Isa 14 | XteSC | STEP | Allah Yahweh er pedi wepra deiamu nesala, sun Yakub yala nesala tep, ila di bicau tenepra melimkamre ja. Tonda, sun Israel nesala tep kange di ton cap wepredi, sun anesala tep tamupra telep kweipredi, dopra sun pe mutu sisa neitamai tamupra deipre pangeda, kange deipra teleppu kunkamenge. Sunda, Allah er mawa nesala tupa kunkamenge. Allahdi anesala tamupra duyarepa, sun pe mutu yana kunkameng dinin, yuk mutu nimi bo neng peda, amutu neitamai yangepa, sun Yakub yala nesala cap, kikimanpu tonpa kunkamenge.

Isaiah 14

Yuk karen mutu dadonokamrepa benamenganen, Yudea mutu tamupra yankamenga tep, pepu upu

1 Allah Yahweh er pedi wepra deiamu nesala, sun Yakub ^{▼▼Yakub – Yakub yala nesala pepkada, ada Yahudi yala nesala dinin, bokra dapu tara (arah utara), Yudea tara neitamai kurami nesala tep, pepu. Tonda, anesalapu dinin, bokra iknapi dam tara (arah selatan) kurami nesalada, sun si yuknge ton, ‘Israel yala nesala’ pepu. Sun yala sida, si butene perami dinino, sunda tenpu yala nesalapu kurami.} yala nesala tep, ila di bicau tenepra melimkamre ja. Tonda, sun Israel nesala tep kange di ton cap wepredi, sun anesala tep tamupra telep kweipredi, dopra sun pe mutu sisa neitamai tamupra deipre pangeda, kange deipra teleppu kunkamenge. Sunda, Allah er mawa nesala tupa kunkamenge. Allahdi anesala tamupra duyarepa, sun pe mutu yana kunkameng dinin, yuk mutu nimi bo neng peda, amutu neitamai yangepa, sun Yakub yala nesala cap, kikimanpu tonpa kunkamenge.

2 Menop taru sun Babel mutu kurami nesaladi, Israel nesala popra Babel mutu dubenami dinin, amenda taruda, yuk mutu nesala weika di, sun Israel nesala melipmengepa, sun nai Allahdi sun tep, men di kareamu mutu tamupra yankamenge. Ataruda, sun Israel nesaladi, sun dubenami neng tep, sun amutara deipmengepa, Israel nesala sun ikin pel melipra donkamenge. Tonda, sun mutu sisa kikiman kunkameng taruda, yuk yala nimi bo nesala, nimi pe, nerapu peda, sun Israel yala nesala tep, sun amu kepmengopda, dorona gum dipapu, talipu pel melipra donkamenge. Ada ataruda, Israel nesala tep tomopra wenemna ati dongomi neng tep nengeda, kwang dakra tomopmengedi, sun amutara deipmengepa dakunkamenge. Tonda, Babel mutu nengdi, Israel nesala tep, nimi deiyo kepra taleamidi, ikin keca sun nong deiki deriramipa, kange mun kuramitopu, amenda taruda, sun Israel nesala nimi deiyo kepra talepmengedi, sun Babel tara nesala deiki, ikin keca deipmengedi, darapkamenge.

Raja Babelda, nimi depmengedi banungai kunkamre, pepu upu

3 Sun Israel nesala yumada, gekepso! Tek sisi pumun taruda, Babel nengdi, popseidi ila ikin keca dopra, sun nong deiki deriramipa, ila kange mun kange doupra, ikin pel weik doramrum dinin, amenda taruda, Allahdi konum telep kupra deipserepa, kanampu kunkamrume. Men taruda, yuk mutu nengdi, sun Israel nesala tep, sun deiki ikin pel diamseipa, ila kange mun kuramrum dinino, amenda taruda, sun nai Allah Yahwehdi, ange gum kweiprepa, sunda beipye peikra teleppu kunkamrume. 4 Ataruda, Allahdi sun Israel nesala lyepropseryopda, sun Israel nesaladi, Raja Babel tep upepra nalepkamrume. “Babel mutu taleamu mali ngeboda, konum sakmare! ARaja ngebodi nun tep, yu kupupa, salnong-nong kamamudi, nun deiki ikin keca deriramseu dinin, ange yumada, amenda taru ton, pio men kupkamre. Erdi ton cap men darapkamsere.

