Isa 13 | XteSC | STEP | Allah erdi Babel mutu nesala wenepkamra tep, Amos er mi nabi Yesaya tep karepupa, Yesaya ken mapka deiki di, aupu gekepu. Ada, Allahdi peipupa, Yesayadi gekepu upuda ake.

Isaiah 13

Allahdi Babel mutu nesala wenepkamra tep, pepu upu

1 Allah erdi Babel mutu nesala wenepkamra tep, Amos er mi nabi Yesaya tep karepupa, Yesaya ken mapka deiki di, aupu gekepu. Ada, Allahdi peipupa, Yesayadi gekepu upuda ake.

2 ‘Jen talena nengdi adipapu poryakameng’ tenen, peten kemdin keca, er si bendera erepra gerekotepra deripkotepkamrume. Ada, akeca-keca men kapmare mutu, ila lyom mutu dupai deiki tara yana petenkemna keca erepra, gerekotepmumdi bomtonkurume! Ukupmumdi, jen neng tep, ila upu di upuprumupa, gekepmengedi yankamenge. Ada, Allahdi, ‘Anesala ^{▼▼anesala – ‘Anesala’ pepkada, ada Babel mutu ila yu nesala tep pepu. Tonda, ayat 19 neitamai dinkurume. Babel mutu nengdi, keteng tamun 597 deiki di, Yudea tara kurami Israel yala nesala yuma popra gawal daki. Ukupi dingeda, keteng tamun 587 deiki di Yerusalem mutu yana popra sikke buktapi.} wenepra popkamne,’ tenemu nesala, sun mutu porbenkamenge. Amutu ila nimi deiyo neng, sun potokra deipi bisi buplan damaipu bena wekmengedi, anesala popkamenge. 3 Ne Allah dipapu, nedi wepra deipsi neng tep, ‘Sundi ne tenepsi pel dopkamneng’ tenen, ‘Sunda ukupkurume,’ pepra, sun deiki konum pepra deipsi. Tonda, ne yu weik kupneupa, nedi wepra deipsi neng, sun puto weik jen talena neng tep, ‘Sunda yana bulupkurume,’ pepra deipsi.

Bulupmengopda, nedi, ‘Ne yu weik kupnerura cadi, ne tenepsi nesalada, sundi anesala deiki ikin keca deipra wenepmumdi popkamrume,’ pepnyopda, ajen talena nengdi anesala porbenkamenge. Ajen nengda, salnong-nong kunung dinin, ‘Anesala porbenkurume,’ pepra deipnyopda, sun ajen nengda, ‘Dyo, nundi kupkupe’ tenen, kange deipra ketenepkamenge.

4 Sun yuma diso! Mutu deiki tara di lelim weik penmarepa gekepkamrume. Alelimda, mutu dup deiki nimi denge pio weik bulupra wekmangedi, sun upu ila di peramengtopu, penmangepa gekepkurume. Sun yuma gekepso! Aupuda, dana-dana tara kunge nesala cap, sun nimi deiyo neng cap, denge pio weik bupra tonpa wekmangedi, ila upu di penmangepa, ila lelim peramretopu, sun ton gekepkurume. Anesala denge pio weik bulupmangedi, lelim weik penmangada, tali tep men perure. Deiyoda, ne Allah akeca-keca yuma deiki tara erepra, im deiki kunge jen talena malaikat, sun deiyo ngebo kunune. Ne dipapu, jen talena neng men nukmanto, denge pio weik, nimi porbana tep bupra deipnepa, ketenepkamenge.

5 Sun ajen talena nengda, pio karenai mutuda, mutu sirik, im sirik dakuramenge neng bupra yakankamenge. Ne Allah cap, sun cap, nun kikiman bepedi, ne tenepsi mutu kunung nesala popra, gawal dakra gum kweipkamepe. Ada, ne cap, ne wepra deipsi jen neng cap, nun kikiman di, sun mali kunge nesala yuma tep, popmepedi, gawal dakamepe.

