Hos 7 | XteSC | STEP | Allah Yahwehdi sun Israel nesala tep pepu. Ada, ne nyapu sisa sun Israel nesalada, ‘Ikin kange doupra kuramipanen, ukutaruda, kange di pio telep kupra deipkamne,’ tenepsi dinino, konum ‘Ukupkune,’ tenepsi taruda, sun iknapi dam tara kunge Israel nesala, sun Efraim yala neng cap, tonda sun dapu tara utara, kunge Israel nesala cap, ila ati arum sida Samaria mutu kunge neng capda, pio malipu kupra kuramenge keca dinin, inimami kecada, konum katuai kupupa, kael kepsi. Ange tep nengeda, ne pio dinun ngeda, sun mali kuna ngeda ake. Ada, sunda tali upupu pepra deridanunge. Ukunungtopu ton, yuk neng sun bisi neitamai embangepa, anengdi sun bung keca yumada, upula doronunge.

Hosea 7

Israel nesala mali weik kurami ngeda, Allah tupa teneamng tep, pepu upu

1 Allah Yahwehdi sun Israel nesala tep pepu.

Ada, ne nyapu sisa sun Israel nesalada, ‘Ikin kange doupra kuramipanen, ukutaruda, kange di pio telep kupra deipkamne,’ tenepsi dinino, konum ‘Ukupkune,’ tenepsi taruda, sun iknapi dam tara ^{▼▼iknapi dam tara – Abuku neitamaida, ‘iknapi dam tara’ pepra sekmepyopda, ada arah selatan tenena tep penupe. Tonda, ‘dapu tara’ pepra sepmepyopda, ada arah utara tenena tep penupe.} kunge Israel nesala, sun Efraim yala neng cap, tonda sun dapu tara utara, kunge Israel nesala cap, ila ati arum sida Samaria mutu kunge neng capda, pio malipu kupra kuramenge keca dinin, inimami kecada, konum katuai kupupa, kael kepsi.

Ange tep nengeda, ne pio dinun ngeda, sun mali kuna ngeda ake. Ada, sunda tali upupu pepra deridanunge. Ukunungtopu ton, yuk neng sun bisi neitamai embangepa, anengdi sun bung keca yumada, upula doronunge.

2 Ukunung dinino, sunda moupra men tenenungada ake. Ada, ne Allahdi, sun Israel nesala yumada, sun kange dipru neitamai kwamre mali kun keca yumada, pio katuai dipu dinedi, kael kemnune. Konum kael kepnyopda, tupa tenenapu kunune. Atep nengeda, ukupmanto, sun dana-dana tara yumada, sun mali weik kunge kecada, ongopdonogpra kurepa, tupa dinapu kunune. Sun mali kunge kecada, ne urasin damai tupa kurura tep pepsene. Allahdi pepu.

Israel nesala sun mali kurami keca tep, pepu upu

3 Allahdi aupu konum pepu dingeda, aupu ton dukdongopra pepu.

Sun Israel nesala yumadi, tali upu pengedi, mali-malipu kunge keca deiki di, sun mutu ila nimi deiyo ngebo Rajada, epredi kange derirure. Tonda amutu neitamai yuma, Raja amutara deiyo-deiyo nengdi, amali kuramenge keca epmengedi, sun peda, ‘Walito kununge’ tenen, teleppu kange deipra kununge.

4 Sun Israel nesala yumada, tali-talipu kungedi, nyangdanapu kununge. Sun anesala yumada, tamna gum di tupa-tupa malipu kununge. Ukupmantoda, sun kungedi yu tenenung kecada, nimi uku sekmengepa, ‘Uku bupu ila di jerepa, roti kwaneng dapkaman’ tenen, roti bunda ketenepredi, uku sekrepa, ila di uku jeramretopu, sun anesalada ukurure. Aukuda ila di tupa jenmare. Metek men kupbaramre.

5 Tonda, sun mutu ila nimi deiyo ngebo Rajada, ‘Ila mambul tumi kupmara cadi, ila kailya kalepkupe,’ peprepa, sun anesala yumadi, sun deiyo ngebo Raja cap, tonda sun amutu talepra upu pena tep deiyo-deiyo neng cap yumadi, kange yawaramne anggur me jenmanpanen, sun kange pio yawaramrure. Ukuprepa, sun aneng yumadi, pio mali kun kecapu kununge. Ada, mali upu penge nengdi, yuk neng tep, yap-yap pepra, nalemengedi, auturamengtopu, sun adeiyo neng peda, wisipmengedi aupu utopu penunge.

