Heb 3 | XteSC | STEP | Arup pepmasen upu yuma akapmara tep, apepkusen upu peda gekenkurume. Kain Jen Ngebodi, nun tuai nesala tep, ‘Mali kuptenge’ tenen, dipru gidoserepa ikin kunup taruda, ‘Nun du bo Yesusdi, melimkamser’ tenen, er tepapu teka tenepra tenenkamrume. Ne kayapu, Allahdi wepseupa, er tep teka tenerum nesala tep pepsene. Allahdi upupseupa, ‘Allah er damai im deiki benkamepe’ tenen, teka tenenuptopu, sun yuk mutu ton kurum nesala, ange utopu teka tenerume. Ange tep nengeda, sun kange tenenange yumada, Yesus deikipu deipmumdi, er teppu teka tenenkamrume. Yesus er tep teka tenepra erpu talepra kunupe. Yesusda, Allahdi tuai nesala lyemna tep, er kai telep upu lap pena tep gonga kemna deiyo ngebo kurure. Nun cap, Allah cap kikiman kuna tep, antamdina deiyo ngeboda Yesus kuserure. Yesus tep teka tenepedi, er upu lap perbanupe.

Hebrews 3

“Yesusda ila mambul ngebo kurure. Musada, yambul mambul pua kurure,” pepu upu

1 Arup pepmasen upu yuma akapmara tep, apepkusen upu peda gekenkurume. Kain Jen Ngebodi, nun tuai nesala tep, ‘Mali kuptenge’ tenen, dipru gidoserepa ikin kunup taruda, ‘Nun du bo Yesusdi, melimkamser’ tenen, er tepapu teka tenepra tenenkamrume. Ne kayapu, Allahdi wepseupa, er tep teka tenerum nesala tep pepsene. Allahdi upupseupa, ‘Allah er damai im deiki benkamepe’ tenen, teka tenenuptopu, sun yuk mutu ton kurum nesala, ange utopu teka tenerume.

Ange tep nengeda, sun kange tenenange yumada, Yesus deikipu deipmumdi, er teppu teka tenenkamrume. Yesus er tep teka tenepra erpu talepra kunupe. Yesusda, Allahdi tuai nesala lyemna tep, er kai telep upu lap pena tep gonga kemna deiyo ngebo kurure. Nun cap, Allah cap kikiman kuna tep, antamdina deiyo ngeboda Yesus kuserure. Yesus tep teka tenepedi, er upu lap perbanupe. 2 Allahdi Musa tep wepra deipupa, Musadi Allah er mawa nesala, Israel nesala sun melimna tep, pel tamna gum di, apel yuma telep kupra pel doramu. Ada, Allahdi Musa tep, ‘Apel donkamnere,’ teneamutopu, pel doramu. Ange utopu, Allahdi Yesus tep, ‘Apel donkamnere,’ teneamutopu, Yesus peda pio telep kupra pel doramu. Ada, tenpunge peda tamna gum di, er tep wepra deipu ngebo Allahdi teneamemeutopu pel telep kupra doramu.

3 Uda, tenpu ati dona deiyo ngebodi ati doptuopda, yuk nengdi, akati tep yambul mambul tenepkameng dinin, akati domya deiyo ngebo tep nengeda, ‘Uo, akati dona deiyo ngeboda, ila mambul ngebo,’ tenepkamenge. Ange utopu, Musada yambul mambul ngebo kurur dinin, Yesuspuda, ila mambul ngebo kurure. ^{▼▼Musa cap, Yesus cap pepu upu deiyoda ake. Musa sengamu upu gekenupa deiki di, Allahdi men lyeserure. Ukutaruda, nun nimi Lyemna Deiyo Ngeboda, er Yesus pua. Ware keca do yuma, apel yala-yala yuma doptepya peda, ange deiki di men lyepdatepi. Yesus teka tenepmepya deiki dipu, Allahdi lyemserure. Allah cap, nimi cap, dana-dana Antamdina Deiyo Ngeboda, Yesus er pua.}

