Heb 13 | XteSC | STEP | Ukutaru konum kumumtopu, yuk teka tenenung nesala yumada, ‘Nun weit yapu utopu kunupe’ tenen, bicau tenepra, makudanapu tupa kunkamrume.

Hebrews 13

Yuk neng tep, bicau tenena cap, sun amutara kuna cap tep, pepu upu

1 Ukutaru konum kumumtopu, yuk teka tenenung nesala yumada, ‘Nun weit yapu utopu kunupe’ tenen, bicau tenepra, makudanapu tupa kunkamrume. 2 Uda, ton nengda, ‘E, anesalada malaikat kununge,’ men teneami dinin, tali mankau kange doupra, nimi bo neng makurami taruda, tek sisi im deiki, pel don neng, malaikat tep namdoramidi, makurami. Ange tep lumdongona gum. Nimi bo neng sun damai yangopda, “Telepe,” pepra namdonkamrume. 3 Tonda, sun teka tenepya tep, ateng koupra wenemna ati dongopipa, wenemna ati tupa dakunung nesala tep, lumdongona gume. Anesala tep tupa tenepra makunkamrume.

Ange utopu, yuk neng teka tenepya tep, mali nengdi ikin keca weik, sun nong deiki derengepa, mali kange doupra, ikine tep dounge nesalada, tupa tenepra makunkamrume. Ataru neitamai yumada, ‘Uo, yu nengdi nun pe tep, ateng koupra wenemna ati dongopsengopda, aneng sun kange mun kange doupra dounmangtopu, nun peda utopu kupsenung’ tenen, wenemna ati tupa dakunge neng tep, bicau tenepra makunkamrume.

4 Uda, ner dopra kuna tep upu pepkusene. Nerapu dopra kunkamrum taru yumada, ‘Angeda ila mambul cadi, mali men kunkamep’ tenen, yuk nerapu dopra tali-tali men nyangdankamrume. Angeda meme. “Ukuna meme,” pepmasenada, tali tep men pepsene. Gume. Ner konum dopu dinin, yuk neng nerapu upula nyangamre ngebo cap, tonda kaber neng dinin, mali-mali kupmengedi, tali nerapu upula nyangdarameng nesala yuma cap, Allahdi sun tep upu lepsisikra bokeipredi, wenepra popkamra tep, pepsene. 5 Allahdi nun teka tenenup nesala yuma tep, er upu deiki di upepseue. Aupuda ake.
‘Doryankamre taru yumada, sun tapra, yukai men bendopkamsene. Ne cap, sun cap kikimanpu kunkamepe. Sun putan keca yuma tep, pio men tamkamsene. Makupra karenapu kunkamsene. Allahdi pepu.’ (Ulangan 31:6)

6 Allahdi, aupu peipseua tep, kange tenimtona gum di, teka tenepra, apepkusen upupu talepra kunkamepe. Ada Mazmur neitamai di peami upu ake.
‘Ne makunere ngeboda, Ila Nimi Deiyo Ngebo Allah kurure. Atep, ne kware pio men kunkamne. Tali nimidi, ware kupnetengpa, Allahdi men melipnetu do? Gume, Allahdi ne tep, pio melimkamnera cadi, ne kware men kunkamne.’ (Mazmur 118:6-7)

7 Uda, sun nimi deiyo neng utopu kupra, Allah er upu peteremamsei nengda, sun kurami keca lumdongona gume. Anengdi kurami ngeda, tupa tenenapu kunkamrume. Sundi dumsisi kuramidi, telep pel doramya deiki di, nong kemamunge yumada, ange tupa tenenapu kunkamrume. Sun deiyo nengdi teka teneramitopu, sun peda utopu, teka tenepra teleppu kunkamrume. 8 Yesus Kristusda, pumun taru pio telep kuramutopu, ukutaru pe kuredi, amenda doryankamre taru peda, utopu pio kunkamre. Yuk ton men kunkamre.

9 Uda, sun yuk nengdi, urasin yuk peteremenge upu, tali upu yala-yala yuma peteremsengepa, gekepmumya deiki di, yuk mali bisi dubesenunga tep, sun upu gekena gume. Allah bicau teneseredi, er kange dipapu melimserepa, nun kange dipru puto kemdiseredi, dipru kwa dimseryada telepe pua. Angepu talepra kunkamrume. Dinino, yuk nengdi, sun pe kange dipu, “Ukuna meme,” pepra, jen keca tep, mem kepmengedi, mem pel doramenga deiki di, nun kange dipru puto men kemdisetue. Jen keca tep, “Angeda jena meme,” pepra mem kepmengedi, mem pel donung neng peda, ukununga deiki di, tek sisi men melimdanunge. Anengdi tali pelpu donunge.

