Hos 3 | XteSC | STEP | Allah Yahwehdi ne Hosea tep upepneu. “Kan adipapu tamupra berume. Bememdi tali nyangdana tep putarepa, akeca tenenapu kurur ner, er kori bememdi, er tep kange deipmemdi, anerda kan ner kunkamra tep, dopkurume. Ukupkamrema deiyoda ake. Ada, ne Allah Yahwehdi sun Israel nesala tep, kange derinun dinin, Israel nesaladi ne upu moupra gekena gum di, balila deipra tamnengedi, tali keca tepapu, ‘Nun nai bo kuserure,’ pepra, isok sipu eremnunge. Atep, katuai kemna tep nengeda, kandi tali-tali nyangamenge ner dopkurume,” Allahdi ne Hosea tep peipneu.

Hosea 3

Hosea cap, er ner cap, kikiman dukdongopra kuna gum tep, pepu upu

1 Allah Yahwehdi ne Hosea tep upepneu. “Kan adipapu tamupra berume. Bememdi tali nyangdana tep putarepa, akeca tenenapu kurur ner, er kori bememdi, er tep kange deipmemdi, anerda kan ner kunkamra tep, dopkurume. Ukupkamrema deiyoda ake. Ada, ne Allah Yahwehdi sun Israel nesala tep, kange derinun dinin, Israel nesaladi ne upu moupra gekena gum di, balila deipra tamnengedi, tali keca tepapu, ‘Nun nai bo kuserure,’ pepra, isok sipu eremnunge. Atep, katuai kemna tep nengeda, kandi tali-tali nyangamenge ner dopkurume,” Allahdi ne Hosea tep peipneu.

2 Upeneu pangeda, nedi aner tep, kunumna weik gat keca, er si perak, lima belas (15) cap, tonda gandum ikin pio weiknge seratus lima puluh kilo (150) cap, anggur tapu du me purupra deipinge yambulanun cap, akeca deiki di aner tep bena kunupsi. 3 Ukupsidi nedi aner tep upepsi. “Kanda pio tep dimpepra, ne damaipu kunkamreme. Ataru yumada, men di tali-tali nyangamkeitopu, ton cap yuk nengda tenpu ngebo peda, ton cap men dopketenge. Tonda kikiman kunkamnem dinin, neda kan cap tonpa men maptenemnye. Yuk-yukpu mamkamneme,” pepsi.

4 Ange yuma, ukupsi ngeda, ada peten kemdina tep kupsi. Ukupsinge nong neitamai ngeda ake. Ada, sun Israel nesala, sun deiyo neng kungedi, ‘Ukupkurume,’ pena neng cap, ila nimi deiyo Raja neng cap, Israel nesala men talenkamenge. Ada keteng tamun denge weik neitamai di talipu kunkamenge. Tonda, ataru neitamai, sun mali keca daemna tep, gam keca popra, Allah damai karyakanung nge cap, Allah er si eremna ati pumbon wengbanai cap, Allah cap nimi cap antamdina pel dona deiyo neng cap, akeca yuma gum kupkamre. Israel nesalada, talipu kunkamenge. Tonda, tali keca tep, “Nun nai bo kuserure,” pepra, isok si eremna keca peda, men talenkamenge. Keteng tamun denge weik neitamai di, pio talipu kungedi, mambul kange doupra kunkamenge. Allahdi peipupa Hoseadi seku.

5 Ukupra dakuramenganen, doryankamre taruda, Israel nesala kange di tamupra, sun nai bo Allah Yahweh tepapu enkamenge. Ukupra engedi, Allah Yahweh er damai yana kunkamenge. Tonda, sun deiyo ngeboda Dauddi deipupa, dadeipdanen yakaramengepane, Allahdi nimi deiyo ngebo tenpu wepra deiprepa, ‘Angebo, nun ila nimi deiyo ngebo, Raja kunkamser’ tenen, er damai tamupra yakankamenge. Ukupmenge dingeda, sirya taru, sundi Allah tep kwar kuprepa, ‘Uo, nun nai bo Allah, erda ila mambul ngebo’ tenen, er amutara kunkamenge. Ukungedi, er sipu eremenge pangeda, Allah Yahwehdi akeca-keca yuma weika di yamupra, sun tep karenkamre. Ada sirya taru ukunkameng keca tep lap pepkene. Allahdi nabi Hosea tep lap pepra deipupa, Hoseadi seku.