Heb 5 | XteSC | STEP | Uda, tuai kunge nesala dinin, ‘Allah dana, nimi dana antamdina deiyo talepra pel donkamseng’ tenen, nimi kan-kan di nimidi wepra derinunge. Ada, anengdi, ‘Nun cap, Allah cap, telep kupra kikiman kuna tep, pel melipra donkamseng’ tenen, wepra derinunge. Tonda, anengdi, nesala makuna tep, Allah karen keca karenunge. Ada, sundi Allah er si eremna cap, gispal dona cap tep, tali karen keca karenunge. Tonda, ‘Nesala mali kun keca, gum kupra deipsetue’ tenen, gam keca popra, Allah tep, karenunge.

Hebrews 5

Allahdi, “Erda Allah dana, nimi dana, Antamdina Deiyo Ngebo kunkamre,” pepra, Yesus wepra ereipka tep, pepu upu

1 Uda, tuai kunge nesala dinin, ‘Allah dana, nimi dana antamdina deiyo talepra pel donkamseng’ tenen, nimi kan-kan di nimidi wepra derinunge. Ada, anengdi, ‘Nun cap, Allah cap, telep kupra kikiman kuna tep, pel melipra donkamseng’ tenen, wepra derinunge. Tonda, anengdi, nesala makuna tep, Allah karen keca karenunge. Ada, sundi Allah er si eremna cap, gispal dona cap tep, tali karen keca karenunge. Tonda, ‘Nesala mali kun keca, gum kupra deipsetue’ tenen, gam keca popra, Allah tep, karenunge.

2 ‘Apel-apel yuma donkameng’ tenen, wepra derinung nengda, sun peda puto boun kungedi, mali kupmanto neng kununga cadi, yuk nesala walwal di, yuk mali bisi lerekra embangepa, aneng bouna di, sun yuk tep, “Telep kun bisi ake,” pepra lepsingdinunge. 3 Apel deiyo nengdi, sun peda kange dipru puto boun nengpu kununga cadi, sun pedi mali kunung keca daemna tep, gam keca popra Allah tep karenunge. Tonda, yuk nesala yuma, sun mali kunung keca daemna tep, gam keca popra Allah karena tep, uku dongoryakanunge.

4 Uda, ware ngebo, er kange dipu, ‘Nedi Allah cap, nimi cap Atamdina Pel Deiyo Ngebo kunkamne,’ teneptudi, apel tali lupra doptu do? Gume, ange men kununge. Ange men kupmanto tep, Allahdi, ‘Harun apel donkamre’ tenen, Harun tep upupudi wepra deipupa, pel doramutopu, Allahdi tenere nengpu, upupre pangeda, anengdi apel talepra donunge. 5 Ange tep nengeda, Kristus peda, ‘Ne kange dipapu, nesala dana, Allah dana, antamdina pel talepra, ila mambul pel deiyo ngebo kunkamne,’ men tenepu. Ange men tenepu dinino, Allahdi Kristus, er erepra derina tep, upupudi pepu upuda ake.
‘Kanda, ne Mi Sisa kurume. Neda, kan nai bo kukenune, Allahdi peiamu.’ (Mazmur 2:7)

6 Ange utopu, yukai ton Allahdi aupu pepu.
‘Allah dana, nimi dana, Antamdina Deiyo Ngebo Melkisedekdi pel doramutopu, kanda, er yala utopu ngebo kumemdi, apelpu talepra, pio donkamrume. Allahdi peiamu.’ (Mazmur 110:4)

Atep Allahdi Kristus tep, arup pepmasen upu deiki upupudi, wepra ereipupa Kristusdi nun tuai nesala cap, Allah cap Antamdina Deiyo Ngebo pel doserure.

7 Yesusda, tuai mutu neitamai kuramu taruda, erdi er depkamunge tep tenepudi, er lyepmanto ngebo Allah tep moropu. Erdi moropkada, “Naie, kandi melipneo,” pepra, asi me deiki cap, ila mali pena cap deiki di moropu. Moropudi, er Yesusda, ‘Allahda, ila mambule cadi, er tep gispal dopnedi, er amutarapu pio kunkamne,’ teneramudi, dipru boun ngebo kuramua tep, Allahdi Yesus moropu upu gekepudi melimamu. 8 Yesusda, Allah er Mi Sisa kurur dinin, er nong deiki ikin keca weik kuramupa, dounmaua deiki, ‘Allahdi teneneretopu, angepu gekepnedi, angepu talepra kunkamne’ tenen, kael kemamu.

9 Kael kemamupa, Allahdi Yesus tep gam bukeipudi, konum pio telep kupra deipupa, er Yesusda Nimi Lyemna cap, Pio Gam Kuna Deiyo Ngebo cap kupu. Nimi Lyemna Deiyo Ngebo kuseryada, tali neng tep gum dinin, ada er pesere upu gekepra, angepu talepra, moupra dombanung nesala tep kuserure. 10 Tonda, Allahdi Yesus tep, wepra deipudi, “Kanda, Allah dana, nimi dana, Antamdina Deiyo Ngebo kunkamrume. Ada, Melkisedekdi apel doramutopu, apelpu talepra pio donkamrume,” peprapudi, Yesus wepra deipu.

“Allah er upu gonga kemnangepu, nong bol deikingepu gum dinin, ila neitamainge kael kemna telepe,” pepu upu

11 Uda, ne kayapu, arup pepmasen upu tep, yuk upu ton cap dukdongopnedi, weikanun lap pepra peterepsetene dinino, sunda, nema dipu kael kemruma cadi, ‘Sun gekepmanto ngeda, ware ka di lap pepra, jenek pepsetene do?’ tenen, ikin kunerure. 12 Uda, angeda tali gume. Pumun di teka teneramruma cadi, ukutaru telep ngeda, sunda peteremna deiyo neng konum kupmatum dinino, sunda kapula. Tupa putasere ngeda, yuk kael nengdi, Allah upu neitamai kurya deiyo upu, gonga kemnengepu, kanam dipu gekepmanto ngeda, kange di ton cap peterepsetengepa, kael keptume. Yambul milo nyapudi, tu keca men jeptenge taru, moum teyung tupa putarepa jeramengtopu, sunda, Allah upu ila mambul nong neitamai ngeda, kapul men gekepra doproptume. Sunda, nong bol deikingepu tupa putaserure.

13 Ware nesala do yuma, sun milo nyapu utopu tupa kunge nesalada, moum teyung utopu upu, bol deikingepu doronge nengda, mali kun keca gum dipapu, pio dumsisi kun kecada, kapul men kael kemnunge. Ada Allah upu nong neitamai upu tepa. Sunda milo nyapu utopu tupa kuruma cadi, aikin upuda, ‘Deiyo ake’ tenen, moupra men kael keptume. Kapula. 14 Dinino, Allah upu pio nong neitamainge, tu keca utopu ngeda, dipru konum wisipu nesaladi gekepra doproptenge. Anesalada, yuma taru yuma, pio moupra tenengedi, dumsisi kununga deiki di, ‘Ange mali, ange telepe’ tenen, tek sisi telep kupra wepmengedi, kael kemnunge.