Hos 11 | XteSC | STEP | Allah Yahwehdi pepu. Israel nesala metek milo nyapu utopu kurami taruda, bicau tenemsidi, sun tep kange deiamsi. Atep nengeda, Mesir mutu neitamai kurami taruda, ikin weik kuramipane, ‘Uo sunda ne nyapu sisa utopu kununge’ tenen, nedi upupsipa, Mesir mutu di tapra duyakaramsi.

Hosea 11

Allah Yahwehdi Israel nesala tep, “Bicau tenesenepapu, balila deipra kurume,” pepu upu

1 Allah Yahwehdi pepu. Israel nesala metek milo nyapu utopu kurami taruda, bicau tenemsidi, sun tep kange deiamsi. Atep nengeda, Mesir mutu neitamai kurami taruda, ikin weik kuramipane, ‘Uo sunda ne nyapu sisa utopu kununge’ tenen, nedi upupsipa, Mesir mutu di tapra duyakaramsi.

2 ‘Upupnepa, ne damai yankamenge,’ teneamsi dinino, kange di ton cap, ‘Ne damai tamupra yarume,’ peramsipane, sun amul deikipu gekerami dinin, ne tep tamamneidi, yambul karenaipu bena kurami. Sundi ne damai tamupra men yakarami. Ne nyapu sisa Israel nesala yumada, ‘Isok si eremkamep’ tenen, isok er si Bahal doupra, si eremna ati pumbon, er urasin utopu keca petupra deipidi, Bahal si eremami. Ukuramidi, isok er si Bahal cap, yuk-yuk tali keca tep, ‘Nun nai boda ake,’ pepra, nimi urasin utopu keca patung petupra deipnedi, akeca si eremna tep, siltong telep keca uku dongorbaramidi, aisok si eremami.

3 Uo, sun Israel nesala yala-yala yumadi, ange betapra men tenenung dinino, ne Allahdi Efraim yala nesala yuma tep lyepramsidi, ‘Dumsisi bisipu benkamrumaida ake,’ pepra peteremamsisi. Nyapuda, sun nin yapudi, ‘Nun milo nyapu, sun pedi bisi embana kael kepkung’ tenen, sun nin yapudi, buru dana-dana taleptapmengepa, embaramengtopu, nedi sun Efraim ^{▼▼Efraim yala nesala pepu ngeda, ada Israel yala nesala tep pepu. Ayala tenpu dinin, si butene perami.} yala nesala yuma tep melimamsi. Tonda, sun ikin kwamunge cap, pu jeramunge cap yumada, nedi kweteramsi dinino, sun yumadi, ‘E, ada nun nai bo Allahdi melimserya deiki di telep kunupe’ tenen, moupra men kael kemami. Ne tep tamnengedi, tupa men tenenenunge.

4 Ukupmanto ngeda, nimidi sun peirameng sapi bisam dubana tep, tapu koupdongopmengedi, menepra bangedi, atapu talepra bangepa, sun sapi bisam yumadi, tali kange doupra, sun amnyo tara telep kupra baramengtopu, nedi Israel yala nesala yuma tep, ‘Teleppu kunkameng’ tenen, nedi bicau teneramsidi, sun ikin kuramunge neitamai yumada, nedi melimamsi. ‘Uo, sunda ne nyapu sisa’ tenen, sun Israel nesala yuma tep, kange deiamsidi, telep kupra melimamsi.

Nimidi, ‘Nun sapi bisam wa tu palipra pel donkamseng’ tenen, ikin keca sun kum deiki deriramengtopu, sun Mesir mutu nesaladi Israel nesala, sun nong deiki ikin keca weik deriramidi, pio ikin pel dimamipane, nedi aikin keca dopramsi. Ukupsi dingeda, sun putan keca tep, ne genepdongopsidi, sun tep telep jen keca kareramsi.

5 Dinino, sun Israel nesaladi, ‘Nun mali kunup keca men tapkamepe’ tenen, mali kecapu talepra tupa kupmengopda, nedi sun tep men wenepkamne do? Tali kaukeptapkamne do? Gume, mali-malipu tupa kungopda, sun wenemna tep, go karepnepa, yuk karen mutu nengdi, Israel nesala bisbisa kapmengedi, tamupra Mesir mutupu ka di tamupra dubenkamenge.

Ange utopu, sun Asyur mutu nengdi, Israel yala nesala yuma popbisipmengedi, gam tupa kunkameng nesala yuma doupra, sun pe mutu tamupra dubengedi, Asyur mutu ila nimi deiyo neng, Raja kunge nengdi, Israel nesala sun amutara deipmengedi, talenkamenge. Israel nesala yumada, sun Asyur mutu nesala amutara kungedi, sun upupu gekenkamenge. Asyur mutu nengdi ikin pel dimengedi, ikin keca weik, sun nong deiki derinkamenge. Ada tali tep gume. Israel nesaladi, sun mali keca tupa kununga tep pepsene.

6 Israel nesala tupa malipu kungopda, karen mutu nesala yangedi, Israel nesala ati domidi kunge mutu neitamai yuma, yana warekamsenge. Ukupsengopda, parang ya di ponkamsenge. Wareksengedi, ati-ati yuma ongopgenepra wiami gel beilya neitamai, buplan potokamenge yuma, gat co cap, besi keca cap di, dominge yuma uruptapkamenge. Ukupmengedi, sun Israel nesala yala-yala yumadi, ‘Amenda taru, ukunkamepe, ukunkamepe,’ teneraminge yuma, gum kupra deipkamenge. Ange yuma men kupmanto kunkamenge. Ada, karen mutu jen talen nengdi, Israel nesala yuma bisbisa kapmengedi, sun amutara deipmengopda, sun nong deiki ikin keca deipmengedi, sun tenenangepu pel donkamenge.

