Hos 2 | XteSC | STEP | “Allahdi Israel nesala cap, Yehuda yala nesala cap yumada, tenpu mutupu dopra deiprepa, sun yumadi kikimanpu kunkamenge. Ada, sun pe weit yapu cap, sun du yapu cap tep, Ibrani upu deiki di, ‘Ammi’ penkamrume. Asi penkamruma deiyoda, ‘Allahdi anesalada, er nyapu sisa kununge,’ tenena tep penkamrume. Ange utopu, sun yumadi, sun weit nerapu cap, sun du nerapu cap tep, Ibrani upu deiki di, ‘Ruhamah,’ penkamrume. Asi penkamruma deiyoda, ‘Allahdi bicau tenerur nesala ace,’ tenena tep, asi penkamrume.” Nabi Hoseadi pepu.

Hosea 2

1 “Allahdi Israel nesala cap, Yehuda yala nesala cap yumada, tenpu mutupu dopra deiprepa, sun yumadi kikimanpu kunkamenge. Ada, sun pe weit yapu cap, sun du yapu cap tep, Ibrani upu deiki di, ‘Ammi’ penkamrume. Asi penkamruma deiyoda, ‘Allahdi anesalada, er nyapu sisa kununge,’ tenena tep penkamrume. Ange utopu, sun yumadi, sun weit nerapu cap, sun du nerapu cap tep, Ibrani upu deiki di, ‘Ruhamah,’ penkamrume. Asi penkamruma deiyoda, ‘Allahdi bicau tenerur nesala ace,’ tenena tep, asi penkamrume.” Nabi Hoseadi pepu.

Israel nesaladi mali-mali weik kuraminge tep, Allahdi wenepu upu

2 Ne nyapu Israel nesalao, sundi ne tamneruma tep, ukupmanto upu deiki di pepkusene. Ukutaruda, sunda ne ner utopu men kurume. Tonda, neda sun nenge gume. Atep nengeda, tali-tali nyangne nerapudi, ‘Urasin telep nerapu tenepsengedi, uo, anerapuda nyaktepe, tenenkamseng’ tenen, sun aso deiki kurun keca cap, bi keca cap likeipmengedi, telep opkal kenengamengtopu, sun Israel nesaladi, mali weik kurume. Tali-tali nyangne nerapudi, nimi yuk neng cap tali nyangdangedi, sun akenge yapu tamamengtopu, sundi mali kun kecapu tenepra kumumdi, ne tapra tali keca isok sipu, ‘Nun nai bo’ tenepra, eremrume. Atep, akumum keca yumada, tamkamrume.

3 Sun mali weik kumum keca yuma men taprumnyopda, ne Allahdi sun opkal kenengmumnge yuma kwiripropnepa, kapul deipsei taru bananga kuramrumtopu kupra kunkamrume. Tonda, nimi tenpu ngebo ton, me pio men kure mutu, katuai mutu gelal tuai neitamaipu kurepa, me putarya deiki di deramretopu, nedi sun tep tapsenedi, sun nong deiki ila ikin keca weik deipsenepa, tek sisi kange mun kange doupra kunkamrume.

4 Tonda, sundi derirum nyapu yuma tep nengeda, nedi, ‘Anyapuda, ne mawa nengpu kununge’ tenepra, pio bicau men tenenkamne. Anesala tapkamne. Sundi, yuk tali keca tep, ‘Nun nai bo,’ pepra si eremruma cadi, sundi derirum nyapuda, ne nyapu sisa men kununge. Sunda tali-tali nyangtamameng nerapudi derirameng nyapu utopu kunung nesala tep pepsene.

5 Ukupmantoda, “Anyapu yumada, tali nyangne nerapudi derirameng nyapu utopu kununge,” pepmasena deiyoda ake. Ada, sun tali-tali nyangtamenge nerapudi, ‘Mali kunmape,’ tenena gum dipapu, tali-tali kunge neng cap nyangdangedi, derirameng nyaputopu kurume. Tonda, anerapudi sun neng yapu tapmengedi, ‘Tali yuk neng cap nyangdapedi, anengdi co bo weik karepsengopda, aco bo deiki di, nun putaser keca kunumkamepe,’ tenenunge.

Ada, ‘Urasin pio telep kunumna weik opkal cap, domba bisam potong di deipra winung bupu opkal cap, jen keca cap, anggur me cap, zaitun co du minyak mokon cap kunupkamepe,’ tenepmengedi, ali dangna gum dipapu, mali weik kununge. Ukuramengtopu, sun Israel nesaladi, ne Allah tep, tamnemumdi, mali kurume.

