Hos 5 | XteSC | STEP | Allah Yahwehdi nabi Hosea tep lap peipupa, seku. Allahdi pepu. “Ne pepsen upuda moupra gekepso. Uo, sun Allah er si eremna ati pumbon pel dona deiyo neng, imam-imam neng yuma cap, Yakubdi deipupa, dadeipdanen bamumdi, sun Israel yala nesala talepra, ila deiyo kerum neng yuma capda, ange moupra gekepmumdi kunkamrume. Tonda, sun ila nimi deiyo ngebo Raja, er nyapsilip yumada, amul kinidongona gume, sun peda moupra gekepso. Amul pakra gekena telepe. Sundi Israel nesala tep, ‘Mispa mutu welepra bepedi, tali keca isok si erepmepyopda, ikin men kunkamsere. Kware tenena gume,’ peramumpa, sun Israel nesala gekeramidi, sun yumadi Mispa mutu cap, Tabor mutu cap, welepra isok si eremamrum taruda, pio mali weik kuramrume. Ukupmantoda, nimidi pena pepmengepa, youramretopu kupseu. Ange utopu ukupmantoda, nimidi, ‘Mekina wekrepa youpkamre’ tenen, jaring tapu deriramengtopu, sun imam nengdi Israel nesala tep, mekina youramre tapu utopu kupra konum kuprume. Ada, sundi gonga kepra mali kuramumpa, Israel nesala yuma peda, isok sipu eremamya tep pepsene. Amali kuraminge deiyoda, sun imam-imam neng dipapu mali kun keca deiyo keamruma tep pepsene.

Hosea 5

Allahdi Israel nesala, sun ila nimi deiyo talepra kurami nengdi mali kuraminge tep, pepu upu

1 Allah Yahwehdi nabi Hosea tep lap peipupa, seku. Allahdi pepu. “Ne pepsen upuda moupra gekepso. Uo, sun Allah er si eremna ati pumbon pel dona deiyo neng, imam-imam neng yuma cap, Yakubdi deipupa, dadeipdanen bamumdi, sun Israel yala nesala talepra, ila deiyo kerum neng yuma capda, ange moupra gekepmumdi kunkamrume.

Tonda, sun ila nimi deiyo ngebo Raja, er nyapsilip yumada, amul kinidongona gume, sun peda moupra gekepso. Amul pakra gekena telepe. Sundi Israel nesala tep, ‘Mispa mutu welepra bepedi, tali keca isok si erepmepyopda, ikin men kunkamsere. Kware tenena gume,’ peramumpa, sun Israel nesala gekeramidi, sun yumadi Mispa mutu cap, Tabor mutu cap, welepra isok si eremamrum taruda, pio mali weik kuramrume. Ukupmantoda, nimidi pena pepmengepa, youramretopu kupseu.

Ange utopu ukupmantoda, nimidi, ‘Mekina wekrepa youpkamre’ tenen, jaring tapu deriramengtopu, sun imam nengdi Israel nesala tep, mekina youramre tapu utopu kupra konum kuprume. Ada, sundi gonga kepra mali kuramumpa, Israel nesala yuma peda, isok sipu eremamya tep pepsene. Amali kuraminge deiyoda, sun imam-imam neng dipapu mali kun keca deiyo keamruma tep pepsene.

2 Ange utopu, Sitim mutu neitamai peda, sundi mali kuramrumpa, Israel nesala yuma peda mali kurami. Ukupmantoda, ada nimidi, ‘Nun podan neng mangkau di yakandenkapmengedi, abon saka dourbengepa popkamepe’ tenen, tu palipra ila kauru kemdiramengtopu kururume. Ange ukupra kumumnya deiki di, sun yumadi mali weik kumumnya kunumna tep, ne Allahdi sun yuma tep wenepra popkamsene.”

3 Neda Efraim ^{▼▼Efraim – Ibrani upu deiki di, yala si Efraim seki dinin, ada Israel yala nesala yuma tep tenepidi seki. Ton taruda Efraim sengnunge, ton taruda, Israel sengnunge, dinin, anesala sun yala tenpu. Ada Israel nesala Yeriko mutu dipra utara (arah utara) kurami nesala tep pepi.} yala nesaladi kunge keca yumada, ne kaele. Ada, Israel yala nesala yuma tep pepsene. Sundi ne tep tamnerumdi, isok sipu eremruma cadi, ukupmantoda, nerapudi sun neng yapu menmena domenge neng tapmengedi, tali-tali nyangne nerapu kemamengtopu kupra kuprume. Sun mali kunge kecada, ‘Nun nai bo Allahdi epra men kael kepkamsere,’ tenerami dinin, amali kun kecada men inipmanto. Ange yuma tek sisi ne Allahdi dinune. Sun Israel nesala yumada, mali weik kurumnya deiki di, sun pepu konum mali kudidaramruma cadi, ne damai men yanetume.

