Hebrews 6

‘Nun dipru wisipkamser’ tenen, Allah er upu neitamai ngeda, doronkamepa tep, pepu upu

1Ange tep nengeda, ne kayapu, Kristus kael kemna tep, Allah upu neitamai dinin, deiyo upu gonga kemnengepuda, konum kael kepmepedi, ‘Nun kange dipru wisipkamser’ tenen, menmenange kael kepra sengpepmepedi, yuknge ton, ila mambul upu ton kael kepbankamepe. Uda, ati dopkunge taruda, menmena ayumna co konum ikmengedi, kange di ton cap men ingamengtopu, Allah upu deiyonge dinin, gonga kemnengepuda, kange di ton cap tamupra men kael kepbankamepe. Aupu gonga kemna tep pepmasenada, nukra pepkusene.

Ada, ‘Mali tupa-tupa kuramepepa, Allahdi wenepra popserur’ tenen, mali kun keca tamna upu cap, Allah tep teka tenena upu cap, 2teka tenepmengepa, me dongona tep lap pen upu cap, nimi nong deiki buru tang deipmengedi, nimi kwetena upu cap, konum deami nesala gam bukameng upu cap, sirya taruda, Allahdi tuai nesala yuma upu lepsisikra bokseredi, mali kun nesala poptapkamre pena upu cap, aupu yumada, gonga kemna upu tep pepsene. 3Atep, ‘Allahdi melimserepa, aupu yuma kael kepra sengpepmepyopda, yuk ila mambul upu, nong neitamainge ton cap kael kepbankamepe’ tenen, pepsene.

Teka teneami keca dinin, ‘Ayuma tapra, mali kupnung’ tenen, pepu upu

4Uda, ware nesala do yuma, sun teka tenenge keca yuma konum tapmengopda, ware ka di tamupra dubetepepa, kange di ton cap sun mali kunge keca tep taptengedi, amnyo karikrotenge do? Gume, angeda men kupmanto. Pumun di, kunungnaipu kurami dinin, Allah er dirine dopra sun dipru neitamai karepupa, dopropidi er kuramre keca kael keami. Tonda, Allahdi karesere keca dopropi. Tonda, Allahdi er Lek Sambala karepupa, sun ton dopropi. 5Tonda, Allah pesere upu gekeramidi, sun peda, ‘Angeda, pio telepe’ tenen, kael keami. Tonda, teka tenerami taru neitamai di, Allahdi nun dipru talesere taru yuma puto di pel doserenge peda kael kemami.

6Ange yuma kael kemami dinino, sun teka teneraminge yuma ka di ton tapmengopda, kange di ton cap, sun mali kun keca ton cap men taptenge. Ada men kupmanto. Sun teka teneraminge tapmengedi, mali kun kecapu talepra kunkamenge. Deiyoda ake. Ada sun teka teneraminge tapmenga deiki di, Allah er Mi Sisa dopra sengdin co deiki popinge utopu, kange di ton cap kununge. Tonda, ukununga deiki di er nong deiki mali keca deipmengepa, yuk tali nengdi Kristus tep, ‘Erda mambul gume’ tenen, nyek-nyek pepra, nalemnunge. Atep nengeda, menmena taru teka tenepinge, ka di ton konum tapmengopda, ka di ton cap, sun mali kun keca tapra teka men teneptenge. Mali kun kecapu talepra kunkamenge.

7Ukunge nesala tep nengeda, domon upu deiki di, aupu ton pepkusene. Ataru-ataru yuma mo cepredi, tu deiki sakupa, tu pumbon wekyopda, amendada atu telepai di, wa pepmenge nesaladi jepmanto keca, dopra kinunge. Telep keca mouramre tuda, Allahdi atu tep, telep kudirure. 8Dinino, takke keca cap, tepmeng kweiyong cap bolongre tu, mali tuda, nimidi jepmanto keca pio men mouptua cadi, Allahdi atuai tep, gum kupra deipmanto kurure. Amenda sirya taruda, atu yumada uku dokoteprepa jepredi gawal dakamre.

9Uda, arup pepmasen upu akapmarepane, ne kayapu sun tep pio bicau tupa tenesenune. Sun tep nengeda, ne kaele. Sunda mali kuna gum di, Allahdi konum lyepseu nesala kuramengtopu, teleppu kunkamrume. 10Allahdi nun telep kunup keca tep tupa teneseredi, nun kunupa utopu, upu lepsisikra bongdiserure. Deiyo men kwapmarepapu, tali tep, men wenemserure. Uda, sundi telep pel domumnge yumada, men lupronkamsere. Sundi er tep teka teneami nesala, er nyapu tep bicau tenepra melimamrumnge cap, tupa melimrumnge cap, adeiki di er Allah tep, dipru karerum ngeda, tupa teneserure.

