Hos 12 | XteSC | STEP | Allah Yahwehdi ne nabi Hosea tep yana pepneu. Sun Israel yala nesala yumadi mali upu pepra derina cap, tali upu pertamna cap, nimi pangdana cap, podana cap, pio weika di ukupra bangedi, dakupdanen banunge. Ne Allahda, pio telep lengna deiyo ngebo kunune. Tonda, nedi ‘Ukupkamne’ pepra, pedina deiki di penetopu, angepu tek sisi kunune. Atep, sun Yehuda yala nesalada, ne dabale tenenuna tep, ne damai ton tupa men yakankamenge.

Hosea 12

Israel yala nesala cap, Yehuda yala nesala cap tep, wenemna keca deipkamrenge tep, pepu upu

1 Allah Yahwehdi ne nabi Hosea tep yana pepneu.

Sun Israel yala nesala yumadi mali upu pepra derina cap, tali upu pertamna cap, nimi pangdana cap, podana cap, pio weika di ukupra bangedi, dakupdanen banunge. Ne Allahda, pio telep lengna deiyo ngebo kunune. Tonda, nedi ‘Ukupkamne’ pepra, pedina deiki di penetopu, angepu tek sisi kunune. Atep, sun Yehuda yala nesalada, ne dabale tenenuna tep, ne damai ton tupa men yakankamenge.

2 Ukupmantoda, nimidi, ‘Keteng yakan tara di yakaramre kumanya embaramyaida, nun ton bepedi, ange tomopra talepkamepe,’ tenenunge. Tonda, ‘Ipna taru di dipra dukdongopra sintarada, kumanya tomopterepkamepe,’ tenena neng utopu kununge. Ada, sun Israel nesaladi, ^{▼▼Israel nesala – Ibrani upu neitamaida, ‘Efraim yala neng’ pepra seki dinin, asekinge deiyoda, tek sisi sun Israel yala nesala yuma tenena tep seki. Ibrani Allah upu buku neitamaida, weikanun, ‘Efraim’ pepra seki ngeda, ada Israel nesala yuma, tonda Yahudi yala neng tenena tep seki.} ‘Asyur mutu nengdi yana popsenge taruda, ware mutu nengdi melipra lyepsetenge do?’ tenen, Mesir mutu nengdi melimna morona tep, minyak gwepmengedi, kunumbanunge. Tonda, sun Asyur mutu neng damai bengedi, ‘Uo sun cap, nun cap, podana gum dipapu, telep kupra kikiman kutepe do? ‘Nun cap kikiman, kupedi, nun kayapu neng tenedankamep’ tenen, sun tep mororbanunge.

3 Sun Israel yala nesala dinin, Yehuda tara kunge nesala cap, Yakub yala neng cap tep, Allahdi, “Sunda mali kun keca talepra kurume,” pepra wenepkamre. Sun abutene yala nesala tep nengeda, sun mali kun keca talepra kurameng nge utopu, Allahdi anesala yuma tep wenepkamre. Sun mali kunange tep menenga keca karepkamre ja. 4 Yakubda, er nin mundu tupa douamnga neitamai dadi, er kwa nyapuda Yakubdi, er dubo Esau tep, ‘Gume nepuda menmena nun nin mundu pumbon di yatene’ tenen, Esau er yan talepu. Ukuamu neng konum deipupa, dakuramreianen, Yakub konum wisi deipu dingeda, Yakub cap, Allahdi doproipu malaikat cap, upu deiki di pepdareidi, yambulanun kikiman podanmarei.

5 Yakub cap, Allah er pel dona ngebo malikat cap pangdanmareianen, Yakubdi amalaikat talepdongopraudi bisbisa kapu. Ukupu dinin, Yakubda engenmaudi, amalaikat tep, ‘Uo, kandi ne tep pio melipnetumdi, pio telep keca ton dopra, ne deiki deipkamnerume,’ pepra moronapu kunmau. Moronapu kunmaupa, amenda taruda Allah Yahwehdi Betel mutu neitamaida, Yakub er damai yaudi, er cap kikiman upu talepmarei. 6 Allahdi Yakub tep pepu upuda adano. Ne Allah, ne si sisada Yahweh kunune. Neda akeca-keca yuma talepra, deiki tara erepra, ila puto kunune. Neda, im deiki kunge jen talena malaikat yumada, sun deiyo ngebo kunune. Ne si sisada, Allah Yahweh kunune.

