Hos 8 | XteSC | STEP | Allah Yahwehdi Israel nesala wenepkamra deiyoda, tali isok tep, ‘Nun nai bo,’ pepra akeca sipu eremamya cadi, nabi Hosea tep pepu upu. Ada, ila lelim pung pen kecada, er si terompet upuda, ‘Nimidi alelim gekepmengedi, ‘Uo’ tenen, moupra gekenkamenge’ tenen, alelimda peten pepu! Deiyoda, ne Allah Yahwehdi go karepnepa, ne nyapu sisa Israel nesala tep, karen mutu yu nengdi poryankamenga tep pepne. Ukupmantoda, ayam ma popra jeramre ma lakra embaredi, er lyana tep eryakaramretopu, nedi kange mun keca keteneipsa cadi, Israel neng deiki deipkamne ja! Ange ukupkamra deiyoda, nedi, ‘Sunda ukupra kurumupa, nedi ange-ange yumada, nedi melipra kupkamsene,’ pepra, pedina upu deiki di peiamsi upu tapnei. Tonda, nedi, ‘Angeda kunkamrume, angeda pio men kunkamrume,’ pepra deiamsi upuda, ne mawa nesaladi moupra men taleamidi, mali kun kecapu tupa-tupa kununge.

Hosea 8

Allah Yahwehdi, Israel nesala wenepkamre deiyoda, tali keca tep, ‘Nun nai bo ake,’ tenen, si eremenga tep, pepu upu

1 Allah Yahwehdi Israel nesala wenepkamra deiyoda, tali isok tep, ‘Nun nai bo,’ pepra akeca sipu eremamya cadi, nabi Hosea tep pepu upu.

Ada, ila lelim pung pen kecada, er si terompet upuda, ‘Nimidi alelim gekepmengedi, ‘Uo’ tenen, moupra gekenkamenge’ tenen, alelimda peten pepu! Deiyoda, ne Allah Yahwehdi go karepnepa, ne nyapu sisa Israel nesala tep, karen mutu yu nengdi poryankamenga tep pepne. Ukupmantoda, ayam ma popra jeramre ma lakra embaredi, er lyana tep eryakaramretopu, nedi kange mun keca keteneipsa cadi, Israel neng deiki deipkamne ja!

Ange ukupkamra deiyoda, nedi, ‘Sunda ukupra kurumupa, nedi ange-ange yumada, nedi melipra kupkamsene,’ pepra, pedina upu deiki di peiamsi upu tapnei. Tonda, nedi, ‘Angeda kunkamrume, angeda pio men kunkamrume,’ pepra deiamsi upuda, ne mawa nesaladi moupra men taleamidi, mali kun kecapu tupa-tupa kununge. 2 Dinino, ne nyapu sisa sun Israel yala nesaladi ne Allah tep upepra moronenunge, “Uo, nun nai bo Allah kan dipapu melimserume. Nun yumada, konum kael keamkepudi, kan sipu eremnupe!” pepra moronenunge.

3 Dinino, ne kaele. Sun Israel nesala yumadi, ‘Telep kun keca cap, dumsisi kuna capda, nun songe,’ pepra, tamami. Atep, sun anesala yuma tep nengeda, sun pona tep yu nengdi domembenkamenge. 4 Tonda, yuk mali keca kurami ngeda ake. Ada, ne nyapu sisa, sun Israel nesalada, neda sun deiyo ngebo kunun dinin, sundi, ‘Allahdi ware ngebo erepra deipserepa, Raja kepredi nun talepra kunkamser do?’ tenen, ne tep men asiamnei dinin, ange gum dipapu, sun nimi deiyo ngebo Raja-Raja tengna tep, sun pe kange dipapu, nimi wepra deiamipa, Raja-Raja kemami.

