Hos 4 | XteSC | STEP | Allah er si Yahwehdi, nabi Hosea tep lap peipupa, Hoseadi seku. Uo, sun Israel nesalada, Allah Yahwehdi pedisere upu moupra gekepkurume. Nun amutu nesala mali kunup ngeda, Allah er dipapu kael kemserura cadi, ukuda wenepkusere. Allahdi peipu upuda, nun ton moupra gekepmepedi, men dombanupa cadi, Allah er kure keca moupra men kael kemnupe. Tupa walwal nesalapu kunupe. Tonda, nundi yuk neng cap telep kupra kikiman men kunupe. Bicau men tenedanupa deiki di, amutu kunup nesalada, nun men di domupu nerapuda, deiyo men kwamupapu, nun tali kange doupra anerapu tapmepedi, yuk nerapu dodanupe.

Hosea 4

Allahdi imam-iman neng cap, yuk tali Israel nesala cap tep, “Sun yumada pio mali kurume,” pepu upu

1 Allah er si Yahwehdi, nabi Hosea tep lap peipupa, Hoseadi seku.

Uo, sun Israel nesalada, Allah Yahwehdi pedisere upu moupra gekepkurume. Nun amutu nesala mali kunup ngeda, Allah er dipapu kael kemserura cadi, ukuda wenepkusere. Allahdi peipu upuda, nun ton moupra gekepmepedi, men dombanupa cadi, Allah er kure keca moupra men kael kemnupe. Tupa walwal nesalapu kunupe. Tonda, nundi yuk neng cap telep kupra kikiman men kunupe. Bicau men tenedanupa deiki di, amutu kunup nesalada, nun men di domupu nerapuda, deiyo men kwamupapu, nun tali kange doupra anerapu tapmepedi, yuk nerapu dodanupe.

2 Tonda, dumsisi men kunupa tep, nun kunup kecada ake. ‘Ne kabo ikin kecapu doproptu’ tenen, widongodanapu kudanupe. Tonda, mok upu pena cap, nimi podana cap, upula dona cap, nun men di domupu nerapu tapra, yuk tali nerapu nyangdana cappu kunupe. Tonda, nun balila kupra, nimi podanapu kunupa deiki di, nimi mali kun kecada, pio weik kupredi, sun pe meneng yapipu dingdiramengtopu kungedi, podana weik kununge.

3 Amali kun keca weik kunupa tep, mali-mali kun keca pio weik tapakbarure. Adeiki di, nun mutu neitamai, akeca-keca yuma kounkamep keca yuma peda, pio men bongopseredi, gum kupbankamsere. Nundi wa pepra, yal keca kounup dinin, telep kupra men bongorure. Tonda, nun mutu tali gam kure keca cap, ma im deiki lakra embaramrenge cap, tonda amutu mokon pum neitamai kure mekina cap yumada, depra gawal dangbanmange. Ukupmenge pangeda, nun amutu kunup nesala yumada, akuprenge yuma dimepedi, mali kange doupra kunkamepe. Allahdi nun Israel nesala tep pepsere. Hoseadi peprapudi seku.

Allah Yahwehdi sun imam neng tep, wenepu upu

4 Allah Yahwehdi pepu. “Uo, sun imam-imam neng, ne mawa nesala tep mali kudina cap, deremna cap kunge keca yumada, nedi sun imam neng tep, nedi tamupra deremkamsene. Sundi ukurume. Yuk nengdi, nun tep, ‘Sun imam-iman nengda telep neng kununge, tenenkamseng’ tenen, sundi yuk neng tep, ‘Mali kurume,’ pepra, wenepmumdi, sun tep dipdongopra buru dupal comrume. Ukurumu ngeda pio gume. Tonda, sundi upeprume. ‘Israel nesaladi mali kunungada, nun deiyo gume. Ada sun pe yuk dipapu mali kununge,’ pepra, yuk neng tep men wenemkamrume. Tek sisi deiyo nengda, sun imam neng pua. Atep, ne sun tep yu kunerure.” Allahdi pepu.

5 Upepudi aupu ton dukdongopra pepu.

Sunda mali weik kupbarumnge kunumna tep nengeda, kange wang-wang pena deiyo keca karepkamsene. Ukupnepa, sun imam-imam nengdi komuni pe, lukunda pe telep kupra bisi men embankamrume. Sunda, kopdanen badenka, sun yan gel dukpeserepa, sangkamrume. Lukunda neitamai di bisi telep kupra eptumdi men embatumopda, sun mangkau di kwepdanen bandeka, sun yan gel dukamsere. Ange utopu, keteng komuni taru neitamai peda, sun imam-iman neng yuma peda, mangkau di kwepdanen bandeka, sun yan gel dukamserure.