5 Nimi deiyo kepra taleramenge nengdi, mali-mali weik kurami neng yumada, ila nimi deiyo kuna tep, petenkemna tep talenung macada, Allah Yahwehdi konum daktapmardi, nimi deiyo talenge ngeda, konum gum kupra deipmare. 6 Men taruda, sun amali nimi deiyo nengdi, pio yu kupnepa, yuk mutu nesala yuma tep, tupa-tupa sun deiki ikin keca deipra porami. Tonda, animi deiyo nengdi, ban-ban yuma kurami nesala yuma tep, ‘Anengda, nun amutara deipkamepe’ tenen, yu kupupa, tamna gum dipapu, anesala tep pio tupa-tupa bongopra ponapu kurami. 7 Dinino, Allahdi amali kuna deiyo neng, konum amu deipka cadi, tuai mutu ban-ban yuma kunge nesaladi, ‘Uo, ware kupkamep do?’ tenena gum di, tali kange deipra, teleppu kunkamenge. Anesala-anesala yumada, podana gum dipapu, kange deipmengedi, mut penkamenge.

8 Angepu gum dinin, Ukupmanto, Libanon mutu neitamai teku gat co, er si Sanobar co ^{▼▼Sanobar co – Aupuda, sanobar co cap, wapum co cap pepkada, ukupmantonge tep pepu. Babel mutu nimi deiyo ngeboda, tenpu mutu yana, ‘Anesala popra gawal dakamep’ tenen, amutu tekamu lyom co yuma kwemamudi, nimi pon keca keteneiamu. Tonda, amutu tekamu co yuma gum kupra deiamu. Atep, aupuda pepu deiyoda, Raja Babelda, ‘Amutu-amutu yuma, ne amu tara deipnedi, ne dipapu talenkamne,’ tenemnga tep, aupu seku.} cap, tonda Wapum co capda, kange deipkamrenge. Ada, Babel mutu taleamu mali kuramu deiyo ngeboda, konum popipa saku! Tonda, yuk mutu nengdi, angebo konum popidi, amutara kepra deipya cadi, ataru di gonga kepra, aneitamai taru yumada, ‘Ila lyom gat co kwepkupe’ tenen, pel don neng ton, nun damai tamupra men yakanunge. Nun damai ton men yangedi, nun ton kwepsengedi, gum kupra men deipkamsenge,” pepra, kange deipra penkamenge. “Ukutaruda, teleppu kunupe,” penunge.

9 Nimi konum deami neng kunungai, er si Sheol, amutu kunge deami nimi sambaladi, Babel mutu taleamu ngebo tep, ‘Uo, kange deipmepe. Apio mali kuramu deiyo ngebo konum popya tep, amutu yankamra cadi, kange deipra keteneipmepe,’ penkamenge. Sun ketenepmengai di, ‘E, nun kabo aca yankure,’ pepra napropkamenge. Ange utopu, sun menmena taru konum deami nesala, sun sambala bukramengedi, Raja Babel cap antamna tep yankamenge. Sun amali-mali kurami Raja neng yumada, tuai mutu talepra Raja-Raja neng kurami dinin, sun konum depya cadi, Sheol mutu kunungai di, Babel mutu taleamu ngebo, sun damai yankamre taruda, er damai yangedi, yana napropkamenge.

10 Sheol mutu neitamai konum deiami Raja neng, sun sambala yumadi, Raja Babel, sun damai yankamre ngebo tep upepkamenge. “Uo, nun kabo, ukutaru kanda nun kurameputopu konum kupmareme. Nun puto gum kupseupa, pio amu tara kurameptopu, kan peda konum puto boun kupmakere! 11 Men taruda, nimidi kan tep, kecapi bung-bung pena doupnedi, gispal doramkeipa, kanda kange deipra salnong-nong kuramume. Dinino, ukutaru kanda nimi dena neng kunungai, pio dimbulung penai konum yaruma cadi, kan manai kepkurume. Kan acapu galupra mapkamremaida, kan nong deiki selimut utopu kupkamer keca cap, kan amutara ason utopu deiki mapkamremai capda, konum deami neng, sun nong lyuprepa, kwali amurur ngeda, kan nong deiki cap, amutara cap, pio akupkamkere.

