Heb 1 | XteSC | STEP | Pumun taruda, Allahdi nun co puna neng tep upu peramu ngeda, erdi peramupa, er upu lap perami neng, sun nabi-nabi neng gekeramidi, nun co puna neng tep lap perami. Allahdi er upu lap perami neng deiki lap pepra peramseu ngeda, ue denge weik cap, pel yala denge weik cap doramua deiki di, lap peramseue.

Hebrews 1

“Allah er Mi Sisada, ila mambul kuredi, malaikat sun deiki tara kurure,” pepu upu

1 Pumun taruda, Allahdi nun co puna neng tep upu peramu ngeda, erdi peramupa, er upu lap perami neng, sun nabi-nabi ^{▼▼Nabi neng, – Allah er upu lap pena nengda, Allahdi, ‘Ne tek sisi upu cap, amenda kupkamre keca upu capda, nimi yuma gekenkameng’ tenen, erdi wepra deiamu neng tep, er upu lap pepu pangeda, aneng gekeramidi, yuk nesala yuma tep, lap perbarami. Anengda ‘nabi neng’ penupe. Tonda, nabi neng, sun lap pena upuda, nomor 25 dirume.} neng gekeramidi, nun co puna neng tep lap perami. Allahdi er upu lap perami neng deiki lap pepra peramseu ngeda, ue denge weik cap, pel yala denge weik cap doramua deiki di, lap peramseue. 2 Ukuramu dinino, ukutaruda nun sirya taru kunupa neitamaida, Allahdi nun tep, er Mi Sisa deiki di peserure. Allahdi er Mi Sisa tep, ‘Akeca-keca yuma dopra karepnepa, ila nimi deiyo ngebo kuredi ange yuma pio talenkamre’ tenen, wepra deipu. Tonda, Allahdi im cap, tuai mutu cap, akeca-keca yuma cap, erdi peipupa, er Mi Sisa pel doamnga deiki di ketekepra deiamu. 3 Allahda pio telep kuredi, ila eremna ngebo kurure. Ukuredi, ila mambule kuretopu, er Mi Sisa peda, pio utopu kurura cadi, ila dirine cap, ila mambul weik cap kurure. Ange utopu, Allah cap, er kange tenenange cap, uda, er kure keca yuma cap, akure utopu, er Mi Sisa peda, er kure keca yuma amsepu kurure.

Allah er Mi Sisadi, er ila puto upu perya deiki di, ware keca do yuma, telep kudirepa, akeca-keca yuma men gum kurure. Er pere upu deiki dipu akeca-keca yuma talerepa, telep kupra tupa gam kurure. Nimi ban-ban yuma, sun mali kunge keca gum kupra derina cap, nimi weike lyemna cap, telep kupra derina cap tep, mambul pel konum dopseudi, ka tamupra im deiki welepudi, Allah er dumsisi tara buku. Akeca-keca yuma deiki tara kuredi, ila eremna ngebo kurure. Allahda, Ila Mambul Ngebo, im deiki kure ngeboda, er Mi Sisadi er dumsisi tara bungbeu.

4 Allah er Mi Sisadi, akeca yuma ukupra ukuramnga tep, ila mambul ngebo kurure. Ukuredi, Allah er im deiki pel donge nesala, malaikat peda, sun deiki tara kurure. Sun malaikatda, yambul mambul neng kunung dinin, Allah er Mi Sisada, ila mambul kurura tep pepsene. Ange utopu, Allahdi er Mi Sisa tep si karepu ngeda, ila mambul si karepu dinin, sun malaikat tep si karepu ngeda, yambul mambul si pua.

5 Uda, ‘Allah er Mi Sisada, ila mambule. Sun malaikatda, yambul mambul pua,’ pepmasenada, deiyo ton pepkusene. Sun ton tenipetepso. Allah er im deiki pel don neng malaikat weik akungepa, sun kan-kan di, ware malaikat tep weprapudi, apepkusen upu pepu do? Gume, apepkusen upuda, sun malaikat tep men peramu. Allahdi pepu upuda ake.
‘Kanda ne Mi Sisa kurume. Ukuda, neda kan nai bo Sisa kunune. Allahdi pepu.’ (Mazmur 2:7)

Tonda, apepkusen upu peda, Allahdi sun malaikat tep pio men peramu. Aupuda ake.
‘Neda angebo er nai bo Sisa kunkamne. Angeboda, ne Mi Sisa kunkamre.’ Allahdi pepu. (2 Samuel 7:14)

Allahdi sun malaikat yuma tep, aupu pio men pepka cadi, sunda yambul mambul dinin, Allah er Mi Sisada, ila mambul kurure. 6 Arup pepmasentopu, Allahdi er menmena deipu Mi Sisa tep, tuai mutu dokotepseu taruda, ami tep aupu pepu. Aupuda ake.
‘Ne im deiki pel donge neng, sun malaikat yumada, ne Mi Sisa tep, gispal dopra er si eremkamenge,’ Allahdi pepu. (Ulangan 32:43)

7 Allahdi er malaikat yuma tep tenepudi, aupu pepupa, Mazmur upu deiki di, adomon upu sekami. Aupu ake.
‘Allahdi er im deiki pel don neng malaikat tep, sun urasin yuk kemdirepa, kumanya utopu dangedi, kununge. Tonda, sun urasin yuk kemdirepa, uku bu kuramre utopu dangedi, er pel melipra donunge.’ (Mazmur 104:4)

