai dirbaramrum taruda, ‘Anggur meda, 50 liter gwepmengedi, dikra deipkamsenge’ tenen, dubaramrum dinino, ataruda, gum kupka tep, anggur me 20 liter ngepu kwamu.

17Ada tali men pepsene. Akeca-keca yuma, suktaleamseunge yumada, nedi sun wenemna tep, mali kudiramsipa, metekapu kwamu. Ada, nedi sun wa pepra kouramrum keca yala-yala yumada, gapung cap, engenga cap, yo puta cap, am tan cap, karepsipa, sun kouramrum keca yuma, mali kuramupa gawal dakamo. Tonda, im deiki di mul duduya esnge dokotepsipa, sun kouramrum keca yuma kerye jeramu.

Ukupra sun wenemna tep, ikin keca sun nong deiki kareamsisi dinino, sundi, ‘E, akupmaser ngeda, tali tep men kupmasere. Deiyo ton akapmarpa, kupmasera cadi, nun mali kunup keca yuma tapra, Allah damaipu tamupra benkupe,’ men teneamrume. Ange gum dinin, kange di tamupra kikapu pio kuramrume.

18Atep, atumida tanggal dua puluh empat (24), wareda toupne war, Raja Dariusdi, keteng tamunda butene talenmaser taru di dipra, dorkupbankamre taru neitamaida, moupra tenenkamrume. Ada, ne si eremna tep dopkoi taru ayumnyada, konum ikra gawal dakrum taruda, kange di ton cap tenenkamrume. Pumun taru di dipra, ukutaru neitamaida, kange mun keca weik kuramseuanen, tupa kuserura cadi, kange moupra tenenkamrume. ‘Ware deiyo keca tep, ikin weik kuramseu do?’ tenen, moupra kunkamrume.

19Ataruda, sun wai damda gandum du do, anggur tapu du do? Uda kwarang co du do, zaitun co du do, tonda delima co du do? Aco du yala-yala yuma peda, du pio men mouamseu. Atep, ‘Nun yal keca derinup ati neitamaida, yal keca telepnge tupa kuserur do? Ange yuma konum gum kupseu do?’ tenen, moupra dinkamrume.

Dinino, ne Allahdi pepsene. Atumi di gonga kepra, dorkupbankamre taru yuma, amenda taru yumada, ne Allahdi akeca-keca yuma weika di yamupra, tupa-tupa karepbankamsene. Ne melimkamsena deiki di, teleppu kupra kunkamrume.

Allahdi nabi Hagai tep, “Yehuda tara talerur ila nimi deiyo ngebo, er sida Zerubabel tep, ‘Allahdi ukupkamkere,’ pepra, lap perbenkurume,” pepra deipu upu

20Atumi tanggal dua puluh empat (24), wareda toupne war, Raja Dariusdi, amutu taleamu keteng tamunda, butenenge konum kupu taruda, Allah Yahwehdi, nabi Hagai tep, upu ue butene deiki di, kange di tamupra yana peipu. Allahdi ayana peipu upuda, ake.

21“Hagai kandi, Yehuda mutu neitamai talepra kurur ila nimi deiyo ngebo Gubernur Zerubabel tep, er kori lap perbenkurume. Allahdi im deiki tara kure keca cap, tuai mutu neitamai kure keca cap, amutu ban-ban yuma cap, upu peiprepa lokamre. Atep, ‘Sik kupkamre’ tenena gume. Allahdi, ‘Akeca yuma lokamre,’ tenepu taru konum damai kupre pangeda, adipapu lokamre. Allahdi pepu.

22Akeca-keca yuma lokamre taruda, tuai mutu kunung nesaladi, nimi deiyo kepra talenung deiyo neng yuma cap, tonda tuai neng ila puto di yuk karen mutu kunge nesala yuma talenung deiyo neng yuma capda, Allahdi bisbisa kapredi, gum kupra deipkamre. Tonda sundi nimi porbana tep, kuda bisamdi gipropmengepa, tu deiki embana tep betapra deipi keca, er si kereta kuda cap, akeca deiki bukmengedi sepdara barepa, nimi porbanung neng cap, gum kupra deipkamre.

Tonda, kuda bisam bali deiki bukmengedi, porbarameng jen talen neng cap, sun kuda bisam cap, popredi akeca yumada gum kupra deipkamre. Ada, sun akeca deiki di bukra embanung neng yumada, sun pedi, sun pe nengpu parang ya doprapmengedi, popdankamenge. Ukupkamenga deiki di, Allahdi sun yuma gum kupra deipkamre.

23Allahdi ukupkamre taruda, nimi si Sealtieldi deipu ngebo, Yehuda mutu neitamai talepra kurur ngebo, Gubernur Zerubabel kan puda, ‘Allah er mi sisa utopu ngebo kupkamrem’ tenen, ereipkamkere. Allah er puto deiki di, kanpu erepra deipkerepa, ila nimi deiyo ngebo kepra kunkamreme. Ada tali tep gume. Allahdi, ‘Ukunkamne,’ teneramu keca yumada, erdi kan tep, puto karepkerepa, ‘Apelpu talepra donkamrum’ tenen, pepkere. ‘Ukunkamre’ tenen, wepra deiamkeudi, konum anuamkeua tep, Allah tep apelpu donkamrume.

Ukupmantoda, ila nimi deiyo nengdi, buru deiki dengnung keca, er si cincin, akeca deiki sun si sekmengedi, mambul surat sengna keca deiki aburu dengna keca darapdongopmengepa, sun si katuai kuprepa, nimi yuma epmengedi, ‘E, ada tek sisi nun ila nimi deiyo ngebodi, asengna keca dokotepseue,’ tenen, kael kemamengtopu, kupkamkere. Ada, Allahdi, er puto kan deiki karepkerepa, er teneamu pelpu, telep kupra dopmemnyopda, nesala yumadi, ‘E, ada Allahdi teneamutopu pel donmare,’ tenen, kael kemkamkenge. Allahdi upepkere.

Allahdi peipupa, nabi Hagaidi Gubernur Zerubabel tep pepu. Aupu ton pepu. “Allahdi upepkere. ‘Ange yumada, ne tali tep men pepkene. Ada ne Allah Yahweh, akeca-keca yuma talepra, deiki tara Ila Eremna Ngebo kunedi, im deiki jen talen malaikat yuma, sun ila deiyo ngebodi pepmakena tep, aupu yumada, tek sisi nong kupkamre.’ Allahdi, ne nabi Hagai tep aupu lap pepra deipneudi, ‘Yehuda tara talepra kurur ngebo Gubenur Zerubabel tep, lap perbenkurume,’ pepra deipneua cadi, upepkene.” Nabi Hagaidi, Gubernur Zerubabel tep pepu.