12 Uo, Babel mutu talepra kuramum Raja ngebo, men taruda, kandi, ‘Neda pio ila mambul ngebo kununa cadi, neda berengyan tara tengyakaramre dirine weik kuru utopu kunune. Tonda, neda ipna taru keteng tengyaredi, dirine weik kuramretopu kunune,’ teneamrume. Dinino, Allahdi go karepupa, yuk mutu nesaladi kan konum popkeipa, sakmuma cadi, ukutaruda pio amutarapu kurume. Ukupmantoda, dirine weik kuru im deiki di tuai saktupa dirine gum kuptua utopu, kan peda konum kupkeue. Pumun taruda, kandi nimi ban-ban yuma popbisiramum dinin, ukutaruda, Allahdi konum popkeudi, tuai pio amutarapu konum deipkeue.

13 Men taruda, kan pe kange neitamai di, ‘Gume, neda im deiki welepnedi, ne bungnaida, Allahdi ila di erepra, alau tara tengre kuru deiamunge, ange deiki tara bukamne. Ne Raja kemna tep bungna keca, er si tahkta, im deiki deipnedi, akeca yuma deiki tarapu bungkamne ja. Tonda, arah utara dinin im sirik, mutu sirikda, ila buku mutu dup deiki, er si Sapon mutu, pio mambul dewa-dewa ^{▼▼dewa-dewa – Aupu deiyoda, ada puto isok-isok tep penunge. Tonda, pumun taru, amutu neitamai kurami nengda, ‘Siria mutu iknapi tarada, ila mutu dup deiki, puto pio weik isok-isok yuma, bulupra bukmengedi, upu talepra bongdinunge,’ teneramya tep, Raja Babelda, ‘Ne peda amutu deiki dupai buknedi, upu bongdina deiyo ngebo kunkamne,’ teneramu.} bukmengedi,’ upu talenungaida, ‘Ne peda aceipu bukamne ja!’ teneramume!

14 Angepu gum dinin, kan dipru neitamai di ange ton teneramume. ‘Duada, im neitamai kurure dinin, neda erepra alau tara dinin, itara ton kunkamna tep, dua deiki welepkamne. Ukupnedi, Allahdi akeca-keca yuma talepra, deiki tara kuredi, Ila Puto Eremna Ngebo ^{▼▼Ngebo – Acada, Ibrani upu deiki di, Allah er si tep, ‘Allah Elyon’ pepra seki. Indonesia Allah upu buku neitamaida, ‘Allah yang Mahatinggi’ pepra sengnunge. Dinino, aupu deiyoda, sun kael kemna tep, angeda konum jenek kupra sekmepu.} kuretopu, ne peda utopu kunkamne ja!’ teneramume.

15 Utenepra kuramrum dinino ukutaru kanda Allahdi konum doprapkeudi, tu pumbon ^{▼▼tu pumbon – Aupu deiyoda, Ibrani nesalada, Sheol cap, tonda tu pumbon cap, upu butene perami dinin, ada konum deami neng sun sambala kunai tep, si butene dinin, amutu tenpu tep perami.} konum dokotepkeue. Ada tu amutara, konum deamipa palipi nesala sambala kunungai, amutu sida Sheol, konum dokotepkeupa, acapu kurume. 16 Konum depmengedi, Sheol benkunung neng, sundi dindenkap kanda epkamkenge. Epkengedi, sundi kan tep, ‘Uo, ware kupra kuptu do?’ tenen, mambul kange doupra asipetepkamenge. “Tuai mutu ban-ban yuma kurami nesala yala-yala yumadi, kan tep si eremamkei ngeboda, kan ado? Tonda, amutu-amutu talepra kurami neng cap, sundi talerami nesala cap yumadi, kan tepapu kware weik kuramupa, sun nong moropsemamu dinin, tek sisi kanda amutupu akunmarem do?’ tenen, asipetepkengepa, sun kange lopkamre.