6 Ange tep nengeda, ukupmantoda, nedi aner er ban bisi yumada, ila lyom beilya deiki tara takke keca deipra, ongopdongopnepa, erdi anerdi abisi ton pio men wekra bankamre. Nedi aner tep, kange wang-wang pena deiyo keca karepnepa, ‘Abisi benkamne,’ tenerur ngeda, men epmanto kupredi, yuk tali bisipu lerekra bankamre. 7 Ukupne pangeda, er mun peramre neng tep, ‘Antapdatepe’ tenen, dombenkamre dinin, pio men antamdankamenge. Tonda, anerdi pio pe deipra enkamre dinin, er mun peramre neng tep, pio men epkamre. Ukupre taruda, ‘Ne men di domsi ngebo er koripu tamupra benkune. Pumun taruda, ne nenge cap, kikiman teleppu kuramnemu dinin, ukutaruda ikinpu kununa cadi, ne men di domsi ngebo damaipu tamupra benkamne,’ tenenkamre.

8 Israel nesalada, atali-tali nyangne nerapu utopu kununge. Ada sundi, ‘Jen keca er sida gandum cap, anggur me cap, zaitun co du mokon cap, tonda kunumna pio weik keca emas cap, perak cap, pio weika di kareserur ngeboda, Allah dipapu kareserure,’ tenepra, pio men kunenunge. Ange betapra men tenenga deiki di, atelep keca yala-yala yuma dopra, tali isok Bahal, ^{▼▼Bahal sekmepu ngeda, yuk Alkitab neitamai huruf Baal sengnunge. Bahal sekmupka deiyoda, ‘Baal’ pepmengepa, lyom bal sisa tenepmengedi, walwal kuprur’ tenen, nundi asi tep ‘Bahal’ sekmupu. Si yuk sekmepu dinino er tenpua.} er si erepra gispal dona tep karerami. Aisokda, gam men kurur keca dinin, nimi buru deiki dipapu petupra deipmengedi, tali keca Bahal er si tepapu, ‘Nun nai bo,’ pepra eremengedi, ne Allah tep tamnengedi, ne si ton pio men eremnenunge.

9 Pumun taruda, akeca-keca yuma dopra, Israel nesala tep konum kareramsi dinin, sundi tamnenunga cadi, ukutaruda, akeca-keca yuma, gandum cap, anggur du cap, anggur tapu du mokon cap, akeca li taru neitamai kareramsinge yumada, tamupra dopropkamne. Tonda, ‘Sun nong bananga kupnung’ tenen, nedi domba bisam potong di deipra wiramenge opkal cap, kunumna weik telep kurun opkal, er si kain lenan cap yumada, tamupra doropnepa, sun kapul deipi taru bananga kuramitopu, kunkamenge.

10 Ukupmantoda, atali nyangamenge ner, er mun peramre neng wekmanga damai di, er kenengre opkal kwiriptapmengepa, er nong banangapu kuprepa, ali weik dangamretopu, nedi Israel nesala, sun damai telep kupra kure keca yuma, gum kupra deipkamne. Ukupkamne taruda, tenpu ngebo peda ton, balila deipra ne damai di, yana men dopropkamre. Israel nesala tep men lyeptenge.

11 Ange utopu, ne Allahdi sun Israel nesala mali kunge keca kunumna tep, ‘Ila tumi tenepra, kange deipra kunkameng’ tenen, kailya kalemna tep keteneipsipa, mambul pel yala-yala yuma donung ngeda, gum kupra deipkamne. Sun ila tumida ake. Keteng tamun ukupunge cap, war tengdongon taru cap yuma, ne Allah tep si eremengedi, tali pel dona gum di, beipye peingnung tumi cap, tonda menop taru di, ‘Sun ila tumi ake,’ pepra kareramsipa, ila tumi tenepra, ila kailya kalemnung tumi yuma capda, gum kupra deipkamne.

12 Tonda, anggur tapu du telep kupra mouramre wa tu cap, ara co kouramenge tu cap, yuk co du yala-yala telepnge paramre mutu yumada, gum kupra deipkamne. Ukupnepa, sun Israel nesaladi, ‘Gume nun mun penup nengdi kareramseinge ace,’ penung keca yala-yala yuma, ne Allahdi sun wenemna tep akeca yuma gum kupra deipkamne. Tek sisi, ne dipapu sun tep, atelep keca yuma kareramsisi dinin, sundi, ‘Gume, nun mun pedanup nengdi, akecada kareramsei,’ penunge. Atep aco palpal yuma, ne Allahdi mali kupra deipnedi, tali co palpal mutu utopu kupra deipnepa, bun papdongopkamre. Ukupnepa, sun Israel nesala ton pio men jenkamenge. Tali bura tara gam kure keca yala-yala yumadi, aco du yuma, jepra gawal dakamenge.

