Hos 1 | XteSC | STEP | Yehuda yala nesala kurami mutu talepra kurami nimi deiyo neng sun sida, Uzia, Yotam, Ahas, Hiskia cap, sun anengdi Yehuda mutu neitamai kurami nesala yuma talerami taru neitamaida, Allah Yahwehdi, nabi Hosea tep, yana upu pediramu. Ataru neitamaipu, Israel nesala talena tep, sun ila nimi deiyo ngeboda, Yoas er mi Yerobeamdi, Israel yala nesala taleamu. Ukupra taleamu taruda, Allah Yahwehdi nimi si Beri, er mi Hosea tep pediryakaramu. Israel nesala cap, Yehuda tara kurami nesala capdi, Allah peiamu utopu men kuramya tep, Allah Yahwehdi, Hosea tepapu peipu.

Hosea 1

Allah Yahwehdi, er upu lap pena deiyo ngebo, nabi Hosea tep, pepu upu

1 Yehuda ^{▼▼Yehuda – Pumun taruda, Israel nesala yuma deremdaramidi, bongdarami. Ukupidi, Yeriko mutu dinin, deiki tara (arah utara) mutu kurami nengda, Israel nesala perami. Dinin, Yerusalem mutu dinin dutarada, (arah selatan) kurami nesala tep nengeda, Yehuda mutu nesala perami.} yala nesala kurami mutu talepra kurami nimi deiyo neng sun sida, Uzia, Yotam, Ahas, Hiskia cap, sun anengdi Yehuda mutu neitamai kurami nesala yuma talerami taru neitamaida, Allah Yahwehdi, ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} nabi Hosea tep, yana upu pediramu. Ataru neitamaipu, Israel nesala talena tep, sun ila nimi deiyo ngeboda, Yoas er mi Yerobeamdi, Israel yala nesala taleamu. Ukupra taleamu taruda, Allah Yahwehdi nimi si Beri, er mi Hosea tep pediryakaramu. Israel nesala cap, Yehuda tara kurami nesala capdi, Allah peiamu utopu men kuramya tep, Allah Yahwehdi, Hosea tepapu peipu.

Hosea er ner cap, er nyapu cap tep, pepu upu

2 Allah Yahwehdi menmena gonga kepra, ‘Israel yala nesala gekenkameng’ tenen, nabi Hosea tep aupu pepu. “Hosea kanda, Israel nesala kan-kan bememdi, amutu tali-tali nyangtamenge ner bena dopkurume. Aner bena dopmemdi, anerdi deipkamre nyapu yumada, kan pe nyape sisapu men kunkamenge. Yuk nengdi kan dopkamrem ner cap kikiman kungedi, tali nyangdangepa, anerdi, yuk neng sun nyapu ton deipkamkere. Anyapuda, tali nyangtamenge nerapudi derinung nesala, sun yala ton kunkamenge. Ukunkamruma deiyoda ake. Ada ukupmanto ngebo kunkamrema tepa.

Deiyoda, mali nerapudi, sun menmena dorami neng tapra, yuk tali dakunge neng cap, tali-tali nyangdaramengtopu, ne nyapu sisa Israel nesaladi ne tep tamnengedi, tali keca si eremnunge. Tamnengedi, yuk tali keca tep, ‘Nun nai bo ake,’ pepra, isok si eremnunge. Ukununga deiki di, ne Allah tep tamnenunge. Tonda, aisok si eremnunga deiki di, nimi cap, nerapu cap, tali nyangdaramengtopu kununge. Israel nesala peda utopu kununge. Sunda, dumsisi telep kupra kuna gum di, mali-malipu kungedi, ne sun nai bo Allah Yahweh tep, tapra bendopneiye.” Allahdi nabi Hosea tep pepu.