4 Angeda, tali tep men pepsene. Deiyo ake. Ada, ware ati do yuma, ati dona nengdi donunge. Dinino, akeca-keca yumada, Allah er pel dopka deiki di akeca-keca yuma ketekepra deipu. 5 Pumun taru Musadi, Allah er nyapu yuma melimna tep, tamna gum di, telep kupra pel doramudi, amenda taru Allahdi penkamunge tep, Musadi ton peramu. Ukupra Allah er amutara kuramudi, er pelpu doramua cadi, Musada, Allah er pel melimna ngebo, pio telep kuramu. 6 Musada, Allah er pel melimna ngebo kuramu dinino, Yesus Kristusda tali pel melimna ngebo gume. Er Yesusda, Allah er Mi Sisa kuredi, Allah er nyapu yuma tep, sun ila deiyo ngebo kuserure. Apel dona peda, Kristusdi tamna gum, pio telep kupra dorure.

Uda, Allah er nyapu pepmasenada, nun tep pepmasene. Ada, nun teka tenenup nesaladi, kware dangna pio gum di, ‘Allah tek sisi lyemserure’ tenen, teka tenepra kange tenimtona gum di, pio dimpepra dinapu kupmepyopda, ‘Allah er nyapu tek sisi kunupe,’ teneptepe. Allahdi tek sisi lyepkamsera tep, er kai telep upu kange deipra peteremnupe.

‘Teka men tenepnung’ tenen, wenemna cap, lap pena cap tep, pepu upu

7 Atep, Allah er nyapu tek sisi kuna tep nengeda, Allah er Lek Sambaladi peipupa, Mazmur neitamai sekami upu ton tenenkamrume. Aupuda ake.
Atumida, ne Allahdi upupsenepa, ne upu gekepnerumyopda, sun apu yapu kuramitopu kuna meme. Ada dabal kupserepa, kika deipra, ‘Men gekenkamepe’ tenepra, men kunkamrume.
8 Pumun taru sun apu yapuda, dabal kupupa, ne Allah tep, ‘Nun songe,’ tenemneidi tapnei. Sun ukuramitopu men kunkamrume.
Ataruda, sun apu yapudi, Mesir mutu tapra, nimi kuna gum, mo pio men cemamngai embaramipa, sun tep kurpeteramsisi.
Kurpeteramsisi taru neitamai di, sundi ne tep dabal kupupa, ‘Allahda, nun songe,’ tenepra tamamnei.
9 Sun apu yapu mali kuramya deiki di, yaniramneidi, ne tep pio kurpeteramneipa, keteng tamun 40 deiki di wenemamsisi ngeda, diramidi kael kemami.
10 Sun apu yapudi ukupra kuramipa, nedi ataru kurami nesala yuma tep, tulum kuramneupa, upepsi. “Gume, sun dipru neitamaida, ne upu cap, ne kune keca cap men kurepa, pio yuk bisipu lerekra embanunge,” pepsi.
Nedi, “Ukunkamrume,” pepra, peteremamsisi keca yumada, moupra men kael kemnunge. “Tek sisi telep bisi ake,” pepra peteremamsi ngeda, men dombanunge.
11 Ukupra mali weik kuramya tep, nedi sun ataru kurami nesala tep, tulum weik kuramneudi ataru neitamaida, aupu ton pepsi.
“Ataru mali kun nesala yumada, nedi sun cap, ne cap beipye peingna tep, keteneipsisi mutuda, sun pio men doronkamenge,” pepsi.

Allahdi Israel nesala tep pepu. (Mazmur 95:7-11)

12 Apepmasen upu akapka cadi, ne weit yapu utopu nesalao, sun pedi, sun pe tep pio moupra kalengdankamrume. Ada, ‘Nun kan-kan tenpu ngebo do, tenpu ner do, sun kange dipru neitamaida, mali kun keca weik kuprepa, teka men tenengedi, Pio Gam Kuna Deiyo Ngebo Allah tep, amnyo karikra yukai benung’ tenen, moupra kalengdankamrume. 13 Allah tep, ‘Nun songe’ tenen, amnyo karikra men tamkamrum dinin, telep ngeda pepkusene. Ataru-ataru yuma, nundi, ‘Atumi ake’ tenen, tupa peptepe taru neitamai yumada, dipru kwa dipra makudankamrume. Ada tali tep gume. Ada sun dipru neitamai mali kun keca tupa akwapmarya di, sun dipru tamupserya deiki di, mali kun kecapu talepra kuprum tenena tep pepsene.

