Isa 16 | XteSC | STEP | Allahdi ne nabi Yesaya tep peipneu upuda, sun Moab mutu nesala tep pepu. Sun Moab kurum nengda, gekepso! Sundi, ‘Yudea tara nengdi melipsetenge’ tenen, sundi Sela mutu di, menenga keca karena tep, domba bisam nyapu weika di dopra, doroiprumupa, nimi pio gumai, mutu katawai bisi duyangedi, Yehuda tara neitamai dinin, Sion mutu deiki, Yerusalem ila ati arum talepra kuramenge deiyo neng damai yana karepkamenge.

Isaiah 16

Moab mutu kurami nesala, sun puto boun kupkamunge tep, pepu upu

1 Allahdi ne nabi Yesaya tep peipneu upuda, sun Moab mutu nesala tep pepu.

Sun Moab kurum nengda, gekepso! Sundi, ‘Yudea tara nengdi melipsetenge’ tenen, sundi Sela mutu di, menenga keca karena tep, domba bisam nyapu weika di dopra, doroiprumupa, nimi pio gumai, mutu katawai bisi duyangedi, Yehuda tara neitamai dinin, Sion mutu deiki, Yerusalem ila ati arum talepra kuramenge deiyo neng damai yana karepkamenge. 2 Duyana karepmengepa, Moab mutu nesala yumada, dopropmengedi, bura saka bengedi, kange wang-wang peprepa, ‘Nun podan nengdi popra gawal daksenung’ tenen, Arnon me goupra ortara mekinpu yana kungedi, ‘Uo, sun Yudea tara nengdi, ware upu pepkuseng do, tonda melipkuseng do, gum do?’ tenen, yana gekenkamenge. Ukupmantoda, walup ma sun nindi dokoteprepa, tuai sakredi, kware weik kuprepa, gupra bura tara baramengtopu konum kupmange.

3 Sun anesaladi Yehuda yala nesala tep upepkamenge. “Uo, nun kupkamep ngeda, ware kupkamep do? Sundi, ‘Ukunada, ake,’ pepra lap pepserumpa, gekepkupe. Sundi nun tep melipserume. Ukupmantoda, keteng bupu di jenmarepa, co tekamyai di lelim pio telep kupra dongomretopu, sundi nun podan neng tep, kalekra melipkuserume. Nunda nun pe mutu di bura saka sepdaro yapu nesala kunupe. Atep, nun moropsep ngeda, ‘Nun podan nengdi popsenunga tep, sundi inipkuserume’ tenen, moropsepe. Sundi jenek kupra men deipkuserume.

4 Sundi nun tep, ‘Telepe, pepsetumpa, nunda sun mutu keana tep, yana kikiman kunkamepe. Nun podan neng yangedi, nun yana popra gawal daksenung tep, kaleksemumpa, nunda sun amutara kunkamepe. Nun Moab tara nesalada, nun tep posenung neng cap, ila ikin keca derisenung neng capda, sundi nun popra gawal daksenung’ tenen, ‘Sun Yudea tara nengdi, nun Moab tara di, sepra aca ayanap neng tep, melipsemumdi, kalengkamserum’ tenen, moropsepe. ‘Gum dingeda, nun tep popra wenemsengedi ikin kemdisenung nengdi, nun yumada gum kupra deipkamsenga cadi, sun Yudea tara nengdi melipra kalengkamserum’ tenena tep moropsepe. Ukupsemum pangeda, amenda taru nun tep daramdongosenge yu nengda bendopkamenge. Tonda, ayu nengdi, nun mutu kwamre keca yuma, tupa sikke buktamnapu men kunkamenge. Ange utopu, nun talenup keca dalupra dorosenung nengdi, bendopmengepa, dim pepkamenge. Ange yuma konum kupyopda, sun Yudea tara nengda, teleppu kunkamrume.

5 Ada ake. Ange yuma konum ukupyoda, Dauddi deipupa, dadeipdanen yakarami nengdi, pio telep kuramre nimi deiyo ngebo ton erepra deipkamenge. Allahdi sun Yudea tara kurum nesala tep, ila di bicau teneserura cadi, er telep kange deiki dipapu, pio dumsisi kurur ngebo erepra deipserepa, angeboda sun nimi deiyo ngebo Raja kepra kunkamre. Er angebodi, er mutu nesala yuma tep, bicau tenepredi, pio moupra talepkamre. Er angeboda, dumsisi kunangepu talepra pel donkamre. Tonda, sika gum dinin, menmena di telep pelpu talepra dopredi, nimi upuda dumsisi kupra bongderinkamre ja!

Allahdi upeipneupa gekepsidi, ne nabi Yesayadi pepne.

6 Uo, ne nabi Yesayadi pepsene. Ne cap, nun Yehuda tara neitamai kuramep nesala yuma cap, nun kaele. Yuk-yuk mutu nesala yumadi, “Gume, sun Moab tara neitamai kunge nesaladi salnong-nong kamnunge. Tonda, sundi dipru ila di eremna neng kungedi, yuk mutu nesala yuma tep, mali upu pepra, lulupra deringedi, nalemnunge. Tonda, sun Moab nengdi, sun pe tep nengeda, ‘Nunda tek sisi pio telep neng kunupe. Nundi akeca-keca yumada, pel telep kupra donupe,’ pepra, dipru erepmengedi, salnong-nong kamengedi, tali upu penunge. Dinino nun kaele, apenge upu yumada, tali upupu kurure. Uperamipa, konum gekepra kael kemamepu dinin, sundi tali mok upupu penunge.