Tonda, nedi ‘Upepkurume,’ men pepsisi dinin, sun pe kange dipapu, ‘Allah er upu lap pepra peteremkusepe,’ pepra, mok upu penung nabi neng peda, yan gel dukrepa sangamengtopu kunkamenge. Ada, ‘Tek sisi telep bisi bankamep ngeda ace,’ men tenepmanto kunkamenga tep pepsene. Sun mali kurumunge kunumna tep, Israel yala nesala yuma wenepra poptapnedi, gawal dakamsene.

6 Ne Allahdi weamsi nesala, ne nyapu sisa Israel nesalada, wenepra poptapkamne deiyoda ake. Sundi ne Allah kune keca cap, ne pesene upu cap, ne si cap kael kemna gum tepa. Israel nesaladi ne tep, tupa walwal kununga deiyoda, sun imam-imam neng tepa. Sunda ne si eremna ati pumbon pel dona deiyo neng kurum dinin, sundi, ne kune keca yuma kael kemna tep, ‘Akecada nun songe’ tenen, ‘Dabale,’ tenepra kuruma tep, sun Israel nesala disengedi, ‘Nabi nengdi kungetopu, nun peda kunkamepe’ tenen, sun peda pio malipu kununge. Ange tep nengeda, nedi sun imam-iman neng yuma tep, ‘Sunda, ne si eremna ati pumbon pel dona deiyo neng tek sisi men kunkamenge,’ tenepsenedi, sun tep konum tamkamsene.

7 Ne si eremna ati pumbon pel dona deiyo nengdi, mali kun keca weika di tapakra kupbanga deiki di, Israel yala nesalada, ne damai weika di mali weik kununge. Deiyoda, sun imam-imam neng dia. Israel nesala yumadi, mali kun keca weik kununga deiki di, tali keca isok er sipu eremnunge. Ada, isok er si eremnunga deiki di, ne tep tamnenunge. Sundi nyape deipmengedi, dadeipdanen, nimi gung weik kupbaramengtopu, sundi mali kun keca pio weik tapakra mali kupbanunge. Atep, neda telep kupra kune mambul ngebodi, ila dirin weik kunun dinin, sundi ne tep tamnenunga cadi, sun wenemna tep, nedi sun tep ila di kange deriramsi ngeda, tamupra tulum kupmanere. Allahdi pepu.

8 Upepudi aupu ton pepu. “Sun kaele. Ne nyapu sisa Israel nesaladi, mali kupmenge taruda, ‘Allahdi nun mali kun keca daepkamser’ tenen, gam keca duyangepa, sun imam nengdi akeca popra, ne karena tep uku dongorume. Ange tep nengeda, sun imam-iman nengdi, ‘Gume, Israel nesala mali kupmenge taruda, sun mali kunange kunumna tep, telep karen keca duyangepa, nundi akeca yuma bokra dopropmepedi, akecada nun ton dopra jenkamepe. Tonda, akeca bokra doropmepya deiki di, nunda isomka neng kunkamepa cadi, sun Israel nesaladi mali-mali keca weik kunungada dakwapye,’ tenerume.

9 Tonda, sunda ne si eremna ati pumbon pel dona deiyo neng, imam neng kurumu dinin, mali keca weik kuruma utopu, sun Israel nesala yuma peda, mali weik kununge. Ada mesum tep gume. Sun deiyo talepra peteremrumu neng mali kurumupa, yuk Israel nesaladi, sun imam neng epra kael kepmengedi, sun mali kurumutopu, sun talemum nesala peda mali kununge. Sun yuma utotopu, mali weik kuruma tep nengeda, sun imam neng pe, sun yuk dakunge Israel nesala yuma peda, ila di wenepra popkamsene.

10 Tonda Israel nesala, sun jen keca yumada jenkameng dinin, men bounkamre. Ukupmantoda, sun tali-talipu nyangdaramenge nerapuda, sun tali neng cap nyangdanunga deiki di, isomka weik kununge. Dinino, sun anerapuda, nyapu men deipmanto kuramengtopu, Israel yala nerapu yuma, sun nyapu ton men deipmanto kunkamenge. Ange yumada, mesum tep men kupkamre. Deiyoda, ne Allah Yahweh, sun nai bo kunun dinin, ne tep tamnengedi, tali keca tep, ‘Nun nai bo,’ pepra, tali keca isok er sipu eremnunge. Ukununga deiki di, ne pio yu kunerura cadi, sun tep wenepra tapkamsene.” Allahdi pepu.