11Apel dorumtopu, ukutaru di dipra, doryankamre taru yumada, pio pe deipra, pel telep kupra donmarumyanen, gawal dangkamrume. Ukunkamruma deiyoda, ‘Allahdi lyepkamsere’ tenen, teka tenepra diramumpane, ‘Amendada, tek sisi nong kupkamre. Allahdi tek sisi lyepropkamsere’ tenen, tamna gum di pio dimpeprappu kunkamrume. 12Nundi sun tep, ‘Sunda dabal kupnepa, pel yuma tapra, tali-talipu kuprum’ tenen, kange moupra kunkamrume, pesenupe. Angeda gum dinin, ton nengda, teka tenena cap, menmena tamna gum di, pio pe deipra, pel dona cap deiki di, pel dopbaramenganen, amenda tara, ‘Allahdi pediramunge tek sisi dororamengtopu, sun ataru kurum nesala peda, sun ton dopropkamruma’ tenen, pepsene.

“Allahdi pedisere upu yumada, men tamupkamre. Tek sisi nong kupkamre,” pepu upu

13Uda, yuk upu ton pepkusene. Allahdi nun apu bo Abraham tep, “Ukupkamkene,” pepra, upu pediramu taruda, ‘Abrahamdi teka tenepkuner’ tenen, Allahdi er pe si cap, tapakra pepu. Er si pepu ada, erda akeca-keca deiki tara, ila mambul ngebo kurura cadi, yuk si tapakra men pepmanto. Ila ngeda, er pe si pua. Allahdi upepu.
14Allahdi Abraham tep aupu pediramu. Aupuda ake.
‘Ne Allahdi kan tep, tek sisi telep kudikenepa, kandi deipmempa, dadeipdanen baramenganen, dordeipbankameng nyapuda, denge pio weik derinkameng, pepkene.’ (Kejadian 22:17)

15Allahdi apedina upu peipupa, Abraham gekepudi, ‘Tek do, telel do?’ tenena gum dinin, ‘Allahdi pediramneu upu dan taru karepkamner do?’ tenen, pio bouna di dinapu dakuramnganen, amenda taru Allahdi pediramutopu, akeca karepupa, Abrahamdi dopropu.

16Uda, Allahdi er si cap tapakra pepu ngeda deiyo ake. Ada, sun kaele. Nimidi, “Ukunkamepe,” penge taruda, yuk neng gekepmengedi, ‘Tek do, telel do, tenepmengedi, ‘Upu deiki pangdanunga’ tenen, upu sengdongona tep, ila si cap tapakra penunge. ‘Amambul si deiki di pepsene,’ penunge. Ila si cap deiki di pepmengopda, sun gekenge nesala upu pangdana gum dipapu, ila si cap gekenga deikida, ‘E, angeda pio tek pepmasenge,’ tenepmengedi, teka tenenunge.

17Ukuramengtopu, Allah peda utopu kupu. Ada Allahdi “Ukunkamsene,” pepra, pedina upu deipu taruda, utenepu. ‘Nedi pedinman upu pepnepa, gekepra, amenda taru akeca dopropkameng nesaladi, moupra kael kepkung’ tenen, er si deiki cap, tapakra pepu. Ada, erdi, “Ukunkamne,” pepra, pediramu upu deiyo ngeda, urasin yuk men tamupmanto cadi, erdi peretopu, tek sisi kunkamre. ‘Betapra kael kepkung’ tenen, er pe si deiki di pedina upu peipu.

18Allahdi, “Ukunkamsene,” pepra, pediramu upu cap, er pe si deiki di pepu upu capda, urasin yuk pio men tamupmanto, erdi peiputopu tek sisipu kunkamre. Allahdi akeca butene tep, mok upu men peptua cadi, tek sisipu kunkamre. Allahdi aupu butene deiki pepseunge deiyoda ake. Ada, sundi, ‘Allah tek sisi lyepkamsere’ tenen, teka tenepra dinapu kunge nesalada, aupu gekepmenga deiki di, dipru kwa dipseryopda, kange tenimtona men kunkamenge. ‘Allah kareserepa, dopropkameng keca, pio moupra talengedi, dimpeprappu kunkamenge’ tenen, peipsene.

19‘Allahdi lyemserure’ tenen, teka tenepra dinapu kupya deiki di, nun kange bongtona cap, kwar dangna cap pio gum dipapu, kange deipra, tamna gum di dimpeprappu kunupe. Nun kange dipruda, ‘Tek do, telel do?’ tenen, men tenimtonupe. Ange gum dinin, Yesus tep, ‘Nun Lyemna Ngebo kuserure’ tenen, nun kange dipru Yesus er deikipu derinupe. Yesusda, Allah er kuryai im deiki pio telep neitam ati konum wengbeu.

Allah er karena tep, pumun taru opkal ati deipembaraminge neitamai wilipra domi atida, tali neng ton men wekmantoai tep, akati dana-dana neitamaida, opkal kapkwetepi. Ange utopu dinin, im deiki ngeda, akati neitamai tali neng men wekmantoai dinin, Yesusdi nun makuna tep, Allah er damai wengbeu ngeda, tali lupra neitam ati, pio telep ati weku.

20Yesusda, aPio Telep Lek Ati menepra beu ngeda, ada nun lyemna tep weku. Uda, Yesusda, Allah dana, nimi dana, antamdina ila deiyo ngebo konum kupseue. Ada, Melkisedekdi apel doramutopu, Yesusda Melkisedek er yala utopu ngebo kupudi, Allah cap nun cap telep kupra kikiman kuna tep, antamdina deiyo ngebo pio kunkamsere.