6 Ada tali tep men pepne. Deiyoda ake. Sun Israel nesala talepra, deiyo-deiyo neng kemami nengda, sun kange dipru neitamai di, ‘Nun Raja popkamepe’ tenen, ila yu di tenenung kecada, ila uku jeramretopu kurure. Ukupmantoda, sun dipru neitamai yu tenenge ngeda, lukunda uku sekmengepa, uku bu pio jeramretopu kurure. Alukunda neitamai yumada, uku pio jeramreyanen, ipna taru peda, tamna gum di, pio tupa uku bu ila di jeramretopu, sun pio ila yu kuprepa, mali tenenung kecada, weika di tapakra nepbarure.

7 Sun yumada, ila uku jeramretopu kununge. Ada, sun kange dipru neitamai di, sun meneng deiyo keamidi talepra kunge nimi deiyo neng teppu, ‘Adeiyo neng popkamepe,’ tenenunge. Atep, sun ila nimi deiyo neng Raja-Raja yumada, pio tupa-tupa dukdongopra ponapu kuramitopu, tupa ponapu kununge. Ange utopu kuramengepanen, kamo urasin pio malipu kununga cadi, sun kan-kan neitamai di, nimi tenpu ngebo peda, ne tep, ‘Naio, melipseo,’ pepra, pio men moronenunge. Allahdi pepu.

Israel nesala kankan dinin, dapu tara kurami nesala, Efraim yala neng tep, pepu upu

8 Allah Yahwehdi aupu ton pepu.

“Israel tara neitamai kunung nesala dinin, Efraimdi deiamupa, dadeipdanen yakarami neng, sun dapu tara mutu (utara) kunge Israel yala neng yumada, sun dana-dana tara kunge yuk mutu nesala cap wisipra kununge. Tonda, sun cap kikiman, yuk mutu nerapu cap dopra, dukdongopra kununge. Ukununga deiki di sunda malipu kudidanunge. Ukupmantoda, roti kwaneng dapmangepa, ton tarada popmare dinin, ton tara ngeda embek tupa kupmarepa, men jepmanto kuramengtopu, sunda malipu kununge.

9 Ange ukununga deiki di, sun Israel yala nesaladi, pio moupra men tenenunge. Ada, sun cap, yuk mutu neng cap, wisipra kikiman tali-tali kununga deiki di, sun puto kuna deiyo keca yumada, wangartamnunge. Sunda pio wisi deiprepa, puto metekpu kunge wisi neng kuramengtopu konum kunung dinino, sundi ange moupra tenena gum di, men kael kemnunge. Atep nengeda, sun cap, sun mutu cap, malipu kupbarur cadi, angeda moupra men tenenunge.

10 Sun Israel nesaladi, salnong-nong kupra gemenungada, konum katuai kuprepa, nong kurure. Sunda malipu kununge. Ukupmantoda, nimi upu bongdina taruda, tenpu ngebo tekredi, yuk ngebo tep, ‘Er mali kuramre kecada ake, ake,’ pepra, katuai di lap peramretopu, sun gemenapu kunga deiki di mali kudidanunge. Sun gemenapu kungedi, mali-malipu kunge keca nong kuprepa, katuaipu kurur dinino, sundi ne Allah tep ton, ‘Nun nai bodi melipra lyepsetu do?’ tenen, men eryakanenunge. Tonda, neda, sun nai bo Allah Yahweh kunun dinin, sunda, ‘Allahdi ware pepkamser do?’ tenen, ne damai tamupra men yakanenunge.

11 Israel tara neitamai kunung nesala dinin, Efraimdi deiamupa, dadeipdanen yakarami neng, sun dapu tara, utara mutu kunge Israel yala neng yumadi, ‘Ware mutu nengdi melipseteng do?’ tenen, ortara benapna, atara yanapna kemtonung nesala kununge. Ada, yambul ma er si merpati madi, ‘Dan benkup do?’ tenen, kange tenena gum di, tali lupra lakra, ortara benapna, atara lakra yanapna kemamretopu, sun Israel nesala peda utopu kemtonunge.

