Heb 8 | XteSC | STEP | Uda, ne kayapu, arup pepmasen upu yuma, deiyoda pepkusene. Allah cap, nimi cap dana-dana Antamdina Deiyo Ngebo, ila mambul ngebo konum kuserure. Angeboda, Allah er Mi Sisa Yesus erpu kurure. Akeca-keca yuma deiki tara, im deiki kure ngebo, Allah er Ila Deiyo Ngebo bungnai damai, dumsisi tarada, Yesusdi aca bungbeu.

Hebrews 8

Allahdi, “Nimi cap kikiman kunkamepe,” pepra, ukupu pediramu upu tep nengeda, “Yesusda Antamdina Deiyo Ngebo kurure,” pepu upu

1 Uda, ne kayapu, arup pepmasen upu yuma, deiyoda pepkusene. Allah cap, nimi cap dana-dana Antamdina Deiyo Ngebo, ila mambul ngebo konum kuserure. Angeboda, Allah er Mi Sisa Yesus erpu kurure. Akeca-keca yuma deiki tara, im deiki kure ngebo, Allah er Ila Deiyo Ngebo bungnai damai, dumsisi tarada, Yesusdi aca bungbeu. 2 Yesus er pel doryaida, Allah er kurya pio neitamainge, Allah er si eremna ati, pio tek sisinge neitamai di pel doserure. Akatida, nimi buru di talepra men domi. APio Telep Lek Ati, mali keca tenpu peda men kure atida, Allah er dipapu akati keteneipu.

3 Allah cap, nimi cap dana-dana antamdina deiyo neng yumada, wepra deipmengepa, Allah er gispal dona tep, telep karen keca cap, uda, ‘Nimi mali kun keca gum kupra deipkuser’ tenen, gam keca popra karerbarameng keca cap, Allah tep karerbanunge. Ange tep nengeda, ne pepmasen ngebo, nun cap Allah cap antamdina deiyo ngebo peda, erdi Allah tep karepmanto keca ton kwamu. 4 Yesusda, tuai mutu neitamaipu tupa kuramtuopda, erda Allah cap, nimi cap dana-dana antamdina deiyo ngebo pel talepra men doptue. Ada, apel donga deiyo neng konum wepra deiamipa, dakungedi, Musa sekeiamu upu perseretopu, Allah er gispal dona tep, telep keca karerbanunge. Ada, Allahdi, “Ukunkamrume, angeda men kunkamrume,” pepra deipupa, Musadi sekeiamseu upu neitamai di, ‘Allah er gispal dona tep, akeca karenkamrume,’ perurtopu, akati pel don nengdi apel talepra donunge. Atep, ‘Yesus tuai mutu tupa kuramtuopda, apel talepra men doptue,’ pepmasene.

5 Allah tep karerbanung deiyo neng, sun pel donung ati, telep lek ati neitamaida, ada yambul atonun im deiki utopunge kurur dinino, sun tuai ngeda, tali ukupmantongepu, kuki utopu kurure. Tek sisi ngeda, im deikinge pua. Ange tep nengeda, Musadi Allah er si eremna cap, er karena cap tep, opkal bol di dodin tenda ati ^{▼▼Tenda ati – Israel nesaladi, Allah er si eremna tep, keana taru tep, opkal bol di dodin ati, atau tenda ati deipembarami. Sun embarami mutu-mutu yuma, benkui taruda, akati uruptapidi, yuk mutu bena dopembarami. Akati neitamaida, Allah si eremami. Tonda, akati pumbon mambul keca ton derirami. Amenda taruda, atenda ati pununa tep, lyom gel di, gat ati ton, Yerusalem mutu neitamai domi. Tonda lap pena upu nomor 21 dirume.} dopkou taruda, Allahdi Musa tep aupu pepu.
‘Sinai mutu dup welepmumpa, nedi, “Akati urasinda ukupra dopkurume,” pepra peipkesitopu, kange moupmemdi moupra dopkurume, pepu.’ (Keluaran 26—27)

6 Allah cap, nimi cap dana-dana antamdina deiyo neng, sun tuai nesaladi pel donung keca cap, sun pel don ati capda, ukupmantonge, kuki utopu kurur dinino, Yesus er pelda pio tek sisinge, ila mambul pelpu dorure. Ange utopu, Allahdi, “Ne cap, nimi cap kikiman kuna tep, ukunkamrume. Ukupmumpa, nedi sun makuna tep ukunkamsene,” pepra, pumun taru di pediramu upuda, yambul telep kuramu dinin, ukutaru keteneipseu pedina upuda, ila mambul upu kurure. Yesusda, ukupu pedina upu tep, Antamdina Ila Deiyo Ngebo kurure. Tonda, Allahdi ukupu pedina upu peipseunge tep, “Ukunkamsene,” pepra, pediramunge deiyo upuda, ila mambul weik kurure. Dinino, menop taru pepu ngeda, er deiyo upu yambul mambulpu kuramu.

