Isa 10 | XteSC | STEP | Allahdi upepu. Sun amutu neitamai talepra kurumu nimi deiyo neng, sun upu bongdina deiyo nengdi, ne nyapu Israel nesala tep, sundi, ‘Ange-ange kuprume,” pepra, dimrumudi, anesala tek sisi kungetopu, upu men bongdirume. Deiyo men kwapmarepa, sun nong deiki ikin keca dopra derirumudi, mali weik kurume. Atep sun peda ikin keca weik doronkamrume.

Isaiah 10

Allahdi, sun nimi upu bongdina deiyo neng tep, wenepra pepu upu

1 Allahdi upepu.

Sun amutu neitamai talepra kurumu nimi deiyo neng, sun upu bongdina deiyo nengdi, ne nyapu Israel nesala tep, sundi, ‘Ange-ange kuprume,” pepra, dimrumudi, anesala tek sisi kungetopu, upu men bongdirume. Deiyo men kwapmarepa, sun nong deiki ikin keca dopra derirumudi, mali weik kurume. Atep sun peda ikin keca weik doronkamrume. 2 Sundi, ‘Ange-ange kuna gume,’ pemumya deiki, sun kan-kan nesala melipmanto ngeda, upu sengdongorumudi, men melimrume. Tonda, Sun yuk nengdi, sun kan-kan nesala tep, ‘Meliptepe’ tenen, keteneipmengopda, sun damai kurumu deiyo nengda, upu sekrumudi malingepu kurumupa, aikin kunge nesala men meliptenge. Tonda, ange utopu, sundi solu nerapu cap, lyan nyapu cap, sun talenge keca yuma dalupra dororume. Ukupmantoda, singa pusdi, bura tara gam kure keca popra jeramengtopu, sun peda sun kan-kan nesala teppu kurume.

3 Allahdi sun yuma tep wenepkamser taruda, sunda ware kupkamrum do? Tonda, sun wenemna tep, go karepredi, ikin keca doproipserepa, pio karen mutu, yu nengdi mar poryankamseng taruda, sunda ware kupkamrum do? Allahdi go kareprepa, karen mutu di poryankamseng nengdi yangopda, sunda dan mutu nengdi puto kuptengepa, sundi amutu nesala damai bena, ‘Uo nun ton melipserume,’ pepra, moroptum do? Tonda, wareto ngebo tep, ‘Melipseo,’ pepra moropkamrum do? Tonda, sundi talepra kumumdi isomka kumum keca yuma tep nengeda, ‘Inipra deiptepepa, upula men dopropkamseng’ tenen, dan mutu inipkamrum do? Gume men kwapmare.

4 Sundi, ‘Uo, nun cap, nun talenup isomka keca cap, iniptepyopda, sun karen mutu yu nengdi upula men dopropsetenge. Nunda nimi podanai bepepa, nun ton men popkamsenge. Tonda, nun ton tomopsengedi, ateng koupdongopra men dubenkamsenge,’ tenenmarum do? Gume, ange kupserya peda, Allahdi sun tep, ‘Uo, sunda bicaue’ tenen, men lyepropkamsere. Tupa wenemnapu kunkamsere. Uda, Allahdi sun Israel nesala tep, ikin keca weika di, sun nong deiki deipkamre dinin, konum kupyopda, erdi, ‘Dyo, akonuma’ tenen, er yuda gum men kupkamre. Erdi tupa yu kuprepa, er buru erepredi, sun Israel yala nesala tep, tupa wenemnapu kunkamsere.