17 Tonda, aupu ton penkamkenge.

“Gume, er angebodi, tuai mutu neitamai ila ati arum dopra kurami nesala yumada, poprapnedi, mutu katauaipu kepra deriramu ngeboda angebo do? Tonda er angebo adi, amutu-amutu yuma poramudi, nimi tomopra wenemna ati deriramu nengda, lopra men tapnepa, ‘Sunda sun pe mutu tamupra benkurume,’ pio men peramu ngeboda, angebo do? Er tomoramu nengda, wenemna ati pumbonpu dongoramupa, aceipu bena kurami. Amali kuramu ngeboda, aca akunmar ngebo do? 18 Tonda, sun yuk mutu nesala yumada, sun talepra kurami deiyo neng, Raja-Raja depmenge pangeda, sundi, ‘Uo, nun deiyo ngebo depmasere’ tenen, ila di gispal dopmengedi, sun Raja-Raja nong gemnada dopra, urasin telep peirbanaipu peirbanunge. ARaja-Raja yuma yuk-yuk dinin, telep kwamu peina tenpu-tenpu peiramidi, aneng tep, tupa gispal donunge.

19 Dinino, Raja Babel kan mutu talepra kurum ngebo, kan peinaida gum tep, kan nongda doprap, telep peinai men dongopkei dinin, bura tarapu tu deiki tali dokotepra tapkei. Ada ukupmanto, tali lyun keca dopra, tu pumbonai dokotemamengtopu konum kupkei. Tonda, sun kan jen talena neng, mar podanai di, parang ya di popmengepa, depmenge nengda, akupmakengetopu, sun gemna doupra yangedi, tenpaipu tu pumbon do, katuai tu deiki do, talipu derirtamamengtopu, kan nong peda dopra, tu deiki deiptapkeidi, kan nong deikipu yuk deami neng deipra taikdongopkei. Ukupkeiyada, ukupmantoda, tali keca depnepa, nimidi, ‘Angeda mambul keca’ tenena gum dipapu, akeca nong deiki yanipra darapdongopra, tali lupra baramengtopu, kupkei.

20 Tonda, kan mali weik kuramuma deiki di, kan pe meneng damai mutu sisa kurami nesala yuma peda, popra gawal dakamome. Ange tep nengeda, kanda yuk nimi deiyo neng Raja-Raja neng deamipa, sun tara nengdi pio moupra peiramitopu, men peipkamkenge. Ada, kan nong dopra peinai telepnge pumbon men peipkamkenge. Deiyoda, kan pedi taleramum mutu neitamai yumada, konum gum kupra deiamume. Ange tep nengeda, kanda pio mali weik kuramum ngebo cap, kan nyapsilip capda, nimidi sun si tupa men tenenkamenge. Kan yala neng tep nengeda, pio lupronkamenge.

21 Atep, ukutaruda sun yuma gekepso! Raja Babel ngebo, er pedi deiamu nyapu cap, erdi deipupa, dadeipdanen yakarami neng yuma capda, aneng yumada sun pona tep, konum ketenepra sengpepkurume! Ada tali tep gume. Raja Babeldi deiamupa dadeipdanen yakarmi neng yumada, sun nai yapudi mali kurami kecada, pio weik cadi, sun nyapu yuma poprumupa depkamenge. Ada, men popra gawal dakmumnyopda, sundi deiami nyapuda, amenda taru sun yala neng ton weik kupbangedi, nimi deiyo neng tupa kepmenge dingeda, kange di ton cap, mutu ban-ban yuma talepkameng ja! Ayala nengdi, nimi deiyo kepmengopda, tuai mutu ban-ban yuma neitamai di, ila ati arum ton dopmengedi, dakunkamenga tep pepne. Atep, Raja Babel, er yala neng yuma, sundi popra gawal dakamrume!

