Heb 10 | XteSC | STEP | Uda, yuk upu ton pepkusene. Allahdi peipupa, Musadi sekeiamu upu, mem upuda, ukupmanto kecapu kuki utopu kuramu. Amenda taru nong tek sisi yankamre keca, er urasin yuk kurure. Pumun taru mem upuda, yambulanun kuki utopu kuramu dinino, amenda taru nong tek sisi yankamre ngeda, pumun taru kwamu upu utopu gume. Apumun taru upuda, kuki utopu kuramnga tep nengeda, sun Allah tep karerami deiyo nengdi keteng tamun, keteng tamun yuma deiki di, sun kareramami kecapu, tupa-tupa kareryakarami. Ukuramya deiki di, ‘Allah er si ereipkup’ tenen, er si eremna ati damai wengami nesala tep, sun mali kun keca yuma gum kupra deipnedi, dumsisipu men deipmanto kurami.

Hebrews 10

“Kristusdi, nun mali kun keca gum kupra derina tep, er pedi er pe nong dopra, Allah tep karepdapudi, nun yo punupseue,” pepu upu

1 Uda, yuk upu ton pepkusene. Allahdi peipupa, Musadi sekeiamu upu, mem upuda, ukupmanto kecapu kuki utopu kuramu. Amenda taru nong tek sisi yankamre keca, er urasin yuk kurure. Pumun taru mem upuda, yambulanun kuki utopu kuramu dinino, amenda taru nong tek sisi yankamre ngeda, pumun taru kwamu upu utopu gume. Apumun taru upuda, kuki utopu kuramnga tep nengeda, sun Allah tep karerami deiyo nengdi keteng tamun, keteng tamun yuma deiki di, sun kareramami kecapu, tupa-tupa kareryakarami. Ukuramya deiki di, ‘Allah er si ereipkup’ tenen, er si eremna ati damai wengami nesala tep, sun mali kun keca yuma gum kupra deipnedi, dumsisipu men deipmanto kurami.

2 Akeca yuma kareramya deiki di, ataru kurami nesala tep, dumsisipu kupra deipmatu teptoda, sundi akeca tupa-tupa men kareramtenge. Konum apel gawal dakra dopmatengedi, yapmatenge. Ada tali tep gume. Deiyoda, akeca kareraminge deiki, sun tep, ue tenpu taru deiki dipu konum telep keiptu teptoda, amenda taru yumada, sun kange dipru neitamai di, ‘Uo, nun mali kunmape’ tenen, mali kange tupa men doamtenge.

3 Dinino, aketeng tamun cap, kange di orketeng tamun cap deiki di, akeca-keca kareramaminge deikida, keteng tamun yuma neitamai di, sundi, ‘Uo, nunda tupa mali kunupe’ tenen, kael kemami. Sun mali kurami kecada tupa tenenapu kurami. 4 Uda, sapi bisam cap, kambing bisam cap popmengedi, akeca yapi gwepra likra deriramenga deiki di, nimi mali kun kecada, pio tek sisi men gum kupra deiptue. Atep, akeca kareramya deiki di keteng tamun yuma kange di ton cap, sun mali kun kecada, tupa tenenapu kurami.

5 Nimidi kareramenga keca deiki di, sun mali kun keca men gum kupra deipmanto kununge. Ange tep nengeda, Kristusdi tuai mutu yau taruda, Allah upu neitamai kwamu upu dopra pepu.
‘Allah kanda, nimidi sun mali kun keca gum kupra derina tep, gam keca popra karenung keca cap, tonda kan gispal dona tep, tali karenung keca cap, akeca-keca yumada putakerepa, kange men derirume. Dinino, tuai nesala kungetopu, nimi nong keteneipmanerumpa, ange dopra karenkamkene.’
6 ‘Gam keca popra uku dongonung keca cap, sun mali kunge keca daemna tep, karekenung keca cap, tupa-tupa karekenung dinin, akeca-keca yuma tep, kange men derirume.’
7 ‘Atep nedi upepkesi, “Neda konum ketenepra akunune.” Kan upu neitamai di, ne tep sekamnei upu deiki di upenerure. “Ne nai Allah, kandi teneamnemumtopu, ‘Apelpu donkune’ tenen, konum ketenepra yanmane.” Kristusdi pepu.’ (Mazmur 40:6-8)

