Heb 7 | XteSC | STEP | Ukutaru Melkisedek tep aupu pepkusen ngeboda, Salem mutu taleamudi ila nimi deiyo ngebo, Raja kuramu. Tonda, akeca-keca deiki tara kuredi, ila Mambul Ngebo Allah, er pel dona tep, Melkisedekda nimi cap, Allah cap dana-dana antamdina deiyo ngebo kuramu. Ukuramnganen, Abrahamda yuk mutu nimi deiyo neng popra bisbisa kapudi, tamupra yau taruda, antapdareidi, Melkisedekdi Abraham tep, “Allahdi telep kudinkamkere,” pepra, telep upu peipka deiki di, Abraham tep telep kweipu.

Hebrews 7

Allah cap, nimi cap, dana-dana antamdina deiyo ngebo Melkisedek tep, pepu upu

1 Ukutaru Melkisedek tep aupu pepkusen ngeboda, Salem mutu taleamudi ila nimi deiyo ngebo, Raja kuramu. Tonda, akeca-keca deiki tara kuredi, ila Mambul Ngebo Allah, er pel dona tep, Melkisedekda nimi cap, Allah cap dana-dana antamdina deiyo ngebo kuramu. Ukuramnganen, Abrahamda yuk mutu nimi deiyo neng popra bisbisa kapudi, tamupra yau taruda, antapdareidi, Melkisedekdi Abraham tep, “Allahdi telep kudinkamkere,” pepra, telep upu peipka deiki di, Abraham tep telep kweipu. 2 Telep upu peipupa, Abrahamdi yuk mutu deiyo neng poprapudi, sun bung keca weik dalupra yaua neitamai di, sepuluh persen (10%) ^{▼▼Sepuluh persen (10%) peramenge ngeda, ada meteka di bokra karenunga tep, penunge. Sepuluh ribu dingeda, seribu karenunge. Seratus ribu dingeda, sepuluh ribu karenunge. Ada, ‘Allahdi akeca yuma kareserura tep, er gispal dopkup’ tenen, akeca bokra karenunge.} bokrapudi, Melkisedek er gispal dona tep karepu. Melkisedek er si deiyoda ake. Mali kuna gum di dumsisi kuna deiyo ngebo kuramua tep, er si Melkisedek perami.

Tonda, mutu si Salem peramya deiyoda ake. Ada podana gum di kange deipra teleppu kuna tep, asida Salem mutu perami. Atep Melkisedekda, Salem mutu deiyo ngebo kuramnga cadi, er si Raja Salem peramya deiyoda, erda kange deipra, telep kuna deiyo ngebo kuramua tep asi perami. 3 Tonda, Melkisedekda, er nai cap, er nin cap, er yala neng cap, uda, erdi deipupa, dadeipdanen barami nesala cap yumada, men kael kemami. Tonda, sundi er deipi taru cap, er depu taru capda, men kael kemami. Atep nengeda, Allah er Mi Sisadi nimi cap, Allah cap dana-dana Antamdina Deiyo Ngebo pio kunkamretopu, er Melkisedek peda, utopu antamdina deiyo ngebo pio kunkamre.

4 Uda, sun ton tenipetepso. Melkisedekda ila mambul ngebo kuramu. Ila mambul weik kuramupa, nun co puna ngebo Abrahamdi, yuk mutu deiyo neng popudi, sun bung keca weik dalupra duyaunge neitamai bokrapudi, Melkisedek er gispal dona tep, denge weik sepuluh persen (10%) karepu. 5 Musa sekeiamu upu ^{▼▼Musa sengamu upuda, Kejadian adinin Ulangan yuma seku. Ange lap pena upuda, nomor 35 dirume.} peseretopu, adeiki di kael kepmepu. Allah karena deiyo neng, sun pel melimna neng, sun Lewi yala nengda, apel donge taruda, sun yuk yala neng yuma tep, “Sun talerum keca yuma neitamai di bokra adipapu sepuluh persen (10%) karenkamserume,” penunge. Sundi Lewi yala neng tep karenung nesala yumada, sun co puna ngebo Abraham kuramupa, sun cap, Lewi yala neng cap, weit yapu utopu kunung dinino, tupa sepuluh persen (10%) bokra karenunge.

