Hos 14 | XteSC | STEP | Uo Israel nesalao, sun mali kumum keca weik kupseunge yumada, tapmumdi, Allah Yahweh er damaipu tamupra yakankurume. Ada, “Sun mali kumum keca kunumna tep popkamsere,” pepsene.

Hosea 14

Allahdi Israel nesala tep, “Sun mali kurumu keca tapmumdi, ne damai kange di ton cap tamupra yamumnyopda, nedi telep kudinkamsene,” pepu upu

1 Uo Israel nesalao, sun mali kumum keca weik kupseunge yumada, tapmumdi, Allah Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} er damaipu tamupra yakankurume. Ada, “Sun mali kumum keca kunumna tep popkamsere,” pepsene. 2 Tonda, Allah er damai tamupra yamumdi, sun kange mun kusere keca yuma doupra, Allah tep moronkamrume. Moronkamrum ngeda ake.

“Uo, nun nai Allah, ‘Nundi kan tep moropkukep upuda gekepsetume’ tenen, moropkepe. Ada, nun mali kupe keca cap, tenepe keca cap yumada, ‘Kandi kaukepsememdi, nun mali kun keca gum kupra deipsememnyopda, nun tep telep kupra deipkamserem’ tenen, moropkepe. Ukupra telep kudisememnyopda, nun yumadi kange di ton cap, kan sipu eremkamkepe. Angeda, pedina upu deiki pepkepetopu, tek sisi kunkamepe.

3 Ukutaruda, nun konum kael kepmape. Asyur mutu jen talen nengdi, nun tep men lyepropkamsenge. Tonda, nun kuda bisam bali deiki bukra embapenge peda, ange puto di men lyepdatepe. Tonda, pumun taruda, nun pe buru di petupra deiamepu keca tep, ‘Nun nai yapu ake,’ pepra, tali keca tep si eremamepu dinino, amenda dorkunkamre taruda, ange ka di ton cap pio men kunkamepe. Angeda konum tapmepe. Ada tali tep men pepmepe. Nun nai Allah kan dipapu, mutu-mutu yuma dakunge nesala yuma cap, lyan nyapu yuma cap, bicau tenesememdi melimserume. Atep, nun melipmanto ngebo ton men kurure, kan tenpua kurume.”

“Upepra moronkamrume.” Hoseadi Israel nesala tep pepu.

Allahdi Israel nesala tep, “Amenda taru pio telep kupra kudinkamsene,” pepu upu

4 Allahdi Israel nesala tep pepu.

Neda sun Israel yala nesala yuma tep, tupa bicau tenenuna cadi, ka di tamupra dopropsenedi, sun mali kunge keca gum kupra deipnedi, ka di tamupra telep kupra kudinkamsene. Sun anesaladi, tupa-tupa mali kuramipa, sun tep yu kupneu dinino, ukutaruda, ange tapnedi, ne kange dipapu bicau tenepnedi, sun tep pio melimkamsene. Sun mali kun kecada, gum kupra deipnedi, anesala tep bicau tenenuna cadi, ka di ton cap, telep kudinkamsene.

5 Ange tep nengeda, amenda taruda, nedi sun Israel yala nesala tep, ka di tamupra telep kweipkamsene. Ukupmanto, tuai gelal semrepa dakwamya, mo ceprepa, mo puru sakredi, pen paleprepa, ka di ton telep kuramretopu, nedi sun Israel nesala tep, telep kupra deipnepa, teleppu kunkamenge. Ukupmantoda, mo weik cepredi, bunga kait poprepa, telep kuramretopu, nedi melimsenepa, teleppu kunkamenge. Tonda, Libanon mutu neitamai cemara co tekredi, yaten tu pumbon wekrepa, puto di tengamretopu, teleppu kunkamenge.

6 Sun anesala yumada, gampu kungedi dadeipdanen, baramengepa, nesala gung weik kupbankamenge. Ukupmantoda, nimidi wa pepra koun keca koupmengepa, bongopredi beleka embaredi paramretopu, anesala peda, gung weik kupbankamenge. Tonda, zaitun co pendu likredi, urasin pio telep kuramretopu kunkamenge. Tonda, Libanon mutu cemara co nintong telep peramretopu, teleppu kunkamenge.

7 Anesala yuma, tamupra ne damaipu wengyangopda, nedi sun tep moupra kaleknedi melimnepa, sunda tali kange deipra, dimpepra kunkamenge. Nedi sun tep melimkamna deiki di, menmena isomka nesala kupbankamenge.

Ukupmantoda, tu telepai jagung utopu keca, er sida gandum bolokmengepa, weik kuramretopu, nesala gung weik kupbankamenge. Tonda, anggur tapu du tu telepai di wa pepra bolokmengepa, ila di nepredi, du weik mouramretopu, Israel nesala peda telep kupbankamenge. Ukupmantoda, Libanon mutu anggur tapu du purupmengepa, anggur me gwepra jerameng ngeda, pio telep kuprepa, yuk mutu nesala yuma jepetepmengedi, “Uo, amutu anggur meda, pio telepnge,” peramengtopu, anesala konum telep kupra deipnepa, telep kunkameng taruda, yuk mutu nesala yumadi, sun tep kael kepmengedi, “Uo, sunda pio telep nesala kununge,” pepra, sun tep gispal donkamenge.

8 Atep nengeda, sun Israel nesala tep pepsene. Sundi tali keca ketenepra deiamrumdi, akeca sipu eremamrum ngeda, tapkamrume. Atali keca di, sun tep men melipsetenge dinino, ne dipapu sun putare keca yuma melipra karesenune. Ukupmantoda, kwarang co tekredi, bo telep doupra sukup-sukup peramretopu ngeboda, nepu kunune. Tonda, lemon co du aketeng tamun, aketeng tamun du mounapu kuramretopu, nedi sun tep telep kupra kudinkamsene. Atep, nedi sun tep melimkamne. Ukunkamna cadi, anesala sundi ne tep, ‘Er dipapu akeca-keca yumada, Allah dipapu melimkamsere’ tenen, ne sipu eremkamnerume. Ne Allah Yahwehdi pepsene.

9 Ware nesala do yuma, sun ila kael kemenge nesala cap, akeca yuma ila kael di nong neitamainge peda, betapra kael kemenge nesala cap, apepkusen upu konum moupra tenenunge. Ada, ne Allah Yahwehdi kunun keca yumada, pio dumsisipu kunune. Atep, ware nesala do yuma, ‘Nundi telep bisipu benkamepe’ tenen, putarepa, ne Allahdi, “Ange kunkamrume, angeda men kunkamrume. Telep kunada ake,” pepra, derisenun upu yumada, moupra talengedi, dombanunge.

Dinino, sun yuk nengda, balila weik kungedi, giso gat deipra kunge nesalada, ne pesene upu amul deikipu gekenung dinin, moupra men talenunge. Ukunung nesala yumada, kopdanen bangepa, dukpeprepa, sangamengtopu kupra sangnunge. Ne Allahdi tek sisi pepsene.