8 Apepmasen upu neitamai di, menmenada Kristusdi upepu. “Nimidi, sun mali kun keca gum kupra derina tep, gam keca popra, karekenung keca cap, kan gispal dona tep, tali karekenung keca cap, gam keca popra uku dongonung keca cap, sun mali kuna daemna tep, karekenung keca cap, akeca-keca yuma men putakerepa, akeca tep kan kange men derirume,” pepu. Uda, tek sisi pumun taruda, Musa sekeiamu upu ^{▼▼Musa sengamu upu Musadi Kejadian adinin Ulangan seku. Ange lap pena upuda, nomor 35 dirume.} deiki di, apel adipapu dorami dinino, Kristusdi amenda taru di, arup pepmasen upu peipu.

9 Upepudi, amenda taru ton, “Neda konum ketenepra kunune. ‘Kandi teneamnemumtopu, apelpu donkune’ tenen, yanmane,” pepu. Aupu pepka deiki di, menop taru kwamu upu, Musa sekamupa, Allah tep karerami keca tep, konum tapu. Aupu tapra, punupudi, amenda taru upu butene ngeda, erdi er pe tep pepu upu, ukupunge pepra deipseue. Ukutaru pedina upu peipseua deiki di, pumun taru pediramu ngeda, konum punupu.

10 Tonda, Kristusdi, “Allah kandi teneamnemumtopu, apelpu donkune,” peputopu, Allahdi Yesus tep teneamu pel tek sisi dopka deiki di, nun mali kun keca yuma gum kupra deipseudi, dumsisipu kupra deipseue. Dumsisi kupra deipseuada, Yesus Kristus er nong popipa, nun mali kun keca daepra lyemna tep depseue. Nun yo pununa tep depudi, lyepseue. Nun lyemna tep, pel konum gawal dakra deipseua deiki di, konum dumsisi kupra deipseue.

11 Uda, tali tuai nesala dinin, Allah cap, nimi cap dana-dana antamdina deiyo nengdi, tumi-tumi yuma tekmengedi, Allah karena tep, pel donunge. Nimi mali kunge keca gum kupra derina tep, yuma taru yuma, gam keca popra karenapu kununge. Tupa-tupa akecapu pio karenung dinino, akarenung keca deiki di, nimi mali kun keca pio men daepmanto kununge.

12 Sun tuai nesaladi ukupra pel donung dinin, angebo Yesusda sun pel doramengtopu men kupu. Angeda gume. Erda, tek sisi Allah cap, nimi cap dana-dana antamdina ila deiyo ngebo kurura cadi, pumun taruda, nimi mali kun keca gum kupra derina tep, tenpu kecapu karepu. Akeca ue tenpu taru di karepka deiki di, konuma. Nimi mali kun keca pumun nge pe, atarunge pe, amenda doryankamre tarunge peda, amali kun keca yuma tep, konum gum kupra deipseudi, gawal dakseue. Ukupudi, adipapu Allah er dumsisi tara bukudi, er cap Allah cap akeca-keca yuma talenkamrenge.

13 Ataru di bukupa, dakuramrepane, Allahdi Yesus tep, ‘Nun song,’ tenenge nesala yuma, bisbisa kapra, Yesus er amutara deipbarepane, Yesusdi anesala tep yanirure. 14 Uda, Kristusdi er pe nong dopra atenpu kecapu karepka deiki di, nun mali kuna deiyo keca tep, gum kupra deipseudi, apel gawal dakseua cadi, konuma, dumsisi utopu kupra deipseue. Ukupseua tep, Allah er kangeda, ‘Yesus tep teka tenenung nesalada, dumsisi nesalapu kununge,’ teneserure. Yesusdi nun tep dumsisi kupra deipseua cadi, teleppu kunkamepe. Ukupseua deiki di, er pel gawal dakseua tep, Allah er dumsisi tara bena buku. Dumsisi kupra deipseu nesalada, Allahdi nun dipruai pel melimserya deiki di, mali kun keca gum kupra deipbaseredi, telep kudiserure.