10 Nun talesere deiyo ngebo Yesusdi, nun pununa tep depka deiki lyepseudi, telep kudisere ngeda, Yesus tep teka men tenenung nesaladi men doproptenge. Sun Yahudi nesalada, ‘Allahdi nun mali keca kaukepkamser’ tenen, gam keca popra, Allah karerameng ati pum, mem pel tupa donge nesalada, sun ton men doproptenge.

11 Uda, yuk upu ton pepkusene. Yahudi yala nesala Allah karena tep ila deiyo ngeboda, ‘Allahdi nun mali kun keca kaukepkamser’ tenen, gam keca popredi, ayapi dopra, Allah karena ati, Pio Telep Lek ati wekredi, Allah er gispal dona tep, yapi likra derirure. Apel yuma konum kupredi, yuk neng tep agam keca nong dopra karepre pangeda, nimi kungai tapra bura tara dubengedi, uku sekra dongopmengepa, ukudi agam keca nong yuma jerorure. 12 Ange ukurameng utopu, Yesus peda utopu kuramu. Ada, Yerusalem ati arum doramyai tapra, bura tarapu dubeidi, ‘Yesus popkup’ tenen, Yesus dopra sengdin co deiki deipipa, dounmauanen, nun yo pununa tep depu. Nun kunumna tep depseua deiyoda, Yesusdi uteneamu. ‘Ne yapi embankamra deiki di, ne wepra deamsi nesala, sun mali kun keca gum kupra deipnedi, anesala telep kupra dumsisi kupra deipkamne’ tenen, nun pununa tep depseue.

13 Yesusdi, ukupseua tep nengeda, sun Yahudi yala nesaladi, ‘Mem pel dopmepya deiki di Allahdi lyepsetue’ tenen, kunge nesala tara tapra, yuk tara mepropmepedi, Yesus tep teka tenepmepedi, erpu talepra kunkamepe. Yahudi yala nesala kankan, ton nengdi, ‘Yesusda, nun song’ tenen, er tep dopra nyek-nyek pepra, er nong deiki ikin keca deriramitopu, nun teka tenenup nesala tep, teka tenena gum nesaladi ikin keca nun nong deiki deipsengedi, mali kupsenga peda, ukupra tenenkamepe. ‘Gume, nun deiyo ngebo Yesus tep, ikin keca er nong deiki deriramitopu, nun pe tepapu, nun nong deiki ikin keca derinmaseng dinin, angeda telepe pua’ tenen, tali kange doupra kunkamepe.

14 Angeda tali tep men pepsene. Deiyoda, tuai mutu ban-ban yuma neitamaida, nun ati arum pio kunkamserai men kurure. Ange gum dinin, ‘Nun pio kunkamep atida, amenda taru yankamser’ tenen, ketenepra dinapu kunupe. Atep Yesus tepapu teka tenepmepedi, erpu talepmepepa, yuk nesaladi nyek-nyek pepra, ikin keca nun nong deiki deipsenga peda, ‘Angeda telepe pua,’ tenepmepedi kunkamepe.

15 Yesusdi nun yo punupseudi, nimi lyemna pel yuma dopseua tep nengeda, erdi melimserya deiki di, nun nai bo Allah tep, “Telepe,” pepra, er si pio eremkamepe. Ada, Allah er gispal dona tep, gam keca popra, Allah tep kareraminge utopu, ukutaruda nundi Allah tep, “Telepe,” pepra, er si pio eremkamepe. Nundi Allah tep karena utopu ngeda, ‘Yuk nesala ton gekepmengedi, teka tenenkameng’ tenen, nundi, “Yesuspu teka tenepra talenupe,” pepra, katuaipu lap penkamepe.

16 Tonda, lumdongona gume. Ware telep kun keca do yuma, yuk neng tep makupra kumumdi, akapsere keca neitamai di bokra, melipra karedankamrume. Deiyoda, ‘Allah er gispal donkupe’ tenen, yuk nesala tep, melipra karemepe keca yuma tep nengeda, Allah epseredi kange deriserura tep pepsene.

