Heb 9 | XteSC | STEP | Pumun taruda, Allahdi, “Nimi cap, ne cap kikiman kuna tep ukunkamrume,” pepra, pediramu upu neitamaida, Allah er si eremna tep, mem upu cap, Allah er ati dona tep, lap pen upu cap ton kwamu. Aupu neitamai kapu keca ton pepkusene.

Hebrews 9

Pumun taru, Allah er si eremna tep, lyom opkal dopra, ke dodin ati dominge tep, pepu upu

1 Pumun taruda, Allahdi, “Nimi cap, ne cap kikiman kuna tep ukunkamrume,” pepra, pediramu upu neitamaida, Allah er si eremna tep, mem upu cap, Allah er ati dona tep, lap pen upu cap ton kwamu. Aupu neitamai kapu keca ton pepkusene. 2 Allah er si eremna tep, ke dodin ati opkal deiki domi. Domidi, wilipra menmena wengami ati er sida, Telep Lek Ati perami. Akati neitamai derirami kecada, nukra pepkusene. Ada, weica derina cap, co lase langdina meja cap, Allah er gispal dona tep, jen keca dapra derirami keca, er sida, roti cap derirami. Akeca yuma deriami ati sida Telep Lek Ati perami.

3 Tonda, aopkal ati neitamaida, ati yuk-yuk wilipra derina tep, opkal butenenge ton kapkwetemi. Aopkal butenenge amnyo tarada, tenpu ati ton wilipra domi. Akati sida, Pio Telep Lek Ati perami.

4 Pio Telep Lek Ati ^{▼▼Pio Telep Lek Ati peramyada, Keluaran pasal 25-27 dinkamrume.} neitamai derirami kecada, nukra pepkusene. Ada, emas di domyada, sereng ma ati doramra utopu kupra, domidi uku seknedi, nintong telep keca uku dongomami. Akecada, akati derirami.

Tonda, pio telep bekin domidi, emas dopra, er nong bol deiki telepra deami. Deamidi, abekin pumbonda, Allahdi Musa tep, “Ukunkamrume, angeda men kunkamrume,” pepra, pediramu upuda, gel pala deiki sekamu ngeda, agel pala dopra, abekin pumbon deiami. Abekinda, Pio Telep Lek Ati neitamaipu deiami. Tonda, Allahdi Israel nesala tep, im deiki di, co kait utopu sangamupa, kareramu jen keca, akeca er sida mana, yambula bupra ketenepmaiya di, abekin pumbon dongopi. Ada, akeca sangamu taruda, ton buprapidi, emas di telepra, domi me mau pum dongopi ngeda, amenda taru abekin pumbon dongopidi, dopra deiami. Tonda, Harun er maca douamupa, gapu pakamu ngeda dopra, abekin pumbonpu dongopidi deiami. Abekinda, Pio Telep Lek Ati neitamai deiami.

5 Abekin deriramyai deiki tara derirami keca, er sida Kerub, petupra deiami. Kerubda ada malaikat urasin utopunge petupra deiami. AKerub deipi ngeda, ‘Nun nai bo Allah aca damai kurure tenenkameng’ tenen, derirami. Akeca petupra deiami ngeda, emas bekin deiki tara deipi. Abekin deiki doami pelda, ‘Allahdi nimi mali kun keca daepkamser’ tenen, yapi bupra abekin deiki likra, deriramyai deiki tara kupu. Akeca-keca yuma deriramipa, akwamu dinin, ukutaruda, akurami keca yuma tep, upu men lap peptepe.

6 Akati neitamai derirami keca yumada, arup pepmanua utopu, konum lelepra deiamidi, sun apel dororami neng, ada Allah cap, nimi cap, dana-dana antamdina deiyo nengpu, akati wengamidi, sun apel dorami. Sun wengami atida, menmena wilipra domipa, menmena tara atipu wengbarami. 7 Sunda, bura tarato ati, menmena ati pum wengami dinin, Allah karena tep deiyo neng, sun ila deiyo ngebo erpuda, akati wilipra neitamai domi atida, “Pio Telep Lek Ati,” perami ati wengamu. Sun ila deiyo ngebodi akati wengamu dinin, yuk nengdi akati, Pio Telep Lek Ati men wengbarami.