Angetopu kupra, sun amutara, yuk nimi deiyo-deiyo neng tengna peda, ne kael kemna gum dipapu, sundi, ‘Nun pedipapu wepra deipkupe’ teneramidi, adeiyo neng ton wepra deiami. Tonda, sun kunumna weik keca, er si emas cap, perak cap doramidi, ‘Tali isok si eremkamep’ tenen, patung berhala ^{▼▼berhala – Aupu deiyoda, ada, isok si eremna tep, patung petupra deiamidi, isok si eremami.} ketekepra deiamidi, isok sipu eremami. Ukununga deiki di, denunga cadi, ukupmantoda, sun pedipapu sikke bukra yawa popdana utopu kunge.

5 Uo, sun Samaria mutu kurum nengdi, ‘Isok sipu eremkamep’ tenen, sapi bisam urasin utopu keca petupra deiamrumdi, akeca tep si eremrumada, nedi, ‘Akecada ne pio songe, ne dabale,’ tenenune. Tonda nedi sun tep ila yu deiki di wenepkamsene. Uo, ataru di dipra ware kuprap taru ton, sun pe dipapu mali kun kecapu talepra kunkamrum do? Ware keca deiyo tep, dumsisi kun kecapu talepra men kunkamrum do? Sunda telep kupra dumsisi kunange tep, pio men kupmanto nesalapu kurum do?

6 Tek sisi pepsene. Asapi bisam urasin utopu petupra deiamrum kecada, tek sisi ne Allah kunetopu pio men kurure. Akecada gam kuredi puto weik pio men kurure. Asapi bisam urasin utopu patungda, Israel tara kunge nesala kan-kan di, tenpu ngebo er pe buru di, akeca petupra deipudi, sun damai duyana karepseu. Atali kecada, ne Allah utopu pio men kurura cadi, angeda ne dipapu sikke bukra tapkamsene!

7 Atep sun Israel nesaladi mali kun keca talepra kurumnge yumada, nong men kupkamre. Ukupmantoda, sundi, ‘Kumanyapu dopra koupkamepe,’ tenena utopu kurume. Tonda, kumanya koupmumnyopda, amenda taru ila puto kumanya yaredi bupatekredi akeca-keca yuma urupra sikke bukra tamamretopu kupkamsere.

Tonda, ukupmantoda, yakung yal kouptum dinin, er nong paptudi, ektu dinin, yakung nong ton men deipyopda, yakung du men kupkamra cadi, ware kuprap bam-bama kecapu dopra taikmumdi, roti kwaneng deiyo keca tepung keteneiptum do? Gume, yakung du men kupyopda, tepung ton pio men keteneiptume. Angeda men kupmanto. Yakung paptudi, tekra ektudi, nong deiptua peda, yuk karen mutu yu neng yangedi, upula dopropmengedi, jepropkamenge. Angetopu, sun Israel nesaladi, mali kun kecapu kupmumnya deiki di, ikin kecapu sun damai yakankamsere. Sun mali kumumnya deiki di, ila kange mun ngepu, sun damai kupkamsere!

8 Ange tep nengeda, Israel tara kurumu nesalada, sun pona tep, yu nengdi yana popra gawal dakamsenge. Atep, olongtamne keca, er sida periuk oloktamengedi, donongamenga utopu, sun Israel neng yumada, poptapra gum kupra deipkamsenge. Ukupsengopda, sun Israel yala nesala dopra, yuk karen mutu-mutu dana-dana yumada, dubena deipsengepa, tali-talipu kunkamrume. Ada, nimidi, ‘Akecada tali keca’ tenen, bura donokmengepa, talipu dakuramretopu, sun peda utopu kunkamrume.

9 Angeda, tali tep men pepsene. Deiyoda ake. Ada, ukupmantoda, Keledai bisam, bura tali gam dakuramredi, giso gat kepra kuramredi, ‘Dan mutu benkun do, ware kupkamne do?’ tenen, walwal kupredi, wang-wang peprepa, orbenapna, ayanapna kemamretopu, sun Israel nesala yuma peda utopu kurume. Ada, sun Israel yalal nengda, ‘Ware mutu nengdi melipseteng do?’ tenen, sun melimna tep, Asyur mutu nesala damai erbenamrumdi, mororamrume. Ange utopu ton, Efraim yala nengdi, ‘Ware karen mutu nengdi nun kayapu neng kepsengedi, melipsetenge do?’ tenen, yuk mutu-mutu dabena kunumbenami.