6 Sun wenepkamne mutu neitamai kurum nesalada, kange mun kange doupmumdi, ila di engenkamrume. Ada, ne Yahwehdi sun tep, ‘Wenepra popkamsene’ tenepsi taruda, konum damai kupmara tepa. Ataruda, ne Allahdi akeca-keca yuma talepra deiki tara erepra, Ila Puto Weik Deiyo Ngebo ^{▼▼Ngebo – Acada, Ibrani upu deiki di, Allah er si tep, ‘Allah Shadday’ pepra seki. Aupu ‘Shadday’ sekinge deiyoda, sundi, ‘Allahda akeca-keca yuma talepra, pio deiki tara kuredi, pio Ila Puto Deiyo Ngebo kurure,’ tenena tep, aupu ‘Shadday’ pepra seki. Sun Ketengban nesala kael kemna tep, angeda konum jenek kupra sekmepu.} kunedi, ne tenepsi nesala yumada, popra gum kweipkamsena tepa. 7 Atep nengeda, sun wenepra poptapkamsen nesala yumada, pio kware weik kupserepa, sun nong yumada puto bounpu kupkamsere. Tonda, kware weik kupserepa, sun dipru pu jepseredi buluksakrepa, akeca-keca yuma men kupmanto pio kupkamrume. 8 Nedi popkamne nesala yumada, kwar pio weik kupkamre. Ikin keca sun nong deiki deipnyopda, sun yumadi, ‘Uo, ware kuptepe do’ tenen, kange mun kange doupmengedi, telep kupra men tenepmanto kunkamenge. Sun amutu kunung nesalada pu weik jepkamre. Ada ukupmantoda, mundu douamenge nerapu, mi deiyo jeramretopu kupkamre. Ila kange mun pu jerepa, kange mun kange doupra kunkamenge. Ukuprepa, nedi wenepkamne nesala, sun pe nesalapu dipetepdangedi lolopkamenge. Ada, sun ila kwar kupkamra cadi, akuprenge tep lolopkamenga deiki, sun urasin deikida, bupu weik kuprepa, pio nong me pakamre.

9 Sun yuma moupra dinkurume! Ne Allah Yahwehdi, tenepsi nesala, amutu-amutu nesala yuma wenepkamne taruda, konum damai kupre. Ataru konum kepre pangeda, sun nong deiki ila ikin keca deipkamsenada, nimi tep bicau pio men tenenkamne. Yu pio weik kupneryopda, sun kunge mutu yuma, mali weik kweipnedi, amutu nesala yuma popra yawa poptapkamne. Ada, nedi mali keca talepra malipu kunung nesala yuma tep, wenepra popnedi, gum kupra deipkamna tepa. Ukupnepa, sun mutu neitamaida, nimi kuna gum di, walangyopu kupkamre. 10 Mali kunge nesala yuma wenepkamne taruda, kunungnapu kupkamra cadi, kuru tenpu-tenpu ingrurnge cap, tenpuai bupra deiya ingnung kuru yumada, dalukra sakropkamre. Tonda, sun dirineda pio men epmanto kupkamre.

Tonda, keteng gupra teng yakaramre taru peda, keteng dirine ton men kupredi, kunukamre. Utopu war dirine peda, men epkamenge. Kunungnapu kupkamre. 11 Ne Allahdi tuai mutu ban-ban yuma neitamai, pio mali-mali weik kunge nesala tep nengeda, nimi upu bokra deipnedi, wenepkamne. Tonda, sundi pio mali kecapu talepra, mali kunge nesala tep, wenepra popkamne. Tonda, sun dipru eremna nesalada, amu kepra deipkamne. Ange utopu, salnong-nong kamengedi mali kunung nesala peda wenepra poptapnyopda, sun salnong-nong kamne keca yuma gum kupra deipkamne. Aneng yumada, pio amutara keipkamne.

