Hos 6 | XteSC | STEP | Nabi Hoseadi, sun Israel nesala tep pepu. Uda, ne kayapu neng, sun Israel nesala tep pepsene. Ukutaruda nun yumadi, nun mali kunup keca tapra, kange di tamupra, nun nai bo Allah Yahweh, er damaipu benkupe. Nun mali kunup keca wenemna tep, ila di wenemseue. Dinino, nun mali kunup keca tapmepedi, er damai tamupra bepyopda, Allah kange deipseredi kwetedinkamsere. Tonda, ukupmanto upu di pepne. Nun wenemna tep, ila kange mun suse kareamseupa, suse jeramserenge yuma peda, er dipapu susu geten keca di deipdongopra getedongonkamsere. Ukupseredi, nun suse kwetedinkamsere. Ada, nun mali kunup keca daepseredi, telep kupra deipkamsera tep pepne.

Hosea 6

Israel nesaladi, ‘Uo, nunda pio mali weik kuramepu,’ tenen, ‘Sun mali kun keca tep ali dakmengedi tapkameng’ tenen, pepu upu

1 Nabi Hoseadi, sun Israel nesala tep pepu.

Uda, ne kayapu neng, sun Israel nesala tep pepsene. Ukutaruda nun yumadi, nun mali kunup keca tapra, kange di tamupra, nun nai bo Allah Yahweh, er damaipu benkupe. Nun mali kunup keca wenemna tep, ila di wenemseue. Dinino, nun mali kunup keca tapmepedi, er damai tamupra bepyopda, Allah kange deipseredi kwetedinkamsere. Tonda, ukupmanto upu di pepne. Nun wenemna tep, ila kange mun suse kareamseupa, suse jeramserenge yuma peda, er dipapu susu geten keca di deipdongopra getedongonkamsere. Ukupseredi, nun suse kwetedinkamsere. Ada, nun mali kunup keca daepseredi, telep kupra deipkamsera tep pepne.

2 Ukupsere pangeda, ue butene tumi do, weneri tumi do, mapmepyopda adipapu kaikseredi, telep kupkamsere. Allahdi telep kupra kweteipsere dingeda, er dipapu nun tep telep kudinkamsere. Tumi weneringe deiki di, pio telep kupra deipserepa, nunda kange di, er damai ton cap kunkamepe. Ada, er dipapu, nun mali kunup keca yuma, gum kupra deipserepa, ka di ton cap er damaipu kunkamepe.

3 Ange ukupkamsera tep nengeda, nun yumadi piriprapmepedi, Allah Yahweh tep teka tenepra dombankamepe. Ada, nun nai bo Allah tep, “Uo, kanda tek sisi ila mambul ngebo kurume,” pepra, er tepapu gispal donkamepe. Tamna gum dipapu, Allah tep teka tenepra dombaramepyane, tek sisi Allahdi nun melimna tep, tumi-tumi yuma ipna taru keteng tengyaredi doramretopu, Allahdi nun tep yana melimkamsere. Utopu ukupmantoda, ila dou maramyane, sirya tarada, mo ila di ceprepa tuai mutu yuma telep kuramretopu kuredi, nun tep melimseredi, telep kudinkamsere. Nabi Hoseadi pepu.

Allahdi Israel nesala, sun wenemna tep, pepu upu

4 Allah Yahwehdi Israel nesala yuma tep pepu. Uo, Israel yala nesala cap, Yehuda yala nesala cap, sun yuma tep, nedi wareto upu ton pepsetene do? Sun tep wareto keca ton kupkamsen do? Ada tali tep men pepsene. Sundi ne tep kange derinerumu ngeda, menmena gum kupbarure. Ukupmantoda, ipna taru mo puru sakmaredi, pen palepmarepane, tu but deiki di dua welepredi, menmena gum kudiramretopu, sundi ne tep ‘Kanpu kange derikenupe,’ pepra penerum dinino, menmena dipu ange tapmumdi, ne tep tupa men tenenerume.