6 Lewi yala nengdi upengepa, sepuluh persen (10%) bokra doronungada, kael kepmepu dinin, apepmasen ngebo Melkisedekda, er apu boda Lewi gume. Er apu bo Lewi men kuramnga peda, Abrahamdi er dopropu keca bokra Melkisedek gispal dona tep sepuluh persen (10%) karepupa, Melkisedekdi dopropu. Allahdi, “Telep kudinkamkene,” pepra, pediramu ngebo, Abraham tep, Melkisedekdi akeca dopropudi, telep upu pepra deipudi, telep kweipu.

7 Ange pepmasenada moupra tenipetepso. Nun kaele. Ila mambul nengdi, sun amutara neng, mambul gum nesala tep, “Allahdi telep kudinkamsere,” pepra, telep upu penga deiki di telep kemdinunge. Atep katuai kupsere. Melkisedekda ila mambul ngebo kurure. Nun apu bo Abrahamda yambul mambul ngebo kurure. 8 Arupda, Lewi yala nengdi yuk neng tep, sun talenge keca bokra sepuluh persen (10%) doronunge pepmanada, sun Lewi nengda amenda depkameng nesala dinin, 10% doronunge. Dinino, Melkisedekpuda, Abraham keca bokra 10% dopropu ngeboda, Allah er upu deiki di, “Angeboda tupa gam kurure,” peserure.

9 – 10 Tonda, aupu ton peptepe. Abraham cap, Melkisedek cap antapdareipa, Abrahamdi er keca bokra sepuluh persen (10%) karepupa, Melkisedekdi dopropu taruda, Lewi kapul men deipi. Abrahamda, Lewi er apu bo kuramnga cadi, erdi deipupa dadeipdanen yakarami nengdi Lewi kapul men deiamya tep, ‘Abraham karepka deiki di, amenda taru deipkami ngebo Lewidi karepka’ tenen, peptepe. Ange tep nengeda, Lewi yala nengdi, yuk nesala talenge keca sepuluh persen (10%) doronung dinin, ‘Sun apu bo Abrahamdi Melkisedek tep, sepuluh persen (10%) karepka deiki di, sun pe ton karepi’ tenen, peptepe.

“Lewi yala nesala pel doraminge deiki di, nimi telep kupra men deipsetenga tep,” pepu upu

11 Allah cap, nimi cap dana-dana antamdina deiyo pel dona tep, Lewi yala nesaladi Allah karena tep pel dorami. Sun pel doramya deiki di, Allahdi peipupa, Musadi sekeiamu upu dopra, Israel nesala kareramu. Lewi yala nengdi, pel dopbaramya deiki di, nimi mali kun keca daepnedi, pio dumsisi kudina tep, sundi pel dopra gawal dakra deiamsetenge teptoda, ware keca deiyo tep yuk yala antamdina deiyo ngebo putaptupa, Allahdi kareamsetu do? Gume, Lewi yala neng pel doramya deiki di dumsisipu kupra deiamsetenge teptoda, Allah cap, nimi cap dana-dana antamdina tep, Melkisedek yala utopu ngebo ton putapsetupa, men yatue. Tonda, Lewidi deipupa, dadeipdanen yakaramyanen, deipi ngebo Harun, er yala nengdi ton, nimi dumsisi kuna tep, gawal dakra deiamseteng teptoda, Melkisedek utopu ngebo ton putapsetupa, men yatue.

12 Uda, antamdina deiyo neng yo punupmengedi, yuk neng wepra deipmengopda, sundi pengepa, nesala yumadi talepra dombanung upu, mem upu ton, punununge. (Ukutaruda, nun antamdina deiyo ngebo, ukupunge konum yaua tep, erdi peserepa, talenup upuda, ukupunge ton kuserure.) 13 “Allah cap, nimi cap dana-dana antamdina deiyo ngebo, Melkisedek yala utopu ngebo konum yaue,” pepmasenada, nun Ila Deiyo Ngebo Yesus tep pepsene. Yesus deipkami yala nesalada, Harun er yala neng gume. Yesus er yala yuk kuramua tep, er yala nesaladi Allah cap, nimi cap dana-dana antamdina pel talepra pio men dorami. Uda, Allah er gispal dona tep, gel pala yakra deiamyai deiki, Allah er karena keca, Yesus er yala nengdi pio men karerami.