17 Uda, Allah teka tenena tep, nimi deiyo neng utopu kusenge nesaladi, pesenge upu moupra gekeprumdi, sun amutara bukra, bouna di kunkamrume. Sundi, ‘Nun amutara kunge nesalada, teka tenepra telep kunung do, gum do?’ tenen, kalekra disenungada, mesum tep men kununge. Amenda taru Allahdi adeiyo neng tep, asipeteprepa, sun pel yuma tep, “Ukuramepu, ukuramepu,” pepra lap pepmengepa, Allahdi aneng tep, upu lepsisikra bokeipkamre. Balila deiya kumum pangeda, sun deiyo neng ikin kange doupmengopda, sun pedi sun pe tep mali kudidankamrume. Atep, sun deiyo nengdi makupra dosenge pel neitamai yumada, ‘Teleppu kupepa, nun deiyo nengdi, kange deipra kunkamenge’ tenen, sun deiyo nengdi pesengetopu, gekepra dombankamrume. Sun upu yanina meme.

18 Sun teka tenerum nesala yumadi nun tep, Allah moronkamserume. Ware kun keca do yuma, nunda, ‘Allahdi teneseretopu, pio dumsisipu kunkamepe’ tenen, putaserepa, dumsisipu kunupe. Tonda, nun kange dipru neitamaida, mali kun keca men inipmepedi, dumsisi kun kecapu tenepra kunupe. 19 Tenpu mambul keca moronkamnerum ngeda pepkusene. Ada, ‘Ne ikin kunere keca gum kuptupa, kange di ton cap, sun uruna tep, sun kori, tamupra diryasetene’ tenen, pepsene. Atep nengeda, sundi, ‘Nun kabodi, nun mutu tamupra diryasetue’ tenen, Allah moronkamnerume.

Allah tep moropu upu

20 Allahdi, ‘Nimi yuma, podana gum di, telep kange deipra, yuk nesala cap, kikiman telep kunkameng’ tenen, telep kuna tep deiyo keca kareserur ngebo kurura cadi, er dipapu melimserepa, yuk nesala cap telep kupra kikiman kunkamepe. Allahdi, “Ne cap, nimi cap, telep kupra kikiman kunkamepe,” pepra pediramseu upu, nimi lyemna upuda, Yesus er yapi embeua deiki di, gawal dakra mumupra deipseue. Yesus popipa depu dinin, Allahdi Yesus tamupra gam bukra deipupa, Yesusda gam tupa kurure. Allahdi nun lyemna tep, pediramseu upuda, men gum kupkamre. Angeda, pio akunkamre. Ukupmantoda, sun domba peina deiyo nengdi, sun domba tep, telep-telep kupra peiramengtopu, Yesusdi nun teka tenenup nesala tep, pio telep kupra melipra kalengserure.

21 Sun tep Allah morosenun kecada pepkusene. Ada, ‘Yesus Kristus melimserya deiki di, sun dipru neitamai pel doserepa, Allahdi, ‘Ukunkamenge,’ teneamseu keca, er kange deriserur keca yuma weika di kapkamsere’ tenen, Allah morosenune. Yesus melimserepa, akeca yuma akapseryopda, adeiki di Allahdi sun tep, ‘Ukunkamenge,’ teneseretopu, ‘Teleppu kunkamrume’ tenen, Allah morosenune. Tonda, ‘Ukutaru di diprap, doryankamre taru yumada, nesala ban-ban yumadi, Yesus Kristus er sipu ila di eremkameng’ tenen, putanerepa, Allah moronune. ‘Tek sisi pio teleppu ukunkameng’ tenen, “Amin,” pepra, Allah morosenune.

Gawal dangna upu

22 Nun yuma teka tenenupa tep, ne weit yapu utopu nesalao. “Ukunkamrume,” pepra sekeipmasen upuda, yambulanunpu dokotepmasena cadi, ‘Asurat epmumdi, kange deipra gekenapu kunkamrum’ tenen, moropsene. 23 Uda, ‘Sun kael kepkurum’ tenen, pepkusene. Nun weit utopu ngebo Timotius, ateng koupra wenemna ati dongopipa, dakuramupane, ukuda konum loptapmange. Erdi ne damai menmena yatuopda, er cap, ne cap, sun damai kikiman diryankamseneme. 24 Sun Allah upu peteremna deiyo neng cap, Allah tep teka teneamipa, Allahdi, ‘Ne mawa nesala kunkameng’ tenen, dororamu nesala yuma cap tep, “Telepe,” peipkamrume. Sun Italia mutu teka tenenge nesaladi, sun yuma tep, “Telepe,” peipmasenge. 25 Uda, konuma. ‘Allah bicau teneseredi, er kange dipapu melimsere keca kareserepa, teleppu kunkamrum’ tenen, telepe pepsene.

Telepe, ne pepsenedi, acapu sekra deipsene.