Hebrews 12

Allahdi, er nyapu sisa yuma tep, ‘Telep kunkameng do, gum do?’ tenen, kurpeteseredi, wenepra peteremserure

1Ange tep nengeda, ne kayapu, sun menop taru kuramidi, teka tenepra dumsisipu kurami nesala, arup pepmasen nesalada, dana-dana tara yuma, gung weik akungedi, nun tep dinapu kusenunge. Disenunga tep nengeda, Allahdi, ‘Ukupra dumsisi bisipu bankamenge’ teneamseutopu, ikin kupserya peda, tamna gum, pio pe deipra, abisi deikipu puto di bankamepe. Sun kamet pen nengdi, ‘Ikin kupnerur’ tenen, tali keca yuma siptapra, tenpu bisipu puto di sepra baramengtopu, nun peda utopu, ‘Iriwarye kupserur’ tenen, tali kun keca yuma tapmepedi, Allah tenepseu bisipu benkamepe. Ange utopu, ila mambul ngeda, mali keca putaserya deiki, kanam di ateng koudongona utopu kuramser keca yuma tapmepedi, Allah teneamseu bisipu benkamepe.

2Nun teka tenenup keca gonga kemna cap, mumupra gawal dangna cap, deiyo ngebo Yesus tep, teka tenepra talepmepedi, pio tenenapu kunkamepe.

Yesusda, ‘Allahdi ne tep erepra deipnerdi, pio telep kudinkamnere’ tenenapu kuramnga cadi, ‘Uo, sengdin co deiki nimi ponungada, ali dangna deipra popkamnengada, ne song,’ men tenepu. Men tenepudi, sengdin co deiki popmemei taruda, pu weik jenmaudi, ikin weik kunmaua peda, men tapu. Amenda taru, gam bukra im deiki beudi, Allah er Ila Nimi Deiyo Ngebo bungnai, dumsisi tara bungbeu. Yesusdi, ‘Allah er dumsisi tara bungbenkamnunada, pio telepe,’ teneamudi, angepu tenepka deiki di, kange deipudi, ‘Sengdin co deiki popkamnengada, ne song cadi, tapkamne’ tenen, pio men teneramu.

3‘Kange mun keca kuserepa, puto boun kupra, kange mun kange doupmepedi, dipru pu jesere taruda tapnup’ tenena tep nengeda, Yesus kuramunge tep, pio tenenapu kunkamrume. Teka tenena gum, pio mali kun nengdi, Yesus yanipra er nong deiki ikin keca weik derirami dinin, Yesusda, pio tamna gum di, pe deipra puto di kuramu.

4Mali kun nesaladi sun tep, ‘Bisbisa kapkupe’ tenen, pirirteresenung taru neitamai di, sun nong bol deikipu posenung dinin, sun yapi kapul men embenmaserpa, men depmarume. Atep, ikin kuserya peda, tamna gume. 5Tonda, Allahdi sun tep, ‘Ne nyapu, sun dipru kwa dinkamne’ tenen, peiamseu upuda, konum luproprum do? Allah upu neitamai kapseu upuda aca deipsene.
Ne nyapo, Allah kurpeteseredi, wenepra peteremseryada, ‘Dakwapye’ tenena meme. Allahdi, “Ukuna meme,” pepra wenepseryopda, ‘Uo’ tenen, dipru pu jena gume.’
6Angeda tali tep men pepne. Deiyoda, Allahdi bicau tenepra, er kange derirur nesala yuma tep nengeda, ‘Telep kunkameng do, gum do?’ tenen, kurpeteseredi, wenepra peteremserura tep pepsene.
Tonda, Allahdi, ‘Ne mi ake’ tenen, doror ngebo tep nengeda, mali kuprepa, wenepra ikin keca karerure. (Amsal 3:11-12)