7 Ange tep nengeda, sun Yakubdi deiamupa, dadeipdanen yakarum nesalao, sunda sun nai bo Allah tepapu, teka teneprumudi, ne damaipu tamupra yankamrume. Tonda sun gam pio kunkamrum taruda, tamna gum dipapu, pio bicau tenedanapu kumumdi, dumsisi kuna ngepu talepra telep kecapu kunkamrume. Tonda, bouna dipapu dim pepra kuramrumupanen, ‘Nun nai bo Allah dipapu, ware pepkamser do? Ware kupkamser do?’ tenen, er tepapu teka tenepra, dinapu kunkamrume.

Amenda taru telepe pena ngeda, ‘Israel nesala wenepkamne,’ pepu upu

8 Allah Yahwehdi sun Yakub yala nesala tep pepu. “Sunda, Kanaan tara nesaladi tali inipra bung keca deripnedi, upula dororamitopu, sun peda ukurume. Ada, ‘Abung kecada ware kuprap kilo kurur do?’ tenen, sun ikin kunumpeten keca, er si timbangan doupra dipetepmumdi, mok upupu perume. Ada, nimidi, ‘Nun bung keca kunupkamepe’ tenen, sun damai yangopda, sundi sun bung keca deiamrumnyai yana kunumamre ngebo tep, tali upu deiki di, ‘Er ikinda ake. Atep, co boda, ukuprappu karepkunerume,’ pepra, mok upupu peptapra, tek sisi upuda er damai men perume. Ukumumnya deiki di, yuk neng tep ikin keca sun nong deiki derirume.

9 Sun Israel tara kurum nesaladi perum upuda, ake. “Ukutaruda nunda isomka neng konum kunupe. Tonda, nun pedipapu, aco bo weik bulupra deriramupupanen, ukutaru konum weik kupsere! Tonda, nimi tenpu ngebo peda ton yatudi, ‘Sunda tali upu peruma deiki di, isomka neng kupmarume!’ pepra, men wenepra pepsetenge. Tenpu ngebo peda, ‘Sunda mali kunmaruma deiki di, co bo weik dororume,’ men pepsetenge. Nunda, tenpu mali kunange peda men kupmepu,” perume.

10 Ukupra perum dinino, ne Allah Yahwehda, sun nai bo Allah kunune. Sundi ne sipu eremnerume. Ukununa cadi, lumdongona gume. Ne dipapu sunda Mesir mutu neitamai ikin kange doupra kuramrum taru neitamaida, nedi sun loptapra duyanamsisi. Ada, nedi sun apu yapu tep, ‘Ila mambul tumida ake. Ne si eremna tep, awar neitamaida, atanggal deiki di, ila kailya kalepra kunkamrum tumida, ake, ake,’ pepra, lap pemsisi.

Ataruda, sunda tali keana opkal bol tenda ati pumbonpu kuramrume. Moupra tenepso! Neda puto weik ngebo cadi, ukutaru telep ati dopra kurum dinino, sunda menop taruda, keana tep tali opkal bol ati, er si tenda ati, kuramrum utopu, kange di ton cap, akatipu dongopsetene.

11 Tonda, pumun taruda, ne dipapu sun nabi-nabi neng tep yana, ‘Ukupkamrume, upepkamrume,’ pepra lap pepsi. Tonda, ken deiki di katuai kemderinange peda, pio weika di sun nabi neng tep kareamsi. Ukupsa cadi, ukutaru peda, nabi neng damai tep, ‘Ukupkamne-ukupkamne,’ pepra, lap pepne pangeda, sundi amenda taru ila kange mun kupkamrenge yuma tep, yana lap pepnepa, sun nabi-nabi neng gekepmengedi, ne nyapu sisa, sun Israel nesala tep lap penkamsenge.