Allah er putoda, Asyur mutu talepra kuramu ngebo deiki deipkamunge tep, pepu upu

5 Allahdi upepu.

Sun Asyur mutu kunge nesalada, sun tep, go karepnepa, sundi Israel nesala tep, ikin keca deipkamenge! Ne nyapu sisa, Israel nesaladi, mali weik kuramya tep, go karepnepa, sundi anesala porbenkameng dinino, amenda taruda, sun peda wenepra popkamne. Ukutaruda, sunda ne dounun kecada, tonda ne nimi pona tep tombak utopu kupra deipnepa, ne mawa nesala Israel neng tep popkamenge. Ada, ne yu weik kupnerepa derepne nesala, sun anesala deiki deipkamenge. 6 Ne nyapu Israel nesalada, sundi ne pemsi upu men gekengedi, nedi, ‘Telep kuna ngeda ake,’ penun upu yuma peda yanitamnunga cadi, Asyur mutu nesala doproipsenepa, Israel tara nesala porbenkamenge. Israel nengdi, mali weik kungepa, ne yu weik kupneua cadi, nedi sun Asyur mutu nesala tep, ‘Sun Israel nesalada, adipapu porbenkurume,’ pepra, sun Asyur mutu nesala doproipsenepa, ne nyapu sisa Israel nesala tep popra gawal dakamenge. Tonda, sun anesala popmengedi, sun talenung bung kecada, bena dalupra dopropkamenge. Sun Asyur mutu nesaladi, ne nyapu sisa Israel nesalada, tali bisai bute yanidongoramengtopu kupra popra yanipkamenge.” Allahdi pepu.

7 Upepu dingeda, adipapu dukdongopra aupu ton pepu. “Dinino, Asyur mutu talerur deiyo ngebo Rajadi, Allah peipu ngeda men tenerure. Tonda, er pedi, ‘Ukupkamne,’ tenemu ngeda, yuk kurure. Raja Asyurda, er pe kange dipapu, ‘Ne pe tenepnengepu kupkamne. Ada nedi ne pe ila puto deiki di talepnedi, ne damai dinin, nesala dana-dana tara neitamai, ban-ban yuma kunge nesalada, bena popnedi, gawal dakra gum kweipkamne,’ tenepu.

8 Angeda tali tep gume. Deiyoda, Raja Asyur er dipru eremna deiki di uperure. “Gume, nedi talenun nengda, ne amutara kunge jen talena neng, sun deiki tara deiyo-deiyo nengda, ila eremna neng, Raja neng utopu kununge. 9 Ne cap, ne jen talena neng cap, nundi ila ati arum kurami nesala weika di konum bisbisa kapmepudi poptapra gawal dakmepu. Ada, Kalno mutu cap, Karkemis mutu cap, Hamat mutu cap, Arpad mutu cap, Samaria mutu cap, Damasyik cap kurami nesala yumada, konum popra gawal dakamepu. Ukuameputopu, sun Israel tara kunge neng peda, popra gawal dakamepe.

10 Ne ila puto di taleamsi taruda, nedi ware kuprap mutu neitamai, nimi deiyo yuk-yuk kepra taleamidi, sun ila isok si talepra, si eremami mutu yumada, nedi popra gawal dakamsi. Amutu si pepman tara yumada, sun si eremami isokda, puto pio weik kurami. Dinino, Yehuda tara nesala, sun Yerusalem ila ati arum cap, Samarai tara kunge nesala cap, sundi si eremnung kecada puto yambulanunpu kurure. Atep nengeda, sun Israel nesala peda, kanam dipapu popra gawal dakamne. 11 Sun ton tenipetepso! Nedi Samaria mutu kurami nesala yuma cap, tonda sun si eremami isok-isok yuma capda, konum popra gawal daksidi, ange yuma konum gum kupra deipsi. Akupmasiya utopu, Yerusalem mutu kunung nesala cap, sundi, ‘Nun nai bo Allah,’ pepra, si eremnung keca peda, bena gum kupra deipkaman ja!” teneredi perure.

12 Raja Asyur tep utenepra perur dinino, Allahda, akeca-keca deiki tara erepra, ila puto weik kurur ngebodi, tamupra pepsere.

“Ne tenepsinge, Sion mutu deiki cap, tonda Yerusalem mutu ila ati arum neitamai kunge nesala cap, sun wenemna tep konum wenepnedi popnyopda, ne dipapu tamupra, Asyur mutu talepra kurur deiyo ngebo, Raja Asyur tep, ila di wenepkamne. Ada, angebodi er dipru eremna deiki di, gemepra salnong-nong kamredi, ila upu weika di perura cadi, ukurya tep nengeda, nedi ila ikin keca dopra, er nong deiki deipkamne ja! 13 Angebo wenepkamnada, tali tep guma! Deiyoda, Asyur mutu taleamu nimi deiyo ngebo, mok upu deiki di uperure. “Gume, sun dana-dana tara kurami nesala yumada, ne pe puto deiki dipapu popra gawal daksi. Tonda neda kael kemna deiyo keca, weika di kael kepsidi, pio nong pumbon kure keca kael ngebo kununa cadi, nedi amutu-amutu nesala poptapsidi, sun talerami tu wilimdonai mutu yumada, konum gum kupra deipsi. Tonda, sun mawa derirami kunumna weik keca yumada, konum dalupra doropsi. Ila jem sapi bisam puto weik kuramretopu, ne peda utopu puto weik kunedi, Raja kuramenge nengda, nimi deiyo neng bungamengai, tahkta deiki bukami dinin, aneng popsidi, ne amutarapu kepra deipsi.