7Uda, ware ngebodi, er mi sisa tep, men wenepra peteremrur do? Gume, nun nai yapu yumadi, ‘Ukunkamrume, angeda men kunkamrume,’ pepra, peteremna cap, wenemna cap kusenunge. Atep, kange mun keca kusere taru yumada, ‘Ada kurpetena cap, wenepra peteremna cap tep kunmasere,’ tenemumdi, tamna gum, pio pe deipra, dimpeprappu kunkamrume. Ikin kusere taru neitamaida, Allahdi nun tep, ‘Ne nyapu,’ teneseredi melimserure. 8Nun nai yapudi nun yuma tep, ‘Mali kun keca tapmengedi, teleppu kunkameng’ tenen, kurpetesengedi, wenepra peteremsenunge. Ukusenunga cadi, men wenepra peterepsetenge teptoda, yuk nengdi nun tep, ‘Anyapuda, sun nai yapudi deiami nyapu sisa gume. Sunda, tali nengdi nyaktapipa, deipi nyapu adano,’ tenepsetenge.

9Angepu gum dinin, nun yumada, nun nai yapudi wenepra peteremamseipa, gekeramepu. Ukupra kuramseinge tep, nun nai yapu tep, gispal dopra kange deriramepu. Nun nong neng tep, yambula di gispal doramepu dinino, nun nai bo Allahdi, nun kange dipru cap, sambala cap, gam kudisere ngebo tep nengeda, adipapu weika di gispal dopra, er amutara bukmepyopda, gam pio kunkamepe.

10Nun nai yapu sisa di, ‘Ange telepe,’ teneamseitopu, wenepra peteremamsei dinino, nun nai bo Allahdi, ‘Ne nyapu pio telep kudinkamne’ tenen, kurpetepseredi, wenepra peteremserure. Ukusere ada, tali tep gume. Ada, ‘Ne mali keca tenpu peda men kunerepa, pio dumsisipu kunetopu, ne nyapu peda utopu amsepu kunkamenge’ tenen, wenepra peteremserure. 11Uda, kurpeten keca cap, wenemna cap, peteremna cap kusenge taru neitamaida, kange deipra men kunupe. ‘Uo, ne ikin kunerure’ tenen, engenapu kunupe.

Dinino, ikin kange doupra, wa pepmengepa, amenda taru akeca-keca weik, nong kuprepa, telep kange doupra, weika di kirameng utopu, kurpetena cap, wenemna cap, peteremna cap kuserepa, adeiki di moupra gekengedi, kael kemenge nesalada, amenda taru kange deipra, dumsisipu kungedi, yuk neng yuma cap, telep kupra kikimanpu kunkamenge.

12Ange tep nengeda, beipye tapseredi, pu jesere buru cap, gutam pu jeseredi lyusereng cap, puto kemdidankamrume. Kange tenimtona gum di, dimpeprappu kunkamrume. 13‘Sun yuma puto di dumsisipu kunkamrum’ tenen, domon upu deiki di pepkusene. Ada, ‘Sun telep bisi tali lupra benkameng’ tenen, sun bisaida, tu palipra ban kupra deiprumyopda, sun yo yambula di kwaneamre nesalada, ila di men kwanepkamre dinin, kwetepmumpa, lepsikmengedi kip kupyopda, dumsisipu embankamenge. Atep, Allahdi kurpeteseredi, wenepra peteremsere taru yumada, makudarumdi, dumsisipu kunkamrume.

Allah tep tamenge nesalada, Allahdi amenda taru ila di wenepra popkamra tep, pepu upu

14Uda, ne kayapu. Sun yumadi, ‘Yuk nesala yuma cap, kange deipra kikiman kupmepedi, mali kuna cap, podana cap, upu deiki pangdana cap, ange yuma pio gum dipapu, dumsisipu kunkamepe’ tenen, pio pe deipra piripetenkamrume. Mali kuna keca yuma men tapmengedi, dumsisipu men kunge nesalada, nun Ila Deiyo Ngebo Allah er cap kikiman antapra men kunkamenge.

15Tonda, ataru neitamai yumada, sun yumadi, sun kikiman kurum nesala tep, moupra kalengdankamrume. Ada, Allahdi nun lyemna tep, bicau teneseredi, er kange dipapu tali melimsere keca konum gekepra kael kemnung dinin, dabal kuprepa, ‘Dakwapye, tenepra, tapnung’ tenen, moupra kalengdankamrume. Tonda, ‘Allahdi tapserur’ tenen, ton neng mali kupmengepa, yuk neng weik tulum kuprepa, adeiki di nesala weikanun ton cap tapakrap, mali kange doupra mali kupmengedi, ‘Sun yuma mali kweipdanung’ tenen, pio moupra kalengdankamrume. Ada mesum tep men pepsene. Ton tara nengdi, tulum weik kuprepa, yuk tara neng ton, ange epra gekepmengyopda, nimi weika di ton cap, tulum kuprepa, ‘Sun yuma mali kupnunga’ tenen, pepsene. ‘Ukupserur’ tenen, moupra kalengdankamrume.