7 Menop taruda, Allahdi, “Ukunkamrume. Ukupmumnyopda, nedi ukupra melimkamsene,” pepra, pediramseu upu, menmena deipu upu, nimi mali kun keca yuma gum kupra deiptudi, gawal dakmanto kuramtu teptoda, Allahdi amenda taru ukupu pedina upu ton men keteneipsetue. Ukupu pedina upu men putapsetue. 8 Dinino, pumun taru kurami nesaladi, Allah peamu upu tapra mali kuramipa, Allahdi dabal kupupa, aupu ton pepu.
Ne Allahdi pepsene. Amenda taruda, nedi sun Israel yala nesala cap, Yehuda yala nesala cap tep, “Ukunkamrume, ukupmumnyopda, nedi sun makuna tep ukunkamsene,” pepra, pumun taru pediramsisi upu tapra, ukupu pedina upu ton pepra, deipkamsene.
9 Uda, sun apu yapu Mesir mutu neitamai ikin kuramipa, nedi sun buru talepra yuk mutu dubenamsisi taru peipsisi upu utopu, men kunkamre.
Gume. Sun apu yapudi, ne pediramsisi upu yaniramidi, tamamneipa, sun tep nedi amnyo karikrosidi, tapsisi.
Atep pumun taru pediramsisi upu utopu, amenda taru men pedinkamsene. Ukupu pedina upu pedinkamsene. Ne Allah Yahwehdi tek sisi pepsene.
10 Pumun pediramsisinge utopu gum dinin, amenda taru neitamai di, nimi cap ne cap kikiman kuna tep, “Ukunkamrume. Ukupmumnyopda, nedi sun makuna tep ukunkamsene,” pepra, sun Israel nesala tep, pedinkamsen upuda ake.
Nimi telep kuna tep, “Ukunkamrume,” pesene upuda, sun kange tenenange neitamai dongopkamsene. Dongopsenedi, sun kange dipru neitamai sekeipkamsene. Neda, sun Ila Nimi Deiyo Ngebo Allah kunepa, ne sipu eremkamnenge. Sunda, ne nyapu kunkamenge.
11 Pumun taruda, ne upu kael keami nengdi, apu men kael keami neng tep peteremami dinin, ukutaruda, tenpu ngebodi, er ati dam kure ngebo tep, “Allah cap dipru dukdongopra kikiman kuna tep, ‘Ukunkamrum,’ pepra,” tupa-tupa men peteremkamre.
Ange utopu, tenpu ngebodi, er weit bo tep, “Allah cap, dipru dukdongopra kikiman kuna tep, ukupra kunkamrum,” pepra, men peteremkamre.
Gume, nedi ne upu dopra, sun kange dipru neitamai dongopkamsena tep, ila mambul neng pe, pio mambul gum neng peda, sun yuma cap, ne cap dipru dukdongopra kikiman kunkamepe. Ataruda, ne nyapu yuma kael kepbankamnenga tep, sun men peteremdankamenge.
12 ‘Sun mali-mali kunge keca yumada, gum kupra deipnedi kaukemkamsene. Sun mali kun kecada, daepne dingeda, kange di ton cap men tenenkamsene. Ukunkamna tep, sun yumadi ne tep kael kepkamnenge. Ne Allahdi pepsene.’ (Yeremia 31:31-34)

13 Uda, ne kayapu, Allahdi aupu yuma tep, “Ukupu pedina upu pepsene,” pepka deiki di kael kemnupe. Pumun taru pediramseu ngeda, ukupmanto pena tep, konum pun deipudi mali kupka cadi, angeda konum punupseu. Pumun taru pediramseu upuda, ton cap men talepra kunkamepe. Konum pun deipu ngeda, menmena gum kupkamre ja. Ukupu pedina upu konum pepmasera tep, angepu talepra kunkamepe, pepne.