Isa 11 | XteSC | STEP | Pumun taru kuramu ila nimi deiyo ngebo Daud, er nai bo Isai kuramudi, deipupa, dadeipdanen bankameng nesala neitamai di, kweptamenge co gonga, kange di gapu ukupunge youpredi bongopra nepredi, du mouramretopu, Daud er yala neng deiki di ila nimi deiyo ngebo yankamre.

Isaiah 11

‘Nimi Lyemna Deiyo Ngeboda amenda yankamre,’ pepu upu

1 Pumun taru kuramu ila nimi deiyo ngebo Daud, er nai bo Isai kuramudi, deipupa, dadeipdanen bankameng nesala neitamai di, kweptamenge co gonga, kange di gapu ukupunge youpredi bongopra nepredi, du mouramretopu, Daud er yala neng deiki di ila nimi deiyo ngebo yankamre. 2 Ayankamre ngeboda, Allah er si Yahweh, er Lek Sambala er nong deiki akunkamre. Allah er Lek Sambaladi ila kael kemna deiyo keca cap, ila kael deiki di akeca-keca yuma telep kupra kuna deiyo keca cap, ila puto kuna deiyo keca cap, ‘Ukunkamrume,’ pepra, dipru kwa dimna deiyo keca cap, angebo tep karenkamre. Ukupra karepre pangeda, angebodi, Allah er si Yahweh tep, er pelpu doredi, er tep si eremredi, gispal donkamre. 3 Ukuredi, kange deipra kunkamre ngeda, Allah er si Yahweh tep kware tenepra bouna di kunkamre. Angebodi nimi tep upu bongdinkamre taruda, tali nong bol deikingepu epra upu men bongdinkamre. Ange utopu, tali amul deiki gekeprengepu, ‘Akonuma tenen,’ upu men bongdinkamre.

4 Ange gum dinin, erdi kankan kunge nesala cap, puto boun nesala cap tep, er dumsisi kurya deiki di upu bongdinkamre. Ila-ila isomka nengdi, tali kankan kunge nesala tep, yanitamengepa, kankan kunge nesaladi, ‘Uo ware kuptepe do?’ tenen, mali kange doupra moronge nesala tep, pio teleppu kudinkamre. Ukupmanto ngeda, co balena puto di tu deiki poramengtopu, sun mali kunge nesala tep, wenepredi poptapkamre. Mali kupra kuramenge nesalada, er upu penkamra deiki di, wenepra poptapkamre.

5 Ukupmanto ngeda, ila puto nengdi urasin telep deiyoteng moupra deriramengtopu, er pel donkamrenge cap, kunkamrenge capda, dumsisipu kunkamre. Tonda, nimi deiyo neng Raja nengdi, pio telep boun opkal lyomnge di, deiyo deiki deipra koudongoramengtopu, angebodi, ‘Ukunkamne, ukupra melimkamsene,’ pepra persere upu yumada, tamna gum dipapu, pio tek sisingepu kunkamsere. Tenpunge peda, men tamkamre.

6 Amenda sirya taru akeca-keca yuma konum telep kupra deipseryopda, yu bura kam cap, domba bisam cap podana gum di, kikiman wisipra kunkamrenge. Ange utopu, ila yu bura pus er si macan tutul cap, kambing bisam cap, podana gum di, kikiman wisipra kunkamrenge. Utopu sapi bisam mi cap, yu bura singa kam cap, podana gum di, kikiman wisipra kunkamrenge. Agam keca cap, yu keca cap, kikiman kunkameng taruda, tenpu metek mi mepra barepa, akeca yuma podana gum dipapu, er amenda tara domyakankamenge.

7 Tonda, sapi bisam manmaneng bo jere taruda, bura yua bisam utopu gam keca cap, kikiman wisipra manmaneng batu jenkamrenge. Ukurengopda, sun nyapu peda utopu kikimanpu mankamenge. Tonda bura yu pus er sida, singa pus peda, sapi bisam manmaneng batu jeramretopu jenkamre. Yuk gam keca popra jeramutopu, men kunkamre. 8 Metek nyapu esu pepdanen embanmankapmengedi, sun buruda, nimi pon bal er sida, kobom bal mapmaryai buru deipkamenge. Ukupkameng dinin, abaldi men si topkamre.

9 Allahdi talenkamre mutu yuma cap, ‘Pio Lek, telepai kupkamre,’ tenen, weamu mutu, Sion mutu deiki capda, pio men podankamenge. Amutu yumada, mali kun keca cap, dipruai di mali tenena keca capda, pio men kunkamre. Teleppu kunkamenga deiyoda, ake. Ada, mutu ban-ban yuma neitamaida, Allah Yahweh ^{▼▼Yahweh – Allah er si, tek sisi ngeda, ‘Yahweh’ kurure. Ibrani upu deiki di, asi er deiyoda, ‘Ne pio akunune,’ kurure. Ada, akeca-keca yuma kapul men ketekeipra deiamu taruda, Allah konum akuramu. Tonda, ataru di dipra, pio dorkunkamre taru peda, Allah pio akunkamrure. Allahdi Musa tep, er si katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra, ne tep gispal donkamnerume,” pepu. Ibrani nesaladi huruf YHWH sengnung dinin, nundi, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda, lap pena upu nomor 49 dirume.} er nong cap, er kun keca cap tep, moupra kael kemengedi, pio teleppu kunkamenge. Ukupmantoda, ila laut mokon deipra dekpepupa, yuk keca yuma men kuretopu, sirya taruda, mutu ban-ban yuma, Allah Yahweh er kure kecapu weik kupra dekpeprorepa, yuk keca ton pio men kunkamre.

