Hos 10 | XteSC | STEP | Allahdi, ‘Israel nesala tep, sun mali-mali kuramidi, tali keca si eremaminge tep, wenepkamne’ tenen, pepu upuda, nabi Hoseadi seku. Aupuda ake. Sun Israel nesala yumada, menop taruda anggur tapke pio weika di mouramretopu kuramrume. Dinino, ukupra teleppu kupbarami taruda, sundi, ‘Tali keca si eremkamep’ tenen, isok si eremna cap, isok karena cap tep, sundi pala gel dopra, yakra deiamidi, mesba-mesba weika di keteneiami. Ange utopu, sun Israel nesala teleppu kupbaramitopu, ‘Isok Asyera si eremkamep’ tenen, peten kemna tep keca, er si ‘tugu berhala’ si eremna tep, ila weik lyom coda, weikanun ton ikrapidi, isok si eremna tep keca dopra deiamidi, aisok-aisok si eremamidi, mali weik kurami.

Hosea 10

Allahdi Israel nesala sun mali-mali kuramipanen, wenepkamrenge tep, pepu upu

1 Allahdi, ‘Israel nesala tep, sun mali-mali kuramidi, tali keca si eremaminge tep, wenepkamne’ tenen, pepu upuda, nabi Hoseadi seku. Aupuda ake.

Sun Israel nesala yumada, menop taruda anggur tapke pio weika di mouramretopu kuramrume. Dinino, ukupra teleppu kupbarami taruda, sundi, ‘Tali keca si eremkamep’ tenen, isok si eremna cap, isok karena cap tep, sundi pala gel dopra, yakra deiamidi, mesba-mesba weika di keteneiami. Ange utopu, sun Israel nesala teleppu kupbaramitopu, ‘Isok Asyera si eremkamep’ tenen, peten kemna tep keca, er si ‘tugu berhala’ ^{▼▼berhala – Aupu deiyoda, ada, isok si eremna tep, patung petupra deiamidi, isok si eremami.} si eremna tep, ila weik lyom coda, weikanun ton ikrapidi, isok si eremna tep keca dopra deiamidi, aisok-aisok si eremamidi, mali weik kurami.

2 Sun Israel nesalada, sipyal deiki di telep upu penung dinin, sun kange dipru neitamai tenenung keca cap, ‘Ukunkamepe,’ penung keca capda, malipu kurura cadi, sunda mok upu pen nengpu kununge. Ange tep nengeda, sun yumadi, mali kun kecapu kupra banunga menenga tep, Allahdi ikin keca karepkamre. Allah Yahwehdi anesala wenepkamre taruda, sundi doami mesba-mesba yumada, urupra sikke buktapkamre. Tonda, sundi, ‘Asyerah isok si eremkamep’ tenen, dopra deiamidi, ingami lyom co, er sida tugu berhala peda, ange yumada, urupra daktapkamre.

3 Ange tep nengeda, Allahdi ange yuma konum kupmare taruda, sundi upenkamenge. “Uo, nundi Allah Yahweh tep, kware men kuramseupa, er sida pio men eremamepudi, er tepapu men talepra kuramupka cadi, ukutaruda nun nimi deiyo ngebo Raja ton dopra deipmaserpa, tupa men kuserure. Dinino, nimi deiyo ngebo Raja tupa akapsetua peda, erdi ware kuptudi melipsetu do? Gume, men kupmanto. Atep, nunda nimi deiyo kepra kunada, warya tep do? Dakwapye,” penunge.

4 Sun anesaladi ukupra tali upupu pepra pertamnunge. Tonda, sundi tali pertamna upu penunga deiki di, yuk mutu neng cap, ‘Gume, kikiman melipra kalekdanapu kunkamepe. Tonda yuk neng tep, ‘Sun cap, nun cap, telep kupra kikiman kupe dingeda, ange ton, ange ton, telep kupra kikiman kunkamtepe,’ pepra, pedina upu deiki di penunge. Dinino, ange yumada, mok upu deiki dipu penunge.

Tali upupu penunga cadi, ton nengdi ton tara neng tep, upu deiki di pedana cap, pangdana cap kungedi, pio weika di kununge. Ukununga cadi, nimi upu bongdina deiyo neng damaida, pio tupa-tupa banunge. Ukupmantoda, ada yu yal kecapu wa tu palipra tapmengedi, koupmengepa pakredi, tali paramre keca cap, takke keca cap weik kuramretopu kurure. Deiyoda, sundi tali upu deiki dipapu penunga tepa.

5 Tonda, sun Israel yala nesala dinin, Samaria tara mutu neitamai kunung nengda, isok si eremna tep, mutu si Bet-Awen mutu neitamai di, isok si eremna tep, sapi bisam mi urasin utopu keca petupra deiamidi acapu akeca si eremnunge. Aisok-isok si eremengedi, ‘Uo, nun nai bo ake’ tenen, yo moropsemnapu kurepa kununge. Asiok yuma tep, sundi kware kuprepa, yo moropsemengedi, upu ila di pengedi, engenunge.