Sun ila deiyo ngebo akati wekamuada, atumi-atumi yuma gum dinin, tenpu keteng tamun neitamaida, ue tenpu tumi deiki dipu wekamu. Tonda, aneitamai ati wekamu taruda, talipu men wengbaramu. Ange gum dinin, sun Israel nesala cap, er pe cap, aketeng tamun neitamai di, mankau kange doupra, mali kun keca kurami ngeda, ‘Allah daepseredi, kaukepkamser’ tenen, yapi dopra, wengbaramidi, Allah tep ayapi dopra gege pepra deriramu.

8 Uda, sun ukuraminge deikida, Allah er Lek Sambaladi, ukupmantonge tep, peteremamseu. Peteremamseunge deiyoda ake. Ada, menmena ati, opkal di wipra, ke taru tep, dopembarami ati kwamu taru yumada, akati neitamai, Pio Telep Lek Ati wekmanto bisi, katuai men lap peramseue. Ada domona utopu cadi, Allah er kureyai tep wekmanto bisi kapul men lap peramseua tep pepsene. 9 Ange yuma ukurami ngeda, ukupmanto keca kwamupa, adeikida nun ukutaru kunup nengdi kael kemnupe. Nundi kael kemnupa deiyoda ake. Ada, sun menop taru kurami nesaladi, Allah er gispal dona tep karerami keca cap, ‘Nun mali kun keca gum kupra deipkamser’ tenen, gam keca popra, Allah tep karerami keca cap deiki di, ataru Allah si eremami nesala, sun kange dipru neitamai ngeda, dumsisi kupra men deipmanto kuramu.

10 Apel-apel doraminge yumada, tali karena keca cap, tali jen keca cap, tali jen me cap, nimi dipru telep kudina tep, tali me kupra pel doraminge cap, apel-apel doraminge yumada, mem pel kwamu dinino, tali ukupmantonge, nong bol deiki utopu pelpu dorami. Apelda, menop taru di dipra, aneitam taru yuma pel dopyakarami dinin, ukutaruda Allahdi ukupu pedisere upu konum peipseua tep, apumun pel dorami ngeda, tupa men talenkamepe. Pumun taru dorami mem pel yuma konum gawal dakmepu.

Yesus Kristus er yapi tep, pepu upu

11 Pumun taruda, sun ke domi ati, yambul telep ati kwamu dinino, Kristusda, Allah cap, nimi cap dana-dana antamdina ila deiyo ngebo kuna tep yau taruda, tali tuai nesaladi domi ati neitamai men wengbeu. Gume, erdi wengbeu atida, atuai mutu neitamai men kurure. Er wengbeu atida, mali keca tenpu pe men kuramu ati, mambul weik ati weku. Yesusdi weku atida, tuai mutu neitamai men kurure. Akatida, im deiki kurur ati tepa.

12 Sun pumun taru pel dorami nengdi, ke opkal ati neitamai, ‘Pio Telep Lek Ati wekup’ tenen, kambing bisam yapi cap, sapi bisam yapi cap, dopna deiki di wengbaramitopu, Yesusda ange utopu men kupu. Ange gum dinino, Yesus Kristusdi, tuai nesala yuma, nun mali kun keca pio gum kupra derina tep kunupseudi, konum gawal dakseue. Konum kunupseudi, nun yo punupseua tep, apel yuma gawal dakseue. Nun mali kun keca daemna pel konum gawal dakseua cadi, Allah er tek sisi Pio Telep Lek Ati, ue tenpu taru weku. APio Telep Lek Ati weku taruda, er pe yapi deiki dipu weku. Atep, kange di ton cap, apel men dopkamre. Apel konum gawal dakseua tepa.

13 Allahdi peipupa, Musa er upu neitamai sekamutopu, pumun taru mali kurami nesaladi, ‘Allahdi kange deipkamser’ tenen, kambing cap, jem sapi cap popra, yapi gwepmainge cap, ner sapi popra, uku dongopi. Uku dongopipa, ukudi jepropudi, bute buku ngeda, abute cap doprapidi, sun telep kudina tep, ataru kurami nesala, sun nong deiki gege pepra derirami. Ukuramyada, ‘Allahdi nun mali kun keca daepseredi, telep kupra deipserepa, nun mali neng kunup dinin, er damai yatepe’ tenen, apel dorami. Ukurami dinin, angeda ukupmanto tep, nong bol deikingepu, telep kudirami dinin, nimi dipru neitamaida, tek sisi telep men kudidarami.