13 Ange yuma ukupkamna deiyoda, mesum tep men kupkamne. Ada, tumi-tumi yuma, gam kuna gum keca, isok Bahal er si tepapu, ‘Nun nai bo,’ pepra, si eremengedi, nintong telep keca duyangedi, uku dongopra, er sipu eremnunga tep wenepkamsene. Tonda, amol bon potokra dongorameng kweirya keca, er si anting-anting cap, tonda garangne keca kalung cap yuma, ‘Nun nong deiki kupmepedi, nun mun penup neng damai bepepa, urasin telep nerapu tenepkamseng’ tenen, ‘Nun mun pedanup neng dan do?’ tenen, pio erbanunga tep, Israel nesala wenepkamsene. Ada, isok Bahal er sipu eremengedi, ne Allah tep tamnenunga kunumna tep, ne Allah Yahwehdi wenepra popkamsene. Allahdi upeipupa, nabi Hosea gekepudi seku.

Allahdi Israel nesala tep, ‘Mali kunung dinin, tupa bicau tenesenune,’ pepu upu

14 Allah Yahwehdi pepu. Israel nesala, sun mali kununga tep, wenepra popkamsen dinin, ange konum kupnedi, tek sisi amenda taruda, nedi Israel nesala dopra, nimi men kunungai, katuai mutu doupra benedi, sun tep dipru telep kemdina upu pepkamsene. 15 Sun mali kunge keca kunumna tep konum wenepnedi, amenda taruda, nedi sun Israel nesala tep, anggur tapu du wa pen tu cap, du jena telep co paramre mutu yumada, nedi ka tamupra karepkamsene. Ukupkamna deiki di, Akhor mutu damaida ukupu buplan keipnepa, amutu tep tenepmengedi, ‘Uo, amenda taruda, teleppu kunkamepe,’ tenepmengedi, kange deipra kunkamenge.

Ada pumun taruda, mali kuramipa, Akhor ^{▼▼Akhor mutu – Pumun taruda, tenpu ngebo er si Akandi, Allah er mawa mem keca upula dopropu. Ukupka tep, amali kupunge kunumna tep, Allahdi Israel nesala yuma wenepu. Amutu si tep, Akhor mutu perami. Angeda, Yosua pasal 7 neitamai di epkamrume.} mutu neitamai, ila di wenepra popsisi dinin, amenda taruda, ka di tamupra, Akhor mutu telep kupra kweipkamne. Pumun taruda, Israel nesala kaber utopu kurami taruda, Mesir mutu neitamai pio ikin kuramipa, nedi lyepra loptapsipa, Mesir mutu di tapra bendopi taruda, Israel nesaladi, ‘Nun nai Allah, er sipu eremkamepe,’ tenepidi, sun kange dipru ne deikipu deipnei. Ukupra ne sipu eremamneitopu, amenda taru peda, ka tamupra ne damai yakangedi, telep kange doupra, ne sipu eremkamnenge.

16 Ataruda sundi ne tep, ‘Ne nenge,’ penkamnerume. Sundi ne tep, ‘Nun tep ikin pel karepnenge tep, ila pel dimserur ngebo,’ men penkamnerume. Ne Allah Yahwehdi pepsene. 17 Uo, ne nyapu Israel nesalao. Nedi melipsene pangeda, sundi isok Bahal er si eremna tep, sun buru di petupra derimum kecada, adipapu lupronkamrume. Bahal cap, yuk isok si cap eremum ngeda, nedi, ‘Sun sipyal deiki di akeca si ton cap men eremkameng’ tenen, asi gum kupra deipkamne. Ukupkamna deiki di, sundi aisok si ton cap men penkamrume.” Allahdi Israel nesala tep pepu.

18 Upepudi aupu ton dukdongopra pepu. “Ataruda, ‘Bura mutu co palpal kunung keca cap, ma im deiki langamrenge cap, tonda tuai kure keca yala-yala yumadi, ton men poryakankamseng’ tenen, nedi konum upu sekronkamne. Akeca yala-yala yumada, tali kange doupra kunkamenge. Tonda, sun tep yu tenepra poryanmanto nesala yumada, gum kupra deipkamne. Atep, sun mar cap, jen cap, parang ya cap, co takke cap yuma peda, gum kupra deipkamne. Akeca yuma gum kupkamre. Atep, sun Israel nesalada, ‘Ware mutu nesaladi yu tenepra poryankamseng do?’ pio men tenenkamrume. Telep kange doupra, teleppu kunkamrume.