12 Ataruda, nedi nimi pio weik popkamna cadi, tupa gam kunkameng nengda, pio yambula dipapu kunkamenge. Tek sisi, nimidi kunumna weik keca, er si emas, ‘Pio telepngepu doproptepe’ tenen, pio moupra dipetepmenge dinin, akeca weika di men diramengtopu, nimi weik popnyopda, nimi ton epetepkameng dinin, denge weik men epkamenge. Ada, pio urasin telepnge, Ofir mutu di palipmengedi, pio telep kupra keteneipmenge emasda, metekanun akamretopu, ataruda tuai nesala peda, yambulanunpu gam tupa kunkamenge.

13 Ange yuma ukupkamna tep nengeda, ne ila puto ngebodi, im deiki kwamre keca yuma talepra lon pepnepa, moropsepkamre. Tonda, mutu-mutu bukua yumada, nedi lon pepnepa, tuai mutu yuma lokamre. Ada Allah Yahweh, akeca-keca yuma talepra, ila puto kunun ngeboda, im deiki kunge jen talena malaikat yuma, sun deiyo ngebo kunune. Atep, ataruda ne yu pio weik kupneryopda, im deikinge cap, tuai mutu bukunge cap, akwamre keca yuma lokamre.

14 Ataruda, nimi yuma pio kware weik kupkamra cadi, ataru kunge nesala ^{▼▼ataru kunge nesala – Apasal upu neitamai yumada, ‘anesala’ perur upu deiyoda, ada Babel mutu nesala tep pepu. Amenda taru Allahdi poptapredi, gawal dakamre nesalada, Babel mutu nesala tep pepu. Menop taruda, sun Babel mutu nengdi, Israel nesala popra, sun pe mutu dubenamya cadi, amenda taruda, Allahdi sun Babel mutu nesala menenga tep, wenepra popkamre.} yumadi, ‘Uo, nun ton popsenung’ tenen, bura saka bendopkamenge. Ukupmantoda, rusa bisam pon nengdi domengepa, bura sakmengedi sepra baramretopu kupra, nimi yumada, ‘Uo, ware neng ton melipra kaleksetenge do?’ tenen, sun pe mutu yuk-yuk sepra bendopkamenge. Tonda sun anesala yumada, domba bisam peina deiyo nengdi talepra peingepa, sun domba gung tenpu kepra embaramengtopu gum tep, sun domba yuma kware kungedi, sun yuk-yuk tamupra sun pe mutupu tamupra sepra baramengtopu, anesala peda utopu kupkamenge.

15 Ataru gam kunkameng nesalada, sepdaro bendopkameng dinin, ware neng do yuma, yu jen talena nengdi, aneng epmengedi tomopmengopda, nimi pon takke keca di, anesala poptapkamenge. Tek sisi, ne tenepsi mutu nesala sepra bendopmengepa, sun aneng porbenkameng yu jen nengdi, epmengedi, anesala yumada, parang ya di lukra popnapu kupkamenge. Ajen talena nengdi epra tomopkameng neng yumada, adipapu lukra popmengepa, depnapu kupkamenge.

16 Angepu gum dinin, ataru popkamne nesala, sun yu jen talena nengdi, amutu nesala, sundi ukupu deipkameng milo nyapu yuma peda dopropmengedi, sun wisi nesala dinmangai dipapu anyapu gel deiki erepra doptapmengepa, sun nong yuma olokyopda, depkamenge. Tonda, sun ayu jen talena neng dipapu, ne popkamne mutu kunkameng nesala sun ati wekra, sun bung keca yuma dalupra doropkamenge. Tonda, sun ajen neng dipapu amutu neng sun domenge nerapu upula dopra nyakamenge. 17 Allahdi pepu. “Nedi Madai mutu neng, sun dipru neitamai, upu pepnedi, go karepnyopda, sundi ne tenemsi nesala, Babel mutu nesala tep mar poryankamenge. Babel mutu nengdi Madai mutu neng tep, ‘Uo, sundi men popkusenga tep, upu sekdongopkup’ tenen, nimi bul kemne co bo kunumna tep, emas cap, perak cap, kareptenga peda, Madai nesaladi ange men tenenunga cadi, Babel mutu neng tep, poryanapu kupkamenge.