12 Ukunun dinino, tupa ange yuma moupra gekena gum dipapu, Gilead mutu neitamaida, pio mali kun keca tupa talengedi, kununge. Tonda, ila ati arum sida, Gilgal mutu neitamai kunge nesalada, isok si eremna tep, tupa mesba deiki sapi bisam popra, yana uku dongopra gispal donunge.

Ukupra tupa kunung dinino, Gilgal mutu neitamai, pala gel dopra, taplakra deiamidi, gam keca popnedi, uku dongona tep, mesba-mesba doaminge yumada, uruptapnepa, agelda nimidi wa tu pepmengai pirman tarada, agel tu deiki tali deiptapmengedi, tu di singiptapmengepa, talipu kupkamre.

13 Yakubda, ‘Ne dubo Esaudi popnerur’ tenen, sun kuramrei mutu tapra, sepdaro Mesopotamia ^{▼▼Mesopotamia – Amutu sida, ‘Aram mutu’ ton perami. Ukutaruda, Mesopotamia mutu penupe. Atep, yuk nengdi seki Allah upu buku neitamaida, ‘Aram’ pepra seki. Dinino, atara mutuda, tenpua.} (Aram) mutu benamu. Tonda, Aram tara neitamaida, ‘Ner doptene’ tenen, amutu neitamai Yakubdi ^{▼▼Yakub – Angebo Yakubda, Allahdi ukupu si ton kareamupa, er si tep, ‘Israel’ si siperami. Ton Allah upu buku neitamaida, ‘Yakub’ pepra sengnunge, ton ngeda, Israel sengnunge. Dinino, angeboda, er tenpua.} domba bisam peina tep pel talepra doramudi, domba bisam peiramnganen, siryada, amutu ner dopu.

14 Yakubdi deiamupa, dadeipdanen barami nengda, Mesir mutu bena kurami. Dakuramipanen, Allah Yahwehdi nabi ngebo tenpu, er si Musa doproiamupa, Israel nesala loptapra dubana tep, sun Israel nesala Mesir mutu neitamai bena, Mesir mutu di tapra kange di tamupra sun pe mutu sisa benami. Tonda, ataru neitamaida, sun Israel nesala moupra kalengna tep, anabi Musa ketenepra deipudi, wepra deiamupa, Israel nesala kalekra melimamu.

15 Allahdi ukuramu dinino, ukutaruda, sun Israel ^{▼▼Israel – Anesalada, sun apubo Yakubdi nyapu 12 deiamupa, sundi dadeipdanen yakarami nesala yuma tep, ‘Israel nesala’ pepu. Ada, menop taru, Allahdi Yakub tep ukupu si karepupa, angebo er pe si tep ‘Israel’ ton si siperami. Tonda, Yakub erdi gerekdanen yakarami yala nesala yuma tep nengeda, ‘Israel nesala’ perami. Dinino, sun yumada, tenpu yala nesala pua. Dinino, Israel yala nesaladi, ‘Nun songe,’ tenepdarami taruda, bokdaramidi, yuk-yuk bena kurami. Sun iknapi dam tara kurami nesala tep, ‘Yehuda tara nesala’ perami. Dapu tara (selatan) kurami nesala tep nengeda, ‘Efraim tara nesala’ perami. Yuk Allah upu buku neitamaida, akayat neitamaida, ‘Yakub’ pepra seki. Yuk bukuda, ‘Israel’ pepra seki dinin, angeboda tenpua. Angetopu, ton buku neitamai, ‘Efraim’ pepra seki ngeda, ton buku neitamaida, ‘Israel’ pepra sengnung dinin, ayala nesalada tenpu kununge.} nesalada, mali-mali pio weik kuramya tep, Allah Yahweh yu weik kupupa, erdi sun tep wenepkamre ja.

Ada, sun Israel nesaladi, mali-mali weik kuraminge cap, ‘Erda nun songe,’ peraminge cap, ‘Yu nengdi yana popsenung’ tenen, ‘Allah dipapu men kaleksetua cadi, yuk mutu nesala moropmepepa, sun dipapu melipra kalengkamsenge’ tenen, Allah tep mali upu pepra, nalemaminge cap tep, Allah Yahwehdi sun Israel nesala tep, menenga keca karepredi, ila di wenepkamre ja!