19 Nedi sun doprapnedi, pio tep, ne ner utopu keipkamsene. Ada, nedi sun tep, tek sisi ner doramengtopu, telep keipkamsena deiki di, dumsisi kun kecapu kupra deipsenepa, teleppu kunkamrume. Tonda, nedi telep kupra deipkamsena deiki di, nimi yuk neng yuma tep, dumsisi upupu pepmengedi, tek sisipu upu bongdidankamenge. Mok upu pepra, minina upu cap yumada, gum kupkamre. Tonda, ne Allahdi, sun Israel nesala tep, pio bicau tenesenedi, tupa-tupa melimkamsene. Ange yumada, pio men gum kupkamre. Pio atep, teleppu kunkamrume. 20 Ne Allahdi sun tep, ne ner utopu kupra deipsenedi, tupa melimkamsene. Ukusenepa, sundi ne Allah Yahweh tep, tek sisi telep kupra, ne cap, ne kune keca cap tep, betapra kael kemkamnerume.” Allahdi Israel nesala tep pepu.

21 Upepudi, aupu ton dukdongopra pepu. “Ne Allahdi ne nyapu, sun Israel nesala tep, kange di lyepra dopropsenedi, telep kupra derinkamsen taruda, sun tuai mutu kumumdi, ne tep moronemum pangeda, ne im deiki kunedi gekenkamsene. Gekesenedi, im deiki dua kan-kan di, mo weik karepnepa, mo cepredi, tuai mutu sangkamre. Tuai mutu ban-ban yumada, tu gelal sepka tep, mo karenkamne. Ne Allah Yahwehdi pepsene,” pepu.

22 “Ne Allahdi mo karepne pangeda, tuai mutu kure keca yumada, gandum wa cap, jagung wa cap, pinas wa cap, anggur tapu du wa cap, zaitun co du wa cap, pena tep me putaretopu, weika di karenkamne. Mo karepnepa, tuai mutu yuma cap, tuai mutu kure keca yuma capdi, ‘Uo, tek sisi, nun nai bo Allahdi, gam kuna deiyo keca kareserure,’ tenenkamnenge. Tonda, ne Allahdi tenenetopu, tuai paramre keca yala-yala yuma kounune. Utopu, ne Allahdi yal keca yala-yala yuma gwekbanune. Atep, ‘Yisreel, ^{▼▼Yisreel – Ibrani upu deiki di, asi Yisreel perami upu deiyoda ake. Ada, ‘Allahdi yal keca yala-yala yuma gwekbarure,’ tenena tep, Yisreel si perami. Atep asi pepka deiyoda, ‘Allahdi Israel nesala dopra, telep kupra deipnepa, pio telep kupbankameng’ tenen, domon upu di, asi Yisreel pepu.} telepe,’ penkamenge.” Allahdi pepu.

23 Ukupmantoda, nimidi yal keca telepnge, tu telepai bolokmengepa, telep kupra bongoramretopu, ne Allahdi Israel nesala dopra, telep mutu neitamai deipnedi, pio telep kupra kalekra melimkamna deiki di, pio teleppu kunkamenge. Pumun taruda, Israel nesala tep, bicau tenena gum di tamamsidi, pio men meliamsa tep, nimi yuk neng yumadi Israel nesala tep, “Uo, Allahdi anesala bicau men tenerura cadi, sun tep, ‘Lo-Ruhama,’ penkamepe,” perami.

“Dinino, nedi Israel nesala ka di dopra, telep kupra deipnedi, sun tep, bicau tenenkamsene. Ange utopu, pumun taru Israel nesala tamamsipa, yuk nesala yumadi, sun tep, ‘Uo, anesalada, Allah er nyapu tek sisi men kununga cadi, asi Lo-Ami, perami.’

Pumun taru uperami dinin, amenda taru, ne Allahdi Israel nesala tep, “Tek sisi ukutaru, sunda ne nyapu sisa kurume,” penkamsene. Upesenepa, sun Israel nesaladi ne tep tamupra, “Tek sisi, Allah kanda, nun nai bo Allah kurume. Kan tenpu kuseruma tep, kan sipu pio eremkamkepe,” penkamnenge. Allahdi pepu.