18 Sun Madai mutu jen nengdi, mar cap, jen capdi, Babel mutu neitamai kunung kaber neng yumada, popkamenge. Ange utopu, ukupu moum jen nyapu yuma peda, epkameng dinin, bicau tenena gum dipapu, amilo nyapu pe, sun du yapu yuma peda, bicau men tenepmengedi, anyapu yumada popnapu kupkamenge. 19 Ataruda, yuk mutu-mutu dakunge nesala yumadi, Babel mutu ila ati arum dominge tep, ‘Uo, akati arumda, tek sisi pio teleppu kurure,’ tenenunge. ‘Mutu-mutu yukda yambul telep dinin, Babel mutu puda, pio urasin telep mutu kurure,’ tenenunge. Tonda, sun Kasdim ^{▼▼Kasdim mutu – Kasdim sekingeda, ada Babel mutu dinin, amenda taru si butene peraminge tep seki. Ada pumun taru sun Kasdim mutu nengdi, Babel mutu popidi, akati arum tep, Kasdim mutu perami. Tonda, Yeremia 21:4; Yeheskiel 1:3; Daniel 1:4 neitamaida, amutu si ton seki.} mutu kunung nesaladi, Babel ila ati arum dominge tep, ‘Uo, akati arumda, urasin pio-pio telep mutu kurure’ tenen, kange derinunge. Dinino, ne Allahdi, Babel mutu yuma yawa popra tapkamne. Ada, ukupmanto, men taru nedi Sodom ^{▼▼Sodom mutu – Sodom mutu cap, Gomora mutu cap pepunge kael kemna tep nengeda, Buku Kejadian pasal 19:23-29 seki ngeda dinkurume. Pumun taru amutu butene kurami nesala, pio mali weik kuramipa, Allahdi im deiki uku dokotepupa, aila uku bu di, anesala yuma jepropupa depi.} mutu cap, Gomora mutu cap popra, sikke buktapsitopu kupkamne.

20 Babel mutu yuma konum yawa popnyopda, amutu neitamaida, tenpu ngebo ton tapnepa, ataru di dipra dorkunkamre taru yuma peda, amutu neitamai pio men kunkamre. Tonda, Arab mutu nengdi sun domba amutu peina tep, keana dodina tenda ati peda, men yana deipkamenge. Tonda, domba bisam cap, kambing bisam cap, peina nengdi, sun pein keca amutu mutmuta jena tep, pio men yana peinkamenge.

21 Dinino, amutu neitamaida, bura tara tali gam kuramre kecapu yana wekamenge. Babel mutu nesaladi, sun ati-ati dopra kuraminge neitamaida, nimi men wekra kunkameng dinin, bura tara kuramre kout ma, tonda ban mutu kunge sanip ma yana, akati wekra kunkamenge. Tonda, bura tara yuk-yuk dakurameng kambing bisam ton, akati wekra amutu kungedi depda-depda pepra, im kurungmengedi, embankamenge. Babel mutu ila ati arum domi ngeda, ati walangyopu kuprepa, abura kecapu yana kunkamenge.

22 Tonda, bura tara mutu kuramre kam, er si dumre kam, gapuna cap, bura tara ila pus utopu keca, er si sirigala perameng nge cap, sun ati pio telep domyai wekra kungedi, ngolongnapu kunkamenge. Allahdi Babel mutu dakra tapredi, yawa popkamre taruda, konum damai kupre. Allah Yahwehdi, ‘Amutu popra sikke buktapkamne,’ tenepu taruda, tek sisi kupkamre. ‘Amutu tupa kupkamre’ tenen, nimidi Allah er kupkamrenge tep, upu men sektenge. Allahdi tenemutopu, amutu gum kupra deipkamre ja. Nabi Yesayadi aupu pepka deiki di aneng wenepu.