Hos 13 | XteSC | STEP | Pumun taru, sun Efraim yala nesala telep kupra kuramidi, puto weik nesala kuramya cadi, ila upu peramipa, sun yuk mutu nesaladi, kwar weik kuramu. Dinino, sun Efraim yala nesala yumadi, isok Bahal er sipu eremamya deiki di, mali weik kurami. Atep nengeda, ukutaru konum denung nesala utopu kununge.

Hosea 13

Allah er yu Israel nesala deiki deipkamunge tep, pepu upu

1 Pumun taru, sun Efraim yala nesala telep kupra kuramidi, puto weik nesala kuramya cadi, ila upu peramipa, sun yuk mutu nesaladi, kwar weik kuramu. Dinino, sun Efraim yala nesala yumadi, isok Bahal er sipu eremamya deiki di, mali weik kurami. Atep nengeda, ukutaru konum denung nesala utopu kununge.

2 Sun Efraim yala nesala yumadi, tupa-tupa mali kecapu talepra kununge. Ukutaru peda, tupa malipu kununge. Ada, sun Efraim yala nesaladi, sun buru deiki di dengameng kunumna weik keca, er sida perak dopra, sun tenepmenge keca ketenepra deipmengedi, “Nun nai bo ake,” pepra si eremengedi, atali keca gispal dona tep, gam keca popra uku dongonunge.

Ukupra kungepa, yuk mutu nesaladi, sun Efraim yala nesala kunge keca tep epmengedi, ‘Uo, sun anesalada, tali keca tepapu, “Nun nai bo ake,” pepra, si eremengedi, sapi bisam urasin utopu keca petupra deipmengedi, akeca gispal dona tep, mutununge. Tonda, sun isok si eremnung keca karena tep, sundi yuk neng poprapmengedi, aisok-isok si eremna tep karerbanunge,’ tenenkamenge.

3 Ange tep nengeda, sun ukupra pio malipu kunung nesalada, ipna taru tu puto weleramredi, gum kupbaramretopu kunkamenge. Ukupmantoda, bererengna taruda, mo pen mutmuta deiki palepmarya, menmena gum kupbaramretopu, anesala peda menmena gum kupbankamenge. Tonda, ila kumanya puto yaredi, koluamre co bo cap, buta cap, tonda gandum bam lartamamenge nge cap yumada, pung peprepa doupra berepa, ket bungtamamretopu, Allahdi sun wenemna tep, gum kupra deipbankamsere. Tonda, uku sekmengepa, uku bu jenmaryane, ket welepredi, jendela bisi bon di ket puksakredi gum kuramretopu, kupkamenge. Ange utopu, Allahdi sun anesala wenemna tep, gum kupra deipkamre.

4 Allahdi pepu. Neda, sun nai bo Allah Yahweh kunune. Sunda, Mesir mutu neitamai, pio ikin kange doupra kuramrumpane, nedi lyepromsisidi, doupra telep mutu yana deiamsisi. Atep nengeda, sundi, ‘Allah ton yuk dakurure,’ tenepra men kunkamrume. Yuk tali keca yala-yala yuma tep, si men eremkamrume. Ne sun nai Allahda, ne tenpu kunedi lyemdisenune. Sundi yuk tali keca tep, ‘Nun Lyemna Deiyo Ngebo akurure,’ pepra pio men penkamrume. Tek sisi Lyemna Deiyo Ngeboda ne tenpua. Allahdi pepu.

5 Tonda sun yumada, me pio gumai tep, nimi men kunge mutu, katuai mali mutu neitamai kuramrum taruda, ne dipapu sun tep konum kael keamsidi melimamsisi. Bupu pio weik kuramu mutu neitamaida, ‘Ne mawa nesala depnung’ tenen, nedipu sun tep kalekra melimamsisi.