16Ange utopu, sun kan-kan neitamai ton nesaladi, ‘Upula tali-tali nyakdanung’ tenen, moupra kalengdankamrume. Tonda, pumun kuramu ngebo Esaudi, ‘Allah er kure keca cap, dumsisi kun keca capda, mambul gume,’ teneamudi, mali kuramutopu, sun kan-kan neitamai yuk neng ton tenepmengedi, ‘Mali kupnung’ tenen, moupra kalengdankamrume. Esauda, ‘Allah er kure kecada mambule gume,’ teneamu. Ukupra teneamua cadi, erda menmena weni mi kuramua tep, er nai bodi taleamu keca yuma doproamtu dinin, tenpu tumi deiki dipu er jen putapupa, er weit bo Yakub jenmau keca kunupra dopropka deiki di, er talepmanto keca yuma kunupropupa, er weit bodipu dopropu.

17Uda, sun kaele, Esaudi, er taleamtu keca yuma konum kunupropupa, er weit bopu dopropu dinin, amenda taruda, Esau er kange tamupudi, ‘Uo, ne nai taleamu keca karepnetupa, nedipu doproptene’ tenen, putapupa moropu dinin, er naidi tapmemeu. Esaudi, “Uo naio, akeca karepnetume,” pepra, ila di engepra moronapu kunmau dinin, er nai bo, er kange men tamupka tep, pio tapmemeu.

18Ne kayapu, sun pumun taru kurami nesala, Israel nesala kuramitopu, ataru kurum nesala men kurume. Sun pumun taru kurami Israel nesalada, nimi buru di talepmanto mutu damai yai dinin, amutu Sinai mutu deikida, ila uku jeramu. Tonda, amutu deikida, pio kunungnai cap, mungna cap, perenglang pena cap, kulman cap, mo weik cap kuramu.

19Tonda, amutu deikipu ila bung-bung pena, er sida terompet ila lelim pepu. Tonda, ila nimi upu utopu upu, ila mambul upu pepupa, aupu gekerami nesaladi, engepra moronmai. “Uo, upu ton cap dukdongopra men pepkamserume. Nun kange mun weik kunmasere,” peprapidi, engepra moronmaidi, kware weik kuramu. 20Ange moropya deiyoda ake. Aila upu di upepu.
‘Amutuda pio memai cadi, nimi do, nerapu do, uda tali gam kure keca peda, ware keca do yuma, amutu damai yangedi, amutu tu yanipmengopda, sun yuk nesala yumadi, adipapu gel dopra aneng sun nong deiki dopra poptapkamrume, pepu.’ (Keluaran 19:12-13)
21Ukuramipane, amutu kwamu keca yumada, pio mambul kuramupa, sun giso talanga beupa, kware weik kuramu. Musa peda ange yuma epudi upepu.
‘Uo, ne kware weik kupmanera tep, ne nong yuma moropsemanere,’ pepu. (Ulangan 9:19)

22Uda, ne kayapu. Sun pumun taru kurami Israel nesala, asuru epmanto keca damai yakarami dinin, sun ukutaru kurumu nesalada, pio yuk keca damai yanmarume. Sunda, Sion mutu dam, Pio Gam Kuna Deiyo Ngebo Allah, er kure mutu, im deiki Yerusalem ati arum damai yakanmarume. Sunda, ila gung weik men nukmanto, im deiki pel don neng telep kange deipra, malaikat beribu-ribuan bulupra, wengmenga damai yakanmarume.

