Isa 15 | XteSC | STEP | Moab mutu kunge nesala tep, Allahdi, “Ukupkamne,” pepra deipu. Ada, “Uo, sun Moab tara kurum nesalada bicaue. Ila ati arum dopra kuramengai, Ar mutuda, tenpu lukunda neitamai dipapu, yuk mutu jen nengdi yana popra sikke buktapmanga cadi, Moab tara kunge nesala yuma, kange mun kange doupra kunkamenge. Ange utopu, Kir mutu peda, popra sikke buktapmanga cadi, Moab mutuda, konum mali kupra deipmange. Ukupmengepa, Moab mutu neitamaida, nimi tenpu peda, amutu ton men kunkamenge. Sun mutuda, walangyopu kupkamre.

Isaiah 15

Allahdi Moab tara kunge neng tep, popra sikke buktapkamra tep, pepu upu

1 Moab mutu kunge nesala tep, Allahdi, “Ukupkamne,” pepra deipu. Ada, “Uo, sun Moab tara kurum nesalada bicaue. Ila ati arum dopra kuramengai, Ar ^{▼▼Ar mutu – Ar mutuda, ila ati arum domidi, Moab tara kwamu. Moab mutuda, kota Yerusalem iknapi dam tara kwamu dinin, adi dutara (arah selatan) kwamu. Kota Ar mutuda, Moab tara dinin, arah utara sirikai kwamu. Kir mutuda, Moab tara dinin, pio iknapi tara (arah selatan) kwamu. Amutu butene konum sikke buktapmengopda, Moab tara nesala tupa men kuptenge.} mutuda, tenpu lukunda neitamai dipapu, yuk mutu jen nengdi yana popra sikke buktapmanga cadi, Moab tara kunge nesala yuma, kange mun kange doupra kunkamenge. Ange utopu, Kir mutu peda, popra sikke buktapmanga cadi, Moab mutuda, konum mali kupra deipmange. Ukupmengepa, Moab mutu neitamaida, nimi tenpu peda, amutu ton men kunkamenge. Sun mutuda, walangyopu kupkamre. 2 Dibon ^{▼▼Dibon mutu – Dibon mutuda, ila ati arum domidi, Moab tara pemerintah deiyoi kwamu dinin, Moab tara dinin, dapu tara (arah utara) sirikai kwamu. Kir mutuda, Moab tara dinin, pio iknapi tara (arah selatan) kwamu. Amutu butene konum sikke buktapmengopda, ‘Moab tara nesala tupa men kuptenga cadi, gum kupkamenge’ tenen, aupu seku.} ila ati arum kunung nesalada, sun isok si eremnung mutu buma deiki welepmangdi, ila di engenmange. Sun Moab mutu kunung nesalada, sun podan nengdi, Nebo mutu cap, Medeba mutu cap, gum kupra deipmange nge tep, pio bicau kuprepa, ‘Uo, uo’ tenen, ila upu di engenapu kunmange. Tonda, sun giso potongda, delau ^{▼▼delau – Pumun taruda, sun Ibrani yala nesalada, kange mun kange doupra kurami taruda, ange peten kemna tep nengeda, sun giso potong cap, sun bana potong capda, touami. Ada, ‘Yuk nesala epsengedi, nun ikin weik kuserenge tenepkameng’ tenen, angeda ukurami.} kurupra deipmange. Ange utopu, sun lyomamre sibana potongda, konum touptapmange. Ada, amutu butene tenepmengedi, bicau kuprepa, dipru engenapu kunmanga cadi, peten kemna tep, amutu nimi yumadi sun potong touptapmange.

3 Tonda, pio kange mun kange doupra kunmanga cadi, amutu bisi neitamai embange nesala yuma peda, sun opkalda pio malingepu, karong goni opkal kepmangedi banunge. Ada, ‘Amutu butene sikke buktaminge tep tenepmangedi, bicau kuprepa, engenmangdi peten kepmange,’ tenena tep, aopkal kepkamenge. Aengenmangaida, sun ati arum, gat keca di ban kupra dominge deiki tara welepmengedi, engenmange. Tonda, amutu nesala bulupra upu sisingnungai peda, wekmengedi, jenek kupra acei neitamai di engenmange. Tonda, sun ati bo pumbon neitamai di engenmange. Amutu neitamaida, tenpu ngebo peda, tali kange men dourure. Sun yumadi engenmangedi, puto bounpu kunmange.