14 Angeda tali tep men pepsene. Katuai kupserpa, kael kemnupa, deiyoda ake. Ada, nun deiyo ngebo Yesusda, Yehuda yala nengdi deipi. Yehuda yala nesaladi antamdina deiyo neng pel dona tep nengeda, Musadi ayala neng tep upupra pio men wepra deriramu.

15 – 16 Tonda, ange ton tenipetepso. Arup pepmasen upu konum katuai kupmaser dinin, pio jenek kuprepa, moupra kael kemnupa, deiyoda ake. Allahdi nimi lyemna tep keteneipseu ngeda, ukupunge konum karepseue pepsene. Ada, Allah cap, nimi cap dana-dana antamdina deiyo ngebo, yuk yala ngebo dinin, Melkisedekdi apel doramu utopu ngebo, Yesus konum yaue. Erdi antamdina deiyo pel dorurada, Musadi, “Lewi yala neng dipu apel donkamenge,” peramutopu, ayalapu men kuramnga deiki di apel men dorure. Yesus, erda, men depmanto ngebo, gam pio kunkamre ngebo kurura cadi, pio gam kunkamrenge puto deiki di, Allah cap nimi cap antamdina deiyo pel doserure. 17 Allahdi Yesus tep, Mazmur deiki pepu upuda ake.
“Allah cap, nimi cap dana-dana antamdina deiyo ngebo, Melkisedekdi pel doramutopu, kanda er yala utopu ngebo kumemdi, Allah cap, nimi cap dana-dana antamdina deiyo ngebo pio kunkamreme, pepkene.” Allahdi pepu. (Mazmur 110:4)

18 – 19 Menop taru di, “Lewi yala nesalapu Allah cap, nimi cap dana-dana antamdina deiyo neng kuptenge. Yuk yalange ton gume,” pepra, deipu upuda, Allahdi ka di tamupra konum punupu. Menop upu tapu di, ukupunge punupka deiyoda ake. Ada Musa sekeiamu upu gekepra dombaramya deiki di, akeca-keca yuma akapupane, mali kun keca tenpunge peda daepudi, telep kupra men deipu. Atep, aupuda nimi telep kudina tep nengeda, puto men kwamudi nong men kuramu. Mem upu talepra kuramiya deiki di, dumsisi nesala men kurami. Talipu kurami.

Ange tep nengeda, Allahdi menopnge tapra ukupunge tamupra punupudi, ukupu upu konum karepseue. Ada, ‘Allahdi lyepkamser’ tenen, teka tenepmepedi, nun kange Yesus er deikipu deipmepedi, dinapu kunkamepa tep pepsene. Allahdi nun tep, aupu ukupu pedina upu keteneipseupa, teka tenepmepya deiki di, Allah cap dipru dukdongopra kutepe. Mem upu talenupa deiki di, Allah cap dipru dukdongopra men kutepe.

20 Tonda, Allah cap, nimi cap dana-dana antamdina deiyo ngebo, ukupu keteneipseu ngeboda, talipu men gonga kepu. Allahdi pediramu upu pepka deikipu gonga kepu. Yuk nengda, Allah cap, nimi cap dana-dana antamdina deiyo neng gonga kemna tep, pedina upu men kwamu dinin, sun Lewi yala kuramya deiki dipu gonga kemami dinin, angeboda gume.

21 Nedi pepmasen ngebo, nun ukupu antamdina deiyo ngebo Yesusda, Allahdi aupu pediramua deiki di gonga kemamu. Allahdi angebo tep upepu.
‘Neda Allahdi kan tep, konum peipmakena tep, ne kange ton cap men tamupkamne. Nedi konum pepkene. Kanda Allah cap, nimi cap dana-dana antamdina deiyo ngebo pio kunkamreme, pepkene. Allahdi pepu.’ (Mazmur 110:4)

22 Allahdi Yesus tep aupu pediramua tep nengeda, nun kaele. Allah cap, nimi cap dipru dukdongopra kikiman kuna tep, Allahdi ukupu bisi keteneipseu ngeda, pio telepe. Menop taru peiamu ngeda, yambul telepe pua. Allah cap, nun cap kikiman kuna tep, nun antamdina deiyo ngebo Yesusda, Allahdi konum keteneipseua tep, ‘Angeda tek kunkamser do, telel do?’ tenen, men teniptoptepe. Tek sisi nong kupkamre. Yesus er dipapu nun teka tenenup nesala yuma lyepropkamsere.