14 Tonda, mutu ban-ban yuma kunung nesalada, ma ati dopra du deiamrepa, nimidi tali lupra bena dororamengtopu, nedi poptapsi nesala talerami bung keca, kunumna weik deiaminge yumada, konum bena dalupra doropsi. Akeca yuma dopropsi taruda, amutu kurami nesala kan-kan di, tenpu ngebo peda, ‘Gume, angeda ukuna gume. Akecada, men doproptume,’ pepra, upu men seknei. Ukupmantoda, ma du deiamredi, tamrepa, nimidi tali lupra dopropmengepa, amadi upu pena gum, tonda lakra bana gum di, tali dim pepra bungamretopu kupra, nedi amutu-amutu yuma bena, poptapsidi, sun keca upula dopramsi. Dopropsi taruda, tenpunge peda, sun si akra yu upu ton, meteka peda pio men pepnei.” Utenepra, Asyur mutu taleamu Rajadi pepu.

15 Upepu dinino, Allahdi tamupra adomon upu pepu.”

Ukupmantoda, kan kapak ^{▼▼kapak ya – Adomon upu neitamaida, kapak ya pepkada, er deiyo neitamaida, nimi tep pepu. Akapak ya dopmar ngebo pepka deiyoda, Allah tep tenepudi pepu. Angetopu, macada ada nimi dinin, maca dopmar ngeboda, Allah tep tenepudi, pepu.} yadi, akapak ya doupmarem ngebo tep, ‘Kanda ne doupmanerem dinin, ila mambul ngeda ne pua,’ pepra, salnong-nong kaptu do? Gume nimidi kapak ketkemnunga tepa. Utopu tonda, co sengna keca gergajida, er agergaji doupmare ngebo tep, ‘Kanda, ne doupmanerem dinin, ila mambul ngeda ne pua,’ pepra, salnong-nong kaptu do? Ange utopu, tonda nimidi, ‘Maca doupra benkamap’ tenen, bura tara yambul co sekra deipmengedi keteneipmengopda, sundi derinung co, er dipapu, aco keteneipmare ngebo, er nong erepra men dourure. Ange utopu, gam men kure maca coda, er sekra keteneipmare ngeboda, gam kure ngebodi ereiptu do? Gume, ange men kupmanto dinino, nimidi atali apetupra derinung coda, erepra dourure.

16 Ange tep nengeda, Allah Yahweh akeca-keca yuma talepra deiki tara erepra, ila puto weik kure ngebodi, im deiki jen talena malaikat yuma, sun deiyo ngebo kurure. Asyur mutu talepra kurura deiyo ngebo, erdi dipru eremna deiki di konum salnong-nong kamrura cadi, Allahdi angebo wenepkamre. Ada, Allahdi Raja Asyur, er amutara ila puto kunge jen talena neng tep, ila kange mun pu kareprepa, sun nong bol deiki yumada, mali kupkamre ja. Sun nong neitamaida, kange mun pu jeprepa, sun nong puto yumada bounpu kupkamre. Ataruda, Allahdi Asyur mutu nesala yuma cap, sun talenung bung keca yuma capda, mali kweipkamre. Ukupmantoda, nimidi uku deipmengepa, ila imna uku bu di akeca-keca yuma jepra gawal dangamretopu, Allahdi sun Asyur mutu nesala kangeda, ‘Angeda mambule,’ tenenung keca yuma gum kupra deipkamre ja.