Allahdi, “Babel mutu cap, amutu kunge nesala yuma cap, popnedi, sikke buktapkamne,” pepu upu

22 Allah Yahweh akeca-keca yuma talepra deiki tara erepra, ila puto ngeboda, im deiki jen talena malaikat yuma, sun deiyo ngebo kurure. Erdi aupu pepu.

“Nedi Babel mutu neitamai kunge nesala yumada popkamne. Amutu cap, amutu kunung nesala cap, sundi deipipa, dadeipdanen yakanung nyapu yuma cap, sundi deiami nyapu cap, sundi deipkameng nyapu cap, sun yuma popnedi gum kupra deipkamne. Anesala yuma konum popnyopda, tenpunge peda gam tupa men kunkamre. Ukupnyopda, yuk mutu nesala yumadi, Babel mutu nesala, sun si tupa men tenenkamenge. Nimi yumadi ayala nesala sun si lupronapu kupkamenge. Ne Allah Yahwehdi aupu pepsena cadi, angeda tek sisi kupkamne.

23 Babel mutuda, ne Allah Yahwehdi mali kweipnepa, nimi pio gumai, walangyopu kuprepa, mali me mokon ban kepra deipnepa, amutu neitamaida, nimi kuna gum di, kout mapu kunkamenge. Ukupmantoda, Babel mutu dana-dana tara yumada, ason bun keca di buta bumamengtopu kupkamne. Ukupnyopda, amutu neitamai kwamre keca yumada, gum kupra deipnedi, sikke buktapkamne. Aupuda, ne Allah Yahweh akeca-keca yuma talepra deiki tara erepra, ila puto ngebo kunedi, im deiki jen talena malaikat yuma, sun deiyo ngebo kunune. Nedi aupuda pepsena cadi, ange yumada tek sisi kupkamne.” Allahdi pepu.

Allahdi Asyur mutu neitamai kwamre keca yuma, gum kupra deipkamra tep, pepu upu

24 Neda Allah Yahweh akeca-keca yuma talepra deiki tara erepra, ila puto ngebo kunedi, im deiki jen talena malaikat yuma, sun deiyo ngebo kunune. Neda, pedina upu deiki di aupu yumada pepsena cadi, tek sisi ange yumada kupkamne. Tonda, nedi, ‘Ukupkamne,’ konum tenemsi keca yumada, tek sisi kupkamne! Ange utopu, nedi, ‘Angeda konum kupkamne,’ peiamsinge yumada, men tamnune, tupa kupnepa akurura cadi, tek sisi ange yumada kupkamne ja. 25 Nedi, ‘Ukupkamne,’ pepra deipsi ngeda, ake. Asyur mutu nesala dinin, ne kange deipsi mutu, Yudea tara mutu neitamai kunung nesalada, popnedi gum kupra deipkamne. Ne mawa mutu, Yudea tara neitamai kunung Asyur nengda, Yudea mutu deiki popnedi yanipdopkamne. Asyur mutu nengdi, ne nyapu sisa Israel nesala tep, popmengedi ikin keca weik, sun nong deiki derinung keca yumada, gum kupra deipkamne. Tonda, sun Asyur nesala popkamna deiki di, sundi ikin keca dopra, Israel nesala deiki deipidi, ikin pel dimami ngeda, ange peda dopropnedi, gum kupra deipkamne.

26 Ne Allahdi, ‘Tuai mutu ban-ban yuma tep, ukupkamne,’ tenepsi ngeda, konum lap pepmasene. Tonda, ne Allahdi, ila puto buru erepra doupnedi, mutu ban-ban yuma kunung nesala yuma tep nengeda, ne tenepnetopu tek sisi kupkamne ja! 27 Neda Allah Yahweh, akeca-keca yuma talepra deiki tara erepra, ila puto ngebo kunedi, im deiki jen talena malaikat yuma, sun deiyo ngebo kunune. Nedi, ‘Ukupkamne,’ pepra ange yuma pedina upu deiki konum pepmasena cadi, ware ngebodi ne upu seknetu do? Gume, angeda men kupmanto. Neda Allah, ne ila puto buru konum erepra doupsidi, ‘Asyur mutu nesalada wenepra popkamne,’ konum pepsa tep, ware ngebodi ne buru gipropnetupa, ange men kuptene do? Nedi, ‘Ukupkamne,’ peiamsetene upuda, ware ngebodi upu seknetu do? Ada, nimi tenpu ngebo peda, upu men seknetenge.