23 Uda, yuk upu ton pepkusene. Allah cap, nimi cap dana-dana antamdina deiyo neng kuramyane, ton neng deamipane, sun yo pununa tep, yuk neng ton wepra deiami. Apel dorami nengda, denapu kuramya cadi, apelda pio tupa-tupa men dopmanto kurami. Atep apel dona deiyo neng weika di wepra deipbarami. 24 Dinino, Yesuspuda, men deptua cadi, gam pio kunkamre. Allah cap, nimi cap dana-dana antamdina deiyo ngebo pel donkamserengada, pio kunkamsere. Allah cap, nun cap antamdina pel doseryada, men gum kupkamre.

25 Yesusda pio gam kunkamra cadi, ‘Allah cap dipru dukdongopra kunkamepe’ tenen, Yesus tep teka tenepra, er deikipu Allah er damai yankameng nesala yumada, Yesusdi pio lyepra gawal dakbaserure. Nimi lyemna pelda, pio telep kupra pel doserure. Tenpunge peda men tamrure. Ukuserya deiyoda, ake. Ada, pio gam kuredi, er tep teka tenenge nesalada, ‘Allahdi er tep teka tenenge nesala melimkamre’ tenen, Allah damai beredi, upu pio melipra perure. Nun makuna tep, Allah tep tupa moroserure.

26 Uda, nun mali kun nesala men melipdanmanto kunupa tep, nun putaseretopu, angebodi melipra lyemserure. Allah cap, nimi cap dana-dana antamdina deiyo ngebo, nun deiyo ngebo Yesus kure kecada ake. Erda, pio mengne ngebo kurura cadi, mali kun keca tenpu peda men kurure. Erda pio lek ngebo kurya tep, sun mali kun nesala yuk, er pio yuk kurure. Akeca-keca yuma dutara akapupane, Allahdi Yesus dopra im deiki tara erepra deipupa, ila mambul ngebo kurure.

27 Uda, yuk tuai nesala dinin, Allah cap, nimi cap antamdina deiyo neng pel dorameng nengdi kuramengtopu, Yesusda ange utopu men kurure. Sunda, ‘Allahdi nun mali keca daepsetue’ tenen, gam kun keca popra, Allah er namna tep, yuma taru yuma gam keca popra kareyakanunge.

Ada menmenada, sun pe mali kunge keca cap, uda amendada, yuk neng mali kunge keca cap, ‘Allahdi gum kupra deipkuser’ tenen, gam keca popra, tumi-tumi yuma kareryakanunge. Dinino, Yesuspuda, ange utopu pio men kurure. Yesusdi, tuai nesala yuma, sun mali kun keca gum kupra derina tep, er pedi, er pe nong dopra, Allah tep karepdaupa, sun mali nengdi er Yesus popya deiki di, tenpu taru deiki dipu konum lyepseudi telep kupra deipseue. Nun mali kun keca daemna pelda konum gawal dakseue.

28 “Nun mali kupepa, putaseretopu melipra lyemserure,” pepmanuada, deiyo ton ake. Ada, Musa sekeiamu upu deiki di peretopu, ‘Allah cap, nimi cap, antamdina deiyo neng kupra apel donkameng’ tenen, wepra derinunge. Dinino, anengda, sun peda tuai neng kununga cadi, mali kupmanto neng ton kununge. Dinino, Musa sekeiamu mem upu, konum karepupa, dakuramnganen, keteng tamun denge weik konum kupupa, amendada, Allahdi er ukupu pediramseu upu deiki di, er Mi Sisa wepra deipupa, nun cap, Allah cap, antamdina ila deiyo ngebo kuserure. Yesusda, mali kun keca men kupmanto ngebo kurure. Allahdi er tep pio telep kweipupa, mali kun keca tenpu pe men kurura tep, pio mengne ngebopu kunkamre.