Hos 9 | XteSC | STEP | Uo, sun Israel mutu neitamai kurumu nesalao, yuk mutu-mutu yuma kunge nesaladi, kange deipra kuramengtopu, sundi ange men kunkamrume. Deiyoda ake. Ne Allahdi sun tep pio kalekra melimsenun dinin, sundi ne tep, ‘Erda dakwapye,’ tenemumdi, tamnerume. Ukupmantoda, nimidi sun konum domi nerapu tapmengedi, yuk tali nyangdana nerapu kikiman kuramengtopu, sundi sun nai bo Allah tep, konum taprumdi, tali isok tep si eremrume. Tonda, sun mutu neitamai, nimidi gandum du taingamengaida, isok er si Bahal dewapu si eremrume. Ukuruma deiki di, sun tali nyangdana nerapudi, sun pe nongpu kunumdaramengtopu kurume.

Hosea 9

Allahdi Israel tara kurami nesala wenepkamrenge tep, pepu upu

1 Uo, sun Israel mutu neitamai kurumu nesalao, yuk mutu-mutu yuma kunge nesaladi, kange deipra kuramengtopu, sundi ange men kunkamrume. Deiyoda ake. Ne Allahdi sun tep pio kalekra melimsenun dinin, sundi ne tep, ‘Erda dakwapye,’ tenemumdi, tamnerume. Ukupmantoda, nimidi sun konum domi nerapu tapmengedi, yuk tali nyangdana nerapu kikiman kuramengtopu, sundi sun nai bo Allah tep, konum taprumdi, tali isok tep si eremrume. Tonda, sun mutu neitamai, nimidi gandum du taingamengaida, isok er si Bahal dewapu si eremrume. Ukuruma deiki di, sun tali nyangdana nerapudi, sun pe nongpu kunumdaramengtopu kurume.

2 Ange tep nengeda, yambulanun ton amenda taru sun mutu kupkamre gandum du cap, anggur du capda, metekpu kupbaramsereyanen, pio gum kupsere pangeda, sun jen putanapu kunkamsere. Tonda, ukupu keteng tamun neitamai ukupu ketenepmange anggur me peda, gum kupropkamra cadi, ange deiki di ikin kupkamsere.

3 Uo, sunda Israel mutu neitamai kumum nesalao. Sun nai bo Allah Yahwehdi, ‘Pio telep mutu karepsenepa, acapu kunkamrume,’ pepra keteneipseudi, kareamseu mutu neitamaida, pio acapu men kunkamrume. Efraim yala nengdi deiamipa, dadeipdanen yakaramidi derinung nesalada, amutu men kunkamrum dinin, sunda adipapu tamupra Mesir mutupu bena kunkamrume. Tonda, sun yala nengpu dinin, yuk neng bokra, Asyur mutu dubesengepa, amutu neitamai di, mali jen keca jenkamrume. Ada, ne Allahdi, ‘Ne nyapu sisada, ajen keca pio men jenkamenge,’ pepra deipsisidi, ‘Ange jenada meme. Ange jepmumnyopda, ne damai ton men yankamrume,’ pepra deipsisingepu, tali lupra dopra jenkamrume.

4 Amutu neitamai kukamrum taru yumada, sundi anggur me ton doupra yamumdi, ‘Allah tep yapi keca popra duyandi karenkamep kecada, pio telep kweipmepepa, Allahdi kange deipkamser’ tenen, ne Allah Yahweh tep kareryakankamrum keca deiki di anggur me men dingtamkamrume. Ataruda, sundi gam keca popra karepnemumnya peda, ne Allah Yahweh epnedi kange men deipkamsene. Akeca doupra ne damai yana karena pio meme. Sundi, gam keca popra ne damai kareryamumnya peda, nimi depnepa peina tumi di jerameng roti kwanengda, ne si eremenge nengdi akeca pio men jeptenge keca utopu kupkamre.

Ada, akeca dopra jepne pangeda, adeiki di sun pe dipapu mali kweipdangepa, ne damai ton men yatenge. Deiyoda, ake. Ada, anesala yumadi akeca dopra jenkamengada, ne gispal dona tep men jerum dinin, ada tali sun munduai putana tep jerume. Sun pe putan kecapu teneprumu dingeda, ato keca doupra ne si eremna ati damai doupra karerbana tep nengeda, pio men duyakankamnerume. Ukunada meme pepsene.

5 Uda, neda Allah Yahweh, ne si eremna tep, ila mambul tumi cap, ila kailya kalemna tumi cap, yuk ila-ila tumi yumada, ware kupkamrum do? Ne Allahdi, ‘Atumi neitamai, ila mambul tumi teneprumudi, ila kailya kalepra jeprumudi, ne sipu eremkamnerume. Atumi deiki di, ne Allah Yahweh tep gispal donkamnerume,’ pepra, deipsisi tumi yuma tep nengeda, sundi pio men kareryakankamnerume.