Ada, menop taruda, ‘Nun isok si eremna keca, sapi bisam mi urasin utopu petupra deiamepu ngeda, pio telep kuramu dinin, ukutaruda, mali kupmasere. Uo, warya tep do?’ tenen, weika di engenkamenge. Ada, sun amutu neitamai kunge nesala cap, sun mali kun keca talepra kungedi, imam pel donge neng capda, ila di engenkamenge. Aimam nengda, Allah tep tamidi, isok si eremna pelpu donunga cadi, sunda nimidi sun domi nerapu tapmengedi, tali nyangdarameng nerapu donung neng utopu kununge.

Ukupra engenkamenga deiyoda, ake. Sundi, ‘Uo, menop taruda, nun isok si eremna tep petupra deipmepu kecada, ‘Urasin pio telepe, angeda mambule,’ teneramepu dinin, ukutaruda, asapi bisam mi utopu petupra deipmepu ngeda, urasin malipu kurure. Akeca yuma gum kupra deipkamrenge tep, bicau kuprepa, engenapu kunkamenge.

6 Yuk mutu nengdi, aisok si eremna tep, sapi bisam utopu kecada, dalupra dopropmengedi, karen mutu Asyur mutu neitamai dubenkamenge. Ada Asyur mutu, sun ila deiyo ngebo Raja, er menenga karena tep dubenkamenge. Ange ukupmenge pangeda, sun Israel tara kunge nesala yumada, ‘Uo, warya tep do?’ tenen, kware kuprepa ali dangkamenge. Ada sun si eremami isok, er urasin utopu keca patung berhala tep, tenepra kware kuprepa, ali dangkamenge.

7 Ukupkameng taruda, Samaria mutu cap, sun ila nimi deiyo ngebo Raja cap peda, Allahdi sikke bukra tapkamre. Ukuprepa sun nimi deiyo ngebo Rajada, co sekra tapmengepa, ila me embaramyadi doupra berepa, dim peramretopu, aRaja ngeboda, doupra dubenkamenge. Ukupmengepa, erda dim pepkamre ja!

8 Tonda, Awen mutu neitamai dinin, mutu dup deiki di, ‘Nun isok si eremkamepe’ tenen, isok si eremna ati dominge yumada, Allahdi go kareprepa, yu podan nengdi akeca yuma urupra, sikke buktapkamenge. Sun Israel nesaladi isok, er si berhala, si eremami mutu buma deiki yumada, sikke bukra tapnedi, gum kupra deipkamne. Israel nesalada, akeca deiki di, ila mali kuna weik kurami.

Ukupne pangeda, sun isok si eremna tep domi keca, mesba-mesba yuma deikida, takke keca cap, betei cap, manmaning cappu pakredi tekamre. Ukupre pangeda, sun anesala yumada, ila upu deiki di ngolokra mutu dup tep kong penkamenge, “Uo, uo, nun kange mun kange doupmapa cadi, sun ila mutu-mutu dana-dana kwamunge yumada, nun yana singipseo,” pepra moronkamenge! Tonda mutu buma yumadi, topra nun yana taikra, popseo!” pepra moronkamenge.

Allahdi Israel nesala tep, “Sun deiki ikin keca deipkamne,” pepu upu

9 Allah Yahwehdi aupu pepu.

Uo, sun Israel nesalao. Gibea mutu neitamai kuramrum taru di gonga kepra, mali kunange talepra kuramrumtopu, tupa kurume. Amali kuramrum ngeda, sun amutu tupa kunge Israel nesala yumadi, ange men tenengedi tupa pio malipu kungedi ne upu yaninenunge. Ange tep nengeda, Gibea mutuda, sun podana neng dopra deipnepa, poryankamsenge.

10 Atep nengeda, ne Allahdi go karepnepa, nimi pona tep yu nengdi, sun mali-mali kunung nesala yuma tep, poryankamenge. Ukupnedi ikin kecada sun anesala deikipu derirbenkamne. Tenpu mutu nengpu gum dinin, mutu-mutu weik, yuk-yuk dinin, sun yumadi wisiprapmengedi sun Israel nesala tep porbenkamenge. Tonda, sun tep wenepkamna deiyoda, sunda mali kun kecada, pio weik cadi, ange deiki tep wenepra popkamsene.

11 Pumun taruda, sun Israel nesaladi, ukupu sapi bisam nepbaredi, moupra kael kemredi, pio telep kupra gandum du yanipra embaredi, er bol koramretopu kurume. Atep, ukupmantoda, ‘Angeda men poptaptume,’ pepra deipsipa, yuk mutu nengdi, Efraim yala neng tep men popra gawal dangami.

Dinino, ukutaruda, sun nong deiki ila ikin keca deipkamne. Ukupmantoda, sapi bisam tapu gerekdongopmengedi, ikin co er kum deiki deipmengepa, asapi bisam di akeca gipra embaredi, tu palinmaredi, ila ikin pel doramretopu, sun Efraim yala neng tep utopu kupkamne.