Allah Yahwehdi tali keca tep, ‘Nun nai bo,’ pepra, si eremenge nesala tep, wenepkamre upu

11 Allah Yahweh upepudi, aupu ton cap dukdongopra pepu.

Uo, sun Israel nesala ne mawa neng yumada, kange yawaramamre me, anggur du mokon weika di jengepa, sun kange yawaraprepa, adeiki di, sun kange moupra men tenepmanto kununge. Sun telep kupra kuna kecada, tapmengedi, tali kange doupra kununge. Tonda, sun yumadi, ne Allah Yahweh tep, konum tamnengedi, yuk tali keca tep, ‘Nun nai bo ake,’ pepra, isok si eremnunge. Israel nesaladi, ne Allah tep tamnenunga cadi, ‘Tali nyangtamamenge nerapu nyangkamepe,’ tenepra, mali weik kununge.

12 Tonda ne nyapu sisa Israel nesala, sundi tali co tep asimnunge. “Uo, nun nai bo ware kupkamep do?” pepra asimpetenunge. Tonda, sun pe buru di petupra derinung keca, tali copu kurur dinin, aco tep, “Uo, nun nai bo, amenda taruda, wareto keca nun damai yana kunkamsere do? Nundi ware kunkamap do?” pepra asimpetenunge. Israel nesala yumadi, ‘Uo, nun nai bo ace’ tenen, pio putarepa tenenunga deiki di, pio walwal nesala kuramengtopu kupbanunge. Ukupmantoda, ‘Co bo doronkamep’ tenen, tali-tali nyangdange nerapudi, sun neng yapu tep tamamengtopu, Israel nesaladi ne Allahda, sun nai bo sisa utopu ngebo kunun dinin, sundi ne tep konum tamnenunge.

13 Ukupra isok si eremengedi, isok karena tep, gam keca cap, telep karen keca cap, dopra, bura mutu deiki cap, mutu buma deiki cap, dubena karemengedi, isok sipu eremnunge. Tonda ila co tekamredi, co bo pio weik kwamyai amutara, bo kunuk-kunuk peramyai bengedi, ‘Acada ila co tekamredi, telep kawai cadi, nun isok si eremna tep karenkamnupaida, amutupuda pio telepe,’ tenengedi, isok si erembanunge. Ukununga tep, ukupmantonge pepkusene. Israel nesala, sun ner nyapu yumadi, tali-talipu nyangdange nerapu utopu kununge. Tonda, sun yamal nerapu peda, sun men di domenge neng yapu yuma, tapmengedi tali yuk neng cap, nyangdanunge. Ada, sundi ne Allah tep tamnenunga tep pepsene.

14 Sun yamal nerapu tali nyangkameng nge cap, sun ner nyapu tali nyangkameng nge yuma tep, ne Allahdi sun yuma tep men wenepkamsene. Tonda, sun yamal nerapu peda, sun men di domenge neng yapu yuma, tapmengedi tali yuk neng cap, nyangdanunge. Ukupra mali kupmengopda, ne Allahdi sun yuma tep men wenepkamsene.

Sun mali kun keca tep, ila di wenepsetene dinin, anerapu yuma, sun nimi peda amali kun keca utopu kununge. Ada, sun peda yuk mutuda, tali nyangdaramenge nerapu cap, antamdanunge. Sun nimi peda, isok si eremenge ati damai kungedi nyangdaramenge nerapu cap kikiman manunge. Nedi sun tep ataru dipu men wenepra poptapkamsen dinino, sun yumada moupra tenenkamrume.

Uo, sun Israel nesala yumada, sundi, ‘Nun dabale, Allahdi kure keca cap, er cap, er upu capda, moupra men kael kemkamepe’ tenen, ne tep tamnerumdi, pio walwal nesalapu kurume. Ukuruma tep nengeda, sun pedi, sun pe tep, mali kudidarume. Amenda taruda, nedi sun wenepra poptapkamsene. Atep, sunda bicaue, pepsene. Allahdi Israel nesala tep pepu. Upepudi aupu ton pepu.

15 Uo, Israel nesaladi, mali-mali weik kunungada, sun Yehuda tara kurumu nesaladi, ange epra men kael kepkamrume. Ukupmantoda, nimidi sun men di domenge nerapu tapmengedi, tali nyangtamameng nerapu kunupmengedi, kikiman maramengtopu, sun Israel nesaladi, sun nai bo ne Allah tep tamnenunge. Dinino, sun Yudea tara kurumu nesaladi, ‘Nun peda utopu mali kun kecapu talepra kunkamepe’ tenen, Israel nesala kuramengtopu men kunkamrume. Sun Israel nesala kan-kan di, ton nengdi, “Allah er si eremna tep, telep karen keca karenkamepe,” pepra, tali upu peptapmengedi, Gilgal mutu cap, Bet-Awen mutu cap, embanung dinin, tek sisi ne si men eremnenunge.