Ukunungada, walwal dipapu kununge. Tek sisi angetopu, ‘Yu nengdi yana popsenung’ tenen, sundi Mesir mutu nesala tep, ‘Uo nun kayapu, sunda yana, nun ton melipseso,’ pepra moromi. Angetopu ton, Asyur mutu kunge nesala tep bena, ‘Uo nun kayapu, sunda nun ton yana melipseso,’ pepra moromi. Ukupra mororami dinin, sun yuk mutu nengdi men melimami.

12 Sundi yuk mutu neng tep, ‘Melipseso,’ pepra bena moroptenga peda, nedi ange yuma gum kupra deipkamne. Sun Israel nesaladi, yuk mutu-mutu neng tep tupa bangedi moropmenge pangeda, nedi sun Israel nesala youna tep kecada, er si jaring tapu deipkamne. Ukupnepa, nimidi tali ma youramretopu, anesala youpkamre. Ukupmantoda, nimidi, ‘Ma youpkamep’ tenen, tapu deriramengtopu kupkamne. Ada, nedi sun Israel tara kunge nesaladi, mali-mali kunung keca yumada, konum kael kepsi cadi, angeda sun Israel nesala wenemna tep kecada konum ketenepsi.

13 Ange tep nengeda, sun Israel yala nesala yumada, bicaue. Anesalada, ila di wenepra popkamna cadi, sunda pio bicaue. Ada tali tep gum dinin, deiyoda sundi ne tep konum tapneidi, luproneiya tep pepne. Tonda sun anesala yumadi, ne pepra deipsi upu yuma men gekengedi, yanitamnunga cadi, adipapu anesala popra sikke bukra tapkamne. Nedi, ‘Sun yuma, ila ikin keca kununga neitamaida, lyepkamne,’ teneamsi dinino, sundi ne tep tali upupu pertamnenunge.

14 Tonda, sun Israel nesala yumadi, sun kange dipru neitamai dipu, tek sisi ne Allah tep pio men moronenunge. Tali sipyal deiki dipapu, morona upu penenunge. Tek sisi ne tep sun ason deiki mapne taru di mororamnetenge dinin, ne tep teka tenena pio gum nengdi, ila di engeramengtopu kununge. Ange utopu sundi, sun pe nongpu dila kudidaramengedi, “Uo, gandum du cap, anggur du cap, karepseo!” pepra moronenunge. Ukunung dinino, nedi, ‘Ukupkamrume, angeda pio men kupkamrume,’ pepra, deiamsi upu tep, yaniptapmengedi, tali keca sipu eremengedi, sunda teka sisi ne Allah tep, tamnenunge.

15 Angeda ukunung dinino, tek sisi ne dipapu sun anesala yumada, nepra deiamsi. Ukuamsidi, sun puto kepra deiamsi. Ukuamsi dinino, sun anesala yumadi ne tep, ‘Allah tep nengeda, ukupkamepe,’ pepra, mali upupu sisingmengedi, ne upuda, yanitamnapu kunenunge.

16 Sun anesala yumadi, ne Allah tep tamnenung dinin, tupa-tupa isok, er sida dewa-dewa, tonda isok Bahal ^{▼▼Bahal sekmepu ngeda, yuk Alkitab neitamai ‘Baal’ sengnunge. ‘Bahal’ sekmupka deiyoda, ‘Baal’ pepmengepa, walwal kuprepa, ‘Bal sisa tenepnung’ tenen, nundi ‘Bahal’ sekmupu. Si yuk sekmpu dinino, aisokda tenpua.} tep, tek sisi puto gum keca, tali kecapu kurur dinin, er si eremnunge. Aisokda, sun tep pio men meliptue. Ukupmantoda, sun anesalada, ‘Mar dopkup’ tenen, jen tapu dipra, pepra dopterepmenge dinin, mar dopmengepa men dourbaramretopu kununge.

Tonda, sun talepra kunge nimi deiyo-deiyo neng yumada, gemena deiki di salnong-nong upu penunge. Ukununga cadi, ange tep nengeda, go karepnepa, yu neng yangedi, pio yu parang ya doupra, yangedi, sun anesala yumada, popkamenge. Dinino, ada ne dia. Ukupnepa, sun Mesir mutu kunung nesala yumadi, Israel yala nesala tep, autupkamenge. Allahdi pepu.