Heb 11 | XteSC | STEP | Uda, teka tenenada lape pepkusene. Ada nunda, ‘Allahdi ukunkamsere’ tenen, ketenepra dinapu kunup keca yuma cap, tonda asuru di kapul men dinup dinin, ‘Allahdi ukunkamre,’ tenenup keca cap tep, nundi Allah tep, teka tenepmepya deiki di, kange bongtona gum di, ‘Tek sisi kunkamsere’ tenenapu kunupe.

Hebrews 11

“Pumun taru kurami nesalada, Allah tep ila di teka tenerami,” pepu upu

1 Uda, teka tenenada lape pepkusene. Ada nunda, ‘Allahdi ukunkamsere’ tenen, ketenepra dinapu kunup keca yuma cap, tonda asuru di kapul men dinup dinin, ‘Allahdi ukunkamre,’ tenenup keca cap tep, nundi Allah tep, teka tenepmepya deiki di, kange bongtona gum di, ‘Tek sisi kunkamsere’ tenenapu kunupe. 2 Nun apu yapudi ^{▼▼Yahudi yala neng, sun apu yapu lap pena upu nomor 20 dirume.} Allah tep, ila di teka teneramipa, Allahdi sun tep kange deiamnga deiki di, telep kupra deiamudi, ‘Anengda ne mawa nesala kunkamenge,’ tenepu.

3 Uda, Allahdi er upupu peipudi, adipapu akeca-keca yala-yala yuma ketekepra deipu. Ada, nun asuru di dinup keca yuma ketekepra derina tep nengeda, asuru epmanto keca dopra, akeca deiki di men ketekepra deipu. Ange gum dinin, er upu pepka puto dipapu, akeca-keca yuma ketekeipupa, kunupsengpepu. Ange yumada, teka tenenupa deiki di, gekepra kael kemnupe.

4 Tonda, Allah gispal dona tep, Kainda yambul telep keca dopra yana karepu dinin, Habeldi Allah tep teka tenepka deiki di, pio telep keca dopra yaudi, Allah tep karepu. Karepupane, amenda taru Allahdi, Habel karepunge tep, upu pepu taruda, “Ne teka tenepneudi, ne gispal dona tep, karepneu ngeda pio telepe. Atep, Habelda dumsisi ngebo konum deipne,” pepra deipu. Allahdi Habel tep dumsisi kupra deipu ngeda, ada Habel teka tenepka deiki di, kupmemeu. Tonda, Habel konum deamu dinin, ila di teka teneramnga cadi, ‘Habeldi teka teneamutopu, nun peda ukunkamepe,’ tenena tep, Habelda ukupmanto ngebo kuserura tep, er teka teneamu ngeda, nun tupa tenepra kael kemnupe.

5 Uda, Henokda pio telep kupra, dumsisipu kuramupane, Allahdi er tep, “Henokda, pio teleppu kurura cadi, er tep ne kange deipne,” peipu. Allahdi Henok tep upepka tep nengeda, Henok men depu. Kapul men depu dinin, tupa gampu kuramu taru neitamaida, Allahdi Henok dopra, im deiki dubeu. Allahdi Henok dopra dubeua tep, konum dimpepupa, ataru kurami nesaladi, ‘Erda dan do, er nong eptepe’ tenen, epetepi dinin, men epi. Allahdi Henok dopra im deiki dubeunge deiyoda, Henok ila di teka teneramnga deiki dipu, Allahdi er tep, gampu dopra, im deiki dubeu.

6 Ware nesala do yuma, ‘Allah er si erepra, er mi kunkamepe’ tenen, putare nesala yumada, adipapu, ‘Allah tek sisi kurure’ tenen, menmena teka tenenkamenge. Teka tenepmengedi adinen, ‘Allah er si eremna tep, pio pe deipra kuramepepa, Allahdi menenga keca karenkamsere’ tenen, kange bongtona gum dipapu, adipapu teka tenenkamenge.

Ange tep nengeda, ware nesala do yuma, Allah tep tek sisi teka men tenepmengopda, Allahdi sun tep kange men derinkamre.