5 Ange tep nengeda, nedi sun tep, ne upu lap pen neng nabi-nabi neng, sun kori pediramsi upu deiki di, sun tep ila di wenemsisi. Ne pediramsi upu deiki di, sun Israel yala nesala cap, Yehuda yala nesala cap, weika di portamamsi. Ukupmantoda, kulman pepkurya tep, menmena perenglang pena peramretopu, nedi sun tep ila wenemna keca kareamsisipa, poramsisi.

6 Atep sundi moupra tenenkamrume. Tek sisi ne putanerepa tenenun kecada, ake. ‘Sundi yuk neng yuma tep, bicau tenepmengedi, telep kupra melimkamenge’ tenen, putanerure. Tonda, ‘Sun yumadi, Allah ne sipu eremnengedi, pio gispal donkamnenge’ tenen, putanerure. ‘Ukuptenge’ tenen, ne ila di putanere ngeda, apua. Dinino, sundi ange yuma men kuprumu dipapu, ne karena tep gam keca popra deiprumudi, karepmumpa, sun imam nengdi, uku dongoryakanunge.

Tonda, ‘Nun mali kun keca daepseredi, kaukepseryopda, nun tep tali lupra popsetu dinin, nun yo pununa tep, gam keca popra karepkupe’ tenen, gam keca popra kareprumupa, sun imam-imam nengdi kareryakanenunge. Dinino, ‘Ange yumada, mambule gume,’ tenenune. Sundi yuk nesala tep, bicau tenepra makuprumudi, ne tep gispal dopra, ne si eremnerumyopda, nedi sun tep kange deipsetenedi, ‘Angeda ila mambule,’ tenepsetene. Dinino, angeda men kurume. Allahdi, sun Israel nesala tep pepu.

7 Dinino, menmena taru kuramu ngebo Adamda, nedi, “Ange kunkamrume, angeda pio men kunkamrume,” pepra deipsi upuda, erdi ange yaniptapudi, mali kuramutopu, sun Efraim yala nesala cap, Yehuda yala nesala capda, sun peda ne peipsisi upu konum tamrume. Sun abutene yala nesaladi, ne pedina upu deiki peiamsi upu moupra talena gum di, mali kun kecapu talepra kurami.

8 Ila ati arum dominge, er sida Gilead mutu, amutu neitamaida, mali kun keca talepra kunge neng cap, nimi pon neng cap, weika di kununge. 9 Upula don nengdi, nimi embanung bisi pirmanai inipmengedi, ‘Dan ngebo do, mankau kange doupra yaryopda, angebo popra, er bung keca upula dopropkup’ tenen, kuramengtopu, Gilead mutu neitamai kunge imam neng peda, utopu kununge. Sunda upula dona weik kununge.

Nimi ati arum dominge, pio mambul mutu, Sikem mutu embanung bisi neitamai di, nimi popmengepa, denunge. Tonda sundi, upula dona cap, ila mali kunange cap, tonda yuknge yuma capda, tali kange tenena deiki di amali kuna ngeda, weika di kununge.

10 Teka sun Israel yala nesala kankan neitamaida, pio mali kuna ngeda, weik kupmengepa dinune. Ada, Efraim yala neng cap, Israel nesala ton dinin, yuk-yuk yala kunge neng capdi, ne tep tamnenunge. Ukupmantoda, nerapudi, sun domenge neng tep, ‘Anengda nun songe’ tenen, tapmengedi, yuk neng tep kange deipmengedi, upula nyangdaramengtopu kupra, sun Israel nesaladi, ne Allah tep, tapnengedi, yuk tali keca tep, kange deipra, “Nun nai,” pepra talengedi, si eremnunge. Ukununga deiki di, pio mali weik kudidanunge. ‘Angeda, ne pio songe,’ tenenuna cadi, atep anengda, ne damai pio men yatenge.

11 Ange tep nengeda, sun Yehuda tara kurum Israel nesala tep nengeda, ‘Sun mali kurumu keca menenga tep, wenepkamne’ tenen, ne konum tenepsidi keteneipsisi tumida. Sun mali kurumu keca tep, ila di wenepkamsene.