Heb 4 | XteSC | STEP | Uda, ne kayapu, Allahdi er nyapu yuma tep, “Ne cap, kikiman beipye peingna tep, keteneipsisi mutuda, doronkamrume,” pepra, pediramseu upu tupa akapmasera cadi, ange tep nengeda, kange moupra kunkamepe. Ada, amenda taru nun kan-kan di tenpu ngebo tep do, tenpu ner tep do, Allahdi, “Gume, anesalada ne pemsitopu men kununga cadi, ne cap kikiman beipye peingna tep keteneipsi mutuda men doproptenge,” pepra, ‘Upu lepsisikra bokeipserur’ tenen, kange moupra kunkamepe.

Hebrews 4

Allahdi, “Ne nyapuda, ne cap, sun cap kikiman beipye peingna tep, keteneipsi mutuda, doronkamenge,” peipseunge tep, pepu upu

1 Uda, ne kayapu, Allahdi er nyapu yuma tep, “Ne cap, kikiman beipye peingna tep, keteneipsisi mutuda, doronkamrume,” pepra, pediramseu upu tupa akapmasera cadi, ange tep nengeda, kange moupra kunkamepe. Ada, amenda taru nun kan-kan di tenpu ngebo tep do, tenpu ner tep do, Allahdi, “Gume, anesalada ne pemsitopu men kununga cadi, ne cap kikiman beipye peingna tep keteneipsi mutuda men doproptenge,” pepra, ‘Upu lepsisikra bokeipserur’ tenen, kange moupra kunkamepe.

2 Uda, sun pumun taru teka men tenemi nesalada, yuk nengdi Allah er upu dopra peteremamipa, aupu gekerami dinino, aupu tep teka men tenemya cadi, tali amul deikipu gekertamamiya tep, nong men kwamu. Sundi teka men teneramya tep, Allahdi keteneipu beipye peingnai telep mutu men weki.

Atep, nun peda utopu, yuk nengdi Allah upu peteremamseipa, gekeramupu dinino, ‘Sun pumun tara nesala teka men tenemitopu kupnup’ tenen, kange moupkamepe, pepsene. 3 Uda, nun konum teka tenenup nesalada, Allahdi pediramseu utopu, beipye peingna tep keteneipseu mutuda wengnupe. Allahdi peipu ngeda ake.
‘Mali kuraminge tep nengeda, tulum weik kuramneu taruda, aupu ton pepsi. “Ataru mali kunge nesala yumada, ne cap beipye peingna tep, keteneipsisi mutuda, pio men doronkamenge,” pepsi. Allahdi Israel nesala tep peiamu.’ (Mazmur 95:11)

Allahdi aupu peipu dinino, aupu peipu taruda, erdi akeca-keca yuma ketekepra, gawal daku taru di aupu peipu. Er pel yuma konum gawal dakudi aupu pepu. 4 Uda, Allah upu neitamai dinin, yukaida, Allahdi beipye peingna tumi, ue yoneitam tumi tep, aupu ton cap pepu.
‘Allahda, ue ngantan tumi deiki di, pel dopbaramnganen, Allahdi er pel gawal dakua tep, yoneitam tumi konum kupupa, pel ton cap men dopu. Bepe peiku.’ (Kejadian 2:2)

5 Tonda, arup pepmasentopu, Allahdi peipu ngeda ton cap pepsene. Ada, “Ne cap kikiman beipye peingna tep, keteneipsisi mutuda men doronkamenge, pepsi.” Allahdi peiamu.

6 Uda, pumun taruda, yuk nengdi Allah er kai telep upu peteremamipa, sun aupu gekerami nesalada, teka men tenemidi, Allah er upu yaniramya cadi, Allahdi beipye peingna tep keteneipuai, telep mutu men wengami. Sun pumun taru teka men tenemi nesala men wengamya tep, yuk nengdi abeipye peingnai keteneipseu ngeda, amenda taru wekameng ja.

7 Ange tep nengeda, nun kaele. Allahdi tenemutopu, tenpu taru wepra deipudi, ataru tep, “Atumi,” si pepra deipu. Asi pepra, “Atumi,” pepu taruda, sun Israel nesala mali kurami tarupu gume. Angeda keteng tamun denge weik konum kupbaramupane, Allahdi Daud sekeiamu upu deiki di pepu. Dauddi sekeiamu upuda, arup konum pepmasen dinin, aupu ton cap pepsene. Aupuda ake.
‘Atumida, ne Allahdi upupsenepa, ne upu gekepnerumyopda, sun apu yapu mali kuramitopu kuna meme. Ada dabal kupserepa, kika deipra, ‘Teka men tenenkamepe,’ tenepra, men kunkamrume.
Pumun taru sun apu yapuda, dabal kupupa, ne Allah tep, ‘Nun songe,’ tenemneidi tapnei. Sun ukuramitopu men kunkamrume. Allahdi peiamu.’ (Mazmur 95:7-8)

8 Uda, Allahdi, “Ne cap beipye peingna tep, keteneipsisi mutuda, yuk nesala ton dopropmengedi, wekameng ja,” pepmasenuada, tali tep men pepsene. Yosuadi menepra baramupa, Israel nesaladi abeipye peingnai konum wekamtenge teptoda, Allahdi amenda taru neitamai di, yuk tumi tep upu men peiamtu. 9 Dinino, Allahdi akeca yuma konum kupupa, amenda taru ton cap, “Atumi ake,” pepka cadi, adeiki di kael kemnupe, Allah er nyapu tep, beipye peingna keteneipseu mutuda, tupa akurepa, doronkamenge. Ada, Allahdi tumi ngantan bari deiki di, pel dopbaramnganen, yoneitam tumi konum kupupa beipye peikamutopu, abeipye peingna utopunge ton, tupa kwapmasere. Allah tep teka tenenung nesaladi, abeipye peingnai wekameng ja.