17 Allahdi, sun Israel yala nesala tep, dirine utopu kupreya deiki di sun melimrure. Erda, sun Dirine Deiyo Ngebo ^{▼▼Dirine deiyo ngebo – Aupuda, ukupmanto tep pepu dinin, aupu deiyoda, Allahdi sun Israel nesala tep, “Telep bisi benkamrum ngeda ake. Mali kuna ngeda ake cadi, ange pio men kunkamrume,” pepra, peteremrur deiyo ngebo kurura tep pepu.} kurur dinin, amenda taruda, ila uku bu utopu kupkamre. Allahda pio dumsisipu kure ngebo dinin, amenda taruda, yu weik kuprepa, erda ila uku bu utopu kupkamre ja. Ila uku bu jeramretopu konum kupyopda, tenpu tumi deiki di, atali paramre takke ^{▼▼takke keca – Aupuda, ukupmanto tep pepu dinin, aupu deiyoda, sun Asyur mutu mali kurami jen talena neng tep pepu. Allahdi sun Asyur mutu jen talena neng yuma tep, wenepra poptapkamra cadi, anesala tep ‘takke keca’ tonda ‘mutmuta’ pepu. ‘Uku bu’ pepkada, ada Allah er pedi kange mun wenemna keca karepkamra deiki di, aneng yuma popra gawal dakamra tep pepu.} keca yuma cap, mutmuta yuma capda, er uku di atali keca yuma jepra gawal dakropkamre.

18 Asyur mutu neitamaida, bura tara pio telep ila co palpal mutu kurure. Tonda, wa penai sukun tuai weika di ton akurure. Ange yuma tep nengeda, nimidi, ‘Uo, angeda pio telepe,’ tenepra telep upu penunge. Dinino, atelepai yuma capda, Allahdi pio gum kupra deipkamne. Ukupmanto pu jen ngebo, er pu pio jeramyane, depmanto kupredi, pio bol mali douramretopu kupra deiprepa, ange yuma pio mali kupkamre. Allahdi Asyur nesala sun nong cap, sun sambala capda, popra gawal dakamre ja. 19 Asyur mutu deiyo ngebodi taleamu mutu neitamai tekamu co palpal yumada yambulanunpu tapkamre. Taprepa, pio yambul midi acoda nukamre. Ada, yambulanunpu tupa akapkamra tep, akurepa, metek midi nukamre.

‘Israel nesalada, nimi yambulanunpu wepra lyepropkamre,’ pepu upu

20 Amenda yankamre taruda, Allahdi Israel nesala sun deiki ikin keca deiprepa, nimi weika di depkameng dinin, sun akeca men doropkameng neng, tupa gam kunkameng nesalada, yambulanunpu kunkamenge. Menop taruda, yuk karen mutu nimi deiyo ngebo, Raja Asyur tep, ‘Er dipapu lyepropkamsere,’ tenepidi, er tep moropi dinin, angebodi sun tara nimi weika di popra gawal daku. Angebodi, sun popra yaniptamu dinin, yambulanun tupa gam kunkameng nengda, er tep, ‘Er dipapu melipra lyepropkamsere,’ men tenenkamenge. Utopu, Yakubdi deiamupa, dadeipdanen yakaramidi, yambulanun tupa kunge nesalada, angebo tep, ‘Melipra lyepsetue,’ pio men tenenkamenge. Ange gum dinino, Israel nesala yuma, sun nai bo Allah Yahweh tep, pio tek sisi teka tenenkamenge. Allahda, pio dumsisi kuredi, pio lengna ngebo Allah kurure.

21 Tek sisi, Israel yala nesala, yambulanun tupa gam kunkameng nesala, Yakub erdi deipupa, dadeipdanen bangedi, tupa kunkameng nesalada, ‘Nun mali kuramepunge tapmepedi, Allah er tepapu teka tenenkamepe,’ tenepmengedi, sun nai bo Allah tep, ‘Erda ila puto weik kurure,’ tenen, ‘Erpu talepmepedi, er upupu gekenkamepe,’ tenepmengedi er damaipu tamupra yankamenge. 22 Menop taruda, Israel nesalada pio weik, ila laut mokon pirman gel wenenga pio weik kuramretopu kurami. Dinino, amenda yankamre taruda, anesala popra dubenamidi ateng koupdongomi mutu di tapra, yambulanunpu Allah damai tamupra yankamenge. Allahdi, ‘Asyur mutu nesala wenepra popkamne,’ tenemu taruda, konum damai kepu. Allahda tek sisi pio dumsisipu kurur ngebo cadi, tek sisi amutu kunung nesalada, sun pedi mali kununga menenga tep, Allahdi anesala wenepra popkamre.