Israel nesala yuk mutu dadoupra derirbenamengepane, Yerusalem tara tamupra yankamenga tep, pepu upu

10 Allahdi tenemu taru konum kepyopda, Isaidi deiamu ngebo, Dauddi deiamupa, deipdanen yakaramyanen, deipmengepa amenda taru Raja kepkamre ngebo tep, ban-ban yuma kunkameng nesaladi, er tepapu dinkamenge. Sun ban-ban yuma kunkameng nesala yumada, er angebo kuramyaipu yangedi, ‘Uo, angebo nun ton kael keptepe’ tenen, er damai yangedi, er tepapu gispal donkamenge. Er angebo kunkamraida, pio teleppu kupkamra cadi, nimi ban-ban yuma epmengedi, ‘Uo, er kururaida pio telepe,’ tenenkamenge. 11 Ange yuma katuaipu kupkamre taruda, Allahda akeca-keca yuma talepra, ila puto weik kure ngebodi, er buru bepekredi, kange di ton cap butene taru ^{▼▼Butene taru – Butene taru pepkada, ada yuk karen mutu nengdi, Israel nesala popidi, ateng koupra dubenamidi, ikin pel dimamipa, sun mutu tamupra men benmanto kurami dinin, Allahdi Israel nesala tep amenda taru loptapredi, sun pe mutu tamupra duyankamra tep pepu. Menmena taru ngeda, ada Israel nesala Mesir mutu neitamai ikin weik kuramipanen, Allahdi sun lyepropu taru tenepka tep, aceida amenda ‘butene taru’ tep pepu.} deiki, Israel yala nesala talepredi, er nyapu sisa lyepredi, sun dana-dana tara kunkamengai di, sun pe mutu tamupra duyankamre. Ada, Asyur mutu cap, Mesir mutu cap, Patros mutu neitamai cap, Sudan mutu cap, Elam mutu cap, Babel mutu cap, Hamat mutu cap, tonda ila laut mokon pirmanai cap, dakunung mutu pio karenai cap, tupa ton akunmange Israel nesalada dopra, tamupra, sun pe mutu sisa neitamai duyankamre.

12 Allah Yahweh erdi sun Israel yala gum nesala, ‘Ban-ban yuma kunge nesala epmengedi kael kepkameng’ tenen, peten kemdina tep ukupu nimi deiyo ngebo erepra deipkamre. Ada ukupmanto, nimidi, ‘Aceida, nimi yuma bulupra diryankameng’ tenen, bendera ton erepra deriramengtopu, Israel yala ngebo ton, ukupu nimi deiyo ngebo erepra deipkamre. Tonda, men taru yu nengdi Israel tara kurami nesala cap, Yehuda tara kurami nesala cap, popidi tomopra karen mutu dubenamipa, tuai mutu dana-dana tara yuma dakurami. Dinino, Allahdi im sirik mutu sirik dana-dana tara kuramengai di anesala dopra, sun pe mutu duyaredi yana bupra deiprepa, tenpu kepra kunkamenge. 13 Ataruda, sun Israel yala nesala yumadi, Yehuda yala neng kunge keca cap, talenge keca cap tep, ‘Uo, sun kunge keca cap, sundi talenge keca capda, nun ngepu kupsetue’ tenen, dipru pu jeramre ngeda, tup men kupkamenge. Tonda, sun Yehuda yala nesaladi, Israel yala neng yuma tep, tupa ton cap men mar penkamnge. Tali kange doupra kunkamenge.

14 Ukupmengopda, sun abutene yala neng kikiman keproprengedi, sun Filistin neng porbana tep, keteng dangban tara kikiman mar porbenkamrenge. Tonda, sun butene yala nengdi, ortara keteng yakan tara kunkameng tara nesalada, sun taleramenge bung keca yumada, bena dalupra doropkamenge. Israel yala neng cap, Yehuda yala neng cap, sundi Edom mutu kunung nesala cap, Moab mutu kunung nesala cap, bena popkamenge. Ukupmengepa, Amon yala nesala yumada, sun abutene yala nesala, sun amutarapu kunkamenge.

15 Allahdi Mesir mutu damai ila laut mokon ^{▼▼laut mokon – Alaut mokon pepkada, nun kangeda, ‘Ataruda, amokon tep, yambul laut, er si Suez tep pepke,’ tenepmepe.} deiamu ngeda, cepra deiprepa gelal sepkamre. Allah erdi ila bupu kumanya doproiprepa yaredi, ortara ila embaramre me, er si Efrat meda, bokra gang-gang yoneitam bari kepra, yambul me deipredi, pumbon men kupkamre. Me mokonda dalpu kupkamra cadi, ukupyopda, nimida yan bol kepra, ame cepropya deiki yanipra, me goupra ortara tali lupra benkamenge. 16 Amenda taruda, Allahdi akeca-keca yuma kupkamre taru neitamai di, Allah er nyapu sisa, Israel nesala ton tupa gam kunkamang nengda, Asyur mutu di ila bisi yo ketenepra deiprepa, sunda abisipu yankamenge. Ada men taru, Allah er nyapu sisa Israel nesala, Mesir mutu neitamai ikin weik kuramipanen, Allahdi sun doupra yanamu utopu, amenda taru peda ange utopu ton cap ukupkamre.