4 Sun mali kun keca weik kununga deiki di, ‘Nunda tamupra Allah Yahweh kan damai yankupe,’ pepra, yana men moropnetenge. Yana moropnetenga peda, ne men gekenkamsene. Ne damai tamupra men yatenge. Deiyoda, sun damaida sambala malingepu kurya deiki di, ‘Allah tep tapmepedi, nunda isok sipu talepra eremkamepe,’ tenena deiyo keca, sun dipru neitamai kurura tep, sundi ne Allah Yahweh kune keca cap, ne si cap, tonda ne upu cap, tenepra men kael kemnunge. Allahdi pepu.

5 Upepudi aupu ton pepu. “Tonda Israel nesala cap, Yehuda tara kunge nesala cap, sun yumadi sun pe dipru eremdangedi, ‘Nunda pio telep nesala kunupe,’ tenengedi, gemedanunge. Ukunungada, ne dinuna cadi, sun tep wenepkamsena deiyoda, konum katuai kurure. Dipru erepra gemenunga cadi, sun Israel nesala pe, Yehuda tara kunge nesala yuma peda, telep kupra men embanunge. Sunda, kopdanen bangepa, yan dukpepyopda, sangnunge.

6 Sun Yehuda tara nesala cap, Israel nesala capdi, ‘Nun nai bo Allah karenkamep’ tenen, sundi kambing cap, domba cap, sapi cap doupra, Allah karenai banunge. Sundi, ‘Agam keca yala-yala yuma popmepedi doupra, Allah Yahweh tep karepmepepa, erdi melimkamser’ tenen, karerbenkameng dinin, ne Allahdi, ‘Angeda telepe,’ tenepra men dinkamsene. Utopu, sundi ne men dinkamnerume. Sunda, ‘Allahdi lyepropkamser’ tenen, kange deipra pel donkamruma peda, ne kange men derinkamsene. Nedi sun yuma tep, konum tapsenedi, sun damaida pio men kunkamne. Gokropkamsene.”

7 “Sun Israel nesala cap, Yehuda tara kurum nesala cap, sun yumadi ne Allah Yahweh tep, kange deipra men kunemumdi, tamnerume. Tek sisi sundi dumsisipu men kurume. Sundi ne tep inimtamnemumdi, derirum nyapu yumada, tek sisi ne nyapu gume. ^{▼▼nyapu – Apepunge deiyoda ake. Sun Israel nesaladi, ‘Nyapu weik deiptepe’ tenerami taruda, Allah tep men mororami. Sundi, ‘Nun nai isok Bahal, er melipsetua deiki dipu, nyapu weik derinkamepe,’ teneramidi iniptapra kuramya tep, Allahdi, ‘Sundi deiprum nyapuda, nenge gume,’ pepu.} Ange tep nengeda, isok si eremengedi, war tengdongon taru, aisok tep ila kailya kalepra jeramengenge yumada, sun pepu mali kudinkamre. Ukutaruda, sun wenemna tep, sun cap, sun wa pen mutu tu cap yuma, mali kupra deipnedi, gum kupra dakamne.” Allahdi pepu.

Allahdi, “Yehuda yala neng cap, Israel neng cap tep, wenepkamne,” pepu upu

8 Ne Allahdi pepsene. “Israel nesala cap, Yehuda tara kunge nesala capdi, ‘Uo, ila ikin keca yankamsere’ tenen, kael kepmengedi, ‘Kware kunkameng’ tenen, Gibea mutu neitamai cap, Rama mutu neitamai cap, jem domba giso takke deiki di, bung-bung pena keteneipinge dopra, upu weika di pong pepkamrume. Tonda Bet-Awen mutu di, ‘Uo, nun popkamser keca yankure,’ pepmengedi ngolokra mali pepkamenge. Ngolokmenge pangeda, sun Benyamin yala nesalada, ‘Uo, ware keca yan popkuser do?’ tenen, sun kware weik kuprepa, ‘Dan tara di yana popkuser do?’ tenen, sundi amnyo tara taprapmumdi moupra dinkamrume.

9 Sun Efraim yala nesalada, sun wenemna tep, ila ikin keca sun nong deiki deipkamsene. Ada, sun wenemna tumi tep kupkamne. Sun mutu neitamai kumumdi, ati dopra kumumnyai yumada, walangapu kupkamre. Ada mesum tep men pepsene. Ne Allahdi peipsena cadi, sun Israel nesala yala-yala yuma tep penun upuda, tek sisi nong kupkamre.”

10 “Sun Yehuda tara kumumdi, ila deiyo talepra kurum nesala yumada, upula don neng utopu kurume. Ukupmantoda, ‘Nimi, yuk neng yangedi, nun wa tu upula dopropsenung’ tenen, gel do, co do, peten kemna keca deipmengepa, yuk neng yana epmengedi, ‘Atuda, metek kuptupa, nundi weik tara doproptepe’ tenen, apeten kemna keca dopra, yukai deriramengtopu, kurume. Atep, ne yu weik kunerura cadi, ila wenemna keca, sun nong deiki derinkamsene. Ukupmantoda, ila mau di me weik gwepmanga, adipapu dingtamamengtopu, sun wenemna keca tenpu taru dipapu, sun nong deiki yankamre.