23 Teka, Allah Yahwehda, im deiki kunge jen talena malaikat yuma, sun deiyo ngebo kurura cadi, erdi aupu pepsere. “Tuai mutu ban-ban yumada, amutu-amutu neitamai kunung nesala yumada, popra gawal dakamne. Neda Allah, ne si Yahweh akeca-keca yuma talepra, deiki tara erepra ila puto ngebo kunune. Nedi tuai mutu yuma popra gawal daknedi, sikke buktapkamne,” peipseu. Angeda, Allahdi, ‘Ukupkamne,’ tenepunge cadi, pio men gum kuptue. Tek sisi kupkamre ja.

Allah Yahwehdi, ‘Asyur mutu Raja tep, wenepra poptapkamne,’ tenepka tep, pepu upu

24 Allah Yahweh im deiki kunge jen talena malaikat yuma, sun deiyo ngebo kurure. Erdi upeipseu. “Ne nyapu sisa Israel nesala dinin, sun Sion mutu neitamai kunung nesala tep pepsene. Sunda, Asyur mutu neng tep, kware men dangkamrume. Sun Israel nesalada, menop taru Mesir mutu kuramrumpa, sun deiki ikin keca deipseidi, maca co dopra, sun nong deiki bongoramseitopu, sun Asyur neng peda, utopu kupkamseng taruda, anesala tep kware men dangkamrume. 25 ‘Sun tupa kware men dangkamrume,’ pepsen ngeda, tali tep men pepsene. Deiyoda, ne Allahdi sun Israel nesaladi mali weik kuramrumnge tep, ne yu tenepsisi ngeda, yambulanunpu tupa kapkamre dinin, amenda taru menmena gum kupkamnere. Sun Israel nesala tep, yu ton tupa men kupneryopda, ne yu weik tupa akupkamnere ngeda, sun Asyru mutu nesala tep, sun nong deiki deipnedi, anesala yuma wenepra popra gum kweipkamne. Allahdi peipseu.

26 Allahda, ila puto weik kure ngeboda, im deiki kunge jen talen malaikat yuma, sun deiyo ngebo kurure. Erdi sun Asyur mutu neng tep wenepkamre. Ada, gat tapu talepredi sun nong deiki bongopra wenepkamre. Ada men taru Midian mutu tara kurami nesalada, Oreb ^{▼▼Oreb mutu – Aupu deiyoda, Hakim-Hakim pasal 7, ayat 24-25 akapka cadi, acei dipu dipra kael kepkurume. Allahdi tenpu ngebo er si Gideon tep melipka deiki di, Midian mutu kurami nesala popra gawal daku.} mutu yangne gel damai kurami nesala popra wenemutopu kupkamre. Tonda, er maca dopra, ila laut mokon deiki dopkamre. Ada Mesir mutu ^{▼▼Mesir mutu – Aupu deiyoda, buku Keluaran neitamai akapka cadi, acei dipu dipra kael kepkurume. Allahdi Musa tep melipka deiki di, er maca erepupa, laut mokon di sun Mesir mutu jen talena neng yuma singipdongopudi jepropu. Mesir mutu jen talena neng popra gawal daku.} nesala popra wenemutopu, Asyur mutu nesala peda wenepra popkamre.

27 Allahdi sun Asyur mutu neng popkamre taruda, sun Israel nesala loptapredi lyepropkamre. Ada, Asyur mutu nengdi ila ikin keca sun morokyo deiki deiamseinge cap, sun nong deiki ikin keca deipra darapdongomseinge capda, Allahdi sun tep melipra lyepropkamsere. Ukupserepa, sundi ton cap talepsengedi, ikin keca men derinkamsenge. ^{▼▼– Aceida, Ibrani upu neitamaida upu weneri ton akapu dinin, ukutaruda aupu deiyoda men kael keptepe. Ton Allah upu seki bukuda, ‘Rimon mutu di yakanmare’ seki.}

Sun Asyur mutu mar pona nengdi poryankamenga tep, pepu upu

28 Asyur mutu jen talena nengdi Ayat mutu ^{▼▼Ayat mutu – Aupu neitamaida, amutu-amutu sida Israel nesala kurami tara dinin, dapu tara (arah utara) di dipdongopra, iknapi dam tara (arah selatan) kwamu mutu seki. Tonda, sun Asyur mutu jen talena nengdi, ‘Yerusalem mutu popra sikke buktapkamep’ tenen, arah utara Ayat mutu di, arah selatan Gebim mutudi (ayat 31) kwerepra yana poryakarami.} damai konum poryanmai. Ukupi dingeda, sun ajen talena nengda Mikron ^{▼▼Mikron mutu Amutuda, Yudea tara neitamai dinin, arah utara ila ati arum domipa, kwamu.} mutu bisi tara di keproidi yanami. Adinin dipra ortara mutuda, Mikmas mutu damai bena, Asyur mutu jen talena neng, sun bung kecada Mikmas mutu neitamaipu mawa deipi.