3 Upepka tep nengeda, nabi Hosea adipapu beudi, nimi si Diblaim, er ner mi sida Gomer bena dopu. Dopudi, kikiman dakuramreianen, er aner mumun douamu ngeda, menmena sal mi deipu. 4 Konum deipu pangeda, Allah Yahwehdi Hosea tep pepu. “Kan mi sida, Yisreel ^{▼▼Yisreel – pepkada, Ibrani upu deiki di, aupu deiyoda ake. Ada, ‘Allahdi Israel nesala wenepredi, sun mutu neitamai di enepra, yuk mutu dokotepkamre’ tenen, domon upu deiki di pepu. Tonda, aupu deiyoda ake. Ada, ‘Allahdi yal keca gwekbarure’ tenen, asi Yisreel pepra si perami.} pepkurume. Israel nesala sun ila nimi deiyo ngebo, er sida Raja Yehu, erdi taleamu keca cap, nesala cap tep, wenepra poptapkamne. Ukupkamna deiyoda, pumun taru deiyo men kupupapu, Raja Yehudi peipupa, er jen talen nengdi, Yisreel mutu neitamai mambul neng tali poptapya tep, Raja Yehudi taleamu keca yuma gum kupra deipkamne.

Ukupkamna deiki di, Israel neng ila nimi deiyo kemenge neng yuma peda, popra gawal dakamne. Tonda, nimi si Yehu deipupa, dadeipdanen yakarami neng peda, wenepkamne. Ange tep nengeda, kan nerdi deipu sal mi, er si Yisreelda, asipu pepra, si penkamrume.” Allahdi Hosea tep pepu.

5 Upepudi aupu ton dukdongopra pepu. “Ataruda, Israel nesala sun jen cap, mar cap talengedi, puto weik kunge nesala yumada, popra gawal dakamne. Ada, mutu si Yisreel mutu ban neitamai di gakra tapkamne. Ukupkamna deiki di, Israel nesaladi, ‘Nun Israel nesalapuda, ila puto nesala kunkamapa cadi, Allahdi melipra kalengserur’ tenen, men putaserure. Utenenung dinin, sun puto yuma gum kupra deipnepa, puto boun nesalapu ^{▼▼Puto boun nesala pepkada, Ibrani upu dinin, domon upu deiki di, ‘Sun mar cap jen cap daktapkamsene,’ pepu.} kunkamenge,” Allahdi Hosea tep pepu.

6 Hosea er ner Gomer, kange di ton cap mundu douamnganen, ner mi deipu. Konum deipu pangeda, Allah Yahwehdi Hosea tep pepu. “Aner mi er sida, Lo-Ruhama ^{▼▼Lo-Ruhama – pepkada, Ibrani upu deiki di, aupu deiyoda ake. Ada, ‘Allahdi bicau men teneserure’ tenen, perami. Aupu deiyoda ake. Ada, ‘Allahdi Israel nesala wenepkamre’ tenen, asi pepu.} pepra, si penkamrume. Ibrani upu deiki di, asi Lo-Ruhama penunga deiyoda, ‘Bicau tenepra melimna gume,’ tenena tep penupe. Ada, ne Allahdi sun Israel nesala tep bicau tenepra, ton men melimkamsena tep, asi pepkurume. Tonda, sun mali kunge keca kaukepnedi, men lyepropkamna tep, kan ner mi sida, Lo-Ruhama pepkurume, pepkene.” Allahdi Hosea tep pepu.

7 “Ne Allahdi, Israel yala nesala tep, bicau tenepra men melimkamne dinino, sun Yehuda ^{▼▼Yehuda – pepkada, Ibrani upu deiki di, aupu deiyoda ake. Ada, ‘Allahdi bicau teneserure’ tenen, perami. Aupu deiyoda ake. Ada, ‘Allahdi Yehuda yala nesala tep bicau tenepredi melimkamre’ tenen, asi pepu.} mutu kunge nesalapuda, bicau tenepra lyemdonkamne. Ne sun nai bo Allah Yahwehdi pepne. Sun Yehuda tara kunge nesaladi, sun podan nesala tep, bisbisa kapkamenge. Ada kuda bisam deiki bukra bena, mar podana cap, parang ya di pona cap, yuk mutu jen talen nengdi makupra pona deiki di gume. Ne Allah puto di, sun tep melimkamna deiki dipapu, sun podan nesala yuma bisbisa kapkamne.” Allahdi pepu.