8 Allahdi, er im deiki pel don neng malaikat tep aupu peipupa, er amutara tali pel don neng utopu kunung dinin, er Mi Sisa tep nengeda, upu yuk pepke. Allahdi er Mi Sisa tep pepu upuda, aca deipkusene. Ada, Allahdi peipupa, Mazmur buku neitamai di sekami upuda ake.
‘Kanda Allah kurume. Kandi nesala yuma cap, akeca-keca yuma cap talepra, ila deiyo ngebo kunkamrem taruda, men gum kupkamre. Gawal dangna gum, pio akunkamrume.
Akeca-keca yuma talepra, ila deiyo ngebo kunkamrema deiyoda, ada pio telep kupra dumsisipu kunkamrema tepa. Akeca yuma talepmemdi, pio dumsisipu kunkamrume.
9 Kandi kange derirum kecada, mali kuna pio gum, dumsisi kun keca pua. Kandi, songe tenepmemdi mali kange doupra kumem kecada, mali kun keca yuma tepa. Ukupra kuruma tep nengeda, kandi ne si erepra gispal donerum ngebo ne Allahdi, kan tep wepra ereipkesi.
Ereipkesidi, kan cap kikiman kunge nesala yuma deiki tara konum erepra deipkesi. ‘Akeca-keca yuma deiki tara kumemdi, akeca-keca yuma talepra, ila deiyo ngebo kunkamrem’ tenen, wepra deipkesi. Ukupra erepkesa deiki di, pio pingping kange deipra, kurume.’ (Mazmur 45:6-7)

10 Tonda, Allahdi er Mi Sisa ^{▼▼Mi Sisa – Abuku Ibrani cap, yuk buku Alkitab neitamai yuma peda, ‘Allah er Mi Sisa,’ pepra sekmengopda, ada Yesus tep seki.} tep aupu pepu.
‘Kanda, Ila Nimi Deiyo Ngebo kurume. Akeca-keca yuma kapul men kwamu taruda, kan pe buru di tuai mutu deiyo keca yuma cap, im neitamai kure keca cap, aneitamai kuramre keca yuma cap, kandi ketekepra deipmume.’
11 ‘Tuai mutu cap, im neitamai kure keca cap, aneitamai kure keca yuma capda, gum kupkamre dinino, kan puda, pio gam kunkamreme.
Tuai mutu cap, im neitamai kure keca cap, ayumada, opkal mali kupbaramyanen, pun deiprepa mali kuprepa, gum kupkamre dinin, kanpuda pio kunkamreme. Kanda, men gum kupkamreme. Kanda pio gam kunkamreme.’
12 ‘Lyom opkal dopra geteramengtopu, tuai mutu kure keca cap, im neitamai kure keca yuma cap, akuramre keca yumada, getena utopu kupmemdi, ukupunge ketekepra deipmemdi, akeca yala-yala yuma punupkamreme.
Pumun opkal kwiriptapmengedi, ukupunge kenengamengtopu, ukupu tuai mutu ban-ban yuma cap, ukupu im cap, ketekepra deipkamreme.’
‘Akeca yumada, punupkamrem dinino, kanpuda pio gume. Ukutaru kumemtopu, pio dorkupkamre taru peda, tupa gampu kunkamreme. Kan men depmanto ngebo cadi, pio men tu pepkamreme.’ (Mazmur 102:25-27)

Allahdi er Mi Sisa tep pepu. Upepka tep, er Mi Sisa Yesusda, ila mambul kurur dinino, sun malaikatda sun yambul mambulpu kununge. 13 Allah er im deiki pel don neng malaikat weik akungepane, Allahdi tenpunge wepra, aca pepkusen upu pepu do? Gume. Allahdi er Mi Sisa tep aupu peipupa, sun Mazmur neitamai sekami upuda ake.
‘Kanda, ne dumsisi tara bukrume. Ukumempanen, mali nesaladi kan tep, ‘Angebo popra bisbisa kaptepe’ tenen, kan upu yanikenung nesala yumada, ne Allahdi anesala yuma tep, konum bisbisa kapnedi, kan amutarapu deipkamne.
Ukupnepa, nimidi sun yane bepeingna tep, apekna co deiki, yan erepra deriramengtopu, kandi amali neng yanipra, sun deiki tara kunkamreme.’ (Mazmur 110:1)

Allahdi aupu yumada, er Mi Sisa tep pepka cadi, er Mi Sisada ila mambule dinin, sun malaikatda, yambul mambulpu kununge. 14 Sun ton tenipetepso. Allah er im deiki pel don neng malaikat yumada, im deiki keca, sambala utopu neng kungepa, Allahdi sun malaikat tep, ‘Gume, nimi tuai nesala lyepnepa, nimi lyemna keca yuma doronkameng nesala tep, sun melimkamrume. Lyepkamne tuai nesala, sun makuna tep, ‘Pel melipra donkamrum’ tenen, sun malaikat dokotemsenune.’

Allahdi uteaneamudi, sun malaikat tep peipu. Malaikatda, Allahdi lyemre nesala sun melimna tep dokotemrura cadi, sun malaikatda yambul mambul kunung dinin, Allah er Mi Sisa puda ila mambul kurure, pepsene.