10 Allahdi beipye peiku utopunge pepmanada lap pepkusene. Ada, Allah er pel doamudi, gawal dakudi beipye peikamutopu, ware nesala do yuma, Allahdi beipye peingna tep, keteneipseua doromenge nesaladi, sun pe pel donge keca tapmengedi, beipye peingkamnunge. 11 Ange tep nengeda, ne kayapu. ‘Nun yumada, Allahdi beipye peingna tep, keteneipseu mutuda, kikiman doronkamepe’ tenen, pio pe deipra, piripetenkamepe. Ada, sun Israel nesala dabal kupupa, Allah upu yanirami utopu, ‘Nun kan-kan di, tenpu ngebo pe ukuprea deiki di, Allah er beipye peingna men dopropmanto kuprur’ tenen, pepsene. Atep, pio kalengdapedi, piripetenkamepe.

12 Uda, yuk upu ton pepkusene. Allahdi pesere upuda, pio gam kuna deiyo keca kurure. Gam kuredi, pel doserepa, nong kemkamsere. Mesumpu men kurure. Parang yada, dana-dana tara ketepmengepa, er sida, yambulpu kurur dinino, Allah er upuda, ya takke utopu, er yu weik kurure. Nun yo cap, yo neitamai kure keca, tumi cap, yu weik parang ya di, dana-dana wilipra teksetutopu, Allah er upuda yu weik kuredi, nimi nong neitamaida, nun kange tenena cap, nun dipru cap, dana-dana wilipra deriserure. Ukurura tep, nun kange dipru neitamai tenepe keca peda, ‘Ange telep, ange mali’ tenen, upu bokra derirserure.

13 Ware keca do yuma, Allahdi ketekepra deiamu keca yumada, pio men inipmanto. Allahdi akeca-keca yuma tep pio dirure. Opkal di singipdongopmange keca akaprepa, aopkal dopropmengepa, katuaipu kuramretopu, Allahdi akeca-keca yuma katuaipu dirure. Akeca-keca yuma dire ngebo Allah tep, nun kupe keca yuma lap pepmepepa, erdi gekepra dipetepseredi, “Ange telep, ange mali,” pepra, upu lepsisikra bokeipkamsere. Nun kupe keca yuma tep, Allah er damai lap pepmepepa, dipetepseredi, upu lepsisikra bokeipkamsere. Tenpu keca peda men iniptepe.

“Allah dana, nimi dana Antamdina Deiyo Ngeboda, Yesus er pua,” pepu upu

14 Allah dana, nimi dana antamdina deiyo ngeboda, Yesus erpu kurure. Ila mambul ngebo, Yesusda, Allah er Mi Sisa kurure. Erda Allah er kureyai im deiki neitamai konum beu. Ange tep nengeda, nundi teka tenepra, nesala gekemengai di, lap penup upu yuma tep, pio dimpeprappu talepra kunkamepe. Tamna gum dipapu, teka tenepra kunkamepe.

15 Nedi, “Nun teka tenenup kecada, tamna gum di pio dimpeprappu talenkamepe,” pepmasenada, tali tep men pepsene. Nun tuai nesala kupepa, puto boun kusere ngeda, ‘Yesus erda men kael keptudi, uo tenen, bicau men tenepsetu ngebo kurure,’ tenena guma. Kain Jen Ngebodi nun tep, ‘Mali kuptenge’ tenen, dipru gidoserurnge yumada, Yesus peda utopu, er dipru girpeteramu. Kain Jen Ngebodi Yesus tep, ‘Mali kuptue’ tenen, dipru gipetepu dinin, Yesus erda mali kun keca tenpunge pe ton men kuramu. Tonda, Allah dana, nimi dana antamdina deiyo ngeboda, Yesus erpu kuserure. Ange tep nengeda, Yesus nun ila deiyo ngebodi, nun ikin kusere ngeda, konum kael kemseredi, bicau teneserure. Nun puto boun kusere ngeda, melipra puto kemdiserure.

16 Yesusdi, nun kange dipru boun kusere ngeda kael kemseredi, bicau teneserura cadi, nun kwar dangna gum di, ‘Tek sisi melipkunere’ tenen, Allah er kange dipu bicau teneseredi, melimsere ngebo, er tep, tali lupra moronkamepe. ‘Teka’ tenen, moronkamepada, tali tep gume. Ada nun ikin kusere taru neitamai yumada, Allahdi tali lupra poptapsetu dinin, ange men kuserure. Ukuna gum di, ‘Gekepseredi, nun putaseretopu bicaue tenepra, er kange dipu tali lupra melimkamser’ tenen, nun nai Allah tep moronkamepe.