Tonda, sundi, amali kun keca tep, ‘Jo, dakwapye. Angeda mali gume, teneprum’ tenen, pepsene. Ukupra tenemumyopda, amendada utenepmumya deiki di, ‘Kika deiprap mali kupnup’ tenen, sun yumadi dipru kwa dipra makudamumdi, kalengdankamrume. Mali kun keca yumada, mok kecapu kurura tep, akeca talepra kumumnyopda, sun dipru gat kweipkamsere. ‘Ukuprum’ tenen, sundi sun pe tep kalengdankamrume pepsene.

14 Amambul upu ton pepkusene. Nundi Allah tep, ukupu teka tenepmupu taruda, kange bongtona gum di, puto di teka tenepmuputopu, tupa-tupa teka tenepbanmapyanen, dorsirik taru peda, tamna gum di, Allah erpu moupra talepmepedi, tupa teka tenenkamepe. Ukupra kupmepyopda, ukutaru pe, amenda taru peda, Kristus cap dipru dukdongopra kikiman kunkamepe. Dinino, kange boktopserepa, Allah tep tapmepyopda, Yesus Kristus cap kikiman men kunkamepe. 15 Atep, arup pepmasentopu, Mazmur sekami upu ton tenenkamrume. Aupuda ake.
‘Atumida, ne Allahdi upupsenepa, ne upu gekepnerumyopda, dabal kupserepa, kika deipra, ‘Men gekenkamepe’ tenepra, men kunkamrume.
Pumun taru sun apu yapuda, dabal kupupa, ne Allah tep, ‘Nun songe,’ tenepra tamamnei. Sun apu yapu mali kuramitopu, sun ukutaru teka tenerum nesaladi, ange ton men kunkamrume.’ (Mazmur 95:7-8)

16 Uda, aupu ton pepkusene. Arup pepmasen upu neitamaida, men gekeramidi, ‘Allah nun songe,’ tenepra Allah tep tamami nesalada, ‘Ware nesala do,’ tenena gume. Sunda, Mesir mutu neitamai di tapra, Musa mepra baramupa, er amnyo tara barami nesala, Israel yala nesala yuma tep pepsene. Mesir mutu di tapra embarami taru neitamaida, abarami nesaladi Allah tep, dabal kupupa, er tep yanirami. 17 Ange utopu, Allahdi, ‘Anesala tep keteng tamun denge weik 40 deiki di tulum kuramneupa, tamamsi,’ pepu nesalada, ‘Ware nesala do?’ tenena gume. Anesalada, Israel nesala kan-kan di mali-mali kuramidi, nimi gumai, mo pio men cemamnga neitamai embaramidi, depbarami. Yuk nesala tep men pepsene.

18 Tonda, Allahdi, “Ne puto di pepsene. Anengda, ne cap beipye peingna tep, keteneipsisi mutuda, pio men doronkamenge,” pediramu ngeda, ‘Ware nesala tep aupu pepu do?’ tenena gume. Ada, er upu tep, teka tenena gum di, yanirtamami nesala tep pepke. Yuk nesala tep gume. Allah er upu yanirtamamidi, gekepra men dombarami nesala tep, tulum kupupa tapu. 19 Ange tep nengeda, nun kael keptepe kecada katuai konum kupsere. Allahdi beipye peingnai tep, telep mutu keteneipuaida, akapupane, sun amutu men wekmanto kurami ngeda, ada teka men tenemya deiki di, atelep mutu men wekmanto kurami. Yuk deiyo tep gume.