29 Asyur mutu jen nengda, mutu dam tara bisi di kepra yakanmange. Sunda abisi kepra yakanganen, Geba ^{▼▼Geba mutu – Amutu kurami nengdi, nabi Samuel deiami (1 Samuel 8:4).} mutu yana, keana taru mapmai. Mapmaiya berekopda, amutu damai kwamu mutu, Rama mutu kurami nesala yumada kwar kunmai. Tonda, Raja Saul deiamu nengdi taleami mutu, Gibea ^{▼▼Gibea mutu – Amutuda, Raja Saul, er apu yapudi, Saul deiamipa, amenda taru konum nepkopda, Raja kuramu taru Gibea mutu neitamai taleamudi dakuramu (1 Samuel 14:16).} mutu kurami nesalada, kwar weik kupmaupa, sun nong yuma moropsemai. Kware weik kupmaua cadi, amutu nengdi, bura saka sepdaro bendopmai. 30 Uo, sun Galim mutu ila ati arum dopra kunge nesala cap, Galim mutu dana-dana tara kunmang nesala capda, sundi, ‘Uo, ajen nengdi popsenunga cadi, melipseso!’ pepra, mali pepra, engepra ngolongmange! Tonda, sun Laisya mutu kunmarum nesalada, moupra gekepkurume! Ananot ^{▼▼Anatot mutu – Amutuda, Yerusalem mutu damai kwamu dinin, Yerusalem deiki tara (arah utara) kwamu. Amutu kurami nengdi, nabi Yeremia deiami. Laisya mutu peda Yerusalem mutu damai kwamu.} mutu kunmarum nesalada, Galim mutu nengdi moropmaseng upu tep, bicau tenepmumdi, aupu gekeprapmumdi, Galim mutu neng tep melipkurume!

31 Sun Madmena ^{▼▼Madmena mutu – Amutu Madmena mutu cap, tonda Gebim mutu capda, Yerusalem ila ati arum damai kwamu dinin, Yerusalem deiki tara (arah utara) kwamu.} mutu kunmang nesala cap, Gebim mutu kunmang nesala capda, ‘Asyur jen talena nengdi poptapsenung’ tenen, sun kunge mutu di tapra, bura saka bendopmange. 32 Atumi peda, Asyur mutu jen nengda, Nob mutu yana kunmange. Ukunmangdi, sun buru getepra eremengedi, Yerusalem ila ati arum kunge nesala yuma tep, dupal copmengedi wenepkamange. Ada, Sion mutu deikipu kunmang nesala tep, ‘Sun moupra diso! Sun Yerusalem mutu ila ati arum kunmarum nesala tep, nun adipapu yana popkusepe’ tenen, kunmange.

33 Asyur mutu jen nengdi, ‘Ukupkupe’ tenen, ketenepmang dinino, sun yuma diso! Allah Yahweh akeca-keca yuma talepra deiki tara ila puto kure ngeboda, im deiki jen talena malaikat yuma, sun deiyo ngebodi, melipkusere! Ada, sun Asyur mutu jen neng yumadi, ‘Yerusalem mutu nesala poptapkupe’ tenen, ketenepmang ngeda, upu sekredi, aneng tep, amu tara kepra deipkamare. Ukupmantoda, Allahda ila puto ngebodi, ila tekamu lyom co welepredi, teru yuma yatupra tuai dokotemamretopu kupkamare. Ada, Allah erdi sun Asyur mutu neng, sun dipru erepra salnong-nong kamnung nengda, sun wenemna tep amutara kepra deipkamare.

34 Allah er puto weik ngebo kurura cadi, ila co palpal neitamai tekamu co yuma kwepkamre. Ukupmantoda, nimi di Kapak ya doupra bengedi, ila co palpal yuma kwemamengtopu kupra, deipkamre. Ada, sun Asyur mutu nengda, puto weik kunung dinin, sun tep amutara kepra deipkamare. Asyur mutu jen nengda ukupmanto, Libanon mutu ila lyom gat co tengamretopu kunung dinin, Allahdi sun yumada, kwepra tapkamare.