6 Tonda, nimi podan taru konum yarepa, nimi weika di popmengopda, ataru tapmengepa, amutu tupa kunkameng nengda, bura tara saka sepdaro bendoptenga peda, amenda taru yuk mutu nengdi yana, ateng koupsengedi, karen mutu dubenkamsenge. Ada, sun Mesir mutu nengdi yankameng taruda, sun adipapu bulupra deipsengedi, dopra sun pe mutu tamupra dubenkamsenge. Ange utopu, yuk taruda, sun Memfis mutu nengdi yana, sun Israel nesala weika di popsengopda, tu pu palipkamenge!

Ukupsengopda, sun kuramrumu mutu cap, ati arum cap yumada, walangyopu konum kupyopda, manmaning cap, betei cap, tali paramre takke keca cap yumada pakamre. Ukupredi sun ati walangyopu kupkamre ati pumbonda, sun yumadi taleamrumu bung keca cap, kunumna weik keca perak cap, sun ati bo neitamai cap yumada, betei cap, takke keca cappu, paptapkamre ja!

7 Atep nengeda, sun moupra gekepso! Ne nabi Hoseadi pepsene.

Ila wenemna tep tumi konum damai kupre. Ada, Allahdi yu kuprepa, sun Israel nesala yuma tep, wenepseredi, ikin keca deipkamsere. Nimidi akeca yala-yala yuma mali kuramenge keca menenga dorona tumi kepkamra tep pepne! Ukupre pangeda, sun Israel nesala yumada, ikin keca dopropkamenge. Dinino, sun Israel yala nesaladi, ukutaruda ukuprap penunge. “Gume, nabi ngebodi peserur upuda, nundi teka men tenenupe. Allah er Lek Sambala kareamu ngebo, nabi ngeboda, mutana ngebo utopu kurura cadi, pio walwal dipu perure,” pepra, nyek-nyek penkamenge. Dinino, ne kaele. Sun Israel nesaladi, sun mali kun keca yala-yala yuma konum kuruma cadi, Allahdi peserur upu cap, ne nabi Hoseadi pesenun upu cap tep, sun akurumu nesaladi, ‘Aupuda dakwapye! Nun songe, aupu men gekepkamepe,’ pepra tamserume.

8 Dinino, tek sisi pepsene. Allahdi ne wepra deipneupa, er upu lap pena deiyo ngebo, nabi ngebo kunune. Atep, sunda er nyapu sisa, sun Israel yala nesala tep, ‘Kange moupso! Allahdi wenepkamsere,’ pepsene. Ada, ‘Mangkau kange doupra, tali lupra tupa mali-malipu kuramengepa, Allahdi ila kange mun keca, sun wenemna tep kareprur’ tenen, ‘Sunda kange moupso,’ pepsene. Dinino ne dan mutu benkune taru do yumada, sun Israel nesaladi ne tep, ‘Angebo nun song’ tenen, ‘Popkupe,’ tenepnengedi, ma pena pepra youramengtopu kupra gerengnerume. Tonda, Allah er si eremna ati pumbon peda, Israel nengdi, ne tep, ‘Nun songe,’ tenepnengedi, ikin keca dopra ne nong deiki derinenunge.

9 Sundi mali kumum keca yumada, pio ila mali kurume. Ada sun Gibea mutu nesaladi mali kun keca weik talepra kuramidi, mali kweipdaitopu, sun amutu kurumu Israel nesala peda, utopu kunerume. Ukuruma tep nengeda, Allahdi sun mali kurumnge yumada, tupa tenepseredi, wenepkamsere. Ada sun mali kumumnge utopu, menenga karepseredi, wenepkamsere. Nabi Hoseadi sun Israel yala nesala tep pepu.

Allahdi sun Israel nesala menop taru telep kuraminge cap, ataru mali kunge keca cap tep, pepu upu

10 Allah Yahwehdi pepu.

“Uo, Pumun taruda, nedi sun Israel nesala tep melipra lyepropkamne,’ tenepsidi, gonga keap melimamsisi taruda, sun tep ngeda kange deiamsisi. Ukupmantoda, nimidi me pio gumai, pio katawai mutu, padan gurun perameng mutu neitamai embaramenganen, daneitamai di, pio telep anggur tapu du mouramrepa, epmengedi, pio kange deriramengtopu, nedi sun tep kange deipsisi. Tonda, ukupmanto ngeda, arah co du menmenange mouamrepa, nimidi epmengedi, ange dakra jepmengedi, tau peprepa, kange pio deriramengtopu, nedi sun apu yapu tep epsisidi, pio kange deipsi.

Dinino, sun adipapu Peor mutu dupai bei taruda, isok si, Bahal, er si eremami. Ukuramidi, Bahal tep kange deiamidi, ‘Er puda, nun nai bo kunkamserura cadi, er sipu eremkamepe,’ pepra, er sipu eremami. Bahal isok si eremna tep, pio ali daktengedi, mali kange doupra engeptenge dinin, ange men kurami. Sun apu yapu yumada, isok si eremamya deiki di, sun pedi, sun pe tepapu, mali kudidarami. Ne Allahdi, isok Bahal cap, sun amali kun keca kurami nesala cap tep, ‘Ne pio songe,’ tenenune. Ato keca cap, ato nesala capda, ne damai pio men yatenge.