10 Sunda, yuk karen mutuda, mutu-mutu nesala tep, ‘Melipkamseng’ tenen, kunumna keca cap, telep karena keca cap, weika di bena karenung dinino, ukutaruda, nedi anesala yuma buluprapnedi, tenpuaipu deipnedi, sun anesala tep wenepkamne. Wenepkamne taruda, pio kuna gum dinin adipapu sun yuk-yuk mutu nimi deiyo Raja neng cap, sun amutara deiyo-deiyo neng capdi, ‘Nun tep kunumna keca weika di kareryakankamserume,’ pepra, ikin keca sun Israel nesala deiki deipmengopda, sunda, ‘Uo ware kuptepe do?’ tenen, ila kange mun kange doupra kunkamenge. Deiyoda, amenda taru Asyur mutu nimi deiyo ngebo Rajadi, sun tep, ‘Kunumna weik keca kareryakankamnerume,’ pepredi, sun tep ikin weik keca deipkamra tepa.

11 Tonda, Efraimdi deiamupa, dadeipdanen yakaramyanen, sun Israel nesaladi, ‘Nun gam keca popnedi, uku dongopmepyopda, isok-isokdi nun mali kunup keca, kilipsengedi, gum kupra deipkamseng’ tenen, pala gel yakra deiamidi, mesbada pio weika di ketenepra deiami. Ukurami dinin, isok morona tep, sundi amesba-mesba ketekepra deiamya deiki di sun Israel nesala yumada pio mali-malipu kurami! Ada, ne Allah tep tapra yaniramneiya tep pepsene.

12 Tonda, ne Allah dipapu sun Israel nesala peteremna tep, ‘Angeda ukunkamrume, angeda pio men kunkamrume. Telep kuna ngeda ake, mali kuna ngeda ake,’ pepra peteremna keca weika di sekra karepsisinge akapmarya peda, sun anesala yumadi, ‘Gume, aupuda tali upupu kurure. Ange yumada, ‘Deiyo ake,’ tenen, betapra men kael keptepe, atep angeda nun songe,’ pepra, yanitamnunge.

13 Angepu gum dinin, tonda, sun Israel nesaladi, ‘Allah er si erepmepedi, er tep gispal donkamepe’ tenen, yapi keca doupra popnedi, yana kareryakanenunge. Tonda, ayapi keca doupra Allah tep yana karepnengedi, atu galemnunga neitamai di bokra jenunge. Ukununga peda, ne Allah Yahwehda, pio dabale kununa cadi, sundi karenenung kecada, ‘Ne songe’ tenen, men doronune. Atep ukutaruda, nedi sun mali kunung nge yuma tepapu, tenepnedi wenepkamane. Ada deiyoda, sun mali-mali kununga tepapu, ila di wenepkamsene. Atep ne adipapu sun tamupra, Mesir mutupu dokotepkamne!

14 Ukupkamna deiyoda ton ake. Ware kupra taru neitamai di, sun Israel yala nesala yumadi, sun ketekepra deiamnga deiyo ngebo tep nengeda, tenena gum dipapu, konum lupropneidi, mali-malipu kununge. Ukupra kungedi, sun kunai tep, ila di pio telep-telep ati dongedi, akati neitamaipu kange deipra kununge. Tonda, ange utopu sun Yehuda tara mutu neitamai kunge nengdi, ‘Nun podan neng yangedi popsenung’ tenen, ila gat gel di deipra, ila puto weik ati arum donunge.

Dinino, ukuramya peda, nedi uku dokotepne pangeda, aila ati arum cap, gat gel di deipra domi ati cap, urasin pio telep-telep kupra istana ati dominge cap yumada, uku bu di jepra gawal dakamre. Tonda sun kunge mutu-mutu neitamai dakuamre keca yuma peda, adokotepkamne uku di jepra gawal dakamre. Ne Allahdi pepne.