15 Uda, Allahdi telep kudisere ada, Allah er Lek Sambala peda, aupu tep ton cap peserure. Yeremia sekeiamu upu deiki di menmena pesere upuda ake.
16 ‘Allahdi pepu. “Amenda taru neitamai di, nimi cap, ne cap kikiman kuna tep, ‘Ukunkamsene,’ pepra pedinkamsen upuda ake. Nimi telep kuna tep, ‘Ukunkamrume,’ pesene upuda, sun kange tenenange neitamai dongopkamsene. Sun kange dipru neitamai sekeipkamsene,” pepu.’ (Yeremia 31:33)

17 Aupu peipudi, aupu ton cap peipupa, Yeremiadi sekamu. Aupuda ake.
‘Sun mali-mali kunge keca cap, ne upu yanipmengedi, sun kange dipu mali kunge keca cap, kaukepnedi, kange di ton cap tupa-tupa men tenenkamne. Ange yuma gum kupra deipkamsene. Allahdi pepu.’ (Yeremia 31:34)

18 Aupu konum peipseua tep, nun kaele. Nimidi sun mali kunge keca yumada, Allah konum kaukepseredi, gum kupra deipseryopda, konuma. Kange di ton cap, ‘Nun mali kun keca daepsetua’ tenen, yuk karen keca dopra, adipapu men kareryakankamnupe. Ange yumada, konum gawal dakra deipseua tepa.

“Tamna gum di, pio pe deipra, teleppu kunkamrume,” pepu upu

19 Ange tep nengeda, ne kayapu. Arup pepmasen upu yuma akapmasera tep, aupu ton pepkusene. Yesus er yapi karepseua deiki di, nun kange tenimtona cap, kwar dangna cap gum dipapu, Pio Telep Lek Ati utonun, Allah er kun damai, tali kange deipra wengkamepe. 20 Yesus er yapi karepka deiki di, ukupu bisi, gam kuna bisi konum yapra deipseue. Ada, pumun taruda, ‘Tali nengdi Pio Telep Lek Ati weknung’ tenen, buplan bisi opkal kapkwetemamipa, Allah karena deiyo nengdi, yapi keca dopra akati wengamitopu, Yesusdi er pe nong dopra Allah tep karepka deiki di, telep bisi yaipra deipseupa, Allah er damai wengnupe.

21 Tonda, Yesusda Allah cap, nimi cap, dana-dana antamdina ila deiyo ngebo konum kupseredi, Allah er kururai, er ati utonun, talena deiyo ngebo konum kuserure.

22 Ange tep nengeda, mawa pena gum dinin, pio dumsisipu kuprap, nun kange dipru neitam, tenimtona gum dipapu, ila di teka tenepmepedi, ‘Allah cap dipru dukdongopra kunkamep’ tenen, er tep tenenapu kunkamepe. Tonda, sun pumun taru Allah karena deiyo nengdi, mali kun keca gum kupra derina tep, yapi dopra likra deriramitopu, nundi Allah talepra, er amutara kupepa, erdi, nun kange dipru neitamai ‘Uo, nunda mali pua,’ tenenup keca daepra, dumsisipu keipkamsere.

Ukupra kuserura tep, er cap kikiman dipru dukdongopra kunkamepe. Tonda, sun pumun taru Allah karena deiyo nengdi, apel dopkui taru, sun nong yuma telep kupra me kuramitopu, nun peda utopu, Allahdi nun kange dipru neitamai mali keca kuserenge yuma, daepseredi, telep kupra deipseryopda, er damai wengbenkamepe. Ukutaruda, er cap dipru dukdongopra kunkamepe.