8 Aner Gomerdi, sun ner mi Lo-Ruhama konum deipupa, aner mi nepupa, konum moun dakeipu taruda, aner Gomer, kange di ton cap mundu doamnganen, deipu sal mi tenpu ton deipu. 9 Asal mi butenenge konum deipu pangeda, Allah Yahwehdi Hosea tep yan pepu. “Ami er sida Lo-Ami ^{▼▼Lo-Ami – pepkada, Ibrani upu deiki di, aupu deiyoda ake. Ada, ‘Anesalada, Allah er nyape gume’ tenen, perami. Atep asi karepu.} pepkurume. Ibrani upu deiki di, ami er si tep, Lo-Ami peramenge deiyoda, ‘Ne mawa nesala guma’ tenena tepa. Kan mi er si tep, Lo-Ami pepkamruma deiyoda, sun Israel nesalada, ne nyapu sisa tupa men kununge. Tonda, ‘Neda, sun nai bo Allah tupa men kunune,’ tenena tep, asi pepkamrume,” Allahdi Hosea tep pepu.

Allahdi, “Israel nesala mali kunung keca tep, gum kupra deipnedi, anesala lyepropkamsene,” pepu upu

10 Allahdi Hosea tep pepu. “Tek sisi Israel nesala tep, ila di wenepkamne dinin, dor kupbankameng taruda, nedi kange di ton cap melipnepa, Israel nesala denge pio weik, men nukmanto kupbankamenge. Ukupmantoda, laut mokon pumbon yamuramre me wenenga, nimidi ame wenenga men nukmanto kuramengtopu, Israel nesala peda, nimi denge pio weik kupbankamenge. Sun kunkameng keca yumada, teleppu kupkamre. Ukuprepa, yuk mutu nesaladi, ‘Uo, Israel nesalada, mambul weik nesala kununge,’ tenepra penkamenge.

Atep, dorkunkamre taruda, pumun taru Allahdi Israel nesala tep, ‘Sunda ne nyapu men kurume,’ peiamu ngeda tapredi, telep kupra deipre pangeda, ka di tamupra er nyapu sisapu kungepa, nimi yumadi, Israel nesala tep, ‘Uo, sun Israel yala nesalada, tek sisi Allah er nyapu sisa kununge. Ukungepa, Allahda, Pio Gampu kurur ngebodi, Israel nesala talerure,’ penkamsenge.

11 Ange yuma, ne Allahdi konum kupne pangeda, Yehuda tara kunge nesala cap, Israel yala nesala cap tep, yuk mutu nesaladi, bisbisa kapra, pio karen mutu dubengepa, kunkamengaida tapmengedi, tamupra amutupu yangedi, acapu kunkamenge. Ukupmengedi, sun tenpu wisipra kungedi, sun nimi deiyo ngebo kuna tep, tenpu ngebo wepra deipmengepa, angebo dipapu, sun amutu kunkameng nesala yuma tep, taleprepa kikimanpu telep kunkamenge.

Ange yuma konum kupne pangeda, nimi yumadi, ‘Uo, ukutaruda, Yisreel ^{▼▼Yisreel mutuda, Samaria mutu cap, Megido mutu cap, adinen utara kwuamu (arah utara). Tonda, Ibrani upu deiki di, nimi si Yisreel penung upu deiyoda, ‘Allahdi yal keca gwekbarure’ tenena tep, asida Yisreel perami. Atep, amenda taru asi pepkamra deiyoda, ‘Israel nesala yuk-yuk mutu dubenamyai di dopra, duyanedi amutu neitamaipu deipnepa, amutu pio telep kupra kunkamenge’ tenen, domon upu deiki di asi pepu. Atep amenda doryankamre taru di, Allahdi asi Yisreel menmena taru pepunga deiyoda, tamupkamre.} er ila tumi konum kupmare,’ penkamenge. Aupu penkameng taruda, Allahdi er mawa nesala Yehuda yala nesala cap, Israel yala nesala cap dopra, kange di sun pe mutu neitamaipu tamupra deiprepa, apio kunkamenge.” Allahdi nabi Hosea tep pepu.