Heb 2 | XteSC | STEP | Arup konum pepmasen upu yuma akapmara tep nengeda, peteremna nengdi peteremamseipa, gekeramepu upuda, pio kange moupra tenenkamepe. Ada, ‘Mankau kange doupra, walwal di, Allahdi peipseu bisi tapra, yuk mali bisi lerekra embanup’ tenen, pepsene.

Hebrews 2

“Nimi Lyemna tep, ‘Dakwapye’ tenen, tamna pio gume,” pepu upu

1 Arup konum pepmasen upu yuma akapmara tep nengeda, peteremna nengdi peteremamseipa, gekeramepu upuda, pio kange moupra tenenkamepe. Ada, ‘Mankau kange doupra, walwal di, Allahdi peipseu bisi tapra, yuk mali bisi lerekra embanup’ tenen, pepsene. 2 ‘Kange moupkamepe,’ pepmasenada, deiyonge ton pepkusene. Ada, malaikatda, yambul mambul kunung dinin, Allahdi peiamupa, sun malaikatdi tuai nesala tep perami upu yuma, adipapu gekepra kurami dinin, aupu yanitamami nesala yuma tep, sun yaniramidi mali kuramitopu Allahdi, wenepra poramu. ‘Dakwapye’ tenena gum dipapu, anesala yuma tep wenepra poramu.

3 Malaikatdi perami upu yambul mambul dinin, aupu yanirami nesala tep, ‘Dakwapye,’ tenena gum di, wenepra poramu. Aneng poramnga cadi, ukutaru ila mambul lyemna keca keteneipseu ngeda, ‘Mambul gume’ tenen, tapmepyopda, Allahdi nun tep, ‘Dakwapye. Sun tep men wenepkamne,’ tenepkamser do, gum do? Gume, ange men kupmanto tep, Allahdi nimi lyemna tep keteneipseu keca tapmepyopda, tek sisi popkamsere.

Aupu pepmasenada, nun Deiyo Ngebo Yesusdi, nimi lyemna tep kai telep upu gonga kepra menmena di lap peramupa, er upu gekerami nengdi, nun damai yakaramidi nun tep, “Yesusdi peramu upuda ake-ake,” pepra, nun damai lap pepra jenek peteremamsei. 4 Tonda, Allahdi nun tep, ‘Ne upu, nimi lyemna tep kai telep upuda, tuai nesala teka tenenkameng’ tenen, sun peteremamsei taruda, mambul pel weik doramseue. Ada, ‘Allah dipapu apel donmasere, tenepkamnetenge’ tenen, tali nengdi men kupmanto keca cap, ila mambul kunupsek pen pel cap, nimi men kupmanto pel cap doramseupa, nimi weika di, ‘Uo, angeda tek sisi Allah er ja,’ teneramepu. Tonda, erdi teneramseutopu, Allah er Lek Sambaladi er puto deiki di karesere pel dona deiyo keca ton, bokra kareamseue.