23 Erdi, “Ukunkamsene,” pepra pediramseu ngebo, Allahda, mok men perure. Erdi peseretopu tek sisipu kurura tep, nundi, ‘Allahda tek sisi lyemdonkamsere’ tenen, teka tenepra dinapu kunkamepe. Ukupra kupedi, katuai di penup upuda, yuk bisi lerekra bana gum, er upupu talepra pio dimpeprappu kunkamepe. 24 Ukupra kunkamep taru neitamai yumada, nundi nun kayapu neng yuma tep, ‘E, ne ware telep pel doptenepa, ne kayapu yumadi, bicau tenedana cap, makudana cap, telep kuna cap kunkameng do?’ tenenkamepe. Ukupra, tenepdapedi, dipru kwa dipra, makudanapu kunkamepe.

25 Uda, ton neng dangeda, ‘Allah upu gekena tep, kikiman bulumnupada, nun dabale,’ tenengedi, Allah upu ati men wengnung dinino, nunda tamna gum di, kikiman bulupra wengbanapu kunkamepe. Tonda, nun yumadi, yuk neng yuma tep, dipru kwa dipra, makudanapu kunkamepe. Ukupra kuramepyanen, Yesus doryankamser taru, Ila Tumi, damai yakarepa, kael kepmepyopda, weikanun ton cap, dipru kwa dipra makudanapu kunkamepe.

26 Uda, yuk upu ton pepkusene. Ware nesala do yuma, Allah er tek sisi upu konum peteremsengepa, gekepmengedi, moupra kael kemnung dinin, ‘Dakwapye’ tenen, sun kange dipu tupa-tupa mali kupmengopda, konuma. Angeda men lepsikmanto. Ada, sun mali kun keca gum kupra derina tep, yuk keca ton kareptenga peda, dumsisi kupra men keipdatenge. 27 Allah tep teka tenepi ngeda, ka di tamupra tapmengopda, angeda men gum kupra deipmanto cadi, sunda ila di kwar dangnapu kunkamenge. Kwar dakra kunkamenga deiyoda, ake. Aneng tep nengeda, Allahdi upu bokra wenepra popkamrenge tep, kware weik kunkamenge. Tonda, sundi Allah er tep, ‘Nun songe’ tenen, dabal kunge nesala tep, uku bu ila di jenkamrenge capda, ‘Gawal dakamser’ tenen, kware weik kunkamenge.

28 Uda, angeda tali men pepsene. Sun ton tenipetepso. Pumun taruda, Musa sekeiamu upu yaniptamami nesala tep nengeda, yuk neng diramidi, butene do, weneri do, sundi tapakra, “Tek sisi aupu yanipmenge,” pepra, lap pepya deiki di, adipapu amali kun neng tep portamami. ‘Uo, anengda, nun kayapu neng cadi, dakwapye,’ tenena pio men kurami. Allah upu yaniptamami nesalada, adipapu poptapnapu kurami.

29 Musa sekeiamu upu yanirami neng portamami ngeda, yambul ikine kwamu dinino, Allah er Mi Sisa tep, yanirtamenge nesala tep, Allahdi wenepra ponkamre ngeda, ila ikine weik men kunkamre do?

Gume, ne kayapu, sun ton tenipetepso. Allahdi, “Ukunkamsene,” pepra, pediramseu upu deiki, dumsisi kudirserenge, ‘Nong kunkamre’ tenen, Yesus er yapi karepseupa, embeue. Angeda, ila mambul dinin, sun mali nengdi, ‘Gume, ayapida, tali kecapu kurure. Mali keca pua,’ tenenge nesalada, Allahdi anesala tep, ila di wenepra men ponkamre do? Tonda, Allah er Lek Sambaladi, bicau teneseredi, er kange dipu melimsere Sambala tep, er nong deiki mali upu pepra, nyek-nyek penge nesalada, ila di wenepra men ponkamre do? Gume, weika di porepa, anesalada ikine weik kunkamenge.