11 Israel nesala ^{▼▼Israel nesala – Ibrani upu neitamaida, ‘Efraim yala neng’ seki dinin, asekinge deiyoda, tek sisi sun Israel yala nesala yuma tenena tep seki. Ibrani Allah upu buku neitamaida, weikanun, ‘Efraim’ pepra seki ngeda, ada Israel nesala yuma cap, tonda Yahudi neng tenena tep seki.} yuma, sun ila telep mambul telep kunge keca yumada, pio gum kupkamre. Ukupmantoda, im neitamai lakra embaramre ma lakra benamredi, wangaramretopu, kupkamre. Ukupkamre taruda, sun yala nerapu yumada, pio mundu men doupkamenge. Ukupmengedi, mi ton men derinkamenge.

12 Tonda, nyapu tenpu-tenpu ton deipmenge pangeda, nena yambulanunpu nepra kunkamenge. Ukunkameng nyapu yumada, nedi doronkamne. Ukupnedi tenpu ngebo ton tapnepa, gam pio men kunkamre. Sun wenemna tep, sun nyapu yumada nedi tapnedi, men kaukemkamne. Doronapu kunkamne. Ukupne pangeda, sun yala neng gum kupra deipnedi gawal dakeipkamsene. Ange tep, uo sun Israel nesalao, nedi sun tep konum tapsenedi, bendopnyopda, sun ikin weik kunkamrume!

13 Pumun taruda, neda Allah Yahweh, sun Efraim yala nesalada, ada Israel yala nesala yuma tep, pio kange deiamsisi. Ukupmantoda, ila telep ati arum Tirus mutu, urasin pio telep mutu kwamupa, nimi yumadi kange deiami taruda, sun Efraim neng ton utopu teneramsisi. Dinino, ukutaru di dipra oryankamre taruda, ila di wenepkamsena cadi, sun Efraim yala nengdi, sun pe nyapu dopra, nimi pon neng damai dubena deipmumnyopda, anyapu weika di poptapra gawal dakamenge. Allahdi pepu.

14 Upepupa, nabi Hoseadi tamupra pepu. “Uo, nun nai Allah. Ange tep nengeda, sun Efraim yala neng yuma tep, ware ikin keca karenkamrum do? Ne Hoseadi, wareto keca moroptenepa, kandi angepu kareptum do? Ukupmantoda, sun wenemna tep, sun nerapu yuma tep, anerapuda you derin kecapu kepra deiptum do? Tonda, nyapu deiptenga peda, sun nin yapudi melo nyapu tep, moum teyung men karepmanto kecapu kareptum do? Ato kecapu kareptumdi weneptum do, gum do?’ tenen, asipetepra moropkene naie,” pepra, nabi Hoseadi pepu.

Allah Yahwehdi Israel nesala wenepkamrenge tep, pepu upu

15 Hoseadi upepupa, Allah Yahwehdi tamupra pepu.

“Gume, Israel nesaladi, mali kun keca talepra, mali-mali weik kuramidi, tupa kunge keca yumada, Gilgal mutu di gonga kepropi. Ange ukupya deiki di, ataruda nedi sun anesala tep, ‘Ne songe, ne dabale,’ tenena keca yumada gonga kemamsi. Deiyoda, sun mali kuna keca yuma kupyakaramya tepa. Atep, sun anesala yumada, ne mutu neitamai adi, enepra dokotepnepa, yuk mutupu benkamenge. Nedi sun anesala tep, ton bicau men tenenkamne. Tonda, sun nimi deiyo-deiyo neng yumadi, ne pepra deipsi upu yuma cap, ne cap tep, balila deipra yaninapu kununge. Atep, aneng yuma tep nengeda, kange men derinkamsene. Tonda, sun tep bicaue tenepnedi, sun ton pio men melimkamsene.

16 Atep nengeda, sun Efraim yala nengdi deiamipa, dadeipdanen yakaramyanen, deiami neng yumada, sun Israel tara kunge nesala yumada, nedi gonga keap konum wenepsidi, tupa wenemkamsene. Ukupmamtoda, nimidi kouamenge keca, koluamredi, du pio men mouramretopu kunkamenge. Tonda, yaten pulpula yuma peda, koluramretopu kunkamenge. Ange nongda ake. Ada, sun anesala yumada, nyapu ton pio men derinkamenge. Nyapu yambulanun ton deiptenga peda, sun pio bicau tenen, dipru karenkameng nyapu yumada, nedi popra gawal dakamne. Allahdi Hosea tep pepu.

Nabi Hoseadi sun Israel nesala kuraminge tep, pepu upu

17 Allahda, er nyapu sisa tep, kange deipredi, tupa bicaue men tenenkamre. Deiyoda, Allah erdi perur upu yumada, pio moupra men gekeramya tepa. Ange ukupramya tep, ne si eremnun Allah, erdi sun tep tapkamre. Erdi Israel nesala konum tapyopda, sun anesala yumadi, mutu ban-ban yuma tep epgirikra embanapu kunkamenge.

Nabi Hoseadi pepu.