4 Moab mutu neitamai dinin, Hesybon mutu kunge nesala cap, Eleale mutu kunung nesala capda, sun engenmangada, ila di erepra engenmangedi, ‘Uo, sun ton yana melipseso!” pepmangepa, alelimda ortara karen mutu Yabas mutu kunung nesala peda, sun upu gekepmange. Ukupmangepa, Moab tara jen talena nengdi, kware weik kuprepa, sun peda, “Uo ware kuptepe do?” pepra engenmange. Tonda, sun puto di balila deriramenge ngeda, pio gum kupmarya tep, kware pio weik kuprepa, sun nong yuma moropsemange.

5 Uo, ne nabi Yesaya peda, sun Moab tara nesala tep bicau tenepnedi, engenmane! Moab mutu kuramenge nesalada, sun pe mutu tapra, bura saka bengedi, Zoar mutu cap, tonda Elgat-Selisia mutu cap, ‘Inipkamep’ tenen, sepra benmange. Yuk Moab tara nesalada, Luhit mutu ban bisi welerbangedi engepbenmange. Ton nesalada, Horonai mutu welerbangepa, ikin keca sun damai konum yanmarpa, sun podan nengdi sun mutu yuma konum sikke buktapya cadi, ila di mali pepra ngolokdanen banmange. 6 Tonda, Moab tara mutu neitamaida, Nimrim mutu ^{▼▼Nimrim me – Moab mutu atara, Edom mutu ortara kwamupa, daneitamaida, metek embaramu me ton, er sida Nimrim me perami.} embaramu metek me bungna peda, konum cepropmaredi, gum kupmare. Atep amutu me pirman dana-dana tara paramre mutmuta yumada, konum kolupropnapu kupmare. Ukupkamre taruda, amutu me pirman tuai paramre keca yala yumada, men kupkamra cadi, mutmuta embek nge ton (hijau) akuprepa, pio men dinkamenge.

7 Atep nengeda, Moab mutu nesala, sun bung keca cap, sun talerami telep keca capda, yambulanunpu bupra keteneipmaidi, ‘Akeca yuma dalupra dopropsenung’ tenen, ame goupra ortara benmaidi, ame er teru tara Haarabim me kin bena doupra deipi. 8 Dan tara mutu do yuma, Moab mutu neitamai kunmang nesala yumada, ila di ngolokra engenmangepa, sun tara tu wilimnaida, pio karenai, iknapi tara (arah selatan) kunmang nesala pe, dapu tara (arah utara) kunmang nesala peda, gekenmange. Ada, nimi ngolokra mali penmangedi, engena lelimpu pepmang ngeda, gekepmengedi, ‘Uo’ tenen, mali kange doupra kunmange. Angolokra engenmange lelimda, Eglaim ^{▼▼Eglaim – Amutuda, Yerusalem mutu adinin, arah selatan kwamu. Beer-Elim mutuda, arah utara kwamu.} mutu cap, Beer-Elim mutu kunung nesala cap yumada gekepmange.

9 Tonda, Dibon mutu neitamai embare me yumada, nimi popmengepa sun yapi cap tapakrepa, ameda yapi bipu kupra embaramre. Allah erdi sun amutu kuramenge nesala, sun deikida, ila kange mun keca ton cap dokoteprepa, pio ila kange mun kupkamre. Allah erdi pus utopu keca, ila yunge er si singa pus doroiprepa, sun Moab mutu nesala, ‘Popra gawal daksenung’ tenen, bura saka bendopmange nesalada, popra gawal dakamre. Dinino, aceipu Moab mutu neitamaipu dakunmange nesala, yambulanun tupa gam kunmange nengda, tu ton karepkamre ja.