11 Sun Efraim ^{▼▼Efraim – Acada Efraim seki dinin, ada Israel yala nesala tenena tep seki.} yala nesala yumada, ila di wenepnedi, popra gawal dakamsene. Ukune taruda, sundi mali pepra engenkamenge. Nedi wenepkamsena deiyoda, tali tep gume. Sundi balila kange doupra kungedi, tali keca, sun men melipmanto keca isok sipu eremnunga tepa. Nedi, ‘Angeda men kunkamrume, angeda meme,’ peramsisi dinin, sundi ne upu gekena gum dipapu, kika deipra mali kununge.”

12 “Ange tep nengeda, ne Allahdi Efraim yala nesala cap, Yehuda yala nesala cap tep mali kupra deipkamne. Ada, ukupmantoda, gam kuramre keca deprepa, lyuramre taruda, deibum yaredi, dudumeteprepra alyun keca jeramretopu, nedi Efraim yala nesala yuma tep, mali kudinkamsene. Ange utopu, nedi sun Yehuda yala nesala tep, boun co mo popredi, bul kuramyane, lyuprepa puto boun kuramretopu, nedi sun tep mali kudinkamsene.

13 Ukupmantoda, pu jeramre nesala cap, suse jeramre nesala cap, sun nong bol mali kuprepa, ‘Ware kwetena ngebodi melipsetu do?’ tenen, erbaramengtopu, sun Efraim tara nesala cap, Yehuda tara nesala capdi, sun mali kunge keca betapra tenepmengedi, ‘Uo, nun mali kunupa tep, Allahdi wenemna keca karepkusere’ tenen, kael kepmengedi, adipapu Asyur mutu mororbenkamenge. Bengedi, Asyur mutu ila nimi deiyo ngebo tep, ‘Uo naio, yuk mutu nengdi, nun poryankamsenga cadi, kandi kan mutu jen talen neng ton wepra deipsetumpa, lyepropkamsenge,’ pepra moropkamenge.”

“Upepra moropkameng dinino, ne Allahdi tek sisi pepsene. Asyur mutu jen talen neng cap, sun ila nimi deiyo ngebo cap tep, bena moroptuma peda, anengdi melipra men lyepropsetenge. Tonda pu cap, suse cap, jeramre nesala tep, kwetena walwal nengdi, moupra men kwetepmanto kuramengtopu, Asyur mutu nesaladi, sun tep pio telep kupra men melipsetenge.

14 Angeda, mesum tep men pepsene. Ukupmantoda, bura taru kure ila yu pus, er sida singa, akaber singa pusdi, tali gam kuramre keca poptapra jeramretopu, nedi sun yuma tep, wenepra popsenedi, gawal dakamsene. Ukupsenya deiki di, yuk karen mutu nesala tep go karepnepa, sun kori yana bisbisa kapsengedi, ateng koupra, sun pe mutu tamupra dubenkamsenge. ‘Ukunkameng’ tenen, ne Allahdi go karepnepa, yuk mutu nesala yumadi, sun tep yana men lyepsetenge. Nedi sun tapra mepropkamsen taruda, ne sun damai ton men kunkamne.”

15 “Anesala yuma tapnedi, ne kune mutupu tamupra benkamne. Sun tapra, ne kununai dakunkamne taru neitamai yumada, sun Israel nesala cap, Yehuda tara kunge nesala capdi, keteng tamun denge weik deiki di, ila kange mun kange doupra kunkamenge. Mambul kange doupra dakuramenganen, ka di ton cap moupra tenipetepmengedi, ‘Uo, tek sisi, nunda pio mali weik kuramepu. Amali kuramupunge kunumna tep, Allahdi walito ila di wenepseue,’ tenepmengedi, ila di kael kepkamenge.

Kael kepmengopda, sun yumadi, ‘Uo, nun nai bo Allah, dan cei kurur do? Allah epsetudi, melipra lyepropsetue’ tenen, pio pe deipra enkamnenge. Ila di kange mun kange doupra kunkameng taru neitamai di, ‘Uo nun nai bo Allah, kan dipapu nun tep kange deipra melipsetume. Tonda nun nai bo, kandi bicau tenepsememdi, nun mali kupe kecada, kaukepra lyepsetume,’ pepra, engena deiki di moronkamnenge.

Mali kange doupra engena deiki di, enkamnenga peda, ne ton pio men epkamnenge. Sun mali-mali kuraminge betapra tenepmengedi, ‘Tek sisi nun puda mali kuramupke’ tenen, kael kepmengedi, ne damai yana jenek kupra lap pepnetengopda, gekepra melipsetene. Gum dingeda, gume.” Allahdi pepu.