Isa 12 | XteSC | STEP | Allahdi akeca yuma konum kupyopda, sun Israel nesaladi mut pepkamrume. Sundi penkamrum ngeda ake. “Uo, nun nai Allah Yahweh, nundi kan tepapu telepe pepkepe. Ada, kange mun kuramepu dinin, kandi nun dipru kwa dipsemumdi, puto kepra deipsemume. Pumun taruda, kandi nun mali kuramepunge tep, yu kupkeupa, ila di wenemsemume. Dinino ataruda, kandi nun tep yu tenemsemum ngeda, konum gum kupmakera tep, kange deipsereme.

Isaiah 12

Mut pena deiki di, ‘Telepe,’ pepra, gispal donkameng nge tep, pepu upu

1 Allahdi akeca yuma konum kupyopda, sun Israel nesaladi mut pepkamrume. Sundi penkamrum ngeda ake.
“Uo, nun nai Allah Yahweh, nundi kan tepapu telepe pepkepe. Ada, kange mun kuramepu dinin, kandi nun dipru kwa dipsemumdi, puto kepra deipsemume.
Pumun taruda, kandi nun mali kuramepunge tep, yu kupkeupa, ila di wenemsemume. Dinino ataruda, kandi nun tep yu tenemsemum ngeda, konum gum kupmakera tep, kange deipsereme.
2 Tek sisi, Allah erda nun Lyemna Deiyo Ngebo kurure. Nundi er tepapu teka tenenkamkepe. Nunda, kwar men kunkamser dinin, ukutaruda, ‘Allah er dipapu nun tep melipra lyepropkamser’ tenen, teka tenenkamepe.
Angeda tali tep gum dinin, deiyoda nun nai bo Allah, er si Yahweh, erdi nun puto kepra deriserure. Atep nengeda, mut pena deiki nundi er sipu eremkamepe.
Tonda, nun Lyemna Deiyo Ngeboda, Allah erpu kurure.” Upepra Allah er si eremkammrume.
3 Allahdi sun tep lyepropseredi, kange di ton cap telep kupra deipkamser taruda, sunda pio kange deipkamrume.
Ukupmantoda, me putanmare neng, me bungna di gwepra jepmengedi, kange deriramengtopu, ataruda sun peda utopu ila kange deipkamrume.

4 Ataru konum kepyopda, sundi upepkamrume.
“Nun yumadi Allah er tepapu, telepe pepra, er sipu erepkupe! Tonda, ‘Er dipapu melipra lyepropkamser’ tenen, er tepapu moropmepedi, er sipu eremkamepe.
Tonda, Allah er ila puto di mambul pel dorurnge yumada, ‘Yuk mutu nesala yuma gekepkameng’ tenen, ange lap perbenkamrume.
Tonda, ‘Nun nai bo Allah, ila mambul ngebo kurura cadi, er pio telep sipu pio telepe,’ pepra, eremkamepe. Atep aupu pepra, lap perbenkamrume.
5 Mut pena deiki di, Allah er tepapu gispal donkamepe. Ada, Allah er dipapu, nun nimidi men kupmanto keca weik kurura tep, erdi pel dorurnge yumada, pio telepe.
Tuai mutu ban-ban yuma kunung nesalada, Allah er ila puto di, pio telep pel dorurnge gekenkamenga tep, aupu lap perbenkamrume.
6 Sun Sion mutu kurum nesalao, kange lopserepa, ila upuda weika di pepmumdi, Allah gispal don mut penkamrume.
Ukunkamrumada, tali tep gum dinin, deiyoda, Israel nesala sun nai bo Allah, mali kun keca tenpu peda men kuredi, pio Dumsisi Lengnapu Ngebo kurure.
Tonda, erda pio ila eremna ngebo, sun kan-kan kurepa, sun cap tonpa kikimanpu kunkamrume.