Tek sisi mali kunungada, anengdi, ‘Isok si eremkamep’ tenen, amutu inipra embanunga cadi, sun Yehuda tara kurumu nesala cap, amali kun neng cap, amutu butene Gilgal mutu cap, Betel-Awen mutu cap, mutu deiki kikiman welerbana meme, pepsene. Tonda, sun mali weik kurumu nesaladi, ‘Yuk nengdi teka tenepkamseng’ tenen, “Allah Yahweh tek sisi, gam pio akunkamretopu, nundi tek sisi upu pepsepe,” perameng ngeda, sun yumadi ton cap, aupu men penkamnerume. Israel nesaladi mok upu pepra mali kununga utopu, ‘Sun Yehuda tara kurumu nesala peda, mali kuprum’ tenen, pepsene. Atep, sun anesala kungetopu, sun Yehuda tara nesala utopu men kunkamrume. Allahdi Yehuda tara nesala tep pepu. Upepudi apu ton dukdongopra pepu.

16 Uo, sun Israel nesalada, sapi bisam ner ngeda, kika deipra kuramretopu, pio balila weik nesala kununge. Sunda, ne upu pio men gekenenunge. Ukununga cadi, ne Allah Yahwehdi Israel nesala, sun wenemna tep, ukupkamne. Ukupmantoda, domba bisam peina deiyo nengdi, domba nyapu, ila pala mutu banai mutmuta telep kupra paramyai, tali deiptaprepa, bura yu kam do, singa pus do, adomba nyapu popmanto kuramretopu, ne Allahdi Israel nesala sun wenemna tep tapkamne. Deiyoda, sun Israel nesalada, kika deipra malipu kununga tep pepsene.

17 Nimidi sun men di domenge nerapu tapmengedi, yuk tali nyangtamameng nerapu kikiman maramengtopu, sun Efraim ^{▼▼Efraim – Ibrani upu deiki di, sun yala sida Efraim seki dinin, ada Israel yala nesala yuma tep tenepidi seki.} yala nesala yumadi tamnenunge. Sunda mali kecapu kungedi, ‘Isok sipu eremkamepe’ tenen, pio putarepa mali kununga tep, kaukeptapnepa, sunda isok sipu pio eremkamenge. Atep, sun Israel nesalada, makuna gume. ‘Sunda dakwapye’ tenen, kunkamrume.

18 Tonda, Israel neng cap, sun kayapu cap, tenpu kange doupra, anggur me yu di kange yawaramamrenge weika di jepmenge dingeda, sun kange yawaramamre. Yu me weik konum jepmenge dingeda, ‘Tali-tali nyangamenge nerapu, dan cei ton kunmang do?’ tenen, epra embanmanganen, epmengopda anerapu cap kikiman manunge. Amali kun kecada, pio putarepa, ‘Akupe ngeda, nun ali weik dangkamepe,’ pio men tenenunge. Tonda, ‘Teleppu kutepepa, yuk mutu nesala disengedi, Israel nesalada pio telep kupra kunung nesalada ace, tenepkamsenge,’ tenepra, pio men tenenunge. ‘Telep kunada dakwapye, mali kupmepedi ali dakmepya peda, ada mambule gume,’ tenenunge. Telep kun keca ton pio men kununge.

19 Sun Israel nesaladi pio malipu kungedi, isok si eremnunga tep nengeda, ne Allahdi, ila wenemna keca sun nong deiki deipkamne. Ukupmantoda, ila mungna puto embaredi pung peprepa, kalkal peramre co bo lakra badoramretopu, ne Allahdi sun Israel nesala tep, ila di wenepra poptapnedi gawal daknyopda, depkamenge. Sun cap, sun talenung keca cap yumada, gum kupra deipkamne. Sun depkameng taruda, sundi, ‘Uo, tali keca isok sipu eremamepunge tep, ukutaru Allahdi wenepra poptapmasere’ tenen, kael kepmengedi, sun anesala yuma ali weik dangkamenge. Dinino, ne Allahdi anesala tek sisi popnepa, nimi weika di depkamenge. Allahdi pepu.

Ada, Allah Yahwehdi nabi Hosea tep, aupu yuma lap peipupa, nabi Hoseadi aupu seku.