Yesusdi nun teka tenenup nesala tep, “Ne weit yapu kurume,” peserur upu

5 Sirya taru, nimi kunkamepai cap, akeca-keca yuma cap, Allahdi ukupunge deipkamserenge tep, ‘Malaikatdi akeca yuma talepra nimi deiyo neng kunkameng’ tenen, men wepra ereipu. Ada, ‘Tuai mutu cap, akeca-keca yuma cap, ukupunge ketekepra deipkamre,’ penmap upu tep, pepsene. 6 Dinino, Allah upu neitamaida, ton ngebodi aupu sekamu.
‘Allah kandi tenesememnya deiyoda, nimida pio telep kununga tep tupa teneserum do? Gume.
Tonda, nimidi derirameng nyapu tenesememnya deiyoda, sun nyapuda ila mambul tep makuserum do? Gume.
7 Malaikat yambul deiki tara kungepa, Nimi Mi Sisa Utopu Ngeboda, ^{▼▼Nimi Mi Sisa Utopu Ngebo – Yesusda, Allah er Mi Sisa kuramu dinin, er tuai mutu yau taruda, nimi urasin utopu daudi, er kange tenena cap, er nong cap, er putaramu keca yuma capda, nun tuai nesala kurameptopu kuramu, dinino, mali keca tenpu peda pio men kuramu. Ukupra kuramunge tep nengeda, Nimi Mi Sisa Utopu Ngebo, penupe. Yesus er pedi, er pe teppu, “Neda, Nimi Mi Sisa Utopu Ngebo kunune,” peramu (Lukas 18:31). Erda, nimi tuai nesala yuma tep, Nimi Lyemna Deiyo Ngebo kurure. Atep, aupu pepdau. Tonda lap pena upu nomor 22 dirume.} ke taru tep sun amutara deipmume. Ukupmumdi, angeboda, ila mambul kupra deipmumdi, er tep gispal doamume.
8 Ukupra weipmumdi, tali tuai keca cap, yuk kure keca yuma cap dopra, Nimi Mi Sisa Utopu Ngebo, ^{▼▼Nimi Mi Sisa Utopu Ngebo – Ibrani upu sekaminge deiyoda, ton ila kael nengdi, aupu tep, ‘Tuai nesala tep pepu,’ tenenunge. Ton kael nengeda, “Gume, ada Yesus, Allah er Mi Sisa kuramu dinin, tuai mutu yau taruda, nimi mi sisa utopu daudi yaua tep, aupu pepu,” penunge.} er amutara deipmumpa, akeca-keca yuma tep deiki tara talepra ila nimi deiyo ngebo kurure.’ (Mazmur 8:4-6)

Allahdi akeca-keca yuma dopra Nimi Mi Sisa Utopu Ngebo, er amutara deipu ngeda, tenpu keca peda men tapu. Akeca yuma dopra, angebo er amutara deipupa, angebodi akeca yuma talepra ila nimi deiyo ngebo kurure. Dinino, ukutaruda, ton kecada, er amutara kurur dinin, ton yuk kecada er amutara kapul men kurepa, erdi akeca-keca yuma talepra, ila nimi deiyo neng tek sisi kapul men kurure.

9 Angeda, kapul men kurepa men dinup dinino, Yesus erda konum kael kepmupke. Allahdi ke taru tep, malaikat deiki tara deipupa, dakuramipa, Yesus dopra, metekanun sun amutara deipu. Men di yambula di amutarato deiamu dinin, Yesus depka cadi, ukutaruda Allahdi Yesus tep, ‘Ila mambul ngebo kunkamre’ tenen, erepra deipupa, nesala yumadi, er tep ila di gispal donkamenge. Yesus depunge deiyoda ake. Ada Allah er kange dipapu, tuai nesala yuma tep bicau teneamseudi makupseua deiki di, ‘Nimi yuma depmengepa, gum kupnung’ tenen, nun yo pununa tep, Allahdi Yesus karepseupa, Yesusdi nun tep depka deiki di, punupseudi lyepseue.

10 Ware keca do yuma, akure keca yumada, Allah er si eremna cap, er gispal dona cap tep kurure. Tonda, Allahdi akeca-keca yuma ketekeipra deipupa, er puto deiki dipu akeca yuma akurure. Allahdi, ‘Ne nyapu weika di lyepnedi, ne pio telep kununai yana, kikiman kunkamep’ tenen, ketenemna tep pel doamu ngeda, pio telep pelpu doamu. Ada Allah er nyapu lyemna tep, Nimi Lyemna Deiyo Ngebo Yesusda, er nong deiki ikin keca weik deipupa, kange mun kange doupra kuramu. Ukuramnga deiki di, Yesus er dipru wisipupa, Allahdi Yesus tep pio telep kupra deipudi ereipu.