7 Ne kaele. Ne nyapu sisa Israel nesaladi, sun pe kun keca tepapu tenepra kungedi, ne tamnenunge. Sundi, ‘Gume, nun nai bo Allahdi pesere upu men gekenkamepe. Nun pedi tenenup ngepu kupra kunkamepe,’ tenenunge.

Atep nengeda, sun damai ikin keca weik yaryopda, sundi ne tep, ‘Uo nun nai bo Allah, kanda akeca-keca yuma talepra, deiki tara Ila Eremna Ngebo kuruma cadi, nun tep melipseo,’ pepra moropnetenga peda, pio men gekenkamne. Sunda, pio mali kun kecapu talepra kununga cadi, ne Allahdi sun tep lyepropnedi, ka di ton cap erepra men deipnedi, telep men kudinkamne. Sunda yuk nesala amutarapu kunkamenge. Allahdi Israel nesala, sun wenemna tep pepu.

8 Upepu dingeda, aupu ton cap dukdongopra pepu. Allahdi pepu. ‘Uo, sun mali kurumunge tep wenemkamsene,’ tenesenun dinino, ne kange yambulanun tenimtona utopu kunerure. Ada, nedi sun tep utenesenune. Uo, Efraim yala nesalao, ware kuprap nedi sun tep pio taptene do? Tapsenepa, yuk karen mutu kunge yu nesaladi popbisipkamseng do? Ange utopu, sun Israel yala nesala peda, ne yu di tapsenyopda, yu nesaladi yana popbisipkamseng do?

Tonda, sun wenemna tep, Adma mutu kurami nesala cap, Seboim mutu kurami nesala cap tep, ila di wenepra poptapsitopu, sun Israel nesala peda, tapra wenepkamsen do? Nedi, ‘Teka mali weik kununga cadi, ila di wenepkamne,’ tenen, ne kange pio bongtonerure. ‘Angeda kupkamne do, gum do?’ tenen, kange pio bongtonerure.

Ada, mesum tep gume. Ne Allahdi, sun Israel nesala yala-yala yuma tep, ila di bicau tenesenuna tep pepsene. Bicau tenesenuna deiki di, ne dipru neitamaida tamupnerure. ‘Mali weik kungopda, tek sisi sun tep tapra wenepkamsen,’ tenepsi dinin, ila di bicau tupa tenesenuna cadi, ukutaruda ne kange pio yuk tenepne.

9 Ange tep nengeda, nedi sun Efraim yala nesala tep, ‘Ne yuda uku bu jeramretopu kunerya di, wenepsenedi poptapkamsene’ tenen, keteneipsi dinino, ukutaruda ange men kupkamne. Tonda, ‘Efraim yala nesala yuma popnedi gawal dakamne,’ tenepsisi dinin, ukutaruda angeda konum tapne. ‘Ukupra wenepkamsen,’ tenepsi dinin, ukutaruda tamupra, bicau tenesenuna cadi, ne kange yuknge ton tenepne.

Apepmasenada, tali tep men pepsene. Deiyoda, neda Allah, mali keca tenpunge peda men kuneredi, pio Lek Ngebo ^{▼▼Lek Ngebo pepi ngeda, ada ‘Bol kurun ngebo,’ tenena tep gume. Ada, ‘Mali kuna pio gum dipapu, pio telep kure ngebo,’ tenena tep, seki.} sun kumumnya neitamaipu kunune. Sunda, tali nimi sisa tuai nesala kumumnya utopu, ne men kunune. Atep nengeda, sun damai yankamne taruda, ila yu di men yankamsene. Ila di wenepra men poptapkamsene, pepsene. Allahdi Israel yala nesala yuma tep pepu.

10 Allahdi aupu pepu dingeda, aupu ton dukdongopra pepu. ‘Ne mawa nesaladi, ka di tamupra ne damaipu yakankameng’ tenen, neda ila yu singa pusdi, ila upu peramretopu penkamne. Upu ila di pepnyopda, keteng dangban tara mutu dakungedi, ne nyapu mali kange doupra, ‘Uo nun nai bo Allah Yahweh, erda ila mambul ngebo kurure’ tenen, moropsepmengedi, ne damaipu kange di tamupra yakankamnenge. Sun menmena di tamupra yange dingeda, nong genepdongopra, ne damaipu tamupra yakankamenge.

11 Ukupmantoda, tali dakuramre ma yaredi, kware weik kuprepa, nong yuma moropsemamretopu, ne nyapu Israel nesalada, Mesir mutu neitamai di, ne damai tamupra yakankamenge. Ukupra yange taruda, sun nong yumada moropsepkamre. Ange utopu, Merpati perameng ma utopu, yal ma gung weika di kikiman lakra embaramengtopu, ne nyapu sisa Israel nesaladi, Asyur mutu neitamai di tapra, sun nong yuma moropsemengedi, ne damai tamupra yakankamnenge. Ukupra yakange taruda, nedi sun pe ati cap, sun pe mutu cap, tamupra yana deipkamne. Ne Allah Yahwehdi pepsena tep, apepmasen upuda, tek sisi nong kupkamre, pepsene. Allahdi pepu.