7 Ange tep nengeda, sun Moab mutu nesalada, nundi sun tep men bicau tenepkamepe. Sun yuk dakunkamnunge. Sundi mali pepra ngolongmengedi, ila di engenkamenge. Tonda, sun Moab tara nesala, dana-dana tara kunge nesala epmengedi, sun Moab tara nesala ikin weik kupkamrenge tep, ‘Uo,’ tenepra engenkamenge. Sun Moab nesalada, men taru Kir-Hareset mutu kurami nesaladi, anggur du dopra pio tau telep jen keca ketenepra deiamipa, jeramrum keca tep, teneprumudi engenapu kunkamrume. Ange peda gum kupkamsere. Nundi sun Moab mutu nesala tapmepepa, sun pedi, ‘Uo, uo, nunda ukuramepu,’ tenepmengedi, dipru sukun-sukun deikipu kunkamenge.

8 Tonda, Hesybon mutu neitamai wa peramenge nge yuma cap, tonda Sibma mutu anggur tapu wa pepra kouraminge yuma capda, gelal sepropupa, sun podan nengdi ange yuma gum kupra deipi. Menop taruda, sun yuk mutu talepra nimi deiyo kemami nengdi, Moab mutu neitamai keteneiami anggur me, kange yawaramrenge tep, yana kunupra jeramipa, kange pio yawaramu. Dinino ukutaruda, sun anggur pio telep ngepu pepra kouramrum wai dam yumada, konum gum kupra deipsei. Men taru, sun anggur wa peramrumaida, pepbenamnanen, karen mutu si Yaezer mutu bena deipra, adinin keteng yakan tara nimi gumai mutu dourbena, tonda adi keteng dangban tarada, ila laut mokon, er si Laut Mati goupra, ortara damai bena deipra perami. Dinino, ukutaruda, ange yuma konum gum kupsere.

9 Atep nengeda, ne nabi Yesaya peda, sun tep, ‘Bicau,’ tenepnedi engenmane. Ada, Moab tara neitamai dinin, Sibma mutu cap, Yaezer mutu cap, anggur tapu wa peami ngeda, konum gum kupra deipipa, sundi engeramrumtopu, ne peda engenmane. Ange utopu, sun Hesybon mutu nesala cap, Eleale mutu nesala cap tep, engenmanpa, ne asi me sangmanere. Ada, sun mutu neitamai kouramrum keca cap, kipra deiramrum keca cap yumada, nimi podana deiki di konum gum kupra deipseia tepa. Anggur du dangna tumi keprepa, kange deipra kingedi, upu ton men penkamenge. Sun podan neng dipapu, konum kipra jepropya tepa.

10 Ukutaruda, tenpu ngebo ton, amutu neitamai anggur wa pepra kouramenge wai dam kuredi, kange deipra men kunkamre. Tonda, amutu neitamai kuredi, kange deipra mut men penkamre. Autopu anggur du dakra deipredi, anggur du deiki yanipyopda, anggur me purupra me men doronkamre. Ada, Allahdi sun akuramengenge yumada, sun wenemna tep konum gum kupra deipseu. 11 Atep, ne Yesayadi, sun Moab mutu nesala cap, Kir-Heres mutu nesala cap, sun kange mun kange doupra kuramenge keca, epne dingeda, ne dipru neitamai dipapu tenepnedi, ‘Uo, sunda bicaue’ tenen, mali peramengtopu kupra ngolongmane.

12 Sun Moab mutu kurum nesalada, ‘Uo, nunda ware kuptepe do?’ tenen, pio palepra, sun si eremnung isok-isok si eremna tep, mutu deiki welepmengedi, ‘Melipserume,’ pepra, ila upu deiki moronkamnung taruda, puto bouna di kunkamenge. Sundi upepra moronkameng dinin, sundi moronkameng keca yumada, tek sisi nong ton pio men kunkamre.

13 Acei deiki tara konum pepmasen upuda, pumun taru di, Allah Yahweh erdi, sun Moab mutu kunung nesala tep nengeda, ‘Sun wenemna tep ukupkamsene,’ pepra deiamu. 14 Dinino ukutaruda, Allah Yahwehdi upepra deipsere.

“Keteng tamun ton cap, weneripu konum kupyopda, Moab mutu nesala sun talepra kungepa, sun cap, yuk mutu nesala capdi, ‘Uo, sundi talenung keca cap, kunung keca cap, angeda pio telepe, pio mambul kurur keca,’ tenenung keca yumada, nedi gum kupra deipkamne. Sun mutu neitamai nesala weik kunung nge peda, gum kupra deipnepa, yambulpu tupa gam kunkamenge. Sunda puto boun nesalapu kunkamenge. Ange yuma konum kupne pangeda, yuk-yuk mutu kunge nesaladi, sun Moab tara kurami nesala tep, ‘Diso! Sunda konum saki! Sunda tali nesalapu kunmang adano,’ pepra nalemkamenge.” Allahdi peipmarpa, ne Yesayadi gekepra sekmane.