14 Sun pumun taru pel dorami ngeda, yambul mambul pel, nong bol deikingepu, yambul telep kudirami dinino, Kristus er pe yapi deiki di, nun kange dipru tek sisi telep kupra deriseryada, ila mambul weik kurure. Kristusda, pio dumsisipu kuramupa, Allah er Lek Sambala, pio akunkamre ngeboda, er puto meliamua deiki di, Yesusdi Allah tep er pedi er pe nong karepdau. Nun kange dipru neitamai, mali keca kuserya deiki di, mali kupedi denupe. Atep, Kristus er yapi deiki di, nun kange dipru neitamai mali keca daepseua deiyoda ake. Ada, ‘Tuai nesaladi, Pio Gam Kuna Deiyo Ngebo Allah, er amutara kumengedi, er pel donkameng’ tenen, pel dopseue.

15 Ange tep nengeda, Allahdi nun tep, “Ukunkamsen,” pepra pediramsere upu, ukupu upuda, konum keteneipseu pangeda, Kristusdi, Allah cap, nimi cap dana-dana Antamdina Deiyo Ngebo kuserure. Apel dopra kuserya deiyoda, ake. Ada, Allahdi kongpesere nesala yumada, Allahdi, “Ukupra karenkamsene,” pepra pediramseu keca, ‘Tek sisi dopropmengedi, akeca talepra pio telep kunkameng’ tenen, Kristusdi nun Antamdina Deiyo Ngebo kuserure. Uda, Allahdi, nimi telep kudina tep, upu pediramupa, menop taru aupu kuramya neitamaida, Allahdi kongperamu nesala, sun mali kurami keca cap, nun mali kunupnge cap, gum kupra derina tep, Kristusdi depseua deiki di kunupseu. Kristusdi nun lyemna tep, punupra depseua deiki di, nun mali kuramupu keca neitamai loptapseudi, lyepra kunupseu. Nun yo punupseua cadi, Kristusda nun cap, Allah cap, Antamdina Deiyo Ngebo kuserure.

16 – 17 Uda, yuk upu pepkusene. Nimi depkunge taruda, ukununge. Surat deikida, “Ne depnyopda, ne taleamsi kecada, ukuprap, ukuprap bokeipkamrume,” pepra sengnunge. Asurat sengmenge neng tupa gam kunge taruda, asurat neitamai penge kecada, yuk nengdi bokra men doproptenge. Asurat deiyo nengdi, tek sisi depmengepa, yuk neng yuma katuai kael kepmengopda, adeiki dipapu, asurat neitamai pemengenge utopu, sun keca bokra doproptenge.

18 Ange utopu, menop taru Allahdi, “Ukunkamsene,” pepra pediramu upu peda, gam kure keca popra yapi likra deipna deiki dipu gonga kemamu. Yapi keca men kareamtenge teptoda, apediramu upu nong men kwamtue. Talipu kwamtu ja. 19 Allahdi peipupa, Musadi sekeiamu upu, mem upu yuma konum lap pepudi, sapi bisam mi popra, yapi dopropu. Ayapi cap, me cap, tapakrapudi, bi opkal cap, co sida hisop co yapla cap dopra, keteneipmana di yapi mokon buruprapudi, amem upu sekmau keca deiki cap, aupu gekenmai neng yuma cap, sun nong deiki gege pepra deipembaramu.

20 Ayapi cap, me cap tapakra, anesala sun nong deiki gege embeu taruda, aupu ton pepra embanmau. “Allahdi sun yuma tep upediserure, ‘Ukunkamrume, ukupmumpa, nedi ukunkamsene,’ pepra pedinmaser upuda, ‘Ataru dipapu talepra dombenkameng’ tenen, karepmaserpa, gonga kepkupa tep, ayapida likra deipbanmasene,” pepu. Musadi aupu peprapudi, yapi bupra gege pepra embaramu.

21 Aupu peprapudi, anesala yuma deiki, yapi likra deipembaramu utopu, Allah er tep karena cap, er si eremna cap tep, sun opkal di ke dodin ati dominge cap, akati pel dona tep, akati neitamai derirami keca yuma cap, yapi doprapudi, gege pepra deipembanmau. 22 Angepu gum dinin, Musa sekeiamu mem upu, neitamai peseretopu, akeca-keca yuma, telep kudina tep, yapi dopra gege pepra deipembarami. Ange utopu, nimidi mali kunge keca daepra kaukemna tep nengeda, yapi gwepra gege pepra deipembaramya deiki dipapu telep kudirami. Yuk tali keca deiki di pio gume.