23Sunda, Allahdi, ‘Anesalada, mambule. Sunda, ne nyapu sisa kunkameng’ tenen, menmena taru konum wepra deiamu nesala damai yakanmarume. Anesalada, Allah er Mi Sisa Yesusdi talerure. Allahdi anesala sun si sekra im deiki konum deiamu. Uda, nimi ban-ban yuma tep, ‘Telepnge ake, mali ake,’ pepra, upu lepsisikra bokra deipkamser Deiyo Ngebo Allah, er damai yakanmarume. Tonda, dumsisi kurami nesala deramipane, Allahdi sun sambala dopra, konum pio mumupra, telep kupra deipupa, sun kungai damai yakanmarume.

24Tonda, Allah dana tara, nimi dana tara, neitamai antamdina deiyo ngebo, Yesus er kundam yakanmarume. Nimi lyemna tep, Allahdi, “Ukupkamsene,” pepra pediramseu upu, ukupu ngeda, Yesusda aupu tep antamdina deiyo ngebo kuserure. ‘Allah cap, nimi tuai nesala cap, telep kupra kikiman kunkameng’ tenen, antapra deriserur deiyo ngeboda, Yesus pua. Menop taru kuramu ngebo Habeldi, Allah er gispal dona tep, gam keca popra, yapi likra deipu ngeda, yambul teleppu kupu dinin, Yesusdi nun lyemna tep, er yapi embeu ngeda, pio mambul weik kurure.

25Ne kayapu, sun kan-kan dinin, ton nesaladi, ukutaru mambul upu pesere ngebo tep, ‘Nun songe’ tenen, er cap, er pesere upu cap tep tapra, ‘Men gekepnung’ tenen, moupra kalengdankamrume. Uda, tenipetepso. Pumun taruda sun deiyo ngebo, tali tuai ngebodi, “Ukuna meme. Sun kange moupso,” peramupane, sun men gekerami nesalada, men lyepdanmanto kuramipa, Allahdi sun balila kurami nesala wenepra portamamu.

Ukutaruda, im deiki kure ngebodi, nun yuma tep, “Ukuna meme. Sun kange moupso,” pepra wenemserura cadi, sun pumun taru kurami nesala men lyepdanmanto kuramya tep, ukutaru di mambul upu pesere ngebo tapmepyopda, nun ware kuptepya deiki di, lyepdatepi do? Gume, angeda men kupmanto. Ukutaru im deiki di pesere ngebo tapmepyopda, tek sisi Allahdi anesala wenepra poptapkamre. Angeda men kaukepkamre.

26Pumun taruda, Allah er upu ila di pepupa, tuai mutu yuma long-long pepu. Dinino, ukutaruda er dipu konum pepsere. “Tenpu taru ton cap, tali tuai mutupu gum dinin, tuai mutu ban-ban yuma cap, im deiki kure keca yuma cap, ton cap pio weika di lokamne ja.” Allahdi upepra pedina upu konum peipseu. 27Erdi, “Tenpu taru ton cap,” pepseua deiki di kael kemnupe. Ada long-long pepmanto keca yumada, erdi ketekeipra deiamu keca yumada, amenda taru gum kupra deipre dingeda, men long-long pepmanto kecapu, ukupu ketekepra deipkamre ngeda, pio akunkamre.

28Ange tep nengeda, ne kayapu, Allahdi nun teka tenenup nesala talepra, Ila Nimi Deiyo Ngebo kunkamserya yuma cap, erdi kareserepa, talepra kunkamepenge yuma capda, long-long peptupa, men gum kuptua cadi, nun yumadi Allah tep tupa-tupa, “Telepe,” pepra kunkamepe. Tonda, Allahdi, ‘Ange telepe,’ teneseretopu, ‘Uo, Allahda ila mambule’ tenen, er tep kware kuserepa, er sipu pio eremkamepe. Nun nai Allah tep, ‘Telepe,’ pepra, er sipu erepmepyopda, Allahdi nun tep kange derinkamsere. ‘Allah tep, kware kunkamsere,’ pepmasen upuda tali tep men pepsene. 29Nun nai bo Allahda, ila uku imna ipmengepa, akeca-keca yuma jepropredi, gum kuramretopu, erda ange utopu kurur ngebodi, mali kun keca yuma tep, tulum kuprepa, gum kupra deipkamra cadi, ‘Erda mambule’ tenen, kware kuseredi, er sipu eremkamepe.