6 Pio mali mutu neitamai kuramrumdi, ikin weik kuramrum dinin, ne dipapu sun putaramseutopu, nedi sun jen keca weika di doupra kareramsisi. Kareramsisipa, akeca dopra jeramrumpa, bouramseu. Jen keca jeramrumpa, bouramseu taruda, kange di ton cap sun pedipapu dipru erepdaramrumdi, gemepra sal nong-nong kuramrume. Sal nong-nong kuramrum taruda, ne si yanirtamamnerumdi, ne tep lumdongoramnerume.

7 Ange tep nengeda, sun kapul men tenepmarumu taru dipapu, menmena sun kori yana wenepra popkamsene. Ukupmantoda, bura dumre kam utopu keca, er si singa pus cap, tonda akeca utopu dinin, er potong mirin nge, er sida macan tutul capdi, tali dakuramre keca mangkau kange doupra embarepa, ayu pus butene di, akeca menmena popra jeramretopu, nedi, ange utopu kupra, sun Israel nesala damai yanyopda, sun embankamrum bisi neitamai di, sun men tenepmarumu taru wenepra popkamsene.

8 Tonda ukupmanto, bura tara kure keca, ila dumre kam utopu dinin, er nong ila weiknge, er sida beruang. Nernge er deipu nyapu yawaraprepa, pio yu deipra eramyane, nimi epredi, adipapu popra jeredi, bululukra tamamretopu, ne Allahdi sun tep, yu kupnerepa, ila di wenepra popkamsene. Tonda, ukupmantonge ton, bura tara kuramre yu pus utopu keca, er si singa pusdi tali bura kuramre keca popredi, gulyakra jepredi, sesekra tamamretopu, ne yu kupnerepa, nedi sun tep wenepra popkamsene.

9 Ukupkamsena tep nengeda, sun Israel nesala yumadi, moupra tenenkamrume. Uo, Israel nesalao, nedi sun yuma yana popkamsen taruda, ware nengdi ton sun tep, yana melipkamseng do? Gume, yuk nesaladi, sun tep men melipsetenge. Wenepra popkamsenada, tali tep gume. Deiyoda, nedi sun tep weika di melimamsisi dinin, sundi ne tep yanitamnerumdi, ne pesene upu men gekeneruma tep, nedi wenepra popkamsene.

10 Wenepkamsen taruda, sundi sun mutu ila kurami nimi deiyo Raja neng cap, tonda “Ukupkupe,” pepra, upu pena deiyo neng cap, sun damai berumudi, “Uo, nun nai yapu nun tep lyepseso,” pepra perbemumdi, moronkamrum dinin, adeiyo nengdi gekenkamseng do? Gume, sun gekepsenga peda, anengdi sun tep, men melipra lyepkamsenge.

Pumun taruda, sundi ne tamamnerumdi, “Nun ila nimi deiyo Raja kunkamre ngebo cap, nun kalengna deiyo neng cap, nun tep, ‘Ukunkamrume,’ pepra, upu pena deiyo neng cap, sun aneng yumadi, ‘Nun ila nimi deiyo neng kunkamseng’ tenen,” pepra, ne tep mororamnerume. Ada sundi, ‘Uo naio, ila nimi deiyo neng kunkamseng’ tenen, “Ila neng ton wepra deipseso,” pepra mororamnerume. Atep nengeda, sun ila nimi deiyo talepra, Raja kure ngeboda, dan cei kurur do? Er dipapu lyepkamser do?

11 Sundi ne tep, “Kan dipapu men talenkamserume. Yuk neng ton wepra deipsemempa, anengdi nun ila nimi deiyo neng kepra talenkamsenge,” pepra, mororamneruma tep, ne yu pio weik kupneua deiki di, ila nimi deiyo ngebo, Raja wepra deipsisi. Sun cap, er cap dakuramrumpane, ne tenemsi taru konum kupupa, aila nimi deiyo ngebo Raja, ka di tamupra dopropsi. Allahdi Israel yala nesala yuma tep pepu.