11 Nimi yuma, sun mali kun keca tep, gum kupra deipredi, telep kudiserura deiyo ngebo Yesus cap, uda, erdi nun mali kun keca gum kupra deipseredi, telep kudisere nesala peda, nun nai bo Allah, er tenpu kurure. Yesus cap, nun cap, nun nai bo Allah tenpu kurepa, nun yala tenpu kunupa cadi, Yesus er cap, nun teka tenenup nesala cap, weitapsilip utopu kunupe. Yesus cap, erdi lyepseu nesala nun cap, weitapsilip utopu kunupa cadi, Yesusdi nun tep, ali kuna gum dipapu, “Sunda, ne weit yapu kurume,” peserure. 12 Mazmur deiki sekami upu neitamaida, Yesusdi uperure. Aupuda ake.
‘Yesusdi Allah tep upepu. “Ne weit yapu tep, kan si cap, kan kumem keca cap tep, lap penkamne. ‘Kan tep teka tenepmenge nesala gekenkameng’ tenen, sun bulumenge taru neitamaida, kan si eremna tep kan kumem keca tenepnedi mut pepra, gispal dokenedi, kan si eremkamkene,” pepu.’ (Mazmur 22:22)

13 Aupu utopunge ton ake.
‘Allah tep teka tenepnedi, er deikipu ne kange derinkamne, pepu.’ (Yesaya 8:17)

Tonda aupu pepu ake.
‘Ne cap, Allahdi kareamneu nyapu sun cap, kikiman kunupe, pepu.’ (Yesaya 8:18)

14 Erdi, “Ne nyapu,” pepu nesalada, tuai nesala kungepa, nong galemna cap, yapi cap kurepa kunupa cadi, Yesus er peda, nimi nong utopu daudi, nun kan-kan kuramu. Nimi nong daudi kuramnga deiyoda ake. Ada, Yesusdi, ‘Nimi lyemna tep, ne depnyopda, adeiki di nimi dena deiyo keca talepra puto kure ngebo Kain Jen Ngebo tep, bisbisa kapnedi poptapkamne’ tenen, Yesusdi nimi utopu dau. 15 Tonda, ware tuai nesala yuma do yuma, ‘Amenda taru, nun depnup’ tenen, kware weik kunge nesalada, Kain Jen Ngebodi anesala yuma ateng koupra taleamupa, er amutara kurami. Er amutara kurami nesala yumada, Yesusdi, ‘Anesala loptapnedi lyepkamne’ tenen, nimi utopu daudi, yana lyepseue.

16 Aupuda tali men pepsene. Yesusdi melimrur nesalada, Allah er im deiki pel don neng malaikat tep, men melimrure. Angeda gume. Ange gum dinin, nun apu bo Abrahamdi deipupa, dadeipdanen yakaramyanen, derisenung nesala, nun tuai nesala tep, melipra lyemserure.

17 Arup pepmasen upu yuma tep nengeda, Allahdi Yesus tep, nimi utopu kupra deipupa, Yesusda er weit yapu utopu nesala, tuai nesala utopu dau. Nimi utopu daunge deiyo ton ake. Ada, nimi mali kun neng tep, bicau teneamseudi, Allah cap, nimi cap antamdina pel dona deiyo ngebo kupseu. Nun mali kun keca tep, adipapu tali lupra poptapsetu dinin, bicau teneamseudi, ‘Tamna gum di, telep kupra nimi lyemna pel donkamsen’ tenen, nimi nong utopu dau. Ton deiyoda ake. Ada Allahdi Yesus tep, ‘Nimi utopu kupredi, tuai nesala sun mali kun keca gum kupra deipredi, sun yo pununa tep, depkamre,’ teneamnga tep, Yesusda, nimi nong utopu dau.

18 Yesus tuai mutu kuramu taruda, Kain Jen Ngebodi Yesus tep, ‘Mali kuptue’ tenen, er dipruai kurpeteramupa, Yesus er ikin kange doupra kuramu. Kain Jen Ngebodi, er dipru kurpeteramupa, erda ikin kange doupra kuramu. Yesus peda ikin kange doupra kuramnga cadi, Kain Jen Ngebodi, nun tuai nesala tep, ‘Mali kuptenge’ tenen, dipru gidoserepa, ikin kunup taruda, Yesusda, ange yuma ila di konum kael keamu ngebo kurura cadi, nun dipru kwa dipseredi, melimserure.