Ada, Efraim yala nengdi deiamipa, dadeipdanen yakaramyanen, sundi deiami neng tep, pio ikin pel dipkamne. Angetopu, Yakub yala nengdi deiamipa, dadeipdanen yakaramyanen, deiami neng tep, ikin keca ton karepne pangeda, sun peda, asapi bisam tu palinmaredi ila ikin pel doramretopu kupkamenge. Ada, Efraim yala neng cap, Yakub yala neng cap, karen mutu nengdi ateng koupra dubengedi, pio ikin pelpu dipmengepa donkamnunge. Ada sun wenemna keca menenga karena tep pepsene.

12 Ne Allahdi pepsene. Uo Israel sun ukupmantoda, nimidi telep yal kecada, wa pepra kouamengepa, dakuamyanen, amenda taruda, pio telep keca pakredi, nong kuprepa, telep kupra kiramengtopu, ne Allahdi sun Israel yala nesala tep pepsene. Uo, sun Israel nesalao! Sunda ukupu wa tu pepra kouna utopu, sunda ukupu dumsisi kun kecapu kupbankamrume.

Tonda, yal keca kina utopu, sundi ne cap, yuk nesala cap tep, tamna pio gum dipapu, pio bicau teneprumudi, melimnapu kunkamrume. Sun kange dipruda, ne deikipu deipkamnerume! Tonda, nimidi wa pena gum di, tali tapra dakuramrepanen, orketeng tamunpu, wa pepra kouramengtopu, sundi telep kun keca men kuramrum ngeda, kange di atelep kun keca kupbankamrume.

Ange yumada, tali tep men pepsene. Deiyoda, sundi, ‘Nun nai bo Allahdi telep kupra deipkamser’ tenen, ne damai tamupra yankurume. Ukuprumudi, ne tep kange deipnerumudi, dumsisi kun kecapu kupmumnyopda, ne Allahdi, sun tep, telep kupra deipkamsene. Ada, ila mo cepredi, tuai sakrepa, akeca-keca yuma telep kupra paramretopu, nedi sun tep telep kweipsenyopda, sunda teleppu kunkamrume. Atep, sundi ne tep enkamnerum taruda, konum damai kupre. Neda sun nai bo Allah Yahweh kunune.

13 Dinino, sun Israel nesalada, telep kupra kunange utopu men kurume. Sunda, tamupra mali kun kecapu kumumdi, tali ngepu nong kemdorume. Tonda, dumsisi kuna gum kecapu, mali kunangepu kurume. Tonda, nimi upu bongdina taruda, sundi mok upupu peprumudi, mali men kupmange neng dopra wenemrume.

Tonda, tali upu deiki di, ‘Ukupkamepe,’ pepmarumu dinin, ange men kurumupa, amenda taruda, ikin keca ton sun damai yakarure. Ukupmantoda, nimidi mali yal keca koupmengepa, amenda taru du mouprepa, dakra malingepu jeramengtopu, sun peda ange utopu kurume.

Ne Allahdi ton cap pepkusene. Uo sun Israel mutu kurumu nesalao, mali-mali weik kurumunge deiyoda, ake. Sundi, “Gume, nunda puto weik nesala kunupe. Nunda nimi pona tep keca keretada pio weikanun kurure. Nun ila kael kemnung jen talena nengda, weik kununga cadi, yuk nengdi men yana popsetenge,” pepra, gemenapu kuramrume.

14 Sun pe putopu tenepra, salnong-nong kuruma cadi, ne Allahdi go karepnepa, yuk mutu yu nengdi, yana popkamsenge. Ne karepnepa, sun mutu dana-dana tara yuma kunge nesala damaida, podana cap, pangdana cappu, yankamsere. Ukupne pangeda, sundi gat lyom gel ati doramrumnge yumada, urup tapmengedi, sikke bukra tapkamenge.

Tonda, sundi lyom gel beilya wipra ongopdongoprumnge yuma peda, sikke buktapkamenge. Pio kange mun keca kupkamsere. Ada, deiyo ngebo Salmandi, Bet-Arbel mutu neitamai nimi weika di popra gum kupra deiamudi, amutu nerapu cap sundi deiami metek milo nyapu yuma capda, dopra gel deiki dopnepa, bongopra poramnga utopu, sun peda aikin keca utopu weik kunkamsere.

15 Angeda, sun damai peda, utopu kupkamsera tep, uo, sun Betel mutu neitamai kumum nesalada, sun pio ila mali kun keca yumada, kumumnya deiki di ange utopu kange mun keca yumada, karepkamsene. Ada tali tep gum dinin, deiyoda ake. Ada, sun pio mali-mali weik kuruma tepa. Ataruda, keteng menmena tengyakaramretopu, bereng tamna ipna sisa di, Israel nesala talepra, ila nimi deiyo ngebo Rajada, poptapmengepa, adipapu depkamre ja!

Atep neda, Allah Yahwehdi sun Israel nesala tep aupu pepra deipsene.