Allahdi Filistin yala neng tep, gum kupra deipkamra tep, peipu upu

28 Aupuda, Raja Ahas depu keteng tamunpu, Allahdi nabi Yesaya damai yana peipupa, erdi lap pepu. Aupuda ake.

29 Sun Filistin yala nesalao, sundi, ‘E, Raja Ahas nun poramseu ngebo, tenpu co gu utopu ngeboda, nimidi gat co maca dopmengedi, yuk neng, sun nong deiki bongoramengtopu kuramseu ngeboda, konum depmare,’ teneprumudi, pingping kange deipra men kunkamrume. Deiyoda, aRaja ngebo, yu baldi kuramretopu ngebo kuramseu dinin konum depmar dinino, yu baldi du deiamyanen, amenda taru patapre dingeda, nimi pon bal ton, pio yunge belepra embaramretopu, amenda taruda, pio ila yu ngebo ton tekredi menmena taleramseu ngebo, er yo punupkamre. Angeboda, pio ila kange mun keipkamser ngebo tekamre. Ange utopu, apio yu nimi pon baldi, du deipyopda, amenda taru ange ton patapre dingeda, nimi pon bal ton, pio-pio yunge ton belepra embankamre. Angedi si topseryoda, nimi adipapu denunge. Atep sirik taru yankamre yu ngeboda, ila kange mun keca sun nong deiki deipkamsere. Sun Filistin nesalada, ila kange mun kupkamsere.

30 Ataruda, Allah er nyapu dinin, pio kan-kan kuramenge nesala peda, sun peinung domba bisam jen keca epmengedi, dopra karepmengopda, jenkamenge. Tonda, ataru akeca-keca yuma men talenung nesala peda, amenda taru telep dipapu beipye peikmengedi, mapkameng taru peda, kware gum di, tali kange deipra kunkamenge. Sundi domba bisa cap, kambing bisam capda, peina deiyo neng kunkamenge. Dinino, Allahdi sun Filistin nesala tep nengeda, ila jen putana karepserepa, jen jena gum di, puto boun kuprepa, depropkamrume. Ataru di men depmumdi, gam tupa kunmarum nesala peda, Allahdi wenepra popredi, gawal dakamre. Sundi deipmumpa, dadeipdanen yakankameng neng peda, poptapredi sikke buktapkamre. Sun yuma peda, gawal dakamre. Amenda taruda, sun yala pio gum kweipkamre.

31 Ataru sun Filistin mutu neitamai ila ati arum dopra kurum nesala cap, akati arum doramyai bisi buplan wengnai damai bulupra, upu sisikrum deiyo neng cap yumada, dipru pu jepserepa, engeprumudi, ‘Uo, ware ngebodi melipsetu do?’ pepra, ngolongkamrume. Deiyoda, sun podan neng, sun jen neng denge weika di, dapu tamna di (arah utara) ketenepra yakangedi, tu deiki yanipmengepa, tu bute welepkamre ngeda, dua bum topdoua weleramretopu kupkamre. Sun ajen nengda, tenpu ngebo peda, bouna di men yankamre. Sun podan neng yuma kikimanpu sepdaro yakangepa, epmum dingeda, kware weik kupkamre.

32 Ange tep nengeda, sun Filistin mutu nesaladi dopra deipmengepa, nun damai upu asimyankamseng neng yangedi, asipetepsengopda, aneng tep ware upu pepkamrum do? Gume, ne nabi Yesayadi ne tenene kangeda ake. Sun adoroipmengepa yankameng neng tep nengeda, nundi upenkamepe. “Allahdi er dipapu, er mawa nesala sun makuna tep, Sion mutu konum telep kupra tamupra deipmare. Atep, Allah Yahweh, er nyapu ikin deikipu kurami nesala tep nengeda, amutu kungepa, kalengkamra tep, tali kange deipra teleppu kunkamenge,” pepra, lap pepkamepe. Nabi Yesayadi pepu.