12 Aupu pepu dingeda, aupu ton cap pepu. Allah Yahwehdi pepu. Efraim yala nesala, sun mali kunge kecada, nedi surat sekrapnedi, getepra derinune. Sun mali kurumnge yumada, men lumdongonune. Tupa tenenapu kunune. 13 Uo, sun Israel nesalao. Sun gam tupa kumum taruda, ‘Ne damai tamupra yankamneng’ tenen, go weika di karesenepane, sundi ne damai yakana gum di, tali kange doupra kurume.

Tupa walwalpu kuruma tep, ‘Ataruda go akapmasera cadi, nun mali kunup keca yuma tapra, Allah er damai tamupra benkupe,’ tenepra men kurume. Ukupmantoda, nerapu mundu douamenganen, mi konum deipmanto kupre taruda, er nin mundu pumbon di men gupsakre taru, kange mun kuramretopu kunkamrume. Sunda, pio walwal metek nyapu utopu kuruma tep, pepsene.

14 Sunda, pio mali-malipu kurum nesala tep, ‘Anesala depmengepa, tu pumbon peipnung’ tenen, nedi sun tep lyepropkamsen do, gum do? Gume, nedi amali kumum nesala tep, men lyepropkamsene. Sunda, tuai mutu nimi denung nesala kungaipu bena talepra kunkamrume. Uo, pu jena keca weika di belepredi, jeramrepane, nesala weika di denkamenge. Tonda, nedi amutu yumada, poprapnedi yawa poptapnepa, depkamrume. Depmumpa, peipsengopda, sun nongda lyupkamsere. Tek sisi, sun mali kurum nesala tep nengeda, nedi sun tep bicau pio men tenenkamsene. Wenemna kecapu karenkamsene.

15 Kange mun keca, sun nong deiki derinkamsenada ake. Yuk Israel nesala yala-yala yuma, yambula di telep kurami dinin, sunda Efraim yala nesala yumada, pio teleppu kuramrume. Ukupra kuramumpane, ne Allah Yahweh keteng yakan tara di, ila bupu kumanya puto doproipkamne. Adoproipkamne kumanya puto di katuai mutu di, yana pung peprepa, sun talepra kurumu mutu neitamai kapu me bungna cap, amutu kwamu me mokon cap, tonda sundi, ‘Me mokon deipkamser’ tenen, sun dipu tu paliramrum bon cap yumada, me mokon ceproprepa, me gum kupbankamre.

Tonda, sun mutu neitamai di, ‘Nun kunumna weik kecada, akati pumbon dongopra deipmepepa, yu nengdi men yana dalupra dopropsetenge’ tenen, doramrum ati yuma cap, akati neitamai deriramrum keca yala-yala yuma capda, nedi go karepnepa, yu nesala yangedi, akeca yuma upula dopropmenga di, gum kupra deipkamne. Ange yuma gum kupra derinkamne taruda, sun mambul keca, kunumna weik keca tenpunge peda, pio men tapkamne. Ange yuma gum kupra deipkamne.

16 Allah Yahwehdi, sun Samaria tara neitamai kurami nesala yuma tep pepu. “Samaria tara kunge nesala wenepkamna deiyoda, sundi ne Allah tep, ‘Nun songe’ tenen, balila kupra, mali-mali weik kuramidi tamamneia tep, amenda taru ila di wenepkamsene. Ada, go karepnepa, yu nesala sun damai mar poryankamengedi, anesala weika di poptapkamenge. Ada amutu kunge nesala yuma cap, sundi derinkameng nyapu yuma capda popkamne.

Ukupkamne taruda, go karepnepa, yuk mutu yu nesala yangedi, mar popbisipmenge taruda, mundu douamenge nerapu yumada, sun mundu popra diktapmengepa, depkamenge. Gam tupa kunmange nyapu yumada, sun yan bulbul talepra gel deiki tapmengepa, depkamenge,” Allahdi pepu.