7 Uda, Nuhdi Allah tep teka teneramua cadi, Allahdi, “Nimi men dirami keca dinin, mo weika di ceprepa, ila mokon deipkamra di, tuai nesala yuma popkamsena tep, kange mouprume,” peipupa, Nuh gekepudi, erda, ‘Allah ila mambule,’ teneramu ngebo cadi, kware kupu. Kware kupupa, ‘Ne nyapsilip yuma lyepkamne’ tenen, ila gapung co keteneipudi, agapung co deiki, ila ati ton dopra keteneipu. Akupka deiyoda, Allah tep ila di teka teneramnga deiki di kupu.

Nuhda teka teneamu dinin, ataru sun mali kurami nesalada, ange yuma men gekepra, teka men tenepi. Sundi aupu tapipa, Allahdi anesala yuma wenepra poptapudi, gawal daku. Allahdi nimi telep kudina tep, dumsisikrap derirseryada, teka tenenupa deiki dipu telep kupra deriserure. Ange utopu, Nuh teka tenepka deiki di, Nuh peda dopropupa, Allahdi, Nuh tep, dumsisipu kupra telep kupra deipke.

Abrahamdi Allah tep, teka teneramunge tep, pepu upu

8 Uda, pumun taru Allahdi Abraham tep, “Akumem mutu tapra, ne karepkamken mutu benkamrume,” pepra upupupa, Abraham gekepudi beu. Erda, ‘Ne benkamne mutu ake’ tenen, moupra men tenepu dinin, er teka teneramnga deiki dipu gekepudi adipapu beu. 9 Beu dingeda, er teka teneramnga deiki di, nimi bo nengdi, yuk karen mutu bena, ke taru tep, tali opkal tenda ati ke dopra, mapbarameng utopu kuramu. Allahdi, “Amutu karepkamkene,” pepra pediramu mutu, Abrahamda, amutu bena wekudi, nimi bo nengdi kuramengtopu, kuramupane, amendada nun apu yapu Isak cap, Yakub cap utopu kuramrei. Allahdi, Abraham tep “Amutu karepkamkene,” pepra pediramutopu, sun butene neng pe tep aupu utopu pediramu.

10 Abrahamdi utenepra dinapu kuramu. ‘Gume, amenda taru, ne pio kunkamne mutuda, Allah er dipapu dopkamre. Allahdi, ‘Ukupra donkamne,’ tenepredi, ati arum dona deiyo ngebo kurure. Aila ati arum neitamaida, tu palipra abon neitamai gel deipmengedi, akati ayomnya co agel deiki ikra deipmengedi, akati yuma domengepa, pio akunkamre. Akati arumda, ke ati gume. Allahdi dorur ati yumada, pio akunkamre.’ Abrahamdi utenepra dinapu kuramu.

11 Tonda, Abraham er teka teneramnga deiki di, ange ton ukupu. Ada, erdi domu ner Sarada, you ner kuramupane, er Abraham peda, nyapu men deipmanto ngebo wisi konum deipu. Ukupra ukuramrei dinin, Allahdi, “Kan mi deipkamreme,” pepra, pedina upu deipupa, Abraham gekepudi, teka tenepu. Ada, ‘Gume, Allah er upu peretopu angepu kunkamre’ tenen, teka tenepka tep, Allahdi Abraham cap, Sara cap tep, meliamupa, er mi deipu. 12 Ange tep nengeda, Abrahamda tenpu ngebo, wisi deipupa, mi men deipmanto ngebo kuramu dinin, er teka teneramnga deiki di, Allah meliamupa, erdi ami deipupa, dadeipdanen yakaramyanen, deiami nyapuda, men nukmanto kununge. Ada, im neitamai kure kuru men nukmanto kure utopu, er nyapuda pio weik kununge. Tonda, laut mokon pirmanai gel wenenga men nukmanto kuretopu, er nyapuda pio weike kununge.

13 Uda, apepmasen nesala yumada, pio teka tenenapu kuramipane, amenda taru deami. Allahdi, “Ukunkamsene, ukupra akeca karenkamsene,” pepra, sun tep pediramu kecada, kapul men kareamupa, men dororami. Nong men dororami dinin, ‘Gume, Allahdi pediramseu ngeda, tek sisi karenkamsere’ tenen, kange deipra karenaito di, ketenepra dinapu kurami. Tonda, sundi uperami. “Gume, nunda, yuk karen mutu nesala, nimi bo nesala utopu kupra kunupe. Nunda, tuai mutu kunup dinin, acada nun mutu sisa gume,” perami. 14 Aupu utopu upu penge nengda, upepmenga deiki di katuai peteremsenunge. Sun pe mutu sisa tep, ketenepra dinapu kununge, sundi, ‘Tali tuai mutuda, nun mutu sisa,’ tenepra men kununge.