23 Ange tep nengeda, ataru kuramu keca yuma, telep kudina tep, gam keca popra, yapi gweprapidi, gege pepra derirami. Ataru kuramu keca yumada, tali ukupmantonge, kuki utopu keca kuramu. Tek sisi ngeda im deikipu kurure. Tek sisi im deiki kure keca telep kudina tep karepmanto kecada, pumun taru gam keca popra yambul telep keca kareraminge deiki di, telep men kuptue. Ange gum dinin, ukupu ngeda pio telep keca deiki dipu dumsisi kupra deiptue.

24 Im deikinge karenada, pio telepnge pua pepmasenada, deiyo ake.

Kristus wengamu ati, pio neitamai atida, nimi buru deiki di domi ati gume. Nimidi, ‘Tek sisinge gum dinin, ukupmantonge dopkup’ tenen, nimi buru talepra domi ati, kuki utopu ngeda men weku. Ange gum dinin, Kristusda, im deikipu wengbeudi, ukutaruda, ‘Allahdi tuai mutu kunge nesala melimkamre’ tenen, nun melimna tep, Allah er kun damai bena kuredi, Allah tep moroserure.

25 Tonda, tuai ngebo dinin, Allah cap nimi cap dana-dana antamdina ila deiyo ngeboda, keteng tamun yuma dinin, ue tenpu taru di, nimidi domi ati, Pio Telep Lek Ati neitamai bana tep, gam keca popra, yapi dopna deiki di wengbarure. Apel donge nengdi, sun pe yapipu gwepmengedi, men wengnunge. Sunda, keteng tamun tupa-tupa pel dona tep, wengamenga utopu gum dinin, Kristus erda, ue tenpu taru dipu, er pe yapipu dopra, im deiki neitamai wekudi, Allah tep karepu. Yesus Kristus, er pedi, er pe nong dopra Allah tepapu karepu.

26 Sun tuai nesala dinin, Allah karena tep deiyo nengdi, tupa-tupa karerbaramengtopu, Kristusdi ange men kupu. Kristusda, anengdi tupa-tupa karenapu kuramengtopu, er peda utopu kuptu teptoda, ue tenpu taru deiki dipu er pe nong dopra, Allah tep men kareamtue. Ange gum dinin, weika di ton cap, im deiki wengbaramtue. Ada, Allahdi akeca-keca yuma ketekeipu taru di dipra, aneitam taru yumada, kange di ton cap, weika di im deiki wengbaramtudi, Allah tep kareamtue. Dinino, ukutaruda, sirya taru damai konum kupupa, Kristusda, ue tenpu taru deiki di konum yaue. Kristus yaua deiyoda ake. Ada, er pedi, er pe nong dopra, Allah tep konum karepka deiki di, nun yo punupseue. Mali nengdi er tep popya deiki di, nimi mali kunge keca yumada, konum gum kupra deipseudi, nun yo punupseue.

27 Uda, Allahdi nimi tuai nesala yuma teneamseutopu kunkamepe. Ada, gam kuramepyanen, tenpu taru di konum depmepyopda, amendada, Allahdi, nun tuai nesala yuma tep, “Ange telepe, ange mali,” pepra upu lepsisikra bokeipseredi, wenepkamsere. 28 Ange utopu, Allahdi, ‘Nimi tuai nesala weik, sun mali kun keca gum kupra deipkamre’ tenen, ue tenpu taru dipu Kristus dokotepupa, mali nengdi Yesus popya deiki di, nun mali kun keca yuma konum daepra gum kupra deipseue. Amenda taruda, Yesus Kristus kange di ton cap, tuai mutu damai belepra tengyankamre dinino, ataruda, ada, ‘Mali kun keca, ne nong deiki deipnengepa daepkamne,’ tenena tep men yankamre. Ange gum dinin, butene taru yankamre deiyoda, ada, sundi, ‘Yesus tek sisi doryankamsere’ tenen, er tep teka tenepra, dinapu kunge nesala tep, lyemdonkamsere.