30 “Ila di ponkamre,” pepmasenada, tali tep men pepsene. Deiyoda ake. Nun kaele. Allahdi aupu pepu.
‘Mali kun nesaladi, ne tep mali kupnengopda, kwa dakra sun nong deiki ikin keca deipkamre deiyo ngeboda, ne akunune. Sundi mali kungetopu, nedi sun tep, ila di wenepra popkamne.’ (Ulangan 32:35)

Tonda, aupu ton cap pepu.
‘Akeca-keca yuma deiki tara talepra, Ila Nimi Deiyo Ngebodi, er nyapu yuma tep upu bokeipredi, wenepkamsere.’ (Ulangan 32:36)

Aupu yuma pepu ngeboda, nun kaele cadi, er tep yaninung nesalada, ila di popkamre. 31 Uo, ne kayapu, mali kupmengepa, Pio Gam Kuna Deiyo Ngebo, Allah, er buru di talepra, anesala tep wenepkamre ngeda, ila mambul weike. Atep, ‘Allahdi wenepra popserur’ tenen, kware dangna weik kunkamepe.

32 Dinino, ne kayapu, sundi peterepseipa, Allah er upu gekepmumpa, Allah er dirine karepseupa, dopropmum taruda, kange di ton cap tenenkamrume. Mali nengdi, ikin keca weik sun nong deiki deriramseiya deiki di, pio kurpeteramsei dinino, ikin kuramseua peda, pio dimpeprap tekamumdi, teka tenenapu kuramrume. 33 Ataru neitamaida, ton taruda, nimi yuma gekenmaiyaipu, sun tep, mali upu pepra nyek-nyek peramsei. Ton taruda, sun teka teneramumnge tep, ikin keca weik sun nong deiki deriramsei. Ton taruda, sun mali nengdi, yuk neng tep, ange utopu ikin keca cap, mali keca cap, sun nong deiki derirami dinin, sundi anesala tep, bicau tenepra, sun dipru kwa dipra makuramume. Aneng tep, men tamamrume.

34 Ton taruda, sun mali nengdi, yuk teka teneami neng tep, doprapidi ateng koupra, wenemna ati dongopi dinin, aneng tep bicau tenepra melimamrume. Tonda, mali nengdi, sun taleramum keca upula doramipa, sundi engena gum dipu, ‘Dakwapye, dadopropseso’ tenen, kange deipra kuramrume. Ukupra kuramruma deiyoda, sundi, ‘Gume, nun tek sisi talenup kecada, upula dopropmaseng kecapu gume. Pio telep talenup kecada, men gum kupmanto. Pio kunkamre keca tepa,’ teneramrumdi, kange deipra kuramrume.

35 Ange tep nengeda, ne kayapu, sun kange bongtona gum di, pio teka tenemum kecada, yamdongona gume. Ange men tapmumyopda, amendada Allah weika di bokra, ila mambul menenga keca weika di karenkamsere. Atep, teka tenenapu kunkamrume. 36 Ikin keca akapserya peda, tamna gum di, pio pe deipra, teka tenenapu kuramum pangeda, amenda taru Allahdi teneamseutopu, konum kupmumyopda, erdi, “Ukuprap, ukuprap karenkamsene,” pepra pediramseutopu menenga keca karepserepa, ‘Akeca doronkamrume’ tenen, pepsene.

37 “Pio dimpepra kunkamrume,” pepmasen upuda, Allah upu neitamai pepi deiyonge ton ake.
‘Amenda yankamre ngeboda, dakuramreyanen, sika di men yankamre. Tek sisi teneramu tarupu, menmena tamupra yankamre. 38 Dinino, er kapul men yare taruda, sun dumsisi kunge nesalada, sun teka tenepmenga deiki dipu kunkamenge. Teka tenepbandenkap, kware tep, kange di ton cap, sun teka tenenge keca tapmengopda, nedi anesala tep, kange men derinkamne. Allahdi pepu.’ (Habakuk 2:3-4)

39 Aupu akapmar dinino, ne kayapu, nun yumada, kware di kange di ton cap tamengepa, Allahdi wenepra poptapkamre nesala utopu men kunupe. Nunda, teka tenenapu kupmepepa, Allahdi lyemkamser nesala kunupe.