15 Sun men di kurami dinin tamami mutu tep, tupa putaptupa, teneamtenge teptoda, tek sisi dabal kuptupa, sun men di tami mutu konum tamupra benamtenge. 16 Dinino, angeda pio men kuramidi, ‘Nunda pio telep mutu, im deiki mutu bena kunkamepe’ tenen, weika di putaramupa, ketenepra dinapu kurami. Ange tep nengeda, Allahdi anesala tep, pio telep ila ati arum konum keteneipka tep, ali kuna gum dipapu, “Anesalada, ne nyapu sisa kununge. Neda, sun nai bo Allah kunune,” perure.

17 Uda, Abrahamda, er mi Isak tenpu kuramu dinin, Allahdi Abraham tep kurpeten keca karepu taruda, “Kan mi poipneo,” pepupa, Abraham ila di teka tenepka deiki di, ‘Allah gispal dona tep, Isak popra Allah karepkune’ tenen, Abraham konum keteneipu.

18 – 19 Menop taruda, Allahdi Abraham tep upediramu. “Kandi Isak deipmempa, Isakdi deiprepa, dadeipdanen, bankameng nyapu yumada, upenkamenge. ‘Nun apu bo Abrahamdi Isak deipupa, er Isak tara nengdi deipsei,’ penkamenge,” Allahdi peipu. Aupu pediramutopu, Abrahamdi Isak konum deipupa, er mi tenpupu kuramu. Allahdi, Abraham tep kupetepu taruda, Abrahamdi utenepu. ‘Gume, ne mi Isak tenpupu kurur dinin, Allahdi konum deami nesala dopra, tamupra gam bukra deipmanto ngebo kurura cadi, ne ikine gume. Ne mi popnepa deptua peda, Allahdi ami tamupra gam bukra deipkamre ja,’ tenepu. Uda, ataruda, Abrahamdi Isak men popu dinin, Abrahamdi Isak tep, ‘Popkun’ tenen, keteneipudi popmanto kupka cadi, yambul ukupmantonge tep nengeda, Isak konum popmatupa, Allahdi gam bukra deiptua utopu kupu.

20 Uda, Isakdi Allah tep, teka teneramnga deiki di, er nyapu Yakub cap, Esau cap tep, ‘Gume, amenda taru kunkamrenge tep, Allahdi teleppu kudinkamser’ tenen, “Allahdi telep kupra deipkamsere,” pepra, telep upu peipudi, sun deiki deipu. 21 Ange utopu, Yakub er depkou taru di, Allah tep, teka teneramnga deiki di, er deipu mi Yusup, erdi deipu nyapu tep, ‘Allahdi anyapu tep, telep kudinkamre’ tenen, telep upu pepra, sun deiki deipu. Aupu peipu taruda, er maca di baripra deiya tekudi, Allah er si erepu.

22 Ange utopu, Yusupdi Allah tep teka teneramnga deiki di, er depkou taru damai kupupa, amenda kupkamu keca tep lap pepu. Ada, Allahdi sun Israel nesala tep, Mesir mutu neitamai ateng koupra taleamya neitamai di, loptapra yukai dubenkamunge tep, lap pepu. Tonda upepu, “Israel nesala Mesir mutu tapra benkunge taruda, ne yo bupra, Kanaan mutu dubena tu palipkamnerume,” pepra deipu. Ayumada, er teka teneamnga deiki di pepu.

Musadi Allah tep, teka teneramunge tep, pepu upu

23 Tonda, Musa er nai cap, er nin cap, sundi Allah tep teka teneamreia deiki di, ukuprei. Mesir mutu talepra ila nimi deiyo ngebo Firaundi, “Sal nyapu yuma poptapso,” peipu dinin, sun kwar dangna gum di, ‘Gume, nun mida tali mi gume’ tenen, konum deipreidi, ami dopra, war weneri deiki di iniamrei.

24 Ange utopu, Musa konum nepu dingeda, Allah tep teka teneamnga deiki di, ukupu. “Neda, ‘Firaun er ner midi deipu mi,’ tenepra men penkamnenge,” peamu. 25 ‘Telep ngeda, Mesir mutu nengdi, Allah er mawa nesala, Israel nesala yuma tep, ikin keca sun nong deiki deriramengtopu, ne nong deiki derina peda telepe pua. Mali kunge nesaladi kange deipra, mali-mali kunge kecada, ke taru tep ne cap kuptepe dinino, angeda telep gum tep, men kunkamne,’ teneamu.

26 Tonda, uteneamu. ‘Gume, Mesir mutu kwamu keca, kunumna pio weik keca yuma taleptenya peda, yambul telep kuptene dinino, Allahdi nimi lyemna tep dokotepkamser ngebo, Kristus tep teka tenepnepa, Mesir mutu nengdi, ikin keca ne nong deiki deipnengopda, angeda ila telepe. Pio telep ngeda, ange pua,’ teneamu. Ange teneamua deiyoda, ‘Allahdi amenda taru menenga tep karepkamner keca dopropkamne’ teneramudi, teka teneamua tep ukuramu.

27 Tonda Musadi, Allah tep teka teneramnga deiki di, ‘Mesir mutu ila nimi deiyo ngebo Firaundi derepnerur’ tenen, kwar dangna gum di, Mesir mutu tapra, yukai beu. Tali nimi asuru di men epmanto ngebo Allah tep, Musadi epka cadi, ikin keca weik er nong deiki deiamipa, ikin kuramnga peda, pio men tamamu.

28 Musa teka teneamnga deiki di, sun Israel nesaladi, Kaplemne tep Kalemna pel dorami ngeda, men tamamu. Tonda, gam keca popra, yapi likra buplan dana-dana deipi ngeda, Musa er peda men tamamu. Ayapi likra deipi ngeda tali tep gume. Ada, Allahdi Mesir mutu kurami nesala, sun wein nyapu popkou taru, ‘Nimi Pona Deiyo malaikatdi, Israel nesala nun wein nyapu ton men popkuser’ tenen, kupu.

29 Tonda ange utopu, Israel nesala Mesir mutu tapra, me gum tep nimi men kurami mutu neitamai embaramyanen, Bi Laut Mokon pirmanai bei. Amokonda, men goupra benmantoai dinin, sun Israel nesala teka tenepya deiki di, Bi Laut Mokon neitamai wilipropupa, tu kal kupka deiki yanipra bei. Sun bei dinin, Mesir mutu nesaladi, ‘Nun peda atu kal deiki tali lupra betepe’ tenen, piripterepi dinin, amokon dana-dana di getepdongoprapudi, Mesir mutu jen talena neng yuma popra gawal daku.

30 Uda, amenda yuk taruda, Yeriko mutu ati arum dana-dana tara yuma, ila lyom gel beilya wipra deiami dinin, Israel nesala teka tenepya deiki di, tumi ue yoneitam deiki di ongomgenepra embanmaipane, Yeriko gel beilya wiaminge lokapudi, Yeriko mutu nesala popu. 31 Israel nesaladi, Yeriko mutu neng popkui taruda, Israel nesaladi, ‘Yeriko nesala popkup’ tenen, nimi ton butene neng dokotepipa, mirbei. Sun mirbei taruda, tenpu ner er sida Rahabdi, nimi tali nyangna ner kuramu dinin, er teka tenepka deiki di, ‘Ne mutu nengdi amiryanmarei neng popnung’ tenen, amirberei neng tep, “Telepe,” pepra melipra inipka cadi, ila gel beilya lokapudi, sun teka tenena gum nesala, Yeriko nesala popu dinin, aner tenpu Rahabda men popu.

32 Uda, ne kayapu, ware upu ton cap dukdongopra pepsetene do? Go ton cap men kwapmanera cadi, Gideon cap, Barak cap, Simson cap, Yepta cap, Daud cap, Samuel cap, uda, Allah er upu lap perami neng, nabi neng cap, yuk teka tenerami neng yuma cap, sun kurami keca yuma men lap pepsetene. 33 Aneng-aneng yuma, sundi Allah tep teka teneramya deiki di, mutu-mutu weik taleami ila nimi deiyo neng porbisiramidi, atalerami mutu yuma neitamai di, dumsisipu ila deiyo neng kemdirami. Allahdi aneng yuma tep, pediramu keca kareamupa, dororami. Tonda, ila yu pusdi, ‘Aneng jepkun’ tenen, piripterepu dinin, ayu pus sun si bana darapmaua tep, men jepmanto kupi.

34 Tonda, ila uku bu jeramu dinin, sundi tapdongopipa, men jepke. Ton taruda, yu nengdi, parang ya di anesala portererami dinin, sepra bendoramya tep, men porami. Sun Israel nesala puto boun kuramipane, Allah er puto di anesala tep meliamupa, puto weik kurami. Mutu-mutu yuma podarami taruda, sun puto weik kuramidi, yuk mutu jen talen neng yuma tep, porbisirami. 35 Ton taruda, nerapu sun nyapu do, sun apu yapu do, konum demami dinin, Allahdi tamupra anesala gam bukra deriramupa, sun nerapu damai tamupra yakarami.

Ton teka tenerami nesalada, yu nengdi dopra, ‘Sun teka tenenge keca yuma tapkameng’ tenen, balana dopra sun nong deiki bongoramidi, pio ikin keca weik sun nong deiki derirami. Ukurami dinin, sun teka tenena nengdi, “Uo, loptapseso,” pepra men mororami. Sun anengdi Allah tep, teka tenepra men tamamya deiyoda, ake.

Ada sundi, ‘Gume, teka tenenup ngebo Allah tep tapmepyopda, ayu nengdi loptapsetenge dinin, ada mali pua. Poptapsengopda, amendada nun nai bo Allahdi, tamupra gam bukeipserepa, pio gam kunkamepe. Pio telep ngeda, angepu tep, anengdi popsenga peda mambul gume. “Lopseso,” pepra men moropkupe,’ teneramipa, sun yu nengdi anesala porami.

36 Mali nengdi, yuk teka tenerami nesala tep, ukurami. Aneng tep nyek-nyek pepra auturami. Ton nengda, dopropnedi, balana di sun bali tara weika di bongorami. Ton neng dopra, ateng kouprapidi, wenemna ati pum dongorami. 37 Ton nengda, yuk nengdi gel dopra, sun nong deiki dopra poramipa, demami. Ton neng tep nengeda, gergaji dopra, sun nong neitamai sengtamami. Ton nengda, parang ya di portamami.

Ateka tenerami nesala, tupa gam kurami taruda, pio kankan kunge nesalapu kurami. Sun opkal sisa gum tep, domba bol cap, kambing bol cap, wipra kenengami. Akeca-keca yuma men taleamya cadi, pio putanapu kuramupa, mali nengdi, ‘Sun teka tenena nesalada, nun songe’ tenen, ikin keca weik sun nong deiki derirami.

38 Sun teka tenerami nesalada, sun telep ati sisa gum tep, tali embaramidi, nesala men kuramyai, mo men cemamuai cap, tali bura mutu neitamai, co palpal cap, gel imir cap, tu palina pumbon cap, wekra marami. Anesala yumada, pio telep nesala, mambul weik nesala kuramya cadi, telep ngeda tali teka tenena gum nesala, mali kunge nesala cap, wisipra tenpu mutu kikiman men kuramtenge. Dinin, tuai mutu tenpu tep, ware kuramtenge do, gume.

39 Menop taru teka tenerami nesala yuma tep nengeda, Allahdi, “Anesalada sun teka tenenung kecada, pio telepe. Ne kange deipsene,” pepra deiamu dinino, Allahdi anesala tep, “Akeca karenkamsene,” pepra, deriramunge yumada, kapul men dopropne dipu demami. 40 Deiyoda, Allahdi nun yuma tep pio telep keca keteneiamseu. Ada, ‘Men di kurami nesala cap, ukutaru kunge nesala cap, kikiman dumsisipu keipnedi, ne Allah cap dipru dukdongopra, pio mumupra teleppu kupra derinkamsene,’ teneamseue. ‘Kikimanpu doronkamenge,’ tenepka cadi, menop taru kurami nesala cap, nun ukutaru kunup nesala cap, keteneipseu ngeda, kikimanpu karenkamsere. Allahdi nun cap, sun